АШАК-КАДАЙ УЛУСКА
3. Хүндүткел
ОЛ ЧҮҮ ДЭЭНИ ОЛ?
Бот-боттарын хүндүлежир ашак-кадай улустуң санал-оналдары аңгы-даа апаар болза, олар дөмей-ле бот-боттарынга ынакшылды илередир. «Ындыг ашак-кадай улус кайызы-даа бодунуу-биле туруптарга тыптып кээр, үнер арга чок байдалдарже кирбезин оралдажыр боор. Олар чөрүлдээлерни кады сайгарып, бот-боттарын хүндүткелдии-биле дыңнап, чаңгыс түңнелге кээрин кызар» — деп «Десять советов, которые преобразят ваш брак» деп номда бижээн. (Ten Lessons to Transform Your Marriage).
БИБЛЕЙЖИ ДҮРҮМ: «Ынакшыл... бодунга ажык сүрбес» (1 Коринфичилерге 13:4, 5).
«Кадайын хүндүлээри дээрге ону үнелээри база өг-бүлезинге хора чедирипки дег чүүлдер кылбазы-дыр» (Майк).
ОЛ ЧҮГЕ ЧУГУЛА?
Ашак-кадай улустуң аразынга хүндүткел турбас болза, оларның чугаа-сөзүнге шүгүмчүлел, каржы шоодуушкун, безин бот-боттарынга тоомча чогу көстүп кээр. Психологтар ону чарлырының баштайгы демдектери деп адаар.
«Шооткан сагындырыглар, каксы чугаалар болгаш кыжырыглыг оюн-баштак кадайыңарның сеткилин хомудадып, безин силерге бүзүрелин чидирип болур. Ооң уржуундан өг-бүлеңер буступ болур» (Брайан).
ЧҮНҮ КЫЛЫП БОЛУРУЛ?
БОДУҢАРНЫ ХЫНАҢАР
Канчаар чугааланып, алдынып турарыңарны неделя дургузунда хайгаараңар. Оон бодуңардан айтырыңар:
-
«Ашаамны (кадайымны) үргүлчү шүгүмчүлээр мен бе азы ону болганчок мактап турар мен бе?»
-
«Ашаамга (кадайымга) хүндүткелим херек кырында чүден көскү?»
КАДЫ САЙГАРЫҢАР
-
Эжиңер силерни хүндүлеп турар деп, ооң кандыг кылдыныглары болгаш сөстери көргүзер-дир?
-
Силернии-биле алырга, эжиңерниң кандыг кылдыныглары болгаш сөстери хүндүткел чогун көргүзүп турар ышкаш-тыр?
СҮМЕЛЕР
-
Кандыг үш талада силерни хүндүлээрин күзээр-дир силер, бижип алыңар. Ашааңарны (кадайыңарны) база шак-ла ынчаар кылырын дилеңер. Оон бижээн чүүлдериңерни солчуп алгаш, эжиңерниң бижээн күзелин кичээнгейге алырын кызыңар.
-
Ашааңарның (кадайыңарның) кандыг аажы-чаңын магадаар-дыр силер? Ону бижип алгаш, ооң ол шынарларын кайы хире үнелээриңерни аңаа чугаалап бериңер.
«Ашаан хүндүлээри дээрге ону үнелеп, ооң аас-кежиктиг болурун күзеп турарыңны херек кырында көргүзери-дир. Ол дээрге албан кайгамчык улуг чүүл кылыр дивээни ол. Ёзулуг хүндүткел дыка хөй бичии ажыл-херектерден тургустунар» (Меган).
Моон көөрге, хамык ужур хүндүткелди илередип турар мен деп санап турарыңарда эвес, а кады чурттаан эжиңер силерниң хүндүткелиңерни херек кырында эскерип, миннип турарында.
БИБЛЕЙЖИ ДҮРҮМ: «Ээ көрүүшкүннү, буянны, биче сеткилди, томаарыышкынны, шыдамык чорукту кедип алыңар» (Колосчуларга 3:12).
