ӨӨРЕНИР СТАТЬЯ 29
Коргунчуг хилинчекке белен силер бе?
«Белен болуңар» (МФ. 24:44).
ЫРЫ 150 Камгалалды алыр дээш, Иегованы дилеңер
ДОПЧУЛАЛ a
1. Айыыл-халапка баш удур белеткенири чүге мерген угаанныг?
БЕЛЕТКЕЛ амы-тынны камгалап болур. Чижээ, бойдус халавынга эрте дээре белеткенип алган улус бодун база өскелерни камгалап алыр чадавас. Ооң дугайында Европаның гуманитарлыг организациязы мынча дээн: «Эки белеткел хөй амы-тынны камгалаар».
2. «Коргунчуг хилинчекке» чүге белеткенип алыр болзувусса эки? (Матфей 24:44).
2 «Коргунчуг хилинчек» хенертен эгелээр (Мф. 24:21). Өске халаптарга бодаарга, коргунчуг хилинчек чамдык улуска хенертен болбас. 2 000 хире чыл бурунгаар Иисус өөреникчилеринге ол хүнге белен болуру чугула деп чугаалаан. (Номчуптуңар: Матфей 24:44.) Белеткенип алган болзувусса, ол берге үеде туруштуг болуру база өскелерге дузалажыры белен болур (Лк. 21:36).
3. Ынакшыл, туруштуг болгаш кээргээчел чорук коргунчуг хилинчекке белеткениринге биске канчаар дузалаар?
3 Коргунчуг хилинчекке белеткениринге дузалаар үш шынарны сайгарыптаалыңар. Кажан биске шииткел медээзин суртаалдаар даалга бээрге, а Бурганга бүзүревес улус удурланырга, канчаар алдынар бис? (Ажыд. 16:21). Иеговага дыңнангыр болурунга база ол бисти камгалаар деп чигзинмезинге туруштуг чорук херек. Акы-угбаларывыс өнчү-хөреңгизин чидирип аар болза, канчаар бис? (Авв. 3:17, 18). Оларга дузалажырда кээргээчел болуру чугула. Чоннар каттыжыышкыны халдап кээрге, ха-дуңма-биле дыкпыш черлерге чаштынып тургаш, канчаар алдынар бис? (Иез. 38:10—12). Шынап-ла, ол берге үени эртерде, биске дыка күштүг ынакшыл херек.
4. Биске ынакшылды, туруштуг болгаш кээргээчел чорукту сайзырадыры чугула деп, Библия канчаар көргүзүп турар?
4 Бурганның Сөзү ынакшылды, туруштуг болгаш кээргээчел чорукту сайзырадырынче кыйгырып турар. «Чаа делегей» очулгазында Лука 21:19-та мынча дээн: «Туруштуг чоруктуң ачызында амы-тыныңарны камгалап алыр силер». А Колосчуларга 3:12-де: «Кээргээчел... чорукту... кедип алыңар» — дээн. 1 Фессалоникчилерге 4:9, 10-да: «Бурган силерни бот-бодуңарга ынак боорунга өөредип каан болгай. [...] Ха-дуңма, бот-бодуңарга оон-даа күштүг ынак бооруңарны дилеп тур бис» дээнин номчаан бис. Ол сөстерни туруштуг, кээргээчел чорукту, ынакшылды илередип билир христианнарга чугаалаан. Ындыг-даа болза, олар ол шынарларны улаштыр сайзырадыр ужурлуг турган. Биске база ону кылыры чугула. Аңаа чүү дузалаар? Бирги векте христианнар ол шынарларны канчаар илередип турганын көрээлиңер. Оон ол акы-угбаларның чижээн канчаар эдерерин көөр бис. Ынчан боттарывыстың коргунчуг хилинчекке беленивисти хынап болур бис.
ТУРУШТУГ ЧОРУКТУ САЙЗЫРАДЫҢАР
5. Баштайгы христианнарга шенелделерни туруштуг ажып эртеринге чүү дузалаан?
