Na vai hoi e faatere ra i te ao nei?

AITA paha oe i farerei aˈenei i te mau tia o te ohipa mafia. Mea ite roa ratou i te huna i to ratou huru mau aore ra i te faanaho i ta ratou ohipa ino mai te fare tapearaa mai. Raau taero, taiataraa tamoni, hooraa i te taata e te vai ra ˈtu â, te parau rahi ïa i roto i te mau vea. E tapao faaite ïa e te vai ra iho â teie mau taata e mea atâta ratou.

Te faaite ra te Bibilia e te vai mau ra Satani. Mai te hoê tia o te ohipa mafia, te faaohipa ra oia i ‘te tapao e te parau-tia ore haavare.’ (Tesalonia 2, 2:9, 10) ‘Te faahua melahi ra oia ia ˈna iho no te maramarama,’ ia au i te Korinetia 2, 11:14. Na te ino ta ˈna i faatupu e haapapu maira e te vai ra te Diabolo. E varua ino itea ore oia. Mea fifi râ no te rahiraa ia farii i te reira no te tahi mau tiaturiraa hape matauhia. Ta tatou ïa e hiˈo mai e ta te Bibilia atoa e parau ra no nia ia ˈna.

◼ “No te aha te hoê Atua î i te here i poiete ai i te Diabolo?” Te parau ra te Bibilia e mea tia roa te Atua e te maitai. Eita ïa e tano ia manaˈo e ua poiete oia i te hoê varua ino e te aroha ore. Aita iho â oia i na reira. No nia i te Atua, te na ô ra te Deuteronomi 32:4: “Oia te Mato, o tei tia roa ta ˈna ohipa ra; o tei au atoa to ˈna ra mau haerea; e Atua parau mau, e te ino ore ra; e parau-tia ta ˈna e te titiaifaro!”—Salamo 5:4.

E nehenehe anei te hoê varua aore ra taata tia roa poietehia e te Atua e rave i te ino? Aita te Atua i poiete i te melahi e te taata mai te matini te huru. Ua horoa ˈtu oia i te tiamâraa e maiti. E nehenehe ïa ratou e maiti e rave i te maitai aore ra i te ino. E ia au i ta ratou i rave e parauhia ˈi e mea maitai anei aore ra mea ino.

Ua vaiiho te Atua ia ratou ia maiti, noa ˈtu e e maitiraa ino ta ratou i rave. Ua faahiti Iesu i te Diabolo tei faaohipa i to ˈna tiamâraa e maiti ma te tano ore. Te na ô ra te Ioane 8:44 e “aore oia i haapao i te parau mau.” Te auraa ïa e na mua ˈˈe, e varua tia roa te melahi tei riro mai ei Diabolo e ‘i haapao na oia i te parau mau.’ a Ua poiete te Atua ra o Iehova i te melahi e te taata ma te tiamâraa e maiti no to ˈna here e tiaturi ia ratou.—A hiˈo i te tumu parau  “E nehenehe anei te hoê taata tia roa e hara?” i te api 6.

◼ “E tavini te Diabolo na te Atua” No vetahi, tera te manaˈo ta te Bibilia e horoa ra i roto i te buka a Ioba. Te na ô ra te Ioba 1:7  e i haaati haere na te Diabolo i te fenua. Teie parau, ia au i te hoê tatararaa no nia i te Bibilia, no te mau mata huna ïa no Peresia i tahito o tei ratere haere e tei faaite pauroa i ta ratou i ite i to ratou arii. Ahani e mata huna te Diabolo na te Atua, eita ïa oia e parau i te Atua e i haaati haere na oia i te fenua. Te mairi ra te buka a Ioba i te Diabolo i te iˈoa ra Satani, oia hoi “Patoi.” (Ioba 1:6) E enemi rahi ïa oia no te Atua, e ere râ i te hoa. Nohea mai râ te manaˈo e e tavini te Diabolo na te Atua?

