Ua itehia mai anei oe e Iehova?
Ua itehia mai anei oe e Iehova?
“Ua ite te Fatu i to ˈna ihora.”—TIM. 2, 2:19.
1, 2. (a) Ua haapeapea Iesu no te aha? (b) Ia feruri tatou i teihea mau uiraa?
I TE hoê mahana, ua ui te hoê Pharisea ia Iesu: “Teihea te parau rahi i roto i te ture?” Ua pahono atu Iesu: “Hinaaro oe i to Atua ia Iehova ma to aau atoa . . . e ma to manaˈo atoa.” (Mat. 22:35-37) Mea here roa na Iesu i to ˈna Metua i te raˈi. Ua ora oia ma te haapeapea no to ˈna auhoaraa e o Iehova. Hou oia a pohe ai, ua faahiti oia i to ˈna auraro taiva ore i te Atua, ma te na ô: “Ia ˈu i haapao i te parau a tau Metua ra, e te vai herehia nei â vau e ana.”—Ioa. 15:10.
2 I teie mahana, e rave rahi te parau ra e mea here na ratou i te Atua. O tatou atoa. Teie râ te tahi mau uiraa mea faufaa ia feruri: ‘Ua ite anei Iehova ia ˈu i roto i te auraa e te farii ra oia ia ˈu? Eaha to Iehova manaˈo ia ˈu? Ei taata anei no ˈna?’ (Tim. 2, 2:19) E nehenehe tatou e faahoa roa ˈtu i te Arii o te ao taatoa. Auê te fanaˈo e!
3. No te aha mea fifi ai no vetahi ia tiaturi e e nehenehe e faahoa ia Iehova? Eaha râ te parau oaoa?
3 Teie râ, mea fifi no vetahi e here ra ia Iehova ia farii e e nehenehe e faahoa ia ˈna. Mea faufaa ore ratou i to ratou manaˈo. No Iehova râ, e ere ïa. E parau oaoa teie! (Sam. 1, 16:7) Ua faataa te aposetolo Paulo i to ˈna mau taeae Kerisetiano e ‘o te taata e hinaaro ra i te Atua te itehia mai e ana.’ (Kor. 1, 8:3) Ia here oe i te Atua e itehia mai ai oe e ana. A feruri na: No te aha oe e taio ai i teie vea? No te aha oe e tutava ˈi i te tavini ia Iehova ma to aau, manaˈo e puai atoa? No te aha oe i pûpû ai ia oe i te Atua a bapetizo atu ai? Te faataa ra te Bibilia e e hiˈo Iehova i te aau, a ite atu ai o vai tei “hinaarohia” e ana. E na ˈna e “faatae” mai ia ratou ia ˈna, oia hoi e titau manihini ia ratou ia faahoa ia ˈna. (A taio i te Hagai 2:7; Ioane 6:44.) No reira, mai te peu e te tavini ra oe ia Iehova, na ˈna e titau ra ia oe. E ore roa oia e faarue i te feia ta ˈna i faatae mai o te vai taiva ore. Mea faufaa roa ratou no ˈna e mea here roa na ˈna ia ratou.—Sal. 94:14.
4. No te aha e haamanaˈo ai e mea faufaa roa to tatou auhoaraa e o Iehova?
4 I teie nei e ua faatae mai te Atua ia tatou ia ˈna, ia vai herehia tatou e ana e tia ˈi. Te na ô ra te Iuda 21: “Ia vai maite outou i roto i te here o te Atua, i te tiairaa i te aroha o to tatou Fatu ra o Iesu Mesia, e tae noa ˈtu i te ora mure ore.” (Traduction du monde nouveau) Ia au i te Bibilia, e nehenehe te hoê taata e mairi i te faaroo aore ra e faarue i te Atua. (Heb. 2:1; 3:12, 13) Ei hiˈoraa, hou ta ˈna i parau i roto i te Timoteo 2, 2:19, ua faahiti Paulo ia Humenaio e ia Phileto. E au ra e i tavini na raua ia Iehova, ua faarue râ i muri aˈe i te parau mau. (Tim. 2, 2:16-18) Ua na reira atoa vetahi mau melo o te amuiraa no Galatia. (Gal. 4:9) E haamanaˈo anaˈe ïa e mea faufaa roa to tatou auhoaraa e o Iehova.