5 Баштайгы христианнарга туруштуг чорук херек турган (Евр. 10:36). Олар өске улустуң ышкаш бергелерлиг-даа болза, кырындан база шенелделерлиг турган. Оларның хөй кезии иудей шажындан азы Римниң башкарыкчыларындан аңгыда, төрелдериниң удурланыышкыннарынга таварышкан (Мф. 10:21). А чыыш иштинге олар чамдыкта ойталакчыларның салдарынга болгаш аңгылажыг үндүрер өөредиглеринге удур туржуп чораан (Аж.-ч. 20:29, 30). Ынчалза-даа христианнар дөмей-ле туруштуг арткан (Ажыд. 2:3). Оларга Иов ышкаш, туруштуг чоруктуң библейжи чижектериниң дугайында боданыры дыка дузалаан (Иак. 5:10, 11). Оон аңгыда, олар мөргүлге күштү дилеп, туруштуг арткан улусту Иегова албан шаңнаар деп утпайн чораан (Аж.-ч. 4:29—31; Аж.-ч. 5:41).
6. Меританың чижээ удурланыышкыннарны ажып эртеринге силерге канчаар дузалаар?
6 Библияда болгаш ном-дептеривисте бижээн туруштуг бараалгакчыларның чижээниң дугайында үргүлчү боданыр болзувусса, туруштуг артып шыдаар бис. Албаниядан Мери́тага өг-бүлезиниң каржы удурланыышкынын ажып эртеринге шак ол чүүл дузалаан. Ол мынча дээн: «Иовтуң чижээ мээң сеткилимге дыка кирген. Ооң хай-халаптарынга кымның буруулуун билбес хирезинде, ол дөмей-ле: „Дириг чорааш, буруу чогумдан ойталавас мен“ — дээн. Иовка бодаарга, бергелеримниң буруудадыкчызын эки билир мен база мээң бергелерим чүү-даа эвес-тир деп боданган мен» (Иов 27:5).
7. Шыңгыы шенелделер чок-даа болза, амдан эгелеп, чүнү кылып өөренири чугула?
7 Иеговага дүвүрелдеривисти сеткиливистен үргүлчү чугаалаар болзувусса, бис база оон-даа туруштуг апарып болур бис (Флп. 4:6; 1 Фес. 5:17). Бо үеде шыңгыы шенелделерге таварышпайн турар чадавас силер. Ынчалза-даа бодуңардан айтырыңар: «Муңгарай бергеш азы чүнү канчаар аайын тыппайн баргаш, Иеговадан дузаны дилээр-дир мен бе?» Кандыг-даа бергелерде Бурганга мөргүп өөренген болзуңарза, шыңгыы шенелдер үезинде оон дуза дилеп чаңчыга бээр силер. Ынчан ол силерге кажан база канчаар дузалаарын билир деп чигзинмес силер (Ыд. ыр. 26:1, 3).
ТУРУШТУГ ЧОРУК
Шенелдеге туруштуг болганывыс дараазында шенелдеге бисти белеткеп турар (8-ки абзац).
8. Амдан эгелеп, туруштуг артар болзувусса, келир үеде шенелделерни ажып эртиптеривисти Мираның чижээ канчаар бадыткаан? (Иаков 1:2—4). (Чурукту база көрүңер.)
8 Амдан эгелеп, шенелделерге туруштуг артар болзувусса, коргунчуг хилинчекти шыдажып эртиптер бис (Рим. 5:3). Чүге ындыг түңнел кылып болур? Хөй акылар бир шенелдени ажып эртиптерге, дараазындазы чиик болур деп эскерген. Ол чүүл Иегова чанында база дузалажырынга белен деп оларның бүзүрелин быжыктырган. А бүзүрел өске-даа шенелделерге туруштуг артарынга дузалап турган. (Номчуптуңар: Иаков 1:2—4.) Албанияда Ми́ра дээр эгелекчи угбавыска туруштуг артарынга дуржулгазы дузалап турар. Чамдыкта аңаа чүгле ооң бергелери хөй ышкаш сагындырар. Ынчалза-даа Мира сөөлгү 20 чыл дургузунда Бурганның ону деткип келгенин сактып тура, бодунга мынча дээр: «Дүжүп бербе! Иегованың сеңээ кылган бүгү чүүлүн кажан-даа утпа. Иегованың дузазы-биле тиилээн тулчуушкуннарыңны сактып чор». Иегованың силерге туруштуг артарынга канчаар дузалап турганын база сактып болур силер. Ынчан коргунчуг хилинчек эгелей бээрге, шенелделерни ажып эртер дуржулгаңар бар боор. Оон аңгыда улаштыр-ла туруштуг артар хөөннүг болур силер. Иегова эртип турар шенелдеңер бүрүзүн эскерип, туруштуг артканыңар дээш, шаңнаар деп черле чигзинмеңер (Мф. 5:10—12).
