1, 2. Мае возьматэ Иегова пала учкон?

 МИ УЛӤСЬКОМЫ «секыт дыръёсы». Нош та дуннеез быдтон но музъем вылын тупаса улон вуон азьын улон эшшо но секытгес луоз на (2 Тим. 3:1). Соин ик юано асьмелэсь: «Мыным юрттэт яке визь-кенеш кулэ ке, кытысь мон соосты утчасько? Учко-а мынам синъёсы Иегова пала?»

² Мае возьматэ Иегова пала учкон? Учкиськомы-а ми со шоры, куке шуг-секытъёсын пумиськиськомы? Трос дауръёс талэсь азьло псаломъёсты гожъясь гожтӥз, Иегова шоры учкыны туж кулэ шуыса. (Лыдӟе Псалтирез 122:1—4.) Солэн верамезъя, ми Иегова шоры учкиськомы озьы, кызьы ляльчи кузёез шоры учке. Кызьы сое валано? Ляльчи кузёез шоры уг учкы, кузёез сое сюдэ но уте шуыса гинэ. Ляльчи тырше валаны, мар кулэ кузёезлы, соку ик солэсь куронъёссэ быдэстон понна. Озьы ик ми но котькуд нунал тыршиськомы Инмарлэсь Кылзэ эскерыны,  валан понна, мар кареммес возьма милесьтым Иегова, но солэсь эриксэ быдэстон понна. Соку ми оскыны быгатӥськомы, секыт дыръёсы Иегова милемлы юрттоз шуыса (Еф. 5:17).

3. Малы ми Иегова шоры учкемысь дугдыны быгатомы?

³ Иегова шоры учкыны туж кулэ шуыса валаськомы ке но, куддыръя саклыкмес мукетызлы висъяны быгатӥськомы. Ӵапак озьы луиз Марфаен, кудӥз Иисуслэн матысь эшез вал. Лукалэсь 10:40—42 верамын, со «трос сиён-юон дасяса... куно карон сярысь сюлмаськиз» шуыса. Инмарлы оскымон кышномуртэн Иисус вӧзаз дыръя но озьы луиз бере, паймоно ӧвӧл, милемын но озьы луыны быгатэ шуыса. Малы ми саклыкмес мукетызлы висъяны но Иегова шоры учкемысь дугдыны быгатомы? Кылсярысь, мукет адямиослэн асьсэды воземенызы сэрен. Таяз статьяын ми эскеромы, кызьы озьы луыны быгатэ но мар юрттоз милемлы ялан Иегова шоры учкыны.

4. Малы милемыз паймытыны быгатоз, Моисейлы Сӥзем музъеме пырыны лэземын ӧй вал шуыса?

⁴ Моисей Иегова шоры учкыса улӥз. Озьы со солэсь эриксэ валаны тыршиз. Библиын верамын: «Со Адӟиськисьтэм Инмарез адӟыса улӥсь кадь юнматскыса улӥз». (Лыдӟе Еврейёслы 11:24—25, 27.) Озьы ик отын верамын, «Израильлэн Моисей кадь пророкез ноку но ӧй ни вал, сое Кузё-Инмар ваче ымныр адӟыса тодэ вал» шуыса (К. Зак. 34:10). Моисейлэн Иеговаен матысь кусыпъёсыз вал ке но, солы лэземын ӧй вал Сӥзем музъеме пырыны (Лыд. 20:12). Малы?

5—7. Кыӵе шуг-секыт кылдӥз ӝоген Израиль калык Египетысь потэм бере но мар кариз Моисей?

⁵ Израиль пиос Египетысь потэм дырысен кык толэзь но ортчыса ӧз вуы но соос Сӥнай гурезь доры ӧз вуэ на вал, соос бадӟым шуг-секытэн пумиськизы. Адямиос ӟургетыны кутскизы, вузы ӧвӧл шуыса. Соос Моисейлы йыркуръяськизы но, югдур туж секыт луиз. Соин ик Моисей Инмарлы вазиськиз: «Мар каром ни мон та калыкен? Кӧня ке дыр ортчыса, соос монэ изэн зӥръяса жугозы» (Пот. 17:4). Иегова Моисейлэсь вӧсяськемзэ кылӥз но вераз, мар кароно: солы кивалтэт боды кутоно но соин Хоривысь изгурезь борды шукконо, соку отысь ву потоз. Библиын верамын, Моисей Израиль тӧроослэн син азязы озьы ик кариз шуыса. Израиль пиос тырмыт ву юизы, но шуг-секыт сэрттэмын-пертчемын вал (Пот. 17:5, 6).

