АНЫЯКТАРГА
9. Хуу-бот
ОЛ ЧҮҮ ДЭЭНИ ОЛ?
Хуу-бот дээрге сээң чүгле ат-сывың болгаш даштыкы овур-хевириң эвес-тир. Ынаар сээң үнелеп чоруур чүүлдериң, үзел-бодалың болгаш аажы-чаңың кирип турар. Ол дээрге сени илередип турар даштыкы болгаш иштики ылгавыр демдектериң-дир.
ОЛ ЧҮГЕ ЧУГУЛА?
Бир эвес сен үзел-бодалдарыңга быжыг туруштуг боор болзуңза, үе-чергеңниң салдарынга алыспас сен.
«Улустуң хөй кезии садыгда манекеннерге дөмей. Олар чүнү кедерин боттары шиливес. Оларны өске кижилер хепкерер» (Адриан).
«Чеже-даа берге болза, мен шын чүүл дээш туржуп өөренип алган мен. Сээң чаныңга эш-өөрүңнүң канчаар алдынып турарын база оларның чанынга бодуңнуң канчаар алдынып турарыңны көрүп тургаш, ёзулуг эш-өөрнү билип ап болур сен» (Кортни).
БИБЛЕЙЖИ ДҮРҮМ: «Бо делегейниң амыдыралының аян-шинчизинге чаңчыгып, аңаа дөмей болбаңар,.. угааныңар чаартып, бодуңар бүрүнү-биле эде тургустунуп алыңар» (Римчилерге 12:2).
ЧҮНҮ КЫЛЫП БОЛУРУЛ?
Кандыг кижи мен база кандыг кижи болуксап турар мен деп бодан. Ону билип алыр дээш, күштүг болгаш кошкак талаларыңны демдеглеп, үзел-бодалдарыңны сайгарып, хына. Сеңээ дараазында айтырыглар дузалаар.
Күштүг талаларың. Менде кандыг салым-чаяан бар база чүнү эки кылып билир мен? Кандыг эки шынарларлыг мен? (Үе-шакты сагыыр, туттунуп билир, ажылгыр, харам эвес...) Чуртталгамда эки чүү кылып чоруур мен?
СҮМЕ. Бир эвес сеңээ күштүг талаларыңны тодарадып алыры берге болза, ада-иеңден, чоок эжиңден олар сени чүүң дээш база чүге үнелеп чоруурун айтыр.
БИБЛЕЙЖИ ДҮРҮМ: «Кижи бүрүзү бодунуң ажыл-херээн шүгдүнзүн, ол ынчан бодун өске улус-биле деңневейн, чедиишкиннеринге чоргаарланып шыдаар» (Галатчыларга 6:4).
Кошкак талаларың. Аажы-чаңымның кандыг талаларын эдип алыр болзумза эки? Колдуунда кандыг таварылгаларда күткүлгеге алзыптар мен? Кандыг байдалдарда бодумну туттунуп өөренип алыр ужурлуг мен?
БИБЛЕЙЖИ ДҮРҮМ: «„Бачыт чок бис“ дээр болзувусса, боттарывысты мегелеп турарывыс ол-дур» (1 Иоанн 1:8).
Үзел-бодалдар. Мөзү-шынарга хамаарыштыр кандыг дүрүмнерни сагып чоруур мен база чүге? Бурганга бүзүрээр мен бе? Бурган бар деп чүге бүзүреп чоруур мен? Чүнү чөптүг эвес чорук деп санап турар мен база чүге? Келир үемни кандыг кылдыр көрүп турар мен?
БИБЛЕЙЖИ ДҮРҮМ: «Бодамчалыг чорук сени камгалаар; улуг угаан — кадагалаар» (Чугаалар 2:11).
Силерге солун бооп болур
АНЫЯКТАРНЫҢ 10 АЙТЫРЫЫНГА ХАРЫЫЛАР
Мен кандыг кижи мен?
Үзел-бодалдарыңны, күштүг болгаш кошкак талаларыңны, сорулгаларыңны билир болзуңза, базыышкынга таварышкаш-даа, шын шиитпирлерни хүлээп шыдаар боор сен.
