Мон вордӥськи 1948-тӥ арын одӥг пичи гуртын, кудӥз интыяськемын Нигерилэн лымшор но шундыпуксён висказ. Со дыре атаелэн выныз Мустафа́ но одӥгез агае Ваха́би Иеговалэн Адӟись-Ивортӥсьёсыз луизы. Укмыс арес дыръям атаймы кулӥз. Мон туж куректыса улӥ. Но Вахаби мыным вераз, атаймы улӟоз но ми соин нош ик адӟиськомы шуыса. Тае тодыса, мынам Библиез дышетэме потӥз. Мон пылатӥськи 1963-тӥ арын. Ӝоген эшшо кык агайёсы но одӥг выны пылатӥськизы на.

1965-тӥ арын мон лыктӥ Уи́лсон агаймы доры, кудӥз Ла́госын улӥз. Соку «Игбо́би» кенешын мон пионеръёсын эшъяськи. Шумпотыса но ӟырдыт мылкыдын ужамзэс-тыршемзэс адӟыса, мынам но соос кадь ужаме-тыршеме потӥз. Соин ик 1968-тӥ арын толшоре мон но пионер луи.

А́льберт Олубе́йби агай, кудӥз Вефильын ужаз-тыршиз, егитъёсты нимысьтыз пумиськонэ ӧтиз. Со вераз, Нигерилэн уйпал палаз нимысьтыз пионеръёс туж кулэ шуыса. Мон та дырозь тодӥсько на, кызьы со милесьтым мылкыдмес ӝутӥз, таӵе кылъёс вераса: «Тӥ егитэсь. Тӥляд дырды но кужымды вань. Сётэ сое Иеговалы. Тӥледыз туж трос уж возьма!» Исаия пророк  сямен, мон дась вал мыныны отчы, кытчы монэ Инмар ыстоз (Ис. 6:8). Соин ик мон заявление гожтӥ, нимысьтыз пионер луыса ужан-тыршон понна.

1968-тӥ арын куартолэзе монэ ыстӥзы нимысьтыз пионер луыса ужаны-тыршыны Нигерилэн уйпал палаз, Ка́но каре. Соку отын мынэ вал Биафрской ож (1967—1970). Нырысь ожмаськон шаерлэн уйпалаз мынӥз, нош собере шундыӝужанпалаз нуиськыны кутскиз. Тодӥсько на, кызьы кенешысь одӥг агай мыным вера вал, отчы мыноно ӧвӧл шуыса. Но мон солы шуи: «Тау сюлмаськемедлы. Но Иегова монэ отчы ыстэ бере, мон быдэсак оскисько, со монэ уз кельты шуыса».

Кано карын югдур туж секыт вал. Граждан ож сэрен та бадӟым кар буш кылиз. Куддыръя тодытыкумы урамъёсын ми кулэм адямиосты адӟиськомы вал. Азьвыл Кано карын кӧня ке кенешъёс вал ке но, тросэз вын-агайёс кошконо луизы. Карын 15-лэсь но ӧжытгес ивортӥсьёс кылизы, кудъёсыз туж кышкаса но куректыса улӥзы. Та вын-агайёс но сузэр-апайёс туж шумпотӥзы, куке вуимы ми, куать нимысьтыз пионеръёс. Ми соослы юрттӥмы нош ик кенешлэсь пумиськонъёссэ ортчытъяны но тодытон уже пыриськыны. Соос выльысь кутскизы филиалэ тодытон уж сярысь отчётъёссэс ыстылыны но куризы соослы публикациосты келяны.

Ми дышетыны кутскимы со интыысь ха́уса кылэз. Та кылын вераськыкумы, адямиос Эксэйлык сярысь иворез умойгес кылзо вал. Но отын вал религия, кудаз со интыысь тросэз адямиос ветлӥзы. Соос пӧлысь куд-огъёсызлы тодытэммы ӧз кельшы. Соин ик ми чакласькыса тодытӥмы. Огпол мон сьӧры но монэн ӵош тодытӥсь агай сьӧры пуртэн пиосмурт уйиськыны кутскиз. Но ми солэсь ӝоггес бызьылӥмы, соин ик со милемыз ӧз суты. Таӵе кышкыт учыръёс вал ке но, Иеговаен ми номырлэсь ӧм кышкалэ (Пс. 4:9). Адӟись-Ивортӥсьёс пумен тросгес луизы. Али Кано карын 11 кенеш, кудъёсаз 500-лэсь но тросгес ивортӥсьёс ужало-тыршо.

Кано карын мон кӧня ке толэзь гинэ ужай-тырши. 1968-тӥ арын гудырикошконэ монэ но кык мукет нимысьтыз пионеръёсты ыстӥзы Ниаме́й каре, Ни́гер шаерлэн шоркараз. Ӝоген ми валамы, Нигерын туж пӧсь шуыса. Но пӧсь куазез чидам сяна, милемлы француз кылэз дышетоно луиз. Со шаерын тросэз улӥсьёс та кылын вераськизы. Капчи ӧй вал ке но, ми Иегова вылэ оскиськимы но со интыысь ивортӥсьёсын ӵош тодытыны кутскимы. Ӝоген Ниамей карысь лыдӟиськыны быгатӥсь котькудӥзлэн кадь «Зэмлык, кудӥз пырак улонэ нуэ» книгаез вал ини. Адямиос асьсэос милемыз утчазы, ми соослы со книгаез мед сётомы шуыса!