⁶ Библиын верамын на: «Со интылы Масса но Мерива ним сётӥз, израиль пиослэн пыкылэменызы сэрен таӵе ним сётэмын вал, малы ке шуоно соос Кузё-Инмарлэсь визьзэ сыналлязы тазьы шуыса: „Асьме пӧлын Кузё-Инмар вань-а, ӧвӧл-а?“»  (Пот. 17:7). Со туж тупась нимъёс, малы ке шуоно соос возьмато «визь сынаськон» но «пыкылон» шуэмез.

⁷ Кызьы учкиз Иегова Мериваын луэмез шоры? Иегова лыдъяз, израиль пиос Моисейлы пумит гинэ ӧз ӝутске, нош солы но солэн кивалтэмезлы пумит ӝутскизы шуыса. (Лыдӟе Псалтирез 94:8, 9.) Со бадӟым янгыш вал. Сояз учыре Моисей шонер лэсьтӥз: со вазиськиз Иеговалы но кариз ваньзэ озьы, кызьы косӥз Иегова.

8. Кыӵе шуг-секыт кылдӥз Израиль калыклэн луоё кыр дуннеетӥ 40 ар пала ветлэмез бере?

⁸ Израиль калыклэн луоё кыр дуннеетӥ 40 ар пала ветлэмез бере нош ик азьвыл кадь югдур кылдӥз. Калык со интые вуиз, кудӥз озьы ик Мерива шуыса нимаське вал. Со Кадес вӧзын вал, Сӥзем музъемен артэ a. Израиль пиос нош ик ӟургетыны кутскизы, ву уг тырмы шуыса (Чис. 20:1—5). Но таяз учыре Моисей бадӟым янгыш лэсьтӥз.

9. Мар карыны косӥз Иегова Моисеез но мар кариз Моисей? (Учке статья кутсконысь суредэз.)

⁹ Мар кариз Моисей таяз учыре? Азьло кадь ик со Иеговалы, юрттэт курыса, вазиськиз. Но табере Иегова Моисеез мукет сямен карыны косӥз. Иегова ӧз вера, Моисейлы изгурезь борды шукконо шуыса, нош вераз, кивалтэт бодызэ кутыса, калыкез изгурезь вӧзы люкано но собере изгурезьлы вазиськоно шуыса (Лыд. 20:6—8). Нош Моисей изгурезьлы ӧз вазиськы. Со туж вожзэ поттӥз но кеськыса вераз: «Тэрытскисьтэм калык, кылзӥське монэ, та изгурезьысь тӥледлы юыны ву поттоно ке шат?» Собере со изгурезь борды шуккиз — одӥг пол гинэ ӧз, кык пол шуккиз (Лыд. 20:10, 11).

10. Кызьы Иегова учкиз со шоры, мар кариз Моисей?

¹⁰ Иегова Моисейлы туж вожзэ поттӥз (К. Зак. 1:37; 3:26). Малы? Одӥгез муг, малы Иегова вожзэ поттӥз, луоз, малы ке шуоно Моисей солэсь выль косонзэ ӧз быдэсты.

11. Малы изгурезьысь вулэн потэмез адямиослы паймымон уж кадь ӧз адӟиськы, вылды?

¹¹ Вань на эшшо одӥг муг, вылды, малы Иегова Моисейлы вожзэ поттӥз. Нырысетӥез Мерива палъёсысь изгурезьёс — со чурыт гранит. Кӧня гинэ со борды эн шуккылы, отысь ву уз поты. Нош кыкетӥез Мерива палъёсын гурезь извыжы чылкак мукет. Ӵем дыръя со пызырес небыт изваска из. Изваска из небыт бере, ӵемысь отчы ву пыӵа но музъем улын люкаське. Но изгурезе пась лэсьтыса, отысь ву поттыны луэ вал. Соин ик, куке Моисей, изгурезьлы вазиськем интые, со борды кык пол шуккиз, быгато вал-а израиль пиос малпаны, ву ас понназ потӥз но со паймымон уж ӧй вал  шуыса? b Озьы вал-а со, ӧй вал-а, вераны ум тодӥське.