5. (a) Eaha na huru maitatai faufaa? (b) E hiˈo mai tatou i te aamu o teihea mau taata?
5 Te vai ra te tahi mau huru maitatai faufaa e itehia mai ai tatou e Iehova. (Sal. 15:1-5; Pet. 1, 3:4) Mai te faaroo e te haehaa. E hiˈo mai tatou e piti taata tei herehia e Iehova no to raua faaiteraa i taua na huru ra. E hiˈo atoa mai tatou i te hoê taata tei manaˈo e ua itehia mai oia e te Atua. Ua faarue râ Iehova ia ˈna no to ˈna teoteo. E nehenehe e huti mai i te haapiiraa faufaa o teie nau hiˈoraa.
Te metua no tei faaroo atoa
6. (a) Ua aha Aberahama no to ˈna faaroo i ta Iehova i fafau? (b) Ua aha Iehova ia Aberahama?
6 No to Aberahama ‘faaroo ia Iehova’ i parauhia ˈi oia te ‘metua no tei faaroo atoa.’ (Gen. 15:6; Roma 4:11) No to ˈna faaroo i vaiiho ai oia i to ˈna nohoraa, to ˈna mau hoa e ta ˈna faufaa no te haere i te hoê fenua atea. (Gen. 12:1-4; Heb. 11:8-10) Ua puai noa to Aberahama faaroo. Ua itehia te reira e rave rahi matahiti i muri aˈe, i to ˈna auraroraa i ta Iehova faaueraa e ‘pûpû ia Isaaka’ ta ˈna tamaiti ei tusia. (Heb. 11:17-19) Ua tiaturi Aberahama i ta Iehova i fafau e ua here roa Oia ia ˈna ei hoa no ˈna.—A taio i te Iakobo 2:22, 23.
7. Eaha ta Aberahama i ite no nia i ta Iehova i fafau e ua aha oia?
7 A ora ˈi oia, aita Aberahama i fatu i te fenua ta Iehova i fafau ia ˈna e aita oia i ite i to ˈna huaai i te riroraa “mai te one tahatai” te rahi. (Gen. 22:17, 18) Noa ˈtu râ, ua puai noa to ˈna faaroo ia Iehova. Ua ite oia e e tupu iho â ta te Atua i fafau e ua ora oia ia au i taua faaroo ra. (A taio i te Hebera 11:13.) Mai to Aberahama anei to tatou faaroo, a itehia mai ai tatou e Iehova?
E tiaturi anaˈe ia Iehova ma te faaroo
8. Eaha te tahi mau mea ta tatou e hinaaro roa?
8 Te vai ra paha te tahi mau mea ta tatou e hinaaro roa, e faaipoipo anei, e fanau i te tamarii e e oraora maitai. Mai tera iho â. Eita râ paha te reira e tupu. E nafea ïa? Tei ta tatou ïa e rave i roto i teie tupuraa e itehia ˈi te puai o to tatou faaroo.
9, 10. (a) Ua aha vetahi no te titau i ta ratou e hinaaro ra? (b) Eaha to outou manaˈo i te tupuraa o ta te Atua mau parau fafau?
9 Mea maamaa mau â ia titau i ta tatou e hinaaro ra ma te ore e auraro i te aratairaa a te Atua. E fifi to tatou auhoaraa e oia. Ua maiti vetahi i te tahi huru rapaauraa aita e tuati ra e ta Iehova mau aˈoraa. Ua farii te tahi atu i te hoê ohipa e aita to ratou e taime faahou no to ratou utuafare aore ra no te mau putuputuraa a te amuiraa. Ua faahinaaro vetahi i te hoê taata aita e tavini ra ia Iehova. Ia na reira te hoê Kerisetiano, aita ïa oia e tutava mau ra ia itehia mai oia e te Atua. A feruri na: Ahani Aberahama i onoono ia faatupu Iehova i ta ˈna i fafau, aore ra i imi i te nohoraa e ia tui to ˈna roo, aita râ i tiaturi ia ˈNa. Eaha ïa to Iehova huru? (A hiˈo i te Genese 11:4.) E manaˈo noa anei ïa oia ia Aberahama ei hoa no ˈna?
