Te faaite ra te Bibilia i te tahi tupuraa i hamani ino ai te feia tiaraa teitei i te taata haihai. E manaˈo paha ïa tatou i tei tupu no Nabota. * O Ahaba te arii i Iseraela i te senekele 10 hou to tatou tau. Ua vaiiho oia ia haapohehia Nabota e ta ˈna mau tamaiti no te haru i ta ˈna ô vine. (Te mau arii 1, 21:1-16; Te mau arii 2, 9:26) No te aha te Atua i vaiiho ai ia tupu tera hamani-ino-raa?

E hiˈo anaˈe i te tahi tumu faufaa roa: Eita te Atua e haavare. (Tito 1:2) E nafea tera manaˈo e faataa ˈi i te tumu i vaiiho ai te Atua ia tupu te hamani-ino-raa? I te haamataraa, ua faaara te Atua e ia faaroo ore te taata, e pohe to muri mai. Te haapapu ra te Bibilia e mai te orureraa hau i roto i te ǒ i Edene e tae roa mai i teie mahana, e pohe te taata. A hiˈo na ia Abela, o te taata matamua hoi teie tei pohe no te hamani-ino-raa a to ˈna taeae Kaina.—Genese 2:16, 17; 4:8.

Teie te manaˈo poto o te Bibilia no nia i te oraraa o te taata mai tahito mai â: “E faahepo te taata i te tahi taata è ei ino nona iho.” (Koheleta 8:9, Te Bibilia Moˈa V.C.J.S., 1976) Tera iho â anei tei tupu? Ua faaara Iehova i to ˈna nunaa Iseraela e e auê ratou i te haavî o te mau arii. (Samuela 1, 8:11-18) Noa ˈtu e e arii paari Solomona, ua faahepo oia i to ˈna nunaa ia aufau i te tute teimaha. (Te mau arii 1, 11:43; 12:3, 4) Tei mua roa ˈtu â te haavî a te mau arii ino mai ia Ahaba. A feruri na, ahiri te Atua i tapea i tera mau faaheporaa, eita anei te taata e manaˈo e ua haavare o ˈna?

A haamanaˈo e ua parau atoa Satani e e tavini te taata i te Atua no te mau tumu miimii. (Ioba 1:9, 10; 2:4) Eita anei tera parau e tano ahiri te Atua i paruru i to ˈna mau tavini atoa i te hamani-ino-raa? E ia tapea o ˈna i te mau faaheporaa atoa, eita anei te taata e manaˈo e nehenehe ta ratou e faatere maitai ia ratou iho? Ia au i te Bibilia, eita roa e tia i te taata ia na reira. (Ieremia 10:23) E hinaaro ïa tatou ia tae mai te Basileia o te Atua, i reira noa hoi te ohipa tia ore e faaore-roa-hia ˈi!

Te auraa anei e aita te Atua e tâuˈa ra i te mau faaheporaa e tupu ra? Aita. A hiˈo na i ta ˈna e rave ra. A tahi, te faataa ra o ˈna e mea nafea te faaheporaa e tupu ai. I roto i te Bibilia e itehia ˈi ta te vahine a Ahaba o Iezebela i rave no te totoa ia Nabota. Ua faaite-atoa-hia o vai te faatere puai i turai ia ˈna ia rave i taua mau ohipa iino ra, oia hoi o Satani te Diabolo. (Ioane 14:30; Korinetia 2, 11:14) Ma te faaite o vai te faatupu ra i te ino e te faaheporaa, te tauturu maira te Atua ia haapae i te rave i te ino a maitai atu ai to tatou a muri aˈe.

Te piti, te horoa maira te Atua i te tiaturiraa papu e e ore roa te faaheporaa. Ua faaite oia i ta Ahaba e Iezebela i rave, ua haava e ua faautua atoa ia raua e te tahi atu feia iino. E tiaturi mau iho â ïa tatou e e faautua oia i te faatupu nei i te ino. (Salamo 52:1-5) Te mauiui ra te feia e here ra ia ˈna no te faaheporaa, te haapapu maira râ te Atua e e faaore roa oia i te reira. * E oaoa roa te taata taiva ore ra Nabota e ta ˈna mau tamaiti i te ite e aita faahou e ohipa tia ore i roto i te paradaiso i te fenua nei.—Salamo 37:34.