12. Кыӵе эшшо муг луыны быгатэ вал, малы Иегова Моисейлы но Ааронлы вожзэ поттӥз?

¹² Луыны быгатэ вал эшшо одӥг муг, малы Иегова Моисейлы но Ааронлы вожзэ поттӥз. Учке, мар вераз Моисей калыклы: «Тэрытскисьтэм калык, кылзӥське монэ, та изгурезьысь тӥледлы юыны ву поттоно ке шат?» Солэн кылъёсысьтыз адӟиськиз, со чик уг гажа шуыса Иеговаез, кудӥз со паймымон ужез лэсьтӥз. Со малпанэз псаломъёсты гожъясьлэн таӵе кылъёсыныз юнматыны луоз: «Мериваысь ву дурын Инмарлэсь вожзэ поттӥзы, соос понна Моисейлы чидан адӟоно луиз. Мыдланьяськыса-вогъяськыса улэменызы, соос Моисейлэсь мылкыдзэ сӧрылӥзы — соку со аслаз ымыныз сьӧлыкано луиз» (Пс. 105:32, 33; Лыд. 27:14) c. Кызьы гинэ медаз луы, но Моисей Иеговаез ӧз данъя. Моисейлы но Ааронлы вазиськыса, Иегова шуиз: «Мынам косон сётонэлы ӧд тэрытске» (Лыд. 20:24). Зэм, соос туж секыт сьӧлыказы!

13. Малы Иеговалэн Моисеез кыл кутытэмез шонерлыко вал?

¹³ Моисей но Аарон Инмарлэн калыказ кивалтӥсьёс вал, соин ик Иегова азьын соос тросгес кыл кутӥзы (Лука 12:48). Азьвылгес Иегова израиль калыкысь быдэс выжыез Ханаанэ пырыны ӧз лэзьы, малы ке шуоно соослэн тэрытскисьтэм мылкыдзы вал (Лыд. 14:26—30, 34). Соин ик, Моисеез озьы ик кыл кутытыса, кызьы кыл кутытӥз вал израиль пиосты, Иегова шонерлыко лэсьтӥз. Со Моисейлы но Сӥзем музъеме пырыны ӧз лэзьы.

14, 15. Малы Моисей Иеговалы ӧз тэрытскы?

¹⁴ Кызьы озьы луиз, Моисей Иеговалы ӧз тэрытскы шуыса? Ойдолэ берытскомы 105-тӥ Псаломысь 32-тӥ но 33-тӥ кылбуръёс доры, кытын верамын: «Мериваысь ву дурын Инмарлэсь вожзэ поттӥзы, соос понна Моисейлы чидан адӟоно луиз. Мыдланьяськыса-вогъяськыса улэменызы, соос Моисейлэсь мылкыдзэ сӧрылӥзы — соку со аслаз ымыныз сьӧлыкано луиз». Израиль калык пумит ӝутскиз Иеговалы, нош вожзэ поттӥз Моисей. Со ассэ кияз возьыны ӧз быгаты но малпаськытэк вераз.

¹⁵ Моисей лэзиз, мукет адямиослэн ужъёссы солы Иегова пала учкыса улыны мед люкетозы шуыса. Нырысетӥяз учыре Моисей шонер лэсьтӥз (Пот. 7:6). Но, израиль калыклэсь трос аръёс ӵоже тэрытскытэк улэмзэ адӟыса, вылды, со жадиз но ӝоже усиз. Моисей нырысь ик аслаз шӧдонъёсыз сярысь малпаськиз,  луоз, но ӧз малпа, кызьы Иеговаез данъяно.

16. Малы милемлы малпаськоно со сярысь, мар луиз Моисеен?

¹⁶ Моисей, Инмарлы оскымон пророк, Иегова пала учкемысь дугдӥз но сьӧлыказ бере, милемын но озьы ик луыны быгатэ. Кызьы куке но Моисей Сӥзем музъеме пырон азьын сылӥз, озьы ик ми но Инмарен сӥзем «музъеме», выль дуннее, пырон азьын сылӥськомы (2 Пётр 3:13). Веранэз ӧвӧл, нокудмылэн но сыӵе паймымон луонлыкез ыштэммы уг поты. Соин ик милемлы котьку но Иегова пала учкыса улоно но солэсь эриксэ быдэсъяны тыршоно (1 Иоанн 2:17). Малы милемыз дышетыны быгатэ Моисеен луэм учыр?

