TUMU PARAU MATAMUA | IA POHE TE TAATA: E ORA FAAHOU ANEI?
Eaha te tupu i muri aˈe i te pohe?
“No ˈu, e toru vahi e vai ra no te feia pohe: te raˈi, te po auahi aore ra te vahi tamâraa hara. Ua ite au eita vau e tano no te raˈi aore ra no te po auahi. Aita vau i papu maitai eaha te vahi tamâraa hara. Aita roa vau i ite i te reira i roto i te Bibilia. Na te taata noa tera parau.”—Lionel.
“Ua haapiihia mai e haere te feia pohe atoa i te raˈi, aita râ vau i papu. No ˈu, o te pohe te hopea o te mau mea atoa, aita e tiaturiraa no te feia pohe.”—Fernando.
Ua ui aˈena anei oe: ‘Eaha te tupu i muri aˈe i te pohe? Te mauiui ra anei te feia herehia i pohe i te tahi vahi? E farerei faahou anei tatou ia ratou? E nafea ia papu?’ A hiˈopoa na i ta te mau Papai e haapii mau ra. Na mua, e hiˈo anaˈe eaha ta te Bibilia e parau ra no nia i te pohe. I muri iho tatou e hiˈopoa ˈi eaha te tiaturiraa ta te Bibilia e faaite ra.
Eaha te tupu ia pohe te taata?
TE PAHONORAA A TE BIBILIA: “Ua ite te feia e ora nei, e pohe ratou, aita râ a te feia i pohe ra e parau itea. Aita hoi a ratou e utua toe i te fenua nei; ua aramoina hoi ratou. O tei itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.” *—Koheleta 9:5, 10.
Tei roto te feia pohe atoa i Hade. E ere râ te reira i te hoê vahi mau e aita hoê aˈe mea e ora ra aore ra e ohipa ra i Hade. Eaha te manaˈo o te taata taiva ore Ioba no nia ia Hade? I roto noa hoê mahana, ua ere o ˈna i ta ˈna mau faufaa, ta ˈna mau tamarii e ua î roa to ˈna tino atoa i te fêfê. Ua taparu oia i te Atua: “Ahiri oe e faatapuni ia ˈu i hade e; ahiri oe e huna ia ˈu.” (Ioba 1:13-19; 2:7; 14:13) No Ioba, e ere ïa Hade hoê vahi e mauiui atu â o ˈna. I reira râ e mâha ˈi to ˈna rohirohi.
Te vai ra te tahi atu ravea no te ite eaha te tupu i muri aˈe i te pohe. E nehenehe e hiˈopoa na vau aamu Bibilia o te feia i faatiahia mai te pohe mai.—A hiˈo i te tumu parau tarenihia “ E vau tia-faahou-raa i roto i te Bibilia.”
Aita hoê aˈe i rotopu i na taata e vau i faatia ua haere ratou i te tahi vahi itehia te oaoa mau aore ra te mauiui. Ahiri hoi tera iho â, no te aha ratou i ore ai i faatia te reira? Eita anei e papaihia i roto i te Bibilia ia ite te taata atoa? Aita roa faatiaraa mai tera te huru i roto i te mau Papai. Aita roa a na taata e vau e parau no nia i te reira. No te aha? No te mea i to ratou poheraa, ua faaea te mau mea atoa i te haa, mai ia tatou ua taoto anaˈe. No reira te Bibilia e faaohipa ˈi i te parau taoto no te faataa i te tupu ia pohe te taata. Ua parauhia, ‘mairi atura te taoto’ a pohe ai na taata taiva ore Davida e Setephano.—Ohipa 7:60; 13:36.
Eaha te tiaturiraa no tei pohe? E nehenehe anei ratou e faatiahia mai te pohe mai?
^ E faaohipahia te taˈo Hade no te parau Hebera Sheol e te parau Heleni Hades. I roto i te tahi mau Bibilia, ua hurihia te reira i te parau “po auahi.” Aita râ te Bibilia e haapii ra te vai ra hoê vahi e haamauiuihia tei pohe i roto i te auahi.
