I EPERERA 2006, ua faaite te mau vea o te ao nei i te taatoaraa i tei itehia e te hoê pǔpǔ aivanaa i roto i te papai tahito parauhia “Evanelia a Iuda.” Ia au i taua mau vea ra, te parau ra te mau aivanaa e e taui to tatou manaˈo no nia ia Iuda, te pǐpǐ taiva a Iesu. No ratou, na Iesu i ani atu ia hoo ia ˈna. E aito ïa Iuda e o oia te aposetolo tei taa roa ˈˈe ia Iesu.

E papai tahito papu mau anei râ? Mai te peu e e, e faaite mai anei te reira i te tahi mea hunahia no nia ia Iuda Isakariota, Iesu Mesia aore ra i te mau Kerisetiano matamua? E taui anei te reira i to tatou manaˈo no nia i te Mesia e ta ˈna mau haapiiraa?

E mea papu ore te itearaa o te “Evanelia a Iuda.” E pinepine, na te mau aivanaa ihipǎpǎ e ite i te reira. I teie râ, aita ïa. Ua tuu taue-noa-hia te reira i nia i te matete o te mau taoˈa tahito i te hopea o te mau matahiti 1970 aore ra i te omuaraa o te mau matahiti 1980. E au ra e ua itea mai te reira i Aiphiti i 1978, i roto paha i te hoê menema o te ore i haapao-faahou-hia. Hoê teie o na papai e maha o te buka tahito (codex) papaihia na roto i te tahi o te mau reo o Aiphiti i mutaaiho (Copte).

Ua maitai noa te huru o taua buka tahito ra hamanihia e te iri puaa i Aiphiti. A tauihia ˈi râ te vahi vairaa o te reira, ua haamata ˈtura i te ino. Hoo-oioi-hia ˈtura taua buka tahito ra, aore ra codex, i 1983. No te moni rahi râ aita te reira i riro. Ua ino roa ˈtu te reira tau matahiti i muri aˈe. I 2000, ua hoo mai te hoê vahine hoo taoˈa tahito no Helevetia i tera codex. Tuu atura oia i te reira i roto i te rima o te mau taata maimi aravihi turuhia e te hoê taatiraa Helevetia (Maecenas Foundation for Ancient Art) e te National Geographic Society no te faaapî i te codex tei huˈahuˈa roa ino. E rave atoa ratou i te mau maimiraa no te ite ehia  matahiti to te codex, inafea te huriraahia a horoa mai ai i te mau faataaraa.

Ua itehia mai e no te mau matahiti 200 aore ra 300 tera codex. Noa ˈtu râ, ua parau noa te mau aivanaa e ua faaohipahia te reo Heleni no te huri i te “Evanelia a Iuda” na roto i teie reo o Aiphiti tahito. Mea maoro atu â ïa te matahiti o te reira. Ehia ïa maororaa? Mea nafea te “Evanelia a Iuda” i te papairaahia?

I roto i te mau papai a te episekopo Irénée, taata papai i te hopea o te mau matahiti 100, i faahiti-matamua-hia ˈi te “Evanelia a Iuda.” I roto i ta ˈna buka Contre les hérésies, te parau ra o ˈna no nia hoê o na pǔpǔ haapii ta ˈna i patoi na: “Te na ô ra ratou e o Iuda tei taiva tei matau maitai i taua mau mea ra, o ˈna anaˈe tei ite i te parau mau no nia i te miterio o te taivaraa. Na ˈna i faahuru ê i te mau mea atoa i te fenua nei e i te raˈi. E aamu hamani-noa-hia e ratou te Evanelia a Iuda.”

Ua patoi iho â Irénée e rave rau haapiiraa a te tahi pǔpǔ philosophia Kerisetiano gnostique. Ia au i ta ratou parau, e ite taa ê to ratou. Te parau gnosticisme, o te mau pǔpǔ atoa ïa e faataaraa e e tatararaa ta ratou iho no nia i te “parau mau” Kerisetiano. Ua niuhia râ te reira i nia i ta ratou iho mau papai, tei parare i te mau matahiti 100.

Ia au i taua mau evanelia ra, aita te mau aposetolo rahi a Iesu i taa i ta ˈna poroi e aita vetahi i maramarama i te hoê o ta ˈna haapiiraa. * No vetahi nau gnostiques, te mau ra te mau varua o te taata i roto i te hoê fare tapearaa. E atua haihai “te atua poiete” o te mau papai moˈa Hebera ia faaauhia i te mau atua rau teitei ta ratou i tiaturi. Te vai atoa ra te hoê taata e “ite” taa ê to ˈna, o ˈna tei taa i te “parau moe,” oia hoi e titauhia ia matara mai te taata i to ˈna iho tino.

