• «Ашаам меңээ чаңгыс удаа эвес өскерилген ышкаш миннип турган мен».

• «Бодумну сонуурганчыг эвес, куду көрдүрген, херекчок кылдыр миннип турган мен».

• «Мен ону кымга-даа чугаалап шыдавас болгаш, бүдүү хинчектенип чораан мен».

• «Сактырымга Иегова меңээ ынак эвес ышкаш болган».

Бо сөстерден алырга, ашаа порнография көрүп турар болза, кадайынга дыка аарышкылыг. А ол чаңчылын ай ай-айы-биле, азы чылдар-биле чажырып келген болза, ашаанга бүзүрээри кадайынга берге апарып болур. Бир угбавыс: «Ашаамны көңгүс билбес болган мен. Оон ыңай менден чүнү чажырар ирги?» деп үлешкен.

Бо статьяны ашаа порнографияга сундуга берген херээжен улуска бижээн a. Мында оларны оожургадып, Иегованың ынакшылынга бүзүредип, Бурган-биле найыралын быжыглап, сагыш-сеткилдиң балыгларын эмнеп болур библейжи бодалдарны сайгарган b.

Ашааңарның базым бүрүзүн хынап шыдавас болгай силер. Ынчалза-даа аарышкыңарны болгаш дүвүрелиңерни оожургадып шыдаар силер. Мындыг каш сүме бар.

Бодуңарны буруудатпаңар. Ашааңар порнография көөрге, бодуңарны буруулуг деп санаар чадавас силер. Ашаанга Алиса c бодун сонуурганчыг эвес кылдыр миннип турган. Ону мындыг айтырыг дүвүредип келген: «Ашаам мени эвес, а өске херээжен улусту чүге сонуургап көөрүл?» Азы хорадааныңар дээш, бодуңарны буруудадып, сактырыңарга байдалды баксырадып каан ышкаш силер. Даниэ́лла мынча дээн: «Килеңни туттунары дыка берге турган. Бодум өг-бүлемни бузуп турар ышкаш болган мен».

А силерге шак ындыг минниишкиннер тыптып кээр болза, сактып чоруңар: Иегованың мурнунга ашааңарның ажыл-херээ дээш харыылавас силер. Иаков 1:14-те мынча дээн: «Кижи бүрүзүн ооң бодунуң-на күзээшкиннери күткүүр»  (Рим. 14:12). Иегова силерни буруудатпайн турар. Ол силерниң аңаа бердингениңерни үнелээр (2 Чыл. 16:9).

Ашааңар порнография көрүп турар болза, четпес чүүл силерде эвес. Ол теманы шинчилээр эксперттерниң сөстеринден алырга, порнография чаңгыс-даа херээжен кижиниң хандырып шыдавазы шын эвес күзелдерни өөскүдүп турар.

Эмин эрттир дүвүревезин кызыңар. Кэтринниң чугаазы-биле алырга, ашаа порнография көрүп турар деп бодал ооң бажындан үнмейн барган. Франсес мынча дээн: «Ашаамның кайдазын билбес болзумза, дүвүреп эгелээш, хүнзедир оожургавас мен». Чамдык христианнарга ашааның багай чаңчылын билир акы-угбалар аразынга турары эпчок. А өскелеринге бергези-биле чааскаан болгаш, сактырга оларны кым-даа билип шыдавас ышкаш.

Ындыг минниишкиннер черле турар. Ынчалза-даа чүгле ону бодап туруп бээрге, дүвүрелдер дам баар. Иегова-биле хамаарылгаңарже кол кичээнгейни салыңар, ол силерни күш киирер (Ыд. ыр. 61:3; Эф. 6:10).

Берге байдалдарда мөргүл таварыштыр оожургалды алган херээжен улустуң библейжи төөгүлерин боданыңар. Бурган чамдыкта оларның бергелерин шиитпирлевес-даа болза, оожургалды, тайбыңны черле бээр турган. Аннаның чижээн көрээлиңер. Бергедежи бергеш, ол Иеговага үр мөргүүр турган. Шупту чүве канчаар шиитпирлеттинерин билбес-даа болза, мөргүүрге ооң сеткили ажый бээр турган (1 Хаан. 1:10, 12, 18; 2 Кор. 1:3, 4).

Хуралдың удуртукчуларындан дузаны дилеңер. Оларның «кайызы-даа хаттан хоргадаар чер, шуургандан чаглак» болур (Иса. 32:2). Удуртукчулар силерни деткип шыдаар, ажыы-биле чугаалажып болур угбайны сүмелээр чадавас (У. ч. 17:17).

Ашааңарга порнография көөр чаңчылдан адырлып алырынга дузалап болур силер. Бергелерни шиитпирлээрде, азы кара сагыштыг дайзын-биле демисежирде, Библияда: «Чаңгыс боорундан эштиг болганы дээре» дээн (Эккл. 4:9—12). Шинчилелдерден алырга, ашааның порнографияга хандыкшылы-биле  кады демисежип, ниити күжениишкиннер-биле бүзүрелди эгидерин кызып турар өг-бүлелер чедиишкинниг болган.