I te omuaraa o te senekele matamua, ua faataa te tahi mau buka ati Iuda e ere i te mea faaurua e te Atua e ua aimârô te Diabolo i te Atua. E auraro râ oia i te hinaaro o te Atua. I roto i ta ˈna buka, te faataa ra Jeffrey Russell taata tuatapapa e ua faariro te Porotetani ra o Martin Luther i te Diabolo ei mauhaa na te Atua, mai te hoê tipi fefe aore ra toˈi ta ˈna e faaohipa no te faaapu. Mea au roa na te toˈi e vaere, ta te rima puai o te Atua e tapea noa ia tupu to ˈna hinaaro. (Mephistopheles) Ua huru ê e rave rahi taata faaroo mea au na ratou te parau-tia i ta Luther  haapiiraa, tei fariihia i muri aˈe e Jean Calvin, taata maimi i te pae faaroo. E nafea te hoê Atua î i te here e nehenehe ai e faatia i te ino a faatupu atoa ˈi i te reira? (Iakobo 1:13) No teie haapiiraa e te mau ohipa riaria i tupu i te senekele 20 i ore ai te taata e rave rahi e tiaturi i te Atua e i te Diabolo.

◼ “Te Diabolo, o te ino ïa” Mai te peu e tera iho â, mea fifi roa ïa ia taa i te tahi mau irava Bibilia, mai te Ioba 2:3-6. Te paraparau ra te Atua ia vai? I te ino anei i roto ia Ioba, aore ra ia ˈna iho anei? E haapopou atoa anei oia ia Ioba no to ˈna mau huru maitatai, a vaiiho atu ai ia tamatahia oia e te ino? E ere roa ˈtu Iehova i te hoê Atua ino, “aore roa e parau-tia ore o roto ia ˈna,” ia au i te Salamo 92:15. Aita oia i ‘nanao i to ˈna rima’ no te haamauiui ia Ioba. Te taa ra ïa ia tatou e e varua te Diabolo tei faariro ia ˈna iho ei enemi o te Atua. E ere râ oia i te ino aore ra i te hoê huru ino o te Atua.

Na vai hoi e faatere ra i te ao nei?

I teie mahana, aita e rave rahi e tiaturi faahou ra e te vai ra te Diabolo. Ia hiˈohia râ te rahi o te ino, aita ˈtu e faataaraa maori râ o ˈna te tumu. No te mau tutavaraa e faaore i te manaˈo e te vai ra te Diabolo i faarue ai e rave rahi i te Atua e i te mau ture aveia morare atoa.

Ia au i te hoê rohipehe o te senekele 19, mea ite roa te Diabolo i te faatiaturi ia tatou e aita oia e vai mau ra. Ma te huna i to ˈna huru mau, te haafeaa ra oia i te taata no nia i te vai-mau-raa o te Atua. Mai te peu e aita te Diabolo, e manaˈo ïa te taata e o te Atua te tumu o te ino atoa a ore atu ai e tiaturi faahou ia ˈna. To te Diabolo ïa hinaaro.

Mai te hoê tia o te ohipa mafia, te huna ra te Diabolo i to ˈna huru mau ia raea ta ˈna fa. Eaha taua fa ra? Te pahono ra te Korinetia 2, 4:4 e ‘te haapouri ra te atua o teie nei ao i te feia aau faaroo ore, ia ore te maramarama o te evanelia hanahana o te Mesia, te hohoˈa o te Atua ra, ia anaana mai i roto ia ratou.’

Eaha ta te Atua e rave i teie varua maramarama te tumu o te ino e te mauiui atoa? E pahono to muri nei tumu parau i teie uiraa faufaa.

[Nota i raro i te api]

[Parau iti faaôhia i te api 5]

E tavini anei te Diabolo na te Atua aore ra e enemi no te Atua?

[Tumu parau tarenihia/Hohoˈa i te api 6]

 E nehenehe anei te hoê taata tia roa e hara?

Ua poiete te Atua ia Adamu ei taata tia roa e ua haamau i te tahi mau taotiaraa ia faatura oia no to ˈna maitai. Ia amu oia i te repo, te iriiri aore ra te raau, e fifi oia. E ia ouˈa oia mai nia mai i te hoê vahi teitei, ma te tâuˈa ore i te ture o te puai aratoraa, e pepe roa oia aore ra e pohe.

Ua faataa atoa te Atua eaha te mea maitai e eaha te mea ino. Ia ore te melahi aore ra te taata ta ˈna i poiete ma te tia roa e haapao i te mea maitai, e fifi to muri mai. No reira, ia ore oia e faaohipa maitai i to ˈna tiamâraa e maiti, e oioi oia i te hape a hara ˈtu ai.—Genese 1:29; Mataio 4:4.