Ta te Parau a te Atua e haapii maira
E haamau anei te Atua i te hoê faatereraa no te ao atoa?
I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau atu no nia i teie mau pahonoraa.
1. No te aha te huitaata e hinaaro ai hoê faatereraa no te ao atoa?
Hoê â fifi to te taata na te ao atoa nei. I te tahi mau nunaa, mea veve te rahiraa o te taata e te haavîhia ra ratou. I te tahi atu, e au ra e ua rahi roa ta te taata e fanaˈo nei i ta ratou e hinaaro mau ra. O te hoê noa faatereraa o te tiaau i te ao atoa te nehenehe e opere maite i te mau faufaa o te fenua.—A taio i te Koheleta 4:1; 8:9.
2. O vai te nehenehe e tiaturihia no te faatere i te ao nei?
Aita te taata e au roa ra i te manaˈo o te hoê noa faatere no te ao atoa. Aita hoi e tane aore ra e vahine te nehenehe e amo maitai i tera hopoia. Eita atoa te taatoaraa e farii i te hoê â taata. O vai hoi ta te mana e ore e nehenehe e haapiˈo? Hoê noa tia faatere haavî no te huitaata, mea riaria roa te reira!—A taio i te Maseli 29:2; Ieremia 10:23.
Ua maiti te Atua ra o Iehova i ta ˈna Tamaiti o Iesu no te faatere i te huitaata e a muri noa ˈtu. (Luka 1:32, 33) Ua ora Iesu i nia i te fenua. Ua faaora oia i te feia maˈi, ua haapii i te feia aau mǎrû e ua faataa i te taime no te tamarii. (Mareko 1:40-42; 6:34; 10:13-16) O Iesu ïa te Faatere maitai roa ˈˈe.—A taio i te Ioane 1:14.
3. Hoê faatereraa no te ao atoa, e nehenehe anei?
Ua maiti te Atua i ta ˈna Tamaiti no te faatere i te fenua mai te raˈi mai. (Daniela 7:13, 14) Aita i titauhia ia parahi tino te hoê tia faatere taata i te mau oire atoa ta ˈna e faatere ra. Oia atoa, eita e titauhia ia parahi tino Iesu i te fenua no te faatere i te huitaata.—A taio i te Mataio 8:5-9, 13.
E farii anei te taatoaraa ia Iesu ei Faatere? Eita. O te taata anaˈe o te hinaaro i te parau-tia no ô mai i te Bibilia ra te farii ia ˈna. E tamâ Iehova i te fenua nei i te feia o te patoi i te Faatere tia e te î i te here ta ˈna i maiti.—A taio i te Mataio 25:31-33, 46.
4. Eaha ta te Faatere o te ao atoa e rave?
Mai te hoê tiai mamoe e haaputuputu i ta ˈna mamoe, te haaputuputu ê na ra Iesu i te feia aau mǎrû no te mau nunaa atoa. E te haapii atu nei oia i te mau huru raveraa î i te here a te Atua. (Ioane 10:16; 13:34) Ma te itoito rahi, e turu ratou ia Iesu e i ta ˈna faatereraa. (Salamo 72:8; Mataio 4:19, 20) Na te ao, te faaite amui nei te feia taiva ore ta Iesu e faatere e ua Arii mai o ˈna.—A taio i te Mataio 24:14.
Ua fatata Iesu i te haa ma te puai no te faaora i te huitaata i te faatereraa piˈo. Ua maiti oia i te tahi o ta ˈna mau pǐpǐ taiva ore no te faatere i te fenua e o ˈna ei arii i nia i te raˈi. (Daniela 2:44; 7:27) Maoti te Basileia o Iesu e î ai te fenua i te ite ia Iehova e e haamauhia ˈi te paradaiso ta te huitaata i ere i te omuaraa o te tuatapaparaa.—A taio i te Isaia 11:3, 9; Mataio 19:28.
E au atoa outou . . .
TE PARE TIAIRAA
Eaha te tupu i te Mahana Haavaraa?
Ua rau te manaˈo no nia i te Mahana Haavaraa. Ia riaria anei oe i te reira? Eaha ta te reira e faatupu?
