E haafatata ˈtu i Tei faaroo i te pure

MEA rahi te taata tiaturi i te Atua te ore e nehenehe e faataa no te aha ratou e faatupu ai i te faaroo, no te aha e pinepine e mea ino te haapaoraa aore ra no te aha te Atua e faatia ˈi i te mauiui. E pure noa iho â ïa ratou i te hoê Atua ta ratou e ore e taa ra.

E nehenehe râ oe e haafatata ˈtu â i te Atua. Ia taa oe i to ˈna huru e here ai oe ia ˈna, e faatupu oe i te faaroo mau tei niuhia i nia i te mau haapapuraa. (Hebera 11:1) Ia haapii oe i te parau mau no nia i te Atua, e nehenehe oe e ite o vai o ˈna e e paraparau ia ˈna mai te hoê hoa. A rave na i te hiˈoraa o te tahi mau taata tei pure na noa ˈtu e aita ratou i papu e te vai mau ra te Atua.

◼ Patricia, o tei faahitihia i roto i te tumu parau matamua. I te hoê mahana, ua paraparau o ˈna e e ahuru o to ˈna mau hoa no nia i te haapaoraa. “Ua faaite atu vau ia ratou e i to te hoê Ite no Iehova haereraa mai i ǒ matou no te paraparau e to ˈu papa o te ore hoi e tiaturi i te Atua, ua haere au i rapaeau mai no te ore e faaroo ia raua. Parau mai nei hoê hoa, ‘Peneiaˈe ua tano te mau Ite no Iehova.’

“Parau mai nei te tahi atu, ‘No te aha e ore ai e haere i te hoê o ta ratou mau putuputuraa no te ite?’ Tera iho â ta matou i rave. Noa ˈtu e ua feaa rii matou, ua tamau vetahi o matou i te haere no te mea noa ua farii maitai mai te mau Ite.

“Teie râ, i te hoê Tapati, ua faaroo vau i te tahi mea o tei taui i to ˈu huru. Ua faataa mai te taata orero no te aha te taata e mauiui ai. I reira noa vau i te taaraa e mea tia roa te taata i te omuaraa e ua haamata te hara e te pohe i te parare i te huitaata taatoa no te hoê noa taata. Ua faataa atoa te taata orero no te aha e titauhia ˈi ia pohe Iesu ia fanaˈo faahou te huitaata i tei erehia e te taata matamua. a (Roma 5:12, 18, 19) I tera taime, ua taa ia ˈu te mau mea atoa. ‘Te vai ra iho â te hoê Atua o te haapao maira ia tatou,’ ta ˈu ïa i manaˈo. Ua tamau vau i te haapii i te Bibilia e aita i maoro, no te taime matamua o to ˈu oraraa, ua nehenehe au e pure i te hoê ihotaata mau.”

◼ Allan, o tei faahiti-atoa-hia i roto i te tumu parau matamua. “I te hoê mahana, ua haere mai te mau Ite no Iehova i te fare e ua titau manihini ta ˈu vahine ia ratou ia tomo mai no to ˈna anaanatae i ta ratou i parau no nia i te ora mure ore i te fenua. Ua riri roa vau. Ma te vaiiho i te mau Ite i roto i te piha faafaaearaa, ua afai au i ta ˈu vahine i te vahi tunuraa maa a parau atu ai ia ˈna, ‘Aita oe e nehenehe e tiaturi i tera mau mea! Mea maamaa roa!’

“‘A haere ïa ia ratou ra e a faaite mai e ua hape ratou,’ ta ˈna ïa i parau mai.

 “Oia mau, aita hoê aˈe mea ta ˈu i nehenehe e faahape. Mea mǎrû mau râ raua e ua vaiiho mai na ˈu te hoê buka no nia i te tumu o te ora, ua poietehia anei tatou aore ra no roto mai tatou i te tauiuiraa o te mau mea ora. Mea maramarama maitai e te tano te haaferuriraa o tera buka. Faaoti atura vau i te ite hau atu â no nia i te Atua. Ua haamata vau i te haapii i te Bibilia e te mau Ite no Iehova e ua taa oioi ia ˈu e mea taa ê ta ˈna e parau ra i ta ˈu i manaˈo na no nia i te haapaoraa. A haapii ai au no nia ia Iehova, ua haamata vau i te faahiti i te mau mea taa maitai i roto i te pure. E huru to ˈu te titauhia ia taui, ua pure atura ïa vau no te ani i te tauturu. Ua papu ia ˈu e ua pahono mai Iehova i ta ˈu mau pure.”

◼ Andrew, o te ora ra i Beretane. “Noa ˈtu e e manaˈo etaeta to ˈu e e mea au roa na ˈu te ihi, ua tiaturi au i te haapiiraa o te tauiuiraa o te mau mea ora no te mea noa ua parau te taata e ua tupu mau te reira. Aita vau i hinaaro e tiaturi i te Atua no te mau mea ino atoa e tupu ra.

“I te tahi râ taime, i manaˈo na vau: ‘Mai te peu e e Atua to nia, te hinaaro nei au e taa  i te auraa o te oraraa. No te aha mea rahi roa ˈi te ohipa ino e te tamaˈi?’ Ia fifihia vau, e pure au i te tahi taime no te ani i te tauturu. Aita râ vau i ite o vai ta ˈu e paraparau ra.

