E nehenehe anei oe e haamanaˈo i te mahana i fanauhia ˈi ta oe tamarii? Ua hinaaro mau oe e rave mai ia ˈna. No te mau metua râ mai ia Carlo e Mia, ua oaoa e ua haapeapea atoa râ i te parauraahia e e tamarii maˈimaˈi aore ra huma ta raua.

E huma anei ta oe tamarii? Te uiui nei paha oe e e maraa anei ia oe. Tera iho â anei? Eiaha e toaruaru! Ua nehenehe hoi vetahi metua e faaruru i te hoê â fifi. E hiˈopoa anaˈe e toru fifi matauhia e e nafea te paari o te Bibilia e tauturu ai ia oe.

E rave rahi metua tei hepohepo a ite ai e e tamarii maˈimaˈi ta ratou. Te parau ra Juliana, te hoê mama, i Mehiko: “I to te taote parauraa mai e e maˈi roro haaparuparu to ta mâua tamaiti ra Santiago,  aita vau i tiaturi aˈe. Ua hepohepo roa ino vau.” No vetahi, hoê â manaˈo to ratou e to te tahi mama Italia o Villana te iˈoa, o te na ô ra: “Ua hinaaro vau i te tamarii noa ˈtu e e nehenehe te fifi e tupu mai no to ˈu matahiti paari. I teie nei, ia fifi ta ˈu tamaiti no te mea e huma roro o ˈna, e faahapa vau ia ˈu.”

E manaˈo iho â oe mai tera. Aore te maˈi i roto i ta te Atua opuaraa. (Genese 1:27, 28) Aita oia i poiete i te mau metua ia farii ohie i te mea ino. E tupu mai iho â te hepohepo i te mea e ua ere ta oe tamarii i te ea maitai. E titauhia iho â te taime no te faaafaro i to oe manaˈo e no te faaau i nia i teie tupuraa apî.

E no tei na ô ra, ‘O vau te tumu i huma ˈi ta ˈu tamarii?’ A haamanaˈo ïa e aita hoê aˈe taata e taa maitai roa e nafea te mau tapao tupuna, te vahi i paari ai te tamarii, e te tahi atu mea e ohipa ˈi i nia i to ˈna ea. I te tahi aˈe pae, e faahapa paha oe i to oe hoa faaipoipo. Eiaha e na reira. E rahi aˈe te maitai ia ohipa amui oe e to hoa faaipoipo no te aupuru noa i ta orua tamarii.—Koheleta 4:9, 10.

MANAˈO TAUTURU: A imi i te mau haamaramaramaraa no nia i te maˈi o ta oe tamarii. Te parau ra te Bibilia “E patuhia te [utua]fare i te paari, e e papu hoi taua [utua]fare ra i te ite.”—Maseli 24:3.

Ihea e imi ai i tera mau haamaramaramaraa? I te mau taote e i roto i te tahi mau papai papu. E nehenehe e faaau ta oe e rave no te ite atu â i te maˈi o ta oe tamarii e te haapiiraa i te reo apî. E ere i te mea ohie i te haamataraa, e nehenehe râ ta oe.

Ua na reira Carlo e Mia. Ua noaa mai ta raua mau haamaramaramaraa i to ratou taote e i te hoê pu taa ê no te maˈi o ta raua tamarii. Te parau ra raua: “Maoti tera tauturu i taa ˈi mâua i te mau fifi e tupu mai e ta te huma roro e ‘nehenehe’ atoa e rave. Ua ite mâua e i roto i te tahi tuhaa o te oraraa e nehenehe o ˈna e ora mai ia tatou. Ua tamahanahana mau te reira ia mâua.”

Ua rohirohi roa ino paha oe i te haapao i ta oe tamarii maˈimaˈi. Te parau ra Jenney, te hoê mama i Niu Zelani: “A tau matahiti i teie nei te iteraahia e e maˈi roro to ta ˈu tamaiti. Noa ˈtu râ ua rohirohi aˈena vau i te feruri-noa-raa e rave i te tahi ohipa na rapae i te fare, e taˈi hanoa vau.”

O te moemoe te tahi atu fifi. E maˈi uaua iˈo e te maˈi parauhia te syndrome d’Asperger to te tamaiti a Ben. Te parau ra oia: “Aita te rahiraa o te taata e taa mau ra i to matou oraraa.” E hinaaro paha oe e paraparau i te tahi taata. E tamarii ea maitai râ ta te rahiraa o to oe mau hoa. E taiâ ïa oe i te aparau atu.

MANAˈO TAUTURU: A ani i te tauturu e a farii atu. Te faˈi ra Juliana, tei faahitihia ˈtu na: “I te tahi taime, e haama mâua ta ˈu tane i te ani i te tauturu.” Te na ô faahou ra râ o ˈna: “Ua farii mâua mea titauhia iho â te tauturu a vetahi ê. Ia na reirahia mai, eita ïa mâua e moemoe.” I te putuputuraa aore ra i roto i te tahi atu tupuraa, ia parau mai te tahi hoa piri aore ra fetii e e parahi oia i pihai iho i ta oe tamarii, a farii e a haamauruuru atu. Te na ô ra te Bibilia: “E aroha mai â te taua i te mau mahana atoa ra, i fanau mai râ te taeae no te anotau e ati ai.”—Maseli 17:17.