17. Мар юрттоз милемлы асьмеды киямы возьыны, куке вожмес потто?

¹⁷ Эн дыртэ вождэс поттыны. Милемлы выльысь но выльысь одӥг шуг-секытэн ик пумиськоно луэ ке но, ойдолэ «ӟеч уж лэсьтыны... [ум] жаде. Ӧм ке лябӟе, кизем бусымес ас дыраз араломы уго»  (Гал. 6:9; 2 Фес. 3:13). Милесьтым мар ке но яке кин ке но ялан вожмес поттэ ке, тыршиськомы-а ми асьмеды киямы возьыны но мар вераммес малпаны? (Мад. 10:19; 17:27; Матф. 5:22). Мар милемлы кароно, куке милесьтым вожмес поттыны тыршо? Библиын верамын: «Инмарлэн вожпотонэзлы инты кельтэ». (Лыдӟе Римъёслы 12:17—21.) Ми Иегова шоры учкыса улӥмы ке, соку ми сое гажаммес возьматомы но солэн вожпотонэзлы инты кельтомы, яке чидаса возьмаломы, ку со югдурез ас кияз кутоз. Нош асьме понна пунэмзэ берыктыны тыршимы ке, озьы Иеговаез гажамтэмес возьматомы.

18. Мае милемлы тодамы возёно выль сётэм кивалтэт пумысен?

¹⁸ Ваньзэ выль сётэм кивалтэтъя лэсьтэ. Тыршиськомы-а ми Иеговалэн выль сётэм кивалтэтэзъя лэсьтыны? Тыршиськомы ке, соку ваньзэ дышем сямъя лэсьтэм интые, ми соку ик уже кутомы Иеговалэн организациезлэсь сётэм выль кивалтэтсэ (Евр. 13:17). Со дыре ик ми тыршомы гожтэмлэн сьӧраз потытэк улыны (1 Кор. 4:6). Соку ми сярысь вераны луоз, ми Иегова пала учкыса улӥськомы шуыса.

19. Мар кароно, мукетъёсызлэн янгышъёссы милемыз Иегова дорысь медаз палэнтэ шуыса?

¹⁹ Эн лэзе мукетъёсызлэн янгышъёссылы тӥледыз Иегова дорысь палэнтыны. Ми Иегова пала учкыса улӥськомы ке, ми ум лэзе мукет адямиослэн янгышъёссылы милесьтым вожмес поттыны но Иегова дорысь палэнтыны, тужгес но со адямиослэн янгышъёссылы, кудъёсыз, Моисей сямен ик, Инмарлэн организацияз кыл куто. Котькудмылы асьмелэн утиськонмы понна кышкаса, куалекъяса тыршоно ке но, тодамы возёно, Иегова ваньмес одӥг мертэтэн уг мерта шуыса (Флп. 2:12). Но макем тросгес милемлы сётэмын, сокем тросгес тыршоно мукетъёсызлы адӟем карымон луыны (Лука 12:48). Ми Иеговаез вань сюлмысьтымы яратӥськомы ке, номыр но милемыз уз канжаськыты но номыр сое яратэмысь уз дугдыты (Пс. 118:165; Рим. 8:37—39).

20. Мар карыны милям мылкыдмы луыны кулэ?

²⁰ Ми улӥськомы секыт дыръёсы. Соин ик милемлы туж кулэ Иегова пала, «Инмын Улӥсь» пала, учкыны, солэсь эриксэ мед валаломы шуыса. Милемлы лэзёно ӧвӧл мукетъёсызлэн янгышъёссылы милемыз Иегова дорысь палэнтыны. Со удысын милемлы юрттыны быгатоз Моисеен луэм учыр вылын малпаськон. Котырысьтыды адямиослэсь тырбыдэстэм луэмзэс адӟыса, соос вылэ вожпотондэс эн кисьтэ. Со интые, тырше лэсьтыны озьы, кызьы гожтэмын Псалтирьын 122:1, 2: «Милям но синъёсмы Инмармы Кузё-Инмар шоры, гажан-жалянзэ милемлы возьматытозь, учкыса уло».