Кивалтӥсьёс Иеговалэн Адӟись-Ивортӥсьёсызлы шум ӧз потэ. 1969-тӥ арын пӧсьтолэзе ми люкаськимы ёросысь конгрессэ, кудӥз та шаерын нырысетӥзэ ортчытӥськиз. Отчы ог 20 адямиос лыктӥзы. Ми шумпотыса возьмаськомы вал кык выль агайёслэсь пылатӥськемзэс. Но конгресслэн нырысетӥ нуналаз ик полиция лыктӥз но программаез дугдытӥз. Нимысьтыз пионеръёсты но ёросэз чакласез полицие нуизы. Милемлы юанъёс сётъязы но мукет нуналаз выльысь лыктыны куризы. Ми валаськомы вал, кивалтӥсьёс конгрессмес ортчытыны уз лэзе, дыр, шуыса. Соин ик ми пылатӥськон сярысь речез одӥг коркан верамы но выль ивортӥсьёсты лушкемен шурын пылатӥмы.

Кӧня ке арня ортчыса, кивалтӥсьёс монэ но вить мукет нимысьтыз пионеръёсты шаерысь кошкыны косӥзы. Улэм-вылэммес бичан понна, милемлы 48 час сётӥзы. Кошкон понна коньдон ми асьмеос шедьтыны кулэ вал. Ми кылзӥськимы но Нигериысь филиалэ кошкимы. Отын милемлы веразы, кытчы табере милемыз ыстозы.

Монэ ыстӥзы Нигериысь Орисунба́ре гуртэ. Отын кӧня ке вын-агайёс но сузэр-апайёс ужазы-тыршизы. Ми шумпотыса тодытӥськомы вал! Но куать толэзь ортчыса, филиал монэ куриз берытскыны Нигере. Мон туж пайми но сюлмаськыны кутски вал. Со дыре ик мынам туж потэ вал нош ик адӟиськеме Нигерысь вын-агайёсын.

Мон Ниамей каре берытски. Лыктэме бере мукет нуналаз ик Нигериысь одӥг ужбергатӥсь тодӥз, мон Адӟись-Ивортӥсь шуыса, но Библия сярысь юалляськыны кутскиз. Ми соин кутскимы Библиез дышетыны. Пумен со тамак кыскемысь, вина юэмысь дугдӥз но пылатӥськиз. Нигерын кӧня ке аръёс ӵоже ужакум-тыршыкум, мон шаерлэн пӧртэм интыосаз вуылӥ. Шумпотоно вал адӟыны, пичиен-пичиен адямиос кенеше лыкто шуыса. Куке мон та шаере нырысетӥзэ вуи, отын 31 Адӟись-Ивортӥсь вал. Нош кошкыкум соос 69 кузя вал ини.

1977-тӥ арын толсуре мон Нигерие берытски, отын 3 арня ӵоже нимысьтыз дышетсконэз ортчон понна. Дышетскон йылпумъяськем бере Ма́лком Ва́йго агай, филиаллэн комитетэзлэсь ужзэ радъясь, сётӥз мыным лыдӟыны гожтэтэз, кудзэ ыстӥз Сье́рра-Лео́не шаерысь филиал. Агайёс утчало вал кинэ ке, кин быгатысал Гвинеяын ёросэз чаклась луыса ужаны-тыршыны. Соослы кулэ вал умой тазалыкен, кышнояськымтэ пионер, кудӥз англи но француз кылъёсын вераське. Вайго агай вераз, монэ ӵапак та ужез быдэсъяны дышетӥзы шуыса. Солэн верамезъя, та уж капчи ӧй вал. Соин ик со шуиз: «Умой-умой малпаськы». Мон соку ик шуи: «Монэ Иегова ыстэ бере, мон дась».

Сьерра-Леоне шаере вуэме бере мон пумиськи филиаллэн комитетысьтыз агайёсын. Одӥгез мыным шуиз: «Ми ум тодӥське, кызьы Гвинеяын Эксэйлыклэн ужез мынэ». Сьерра-Леоне шаерысь филиал Гвинея сярысь но сюлмаське вал. Но Гвинеяын бугыръяськонъёс луылӥзы. Соин ик агайёс ӧз тодэ, кызьы отын тодытон уж нуиське. Филиал отчы кӧня ке пол агайёсты ыстылӥз ини, но номыр ӧз пӧрмы. Соин ик агайёс ыстӥзы монэ Конакри́ каре, Гвинеялэн шоркараз, но куризы кивалтӥсьёсын вераськыны, мыным со шаерын улыны мед лэзёзы шуыса.