A haapao atoa i to oe iho ea. Ia nehenehe noa te hoê pereoo a te fare maˈi e uta i te taata i reira, e titauhia ïa ia tito i te mori. Mai te reira atoa oe. E titauhia oe ia tamaa maitai, ia tamarû ia oe e ia faaetaeta i to tino. E nehenehe ïa oe e haapao â i te mau hinaaro o ta oe tamarii. Te na ô ra Javier, e tamaiti paruparu ta ˈna: “I te mea e eita ta ˈu tamaiti e nehenehe e haere, i to ˈu manaˈo mea tano ia tamaa maitai au. Maoti hoi au e nehenehe ai oia e haere i te tahi vahi i te tahi atu. To ˈu avae, to ˈna ïa avae!”

Eaha te taime e haapao ai oe ia oe iho? E haapao vetahi metua i te tamarii ia nehenehe te tahi atu e tamarû ia ˈna aore ra e haamâha i to ˈna iho mau hinaaro. E ere i te mea ohie, e titauhia râ ia faaherehere i te taime, eiaha te reira e pau i te tahi mau ohipa faufaa ore. Te na ô ra râ Mayuri, te tahi  mama i Initia: “I te pae hopea, e matau iho â oe i te na reira.”

A paraparau i te hoê hoa papu. Noa ˈtu e aita ta to hoa e tamarii maˈimaˈi, e nehenehe oia e tamahanahana ia oe. A pure atoa i te Atua ra o Iehova. E tauturu mau anei te reira? E maˈi tuino mahaha, aau, upaa e rama to ta Yazmin na tamarii e piti. Te faˈi ra o ˈna: “Te vai ra te tahi mau taime, ua hepohepo roa ino vau a na ô atu ai ‘ua tahiti roa vau.’” Te parau atoa ra râ oia: “E pure au ia Iehova ia tamǎrû e ia tauturu mai. I muri iho, e itoito â vau.”—Salamo 145:18.

No te huma, e taui paha te maa, te mau vahi e haere ai te utuafare oia atoa te taime ta te mau metua e faataa no te tamarii taitahi. No reira, e manaˈo paha vetahi aita ratou e haapaohia ra. I te tahi taime, o te faaipoiporaa te fifihia. Te parau ra Lionel, te hoê papa i Libéria: “I te tahi taime, e parau ta ˈu vahine e o ˈna anaˈe te rave nei i te rahiraa o te ohipa. No ˈna, aita vau e haapao ra i ta mâua tamaiti. No ˈu, aita oia e faatura maira, e pahono iria vau ia ˈna i te tahi taime.”

MANAˈO TAUTURU: No te haapapu i te taatoaraa o ta orua tamarii e te haapaohia ra ratou, a faanaho i te tahi mau faaanaanataeraa ta ratou e au. Te na ô ra Jenney, tei faahitihia ˈtu na: “I te tahi taime, e rave mâua i te tahi ohipa taa ê no ta mâua tamaiti matahiapo noa ˈtu e o te haere-noa-raa i te fare tamaaraa ta ˈna e au roa.”

No te paruru i to oe faaipoiporaa, a aparau e a pure e to hoa faaipoipo. Te parau ra Aseem i Initia, te papa o te tahi tamaiti hopii: “Ia rohirohi roa anaˈe au e ta ˈu vahine, e parahi, e paraparau e e pure atoa mâua. I te mau poipoi atoa, hou te mau tamarii e ara ˈi, e tauaparau mâua i nia i te tahi irava Bibilia.” No vetahi hoa faaipoipo, e na reira ratou hou a taoto ai. I te mau taime fifi roa, na tera mau aparauraa e pure haavare ore e faaitoito ia orua. (Maseli 15:22) Te na ô ra te tahi hoa faaipoipo: “O te mau taime fifi roa ˈˈe o te oraraa ta mâua e haamanaˈo roa ˈˈe.”

Ia au i te mau parau fafau Bibilia, ua fatata roa te Atua i te faaore i te mau maˈi atoa e haamauiui ra i te feia apî e paari. (Apokalupo 21:3, 4) I tera mahana, “e ore hoi to reira e parau e, Ua paruparu vau i te maˈi.” *—Isaia 33:24.

A tiai noa ˈi râ, ei metua no te hoê tamarii huma, e nehenehe oe e oaoa i teie nei â. Te parau ra Carlo e Mia, tei faahitihia ˈtu na: “Noa ˈtu e mea fifi, a faaitoito! E rave rahi hoi mea faahiahia no nia i to tamarii ta oe e nehenehe e haamanaˈo.”