КЭЭРГЭЭЧЕЛ БОЛУҢАР
9. Антиохияда христианнар акы-угбаларга кээргелди канчаар көргүскен?
9 Иудеяга улуг аш-чут эгелээрге, чүү болганын көрээлиңер. Сирияның Антиохияда христианнар ону дыңнааш, Иудеяда акы-угбаларын кээргей берген. Ол христианнар чүгле анаа кээргеп эвес, а ону херек кырында көргүскен. Олар «шыдаар шаа-биле Иудеяда ха-дуңмаларынче дузаламчы чорударын шиитпирлээн» (Аж.-ч. 11:27—30). Иудея чеже-даа ырак болза, Антиохияда христианнар акы-угбаларынга дыка дузалажыксаан (1 Ин. 3:17, 18).
КЭЭРГЭЭЧЕЛ ЧОРУК
Айыыл-халап үезинде кээргээчел чорукту көргүзер арга тыптып кээр (10-гу абзац).
10. Айыыл-халапка таварышкан ха-дуңмавыска кээргээчел чорукту канчаар көргүзүп болур бис? (Чурукту база көрүңер.)
10 Амгы үеде айыыл-халапка таварышкан кады бүзүрээн ха-дуңмавыска кээргелди көргүзүп болур бис. Оларга ол дораан дузалаарынга белен бис. Чижээ, дуза кадарынга беленивисти удуртукчуларга дыңнадып b, делегей чергелиг ажыл-чорудулгавысче өргүп, когараан улус дээш мөргүп турар бис (У. ч. 17:17). 2020 чылда COVID-19 деп хамчык аарыг үезинде когараан улуска дузалаар дээш, бүгү делегейге 950 комитетти тургускан. Ол комитеттер-биле кады ажылдажып турар улус макталга төлептиг. Олар кээргелди көргүзүп, акы-угбаларга гуманитарлыг дузаны чедирип, оларның Бурган-биле найыралы быжыг артарынга дузалап, а чамдык байдалдарда бажыңнарын, Хурал залдарын септеп азы катап тудуп турар. (Деңнеңер: 2 Коринфичилерге 8:1—4.)
11. Буянныг ажыл-херээвис дээрде Адавысты канчаар алдаржыдып турар?
11 Бойдус халавының соонда дузавысты улус эскерип турар. Чижээ, 2019 чылда Багам ортулуктарынга «До́риан» деп шуурган Хурал залын үрегдээн. Ол залды септеп тургаш, Иегованың Херечизи эвес тудугжудан ажылдың өртээн айтырарга, ол мынча дээн: «Силерге дериг-херекселди, ажылчыннарны болгаш материалдарны халас бээр мен. Организацияңарга эки чүүлдү кылыксап тур мен. Бот-боттарыңар дээш канчаар сагыш човап турарыңар мээң сеткилимге дыка кирди». Делегейде улустуң хөй кезии Иегованы билбес. Ынчалза-даа дыка хөй улус Иегованың Херечилерин эскерип, хайгаарап турар. Буянныг ажыл-херээвис Бурганның «эгээртинмес байлак өршээлинче» кижилерни хаара тудуп болуру биске дыка улуг алдар-хүндү-дүр! (Эф. 2:4).
12. Амдан эгелеп, кээргээчел чорукту илередип билири коргунчуг хилинчекке бисти канчаар белеткээр? (Ажыдыышкын 13:16, 17).