Конакри каре вуэме бере мон одӥг кивалтӥсь доры мынӥ. Мон солы верай, Гвинеяын тодытэме потэ шуыса. Но со вераз, монэ арестовать карыны но вӧсь карыны быгато шуыса. Со мыным шуиз: «Берытскы Нигерие но отын тодыты». Но мон верай: «Мон татчы кыльыны малпасько». Соку со Гвинеяысь мукет кивалтӥсез куриз мыным юрттыны. Соиз соглаш кариськиз.

Собере ӝоген мон Сьерра-Леоне шаерысь филиалэ берытски но верай, кызьы Иегова монэ бакель кариз. Куке агайёс тодӥзы, кивалтӥсьёс мыным Гвинеяын улыны лэзизы шуыса, соос туж шумпотӥзы!

1978-тӥ арысен 1989-тӥ арозь мон Гвинея но Сьерра-Леоне шаеръёсын ёросэз чаклась луыса ужай-тырши, нош Либе́риын — ёросэз чакласьлэн воштӥсез луыса. Нырысь мон ӵем висисько вал. Куддыръя, кыдёкысь гуртын луыкум, висьыны кутскисько вал. Но агайёс котьку но тыршизы монэ эмъюртэ вуттыны.

Одӥг пол мон туж секыт висьыны уси: мынам малярия вал, озьы ик кӧлъёсы но вал. Бурмеме бере мон тодӥ, агайёс малпало вал ини шуыса, кытын монэ ватыны! Туж кышкыт учыръёс вал ке но, мон ноку ӧй малпа отысь кошкыны. Мон юн оски: Иеговаен мыным номыр но кышкыт ӧвӧл, малы ке шуоно со кулэмъёсты улӟытыны быгатэ.

1988-тӥ арын мон пумитай До́ркас сузэрез. Со зӥбыт-востэм вал но пионер луыса ужаз-тыршиз. Ми кузпалъяськимы но, со юрттӥз мыным азьланяз но ёросэз чаклась луыса ужаны-тыршыны. Доркас, ассэ жалятэк, мукетъёсыз  сярысь сюлмаське. Куд-ог кенешъёсы ми пыдын, сумкаосмес нуыса, 25 иськем мынӥськомы вал. Нош куд-ог кенешъёс эшшо но кыдёкын интыяськемын вал. Сюресъёс туж уродэсь вал. Соин ик ми котькыӵе транспортлы шумпотӥськомы вал.

Монэ котьку паймытэ вал Доркаслэн кышкасьтэм луэмез. Огпол милемлы шур вамен потоно вал, нош пулэсь лэсьтэм выж тӥяськемын вал. Соин ик ми пичи пыже пуксимы. Пыжысь потон понна султыкуз, Доркас вуэ усиз. Со но, мон но уяны ӧм быгатэ. Нош шур крокодилъёсын тырмемын вал. Шумпотыса верано луэ, кӧня ке егит пиосмуртъёс вуэ тэтчизы но сое ярдуре поттӥзы. Собере кӧня ке дыр ӵоже ми, кышкыт уйвӧтъёс адӟыса, изимы. Озьы ке но ужан-тыршонмес ӧм кельтэ.

1992-тӥ арлэн кутсконаз ми тодӥмы, ӝоген анай но атай луомы шуыса. Милемлы ужпум кутоно вал, азьланяз нимысьтыз пионеръёс луыса ужаломы-тыршомы-а, ум-а. Ми малпамы, Иегова милемлы кузьым лэсьтӥз шуыса. Соин ик нылмес Джа́гифт шуыса нимамы (со берыктӥське «Иеговалэн кузьымез» шуыса). Ньыль ар ортчыса, милям Эрик пимы вордӥськиз. Иеговалэн та кузьымъёсыз милемыз весяк шумпотто. Кӧня ке дыр ӵоже Джагифт Конакри карын интыяськем палэнын берыктон ужез нуись офисын ужаз-тыршиз, нош Эрик кенешлы юрттӥсь луыса ужа-тырше.

Берлогес Доркаслы нимысьтыз пионер луыса ужамысь-тыршемысь дугдоно луиз. Но нылпиосмес будэтыкумы, со котьку но пионер вал. Нош мон нимысьтыз пионер вал. Нылпиосмы будэм бере Доркас нош ик нимысьтыз пионер луиз. Али ми Конакри карын миссионеръёс луыса ужаськомы-тыршиськомы.

Кытчы гинэ Иегова монэ медам ыстылы, мон котьку соглаш кариськылӥ. Ми кышноеным трос пол шӧдӥмы Инмарлэсь утемзэ но юрттэмзэ. Инмысь Атаймы вылэ оскиськон утиз милемыз трос шуг-секытъёслэсь, кудъёсыныз пумисько соос, кинъёс коньдон вылэ оскисько. Ми кышноеным ас выламы шӧдӥмы, зэмос утиськон Иегова сётэ шуыса (1 Пар. 16:35). Мон оскисько: Иегова утёз котькинэ, кин со вылэ оскиське (1 Экс. 25:29).