Tera atoa te haapiiraa a te “Evanelia a Iuda.” Te na ô ra te omuaraa: “Faatiaraa a Iesu i te parau moe ia Iuda Isakariota, i te roaraa e vau mahana, e toru mahana hou oia a faatupu ai i te oroa Pasa.”

Tera anei te papai tahito ta Irénée i faahiti, tei manaˈohia e ua moe a tau senekele? Te pahono ra Marvin Meyer, melo o te pǔpǔ matamua i hiˈopoa e i huri i tera codex: “Ua tano maitai ta Irénée faataaraa poto i teie Evanelia a Iuda na roto i te reo Aiphiti tahito.”

Ia au i te “Evanelia a Iuda,” te faaooo ra Iesu i te ite ore o ta ˈna mau pǐpǐ. I roto i na aposetolo 12, o Iuda anaˈe tei taa i te huru mau o Iesu. Taa ê atu i te reira, o ˈna anaˈe ta Iesu i faaite i “te mau miterio o te basileia.”

Ua haapao rahi te pǔpǔ aivanaa matamua i ta Irénée faataaraa o te evanelia. No reira ratou i huri ai e o Iuda ta Iesu i au roa ˈˈe, o ˈna atoa tei taa i “te mau miterio o te basileia” e oia anaˈe te ô atu i roto. Noa ˈtu e ua imi te mau aposetolo i te hoê mono no Iuda, ua riro oia ei “ahuru ma toruraa o te varua” tei “hau ê [i te tahi atu mau pǐpǐ]”  no te mea ua parau Iesu e “o oe te haamatara ia ˈu i to ˈu tino.”

Ua pia-oioi-atoa-hia te mau faataaraa no nia i te “Evanelia a Iuda” a na taata papai tuiroo ra o Bart Ehrman e Elaine Pagels, aivanaa no nia i te mau Kerisetiano matamua e gnosticisme. Aita te reira i taa ê roa i ta te pǔpǔ matamua. I muri aˈe, ua faaite atura te tahi atu aivanaa o April DeConick e Birger Pearson i to raua manaˈo no nia i te reira. Oia hoi, na te National Geographic Society i haavitiviti i te piaraa o teie papai tahito ma te ore e pee i te faanahoraa matauhia.

Ua itea ia DeConick raua Pearson e ua hape te mau aivanaa i hiˈopoa matamua i roto i ta ratou huriraa o te tahi tuhaa o te huˈahuˈa o te codex. Ia au ia DeConick, ua parau Iesu no Iuda te “ahuru ma toruraa o te Demoni” eiaha râ te “ahuru ma toruraa o te varua.” * Ua faaite maitai atoa ˈtu Iesu e aita oia e ô i roto i te “basileia.” Aita atoa oia i hau ê i te tahi atu mau pǐpǐ, ua na ô atu râ Iesu ia ˈna: ‘O oe te rave i te mea ino roa ˈˈe ia ratou. Na oe e haapohe i to ˈu tino.’ No DeConick, e papai gnostique faaooo i te mau aposetolo atoa te “Evanelia a Iuda.” I te pae hopea, ua faaoti DeConick e Pearson e ia au i te “Evanelia a Iuda,” e ere o ˈna i te aito.

Noa ˈtu e e aito aore ra e demoni te Iuda o teie evanelia, aita te mau aivanaa i rave i te mau hiˈopoaraa no te haapapu e ua tano anei teie papai i te tuatapaparaa. Te faataa ra Bart Ehrman: “E ere na Iuda aore ra na te hoê taata tei parau e o ˈna teie, i papai i teie Evanelia. . . . E ere atoa na te hoê taata i matau ia Iuda i to ˈna ra tau . . . Aita ïa ta teie buka e haamaramaramaraa hau no nia i tei tupu i roto i to Iesu oraraa.”

E papai gnostique Heleni no te mau matahiti 100 te “Evanelia a Iuda.” Aita te taatoaraa o te mau aivanaa i papu e ua tuea mau anei teie papai apî i ta Irénée i faahiti. Te faaite maira râ te reira e ua faatupu mau e rave rahi faahua Kerisetiano e ta ratou mau haapiiraa i te amahamaharaa. Te haapapu mau ra ïa te “Evanelia a Iuda” i ta te Bibilia mau faaararaa, mai ta Paulo i papai i roto i te Ohipa 20:29, 30: “Ua ite hoi au, ia reva ê atu vau . . . E tia mai hoi te taata i roto ia outou iho, e parau mai i te parau piˈo, ia peehia ratou e te pǐpǐ.”