12 Коргунчуг хилинчек үезинде кээргээчел болуру чүге чугула? Бо үеде-даа, коргунчуг хилинчек үезинде-даа политиктиг тургузугну деткивес улуска бергелер тургустунар деп Библиядан тода көскү. (Номчуптуңар: Ажыдыышкын 13:16, 17.) Ол үеде акы-угбаларның кол хереглелдери безин чедишпейн барып болур. Ынчангаш оларга кээргээчел чорукту илередип билири дыка чугула. Ынчан Хаанывыс Иисус Христос, Бурганның шииткелин күүседир дээш чедип келгеш, биске: «Дээрниң Чагыргазын салгап алыңар» — дээр (Мф. 25:34—40).
ЫНАКШЫЛДЫ САЙЗЫРАДЫҢАР
13. Павелдиң Римчилерге 15:7-де сүмези баштайгы христианнарга ынакшылды сайзырадырынга канчаар дузалаан?
13 Ынакшыл — баштайгы христианнарның ылгавыр демдээ. Ол шынарны илередири оларга белен болган бе? Чижээ, Римде чыышче аңгы-аңгы кижилер барып турган. Аңаа чажындан тура Моисейниң хоойлузун сагып чораан еврейлер болгаш дүрзү-бурганнарга мөгейип чораан улус турган. Христианнарның аразынга кулдар, хостуг улус, безин кул эдилекчилери турган чадавас. Олар аңгылашпайн, канчаар ынакшылды сайзырадып алганыл? Павел элчин оларга: «Бот-боттарыңарны... [өөрүшкүлүг] хүлээп алыңар» — деп сүмелээн. (Номчуптуңар: Римчилерге 15:7.) Ол чүнү чугаалаксааныл? «[Өөрүшкүлүг] хүлээп алыңар» деп очулдурган сөс «улусту бажыңынга чылыг-чымчак хүлээр» азы «эштериниң санынче киирер» дээн уткалыг. Чижээ, Павел Филимондан Онисим дээр дескен кулду өөрүшкүлүг хүлээп аарын дилээн (Флм. 17). А Прискилла биле Акила христиан чүдүлгениң дугайында, оларга бодаарга, шоолуг билбес Аполлосту бажыңынче чалап алганнар (Аж.-ч. 18:26). Ол христианнар аңгылашпаан, улуг ылгалдары турза-даа, бот-боттарын өөрүшкүлүг хүлээп ап турганнар.
ЫНАКШЫЛ
Шупту акы-угбаларның ынакшылы биске херек (15-ки абзац).
14. Миссионер өг-бүле ынакшылды херек кырында канчаар көргүскенил?
14 Бис база акы-угбаларга ынакшылды илередип, олар-биле эдержип болур бис. Олар харыы кылдыр чүректерин ажыдып бээр чадавас (2 Кор. 6:11—13). Анна биле ооң өөнүң ээзиниң чижээн көрээлиңер. Ол өг-бүле Барыын Африкага миссионерлей бээрге, COVID-19 деп хамчык аарыг эгелээн. Миссионерлер чаа чыыжында акы-угбалар-биле хууда ужуражып шыдавас апаргаш, ынакшылды канчаар илереткен? Олар ха-дуңмага видеохарылзаа таварыштыр чоок таныжып алыксаарын чугаалап турганнар. Миссионерлерниң ынакшылы хөй өг-бүлелерге дээштиг болган. Ынчангаш ол өг-бүлелер оларже долгап, СМС-терни бижип турган. Ол миссионерлер чаа чыыш-биле найыралдажырын чүге кыскан? Анна мынча дээн: «Акы-угбалар мээң өг-бүлемге эки-даа, багай-даа үеде чаңгыс удаа эвес дузалашкан. Мен ону сактып алгаш, шак ындыг ынакшылды илередиксеп турган мен».
15. Шупту акы-угбаларга ынакшылды көргүзеринге хамаарыштыр Ванессаның чижээнден чүнү өөренип алыр бис? (Чурукту база көрүңер.)