10 Te vai ra paha te tahi mau mea ta oe e hinaaro roa. Mea puai anei to faaroo no te tiaturi ia Iehova? Te fafau ra oia e na ˈna e haamâha i to mau hiaai tia. (Sal. 145:16) Eita paha te tahi mau parau fafau a Iehova e tupu oioi mai ta tatou i manaˈo. E faaite anaˈe râ i roto i to tatou oraraa e mai to Aberahama to tatou faaroo. E haamaitai mai Iehova.—Heb. 11:6.
Te haehaa o Mose e te teoteo o Kora
11. Eaha te haamaitairaa ta Kora i fanaˈo na mua ˈˈe?
11 E hiˈo mai tatou ia Mose e ia Kora. Ua faatura Mose i ta Iehova mau faanahoraa e faaotiraa e ua itehia mai oia e te Atua. Area Kora, ati Levi na Kohata, aita ïa. I fanaˈo na oia e rave rahi haamaitairaa. E au ra e ua ite mata oia i to Iehova faaoraraa i to ˈna nunaa i te miti Uteute, ua apiti atoa oia i to Iehova faautuaraa i te mau Iseraela faaroo ore i te mouˈa Sinai, e ua amo atoa i te afata faufaa. (Exo. 32:26-29; Num. 3:30, 31) Mea maoro ïa to ˈna taviniraa ia Iehova ma te taiva ore, a faatura ˈtu ai e rave rahi i Iseraela ia ˈna.
12. Ia au i te hohoˈa i te api 31, a faataa eaha tei tupu no te teoteo o Kora.
12 Tera râ, a haere ai ratou i te Fenua tǎpǔhia, ua manaˈo Kora e aita e tano ra ta te Atua huru aratairaa i to ˈna nunaa Iseraela. Hinaaro atura oia e taui i te mau mea. E 250 tavana tei turu ia ˈna. Ua tiaturi roa teie mau taata e e taairaa piri to ratou e o Iehova. Ua na ô ratou ia Mose e ia Aarona to ˈna tuaana: “Te faarahi hua na orua, no te mea te moˈa atoa nei te taata atoa e ati noa ˈˈe te amuiraa atoa nei, e tei roto[pu] Iehova ia ratou.” (Num. 16:1-3) Tera te teoteo mau! Ua parau atu râ Mose e na Iehova e faaite o vai mau â to ˈna mau taata. (A taio i te Numera 16:5.) I te ahiahi o to muri iho mahana, ua pohe Kora orure hau e te feia atoa i turu ia ˈna.—Num. 16:31-35.
13, 14. Mea nafea to Mose faaiteraa i to ˈna haehaa?
13 Area Mose, e taata mǎrû ïa e te haehaa. ‘E mamahu rahi to ˈna i to te taata atoa o te ao nei.’ (Num. 12:3) Ua pee maite oia i te aratairaa a Iehova. (Exo. 7:6; 40:16) Aita te Bibilia e parau ra e ua faahapa oia i ta Iehova i faanaho aore ra ua fiu i te rave i ta ˈna i faaue. No te hamani i te sekene, ua faataa maitai Iehova e nafea, eaha te û o te taura e ehia haavaro no te hoê paruru o te tapoˈi i te sekene. (Exo. 26:1-6) Ia faaue te hoê tiaau o te faanahonahoraa a te Atua ia na ô oe, e huru ê paha oe. O Iehova râ, e tiaau maitai roa ïa o te horoa i te ohipa na ta ˈna mau tavini ma te tiaturi e e rave maite ratou i te reira. Ia faataa maitai oia i te tahi mau mea, e tumu ïa. Aita Mose i riri ia Iehova no te faataaraa ˈtu eaha te rave. Aita atoa i manaˈo e te haafaufaa ore ra Iehova i to ˈna tiamâraa e maiti. Ua faaue râ oia i te mau tamarii a Iseraela ia rave mai ta Iehova i parau. (Exo. 39:32) Tera te haehaa mau! Ua taa ia Mose e te faaohipa ra Iehova ia ˈna no te rave i ta ˈNa ohipa.
