No te aha Tei faaroo i te pure e faatia ˈi i te mauiui?

NOA ˈTU e te pure nei ratou, aita vetahi mau taata i papu e te vai mau ra te Atua. No te aha ratou e feaa ˈi? No te rahi paha o te mauiui ta ratou e ite ra na te ao. Ua ui ê na anei oe no te aha te Atua e faatia ˈi i te mauiui?

Ua poiete anei te Atua i te taata ei mea tia ore e ia mauiui ratou? Mea fifi roa ia faatura i te hoê atua o te hinaaro e haamauiui i te taata. A feruri na râ: Mai te peu e a hiˈohiˈo ai oe i te hoê pereoo nehenehe mau e ite oe e ua ino te hoê pae, e parau anei oe e na te taata hamani te hape? Eita roa ˈtu! No oe, e pereoo maitai roa ta ˈna i hamani e na te tahi atu taata aore ra ohipa i faaino i te reira.

Oia atoa, ia hiˈo tatou i te nahonaho e te nehenehe o te mau mea i roto i te natura e a ite atu ai i te huanane e te ohipa ino e faaino ra i te huitaata, eaha te mea tia ia manaˈo tatou? Te haapii ra te Bibilia e ua hamani te Atua i na taata matamua ma te tia roa. Na raua noa iho â râ i faaino ia raua. (Deuteronomi 32:4, 5) Te parau apî maitai, teie ïa: ua fafau te Atua e tataî i tei faainohia ia fanaˈo faahou te huitaata faaroo i te tia-roa-raa. No te aha ïa oia e tiai maoro roa ˈi?

No te aha e tiai maoro roa ˈi?

Ua taaihia teie uiraa i te tahi atu, No vai te tiaraa e faatere i te huitaata? Aita roa ˈtu Iehova i opua e na te taata e faatere ia ratou iho, na ˈNa râ. Te na ô nei te Bibilia: “E ere hoi tei taua taata e haere ra i te haapao i to ˈna taahiraa.” (Ieremia 10:23) Te mea peapea, ua maiti na taata matamua i te patoi i te mana arii o te Atua. Ua orure hau raua e ua riro mai nei ei taata hara. (Ioane 1, 3:4) Ei faahopearaa, ua ere na taata matamua i  to raua tia-roa-raa a ino atu ai raua e to raua huaai.

E tausani matahiti i te maoro, ua vaiiho Iehova i te taata ia faatere ia ratou. Ia au i te tuatapaparaa, aita to ratou e aravihi no te na reira, ua faatupu noa hoi te mau faatereraa taata atoa i te mauiui. Aita hoê aˈe tei faaore i te tamaˈi, te ohipa ino, te ohipa tia ore aore ra te maˈi.

E nafea te Atua e faaore ai i te ino i ravehia?

Te fafau ra te Bibilia e ua fatata te Atua i te haamau i te hoê ao apî parau-tia. (Petero 2, 3:13) O te feia anaˈe tei maiti i te here i te tahi atu e i te Atua te faatiahia ia ora i reira.—Deuteronomi 30:15, 16, 19, 20.

Te na ô atoa nei te Bibilia e i “te mahana haavaraa” e fatata roa maira, e faaore te Atua i te mauiui e te feia e na reira ra. (Petero 2, 3:7) I muri iho, e faatere te Arii ta te Atua i faatoroa, Iesu Mesia, i te huitaata faaroo. (Daniela 7:13, 14) Eaha ta te faatereraa a Iesu e faatupu? Te parau nei te Bibilia: “Area te feia mǎrû ra, e parahi ïa i te fenua, e oaoa ratou i te rahi o te hau.”—Salamo 37:11.

Ei Arii i te raˈi, e faaore Iesu i te ino i ravehia a patoi ai te taata ia Iehova “te tumu o te ora.” Oia atoa i te maˈi, te ruhiruhiaraa e te pohe. (Salamo 36:9) E faaora Iesu i te feia atoa e farii i ta ˈna faatereraa î i te here. Ia faatere mai oia, e tupu teie mau parau fafau Bibilia:

◼ “E ore hoi to reira e parau e, Ua paruparu vau i te maˈi.”—Isaia 33:24.

◼ “Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito.”—Apokalupo 21:4.

E ere anei i te mea mahanahana ia ite e ua  fatata te Atua i te faaore i te mau mauiui atoa mai ta ˈna i fafau? A tiai ai râ, ia papu ia tatou e noa ˈtu e te faatia nei oia i te mauiui, te faaroo nei oia i ta tatou mau pure.

Te vai mau ra te Atua. E nehenehe oia e faaroo ia oe, oia atoa ia mauiui e ia oto oe. E te hinaaro nei oia ia fanaˈo oe i te hoê oraraa aita e feaaraa e e mauiui faahou.