Mai ta oe i ite i roto i na tuhaa matamua o teie tumu parau, e mea faufaa roa te Basileia o te Atua no te mau Ite no Iehova. Ua maere paha oe i te ite vetahi haamaitairaa ta te Basileia o te Atua e faatupu a muri aˈe. Peneiaˈe, te manaˈo atoa ra oe e moemoeâ noa tera mau parau fafau.

Mea au iho â ia haapao maitai hou a tiaturi ai i te parauhia ˈtu. (Maseli 14:15) E nehenehe oe e faaauhia i te feia no Berea. * I te taime matamua a faaitehia ˈtu ai te poroi apî o te Basileia, aita noa to Berea i farii tei parauhia ˈtu no te mea ua hinaaro ratou ia riro te reira ei parau mau. Ua hiˈopoa maite râ ratou i te mau Papai i “te imiraa i te parau i papaihia ra i te mau mahana atoa.” (Ohipa 17:11) Ua faaau ïa ratou e ua tano anei te poroi i faaitehia ˈtu i ta te mau Papai e parau ra. I muri aˈe, ua papu ia ratou no roto mai tera poroi i te Parau a te Atua.

Te faaitoito atura te mau Ite no Iehova ia oe ia na reira atoa. Ma te pûpû i te haapiiraa Bibilia tamoni ore, te hinaaro ra matou e vaiiho i te taata ia hiˈo ua tano anei ta te mau Ite no Iehova e tiaturi ra no nia i te Basileia o te Atua i ta te Bibilia e haapii ra.

Maoti te haapiiraa Bibilia, eita noa oe e taa eaha te Basileia o te Atua, e ite atoa râ i te pahonoraa i te mau uiraa faufaa roa.

•   Na vai i hamani ia tatou?

• No te aha tatou i poietehia ˈi?

• No te aha te Atua e vaiiho ai ia mauiui te taata?

• Eaha te tupu ia pohe tatou?

• E haamouhia anei te fenua?

• E nafea ia oaoa to ˈu utuafare?

Hau roa ˈtu â, e tauturu atu te haapiiraa Bibilia ia oe ia “haafatata ˈtu i te Atua.” (Iakobo 4:8) Ia piri noa to taairaa e te Atua, e ite atu â oe eaha te mau maitai ta te Basileia o te Atua e faatupu no oe i teie nei e a muri aˈe. A pure ai i to ˈna Metua, na Iesu iho i parau: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.