15 Чыышка культуразы болгаш аажы-чаңы аңгы-аңгы акы-угбаларга таваржып болур бис. Оларның эки талаларынче кичээнгей салыры эргежок чугула. Ынчан оларга ынакшылывыс өзер. Чаа Зеландияда бараалгап чоруур Ване́сса чыышта чамдык акы-угбалар-биле билишпес турган. Ону бужургандырар улустан оюп-дезериниң орнунга, ол олар-биле хөй үени эрттирип эгелээн. Ооң ачызында Иегова оларга чүү дээш ынак дээрзин көрүп каан. Ол мынча дээн: «Мээң өөм ээзи кожуун хайгааракчызы апаарга, аңгы-аңгы аажы-чаңныг улус-биле оон-даа хөй аралажып эгелээн мен. Ынчалза-даа ол меңээ берге болбаан. Мен аңгы-аңгы улуска ынак апарган мен. Иегова база оларга ынак, чүге дизе ол бисти кандыг-даа улусту бодунче хаара туткан болгай». Өске улусче Иегова ышкаш көрүштүг боорун кызар болзувусса, оларга ынакшылывысты көргүзер бис (2 Кор. 8:24).
Коргунчуг хилинчек үезинде ха-дуңма-биле кады болзувусса, Иегова бисти камгалаар (16-гы абзац).
16. Ынакшыл коргунчуг хилинчек үезинде чүге ылаңгыя чугула болур? (Чурукту база көрүңер.)
16 Коргунчуг хилинчек үезинде ынакшылды илередири ылаңгыя чугула. Ол болуушкун эгелей бээрге, Иегова бисти канчаар камгалаар? Мидий-перс шериг бурунгу Вавилонче халдай бээрге, Бурган бараалгакчыларынга: «Мээң чонум... бажыңыңче кирип, эжииң хаап ал! Бурганның килеңи чавырылгыжеге чедир, түр када чаштына бер» — дээн (Иса. 26:20). Бис коргунчуг хилинчектиң болур деп барган үезинде чурттап турар болганывыста, ол сөстер биске база хамааржыр. «Бажың ишти» деп сөстер чыыштарывысты илереткен чадавас. Коргунчуг хилинчек үезинде ха-дуңма-биле кады турар болзувусса, Иегова бисти камгалаар. Ынчангаш амдыгааштан тура, ха-дуңмавысты анаа-ла шыдашпайн, а оларга ынакшылды сайзырадырын кызар ужурлуг бис. Оон бистиң амы-тынывыс хамааржыр!
АМДЫГААШТАН БЕЛЕТКЕНИҢЕР
17. Амдан эгелеп белеткенир болзувусса, коргунчуг хилинчек үезинде чүнү кылып шыдаар бис?
17 «[Иегованың] өндүр улуг хүнү» кижи төрелгетенге улуг согуг болур (Соф. 1:14, 15). Иегованың Херечилеринге база берге болур. Ынчалза-даа амдыгааштан тура белеткенир болзувусса, дүвүревейн, өске улуска безин дузалажыр бис. Кандыг-даа бергелерни туруштуг ажып эртиптер бис. А бир эвес ха-дуңмавыс багай чүвеге таваржы бээрге, оларның хереглелдери дээш сагыш човап, кээргеп, болдунар-ла чүүлдү кылыр бис. Ынак апарган акы-угбаларывыстан бисти чүү-даа ырадып шыдавас боор. Ынчан Иегова бисти хилинчек-човалаң, хай-халаптар уттундурган делегейге мөңге чуртталга-биле шаңнаар (Иса. 65:17).
ЫРЫ 144 Шаңналче көрүжүң угла!
a Коргунчуг хилинчек дыка дүрген чоокшулап орар. Аңаа белен болурунга шыдамык чорук, ээ көрүүшкүн база ынакшыл херек. Бирги векте христианнарга ол шынарлар канчаар дузалаанын, биске канчаар дузалап турарын база коргунчуг хилинчекке белеткениринге канчаар дузалаарын сайгарыптаалыңар.
b Дуза кадар ажылдарга киржиксээр болзуңарза, «Заявление на служение добровольцем в программе местного проектно-строительного отдела» (DC-50) азы «Заявление на добровольное служение» (A-19) деп анкетаны долдургаш, чалаптарын манаңар.