“Ua horoa te tahi taata na ta ˈu vahine te api parau piahia e te mau Ite no Iehova: E ora anei teie nei ao? Tera iho â te uiraa ta ˈu i ui noa na. Ua ui atura vau no nia i te Bibilia, ‘Mea hoona anei ia hiˈopoa i te mau pahonoraa?’ I muri aˈe, i ta ˈu tau faafaaearaa ohipa, ua horoa mai te tahi taata i te buka Te Bibilia—Parau na te Atua aore ra na te taata? b I to ˈu iteraa e te tuati ra te Bibilia e te ihi, ua hinaaro vau e haapii hau atu â no nia i te Bibilia. No reira, i to te hoê Ite no Iehova pûpûraa ia ˈu te hoê haapiiraa Bibilia, ua farii au. A maramarama ˈi au i ta Iehova opuaraa, ua riro oia no ˈu ei ihotaata mau ta ˈu e nehenehe e paraparau tahaa ˈtu i roto i te pure.”

◼ Jan, tei paari i roto i te haapaoraa Porotetani i Lonedona. “Ua faarue au i te haapaoraa no te haavare e vai ra i roto e no te rahi o te mauiui. Ua faaea atoa vau i te haere i te haapiiraa e ua haamata ˈtura i te himene e i te hauti i te tita ia noaa mai te moni. I reira vau i te farereiraa ia Pat. Ua paari oia i roto i te haapaoraa Katolika e aita o ˈna i tiaturi faahou i te Atua mai ia ˈu.

“I ora na mâua e te tahi atu mau taata tei faarue i te haapiiraa e tei anaanatae i te mau haapaoraa no Hitia o te râ. I faaea na matou paatoa i roto i te hoê fare aita e taata to roto. I te maororaa po, i paraparau noa na matou tau hora no nia i te auraa o te oraraa. Noa ˈtu e aita mâua Pat i tiaturi i te Atua, ua manaˈo mâua e te vai ra iho â te tahi ‘puai o te atuatu ra i te ora.’

“I muri aˈe i te haereraa i te pae apatoerau no Beretane no te imi i te ohipa ei taata faataˈi upaupa, ua fanau vau i ta mâua tamaiti. I te hoê po, ua maˈihia o ˈna e ua pure atura vau i te Atua ta ˈu i ore i tiaturi na. I muri iti aˈe, ua fifi roa ˈtu â to mâua Pat mau taairaa e ua faarue au ia ˈna ma te rave i ta mâua aiû. Ua pure faahou vau no te ani i te tauturu ma te tiaturi e e faaroohia mai au. Aita vau i ite, teie râ, ua na reira atoa Pat.

“I tera iho â mahana, e piti Ite no Iehova tei patoto i to Pat opani e tei faaite atu i te tahi mau aratairaa Bibilia faufaa. Taniuniu mai nei Pat ia ˈu no te ani e e farii anei au i te apiti ia ˈna no te haapii i te Bibilia e te mau Ite. Ua haapii oioi mâua e no te faaoaoa i te Atua, e mea tia ia faaipoipo mâua. E ere râ hoi i te mea ohie no te fifi o to mâua mau taairaa.

“Ua hinaaro mâua e ite hau atu â no nia i te tupuraa o te mau parau tohu Bibilia, i te tumu o te mauiui e eaha te Basileia o te Atua. Ua haamata atura mâua i te taa e te anaanatae maira iho â te Atua, e ua hinaaro mâua i te rave i ta ˈna e parau ra. Ua faaipoipo aˈera mâua. Ua tauturu mai te paari no ǒ mai i te Parau a te Atua ra ia haapii maitai i ta mâua na tamarii e toru. Ua papu ia mâua e ua faaroo Iehova i ta mâua mau pure.”

A hiˈopoa roa ˈtu i te mau haapapuraa

Mai e mirioni atu â taata, aita te feia i faahitihia i roto i teie tumu parau i vare i te haapaoraa hape e ua ite ratou no te aha te Atua e faatia ˈi i te mauiui. Ua tapao anei oe i roto i te tupuraa taitahi e ua tiaturi papu ratou e te faaroo ra iho â Iehova i te mau pure i to ratou taa-maitai-raa i te Bibilia?

Te hinaaro ra anei oe e hiˈopoa i te mau haapapuraa e te vai mau ra te Atua? E oaoa te mau Ite no Iehova i te tauturu ia oe ia haapii i te parau mau no nia ia Iehova e e nafea ia haafatata ˈtu i ‘Tei faaroo i te pure.’—Salamo 65:2.

[Nota i raro i te api]

[Parau iti faaôhia i te api 10]

“A maramarama ˈi au i ta Iehova opuaraa, ua riro oia no ˈu ei ihotaata mau ta ˈu e nehenehe e paraparau tahaa ˈtu i roto i te pure”

[Hohoˈa i te api 9]

Ua niuhia te faaroo mau i nia i te mau haapapuraa e i nia i te iteraa i te parau mau no nia i te Atua