14 Ua ite-atoa-hia to Mose haehaa i roto i te hoê tupuraa fifi mau. I te hoê mahana, ua riri roa Mose i te nunaa o te amuamu ra e aita ta ratou e pape. Aita ˈtura oia i faahanahana ia Iehova. Ua parau atura te Atua ia ˈna e e taata ê te aratai ia Iseraela i te Fenua tǎpǔhia. (Num. 20:2-12) E rave rahi hoi matahiti to raua Aarona faaoromai-noa-raa i tera nunaa. No teie noa râ hape, aita oia i ite i ta ˈna i tiai maoro na! Ua aha Mose? Noa ˈtu to ˈna peapea, ua farii haehaa oia i ta Iehova faaotiraa. Ua ite oia e e Atua parau-tia Iehova. (Deut. 3:25-27; 32:4) Ia manaˈo tatou ia Mose i teie mahana, ei taata ïa tei itehia mai e Iehova.—A taio i te Exodo 33:12, 13.
E auraro anaˈe ia Iehova ma te haehaa
15. Eaha te haapii mai i te teoteo o Kora?
15 E itehia mai tatou e Iehova ia farii tatou i te mau faatanoraa e ravehia e ia faatura tatou i te feia ta ˈna e faaohipa ra no te aratai i te amuiraa. Ua atea ê Kora e to ˈna mau apiti i te Atua no to ratou tiaturi rahi roa ia ratou, te teoteo e te ereraa i te faaroo. No Kora, e ruhiruhia noa Mose o te rave ra i ta ˈna iho mau faaotiraa. Ua moe râ ia ˈna e na Iehova e aratai ra i te nunaa. Aita ˈtura oia i faatura i te feia ta te Atua e faaohipa ra. Ahani oia i tiaturi ia Iehova, e tauturu oia ia ˈna ia taa no te aha mai tera ˈi aore ra e faatano ai. Ua teoteo râ oia. No reira i teie mahana, eita tatou e manaˈo i ta ˈna taviniraa taiva ore, ei taata râ tei faaroo ore ia Iehova.
16. E nafea to Mose haehaa e tauturu mai ai?
16 E faaararaa te tupuraa o Kora no te mau matahiapo e te tahi atu mau melo o te amuiraa i teie mahana. E titauhia te haehaa no te tiaturi ia Iehova e no te faaroo i te feia ta ˈna e faaohipa ra no te aratai i te amuiraa. E taata haehaa anei tatou e te mǎrû mai ia Mose? Te farii ra anei tatou i te hopoia a te mau taeae e aratai ra i te amuiraa, a auraro atu ai i ta ratou mau faaueraa? E haavî anei tatou ia tatou ia inoino tatou? Ma te na reira e farii mai ai Iehova. Ia haehaa e ia auraro tatou, e here roa oia ia tatou.
Ua ite Iehova i to ˈna mau taata
17, 18. Ia aha tatou e ite-noa-hia mai ai tatou e Iehova?
17 Mea maitai ia feruri tatou i te hiˈoraa o te feia ta Iehova i here e i titau manihini ei hoa no ˈna. E taata hara Aberahama raua Mose e e fifi to raua mai ia tatou. Ua itehia mai râ raua e Iehova ei taata no ˈna. Te faaite ra râ te hiˈoraa o Kora e e nehenehe tatou e faarue ia Iehova a ere atu ai i to ˈna auhoaraa. E uiui anaˈe ïa: ‘Eaha to Iehova manaˈo ia ˈu? Eaha ta teie mau hiˈoraa Bibilia e haapii maira?’
18 Te hiˈo nei Iehova i ta ˈna mau tavini taiva ore ei taata no ˈna. Mea mahanahana roa ïa. E faaite noa anaˈe i te faaroo, te haehaa e te tahi atu mau huru maitatai e here atu â ˈi te Atua ia tatou. E fanaˈoraa taa ê mau â ia itehia mai e Iehova. I teie mahana, te oaoa nei te feia ta ˈna e farii ra e e fanaˈo ratou a muri aˈe i te mau haamaitairaa faahiahia.—Sal. 37:18.
Te haamanaˈo ra anei outou?
• Eaha te auraa ia itehia mai tatou e Iehova?
• E nafea ia pee i te faaroo o Aberahama?
• Eaha ta Kora e ta Mose e haapii maira?
[Uiraa haapiiraa]
[Hohoˈa i te api 29]
E faaroo anei to tatou mai to Aberahama e e tupu iho â ta Iehova i fafau?
[Hohoˈa i te api 31]
Aita Kora i auraro i te aratairaa
[Hohoˈa i te api 32]
Ua itehia mai anei oe e Iehova ei taata auraro haehaa i te aratairaa?