Дыка хөй чүүл ашааңарның ол чаңчылды ажып эртеринге кайы хире күжениишкин үндүреринден хамааржыр болгай. Ол Иеговадан деткимчени база удуртукчулардан дузаны дилээн бе? (2 Кор. 4:7; Иак. 5:14, 15). Канчаар хөделир планы бар бе? Чижээ, ол электроннуг херекселдер ажыглаар дүрүмнер тургузуп алган бе база күткүлге тургустунар байдалдардан дезип турар бе? (У. ч. 27:12). Дузаңарны хүлээп, төнчүзүнге чедир силерге шынчы бе? Бир эвес ийе болза, дузалажып шыдаар силер.

Чүнү кылып болур силер? Фели́сияның чижээн көрээлиңер. Ооң ашаа И́тан бичии тургаш-ла порнография какпазынче кирген. Фелисия ашаан билип аар дээш кызар, чугаалажырынга кезээде белен. Ынчангаш аңаа порнография көөр күзел тыптып кээрге, ону Фелисияга чугаалаары белен. Итан мынча дээн: «Мен кадайым-биле ажыы-биле чугаалажыр мен. Ол меңээ интернетти шын ажыглаарынга, кызыгаар тургузарынга дузалажып турар. Чедиишкиннеримни үргүлчү айтырар». Итанның багай чаңчылы Фелисияга дыка аарышкылыг. Ынчалза-даа Фелисия мынча дээн: «Хорадаанымны туттунмас болзумза, аңаа дуза болбас. Ооң бергелерин чугаалажырывыска, ашаамга мени деткиири белен».

Ындыг чугаалар ашаамга багай чаңчылы-биле чедиишкинниг туржурунга дузалаар. Оон артык кадайынга база ажыктыг. Чүге дизе ашаа ажыы-биле бодунуң кошкак талаларын үлежип, кайдазын база хүн дургузунда ажыл-херээн чугаалап турар болза, кадайынга аңаа бүзүрээри белен.

Силер бо арганы ажыглаарынга белен силер бе? Ийе болза, эжиңерге бо статьяны кады номчуп сайгарарын сүмелеңер. Порнографиядан адырлып алыр база бүзүрелиңерни чаалап аар сорулганы ашааңар салыр болза эки. Чугаа эгелээрге хорадавайн, силерге ол чүүл кайы-хире аарышкылыын ашааңар билип алыр ужурлуг. А силерниң сорулгаңар — ашааңарның күжениишкиннерин деткип, багай чаңчылдан адырлып шыдаптар деп бүзүрээри. Силерниң ийилдириңерге порнографияга канчаар хандыкшый бээрин база ооң-биле канчаар туржурун сайгарып билип аары чугула d.

Маргыжа бээринден коргар болзуңарза, кайыңарның-даа бүзүрээр бир удуртукчу акыйны  ол берге айтырыгны сайгарарда кады турарын дилеңер. Ашааңар ол багай чаңчылындан адырлып-даа аар болза, аңаа катап бүзүрээринге элээн үе херек апаар чадавас. Дүжүп бербеңер. Хензиг-даа өскерлиишкиннер бар болза, эскериңер. Кажан-бир силерниң өг-бүлеңерге аас-кежик катап келир деп шыдамык болуп, бүзүреңер (Эккл. 7:8; 1 Кор. 13:4).

Бир эвес ашааңар багай чаңчылынга катап алзыпкан болза, буруузун билинмээн, чүү-даа болдунмас дээни ол бе? Албан эвес. Бир эвес багай чаңчылга ол дыка алыскан болза, ол бүгү назынында демисежир чадавас. Чылдар эрткен-даа болза, ол багай чаңчыл эглип кээп болур. Ону болдурбас дизе, оон-даа шыңгыы дүрүмнерни тургузуп алгаш, ол чаңчылдан адырлып алган ышкаш-даа болза, оон ойталавазы чугула (У. ч. 28:14; Мф. 5:29; 1 Кор. 10:12). Ашааңарга чаа «угаан-медерелди» сайзырадып алыры база порнография көөрү, мастурбация дээн ышкаш оон-даа өске арыг эвес чаңчылдарны көөр хөңнү чок боорунга өөренири чугула (Эф. 4:23; Ыд. ыр. 96:10; Рим. 12:9). Ындыг демисел чорударынга эжиңер белен бе? Ийе болза, ашааңар тиилелгени чедип ап болур e.

Бир эвес ашааңарның ол багай чаңчылын тиилеп аар күзели чок болза, канчаар? Үе-үе болгаш чөгелиңер төнүп, хорадаар чадавас силер, чүге дизе силерни садыпкан деп бодал кирип кээр. Ындыг байдалда Иеговадан оожургалды дилеңер. Олче шупту дүвүрелдериңерни чая кааптыңар. Ол чүүл чүрээңерге тайбыңны бээр (1 Пет. 5:7). Иегованың Сөзүн өөренип, аңаа мөргүп, олче чоокшулаңар. Бурган база силерге чоокшулаар деп чигзинмеңер. «Чаа делегей» очулгазында Исайя 57:15-те Бурган «ундарап, муңгараан улус-биле база кады», оларны күш киирер дээн. Христиан шынарларны сайзырадып, Иеговага эң-не эки чүүлдү бериңер. Удуртукчулардан дузаны дилеңер. Ашааңар кажан-бир эттинип алырын күзей бээр деп идегелиңер чидирбеңер (Рим. 2:4; 2 Пет. 3:9).