Mai te aha te veve rahi?

E FIFI atâta te veve rahi. Aita e navai ra te maa, te pape e te mori. Aita atoa e nohoraa, e ravea rapaauraa e e haapiiraa au maitai. Hoê miria taata tei roto i tera ati, e au ïa i te huiraatira atoa no Afirika. Aita râ te rahiraa o te taata no Europa Tooa o te râ e Marite Apatoerau i farerei aˈenei i te hoê taata i roto i te veve rahi. E haamatau anaˈe ïa i te tahi.

Te ora ra Mbarushimana, ta ˈna vahine e ta ˈna na tamarii e pae i Rwanda, i Afirika. Ua pohe te tahi atu tamarii i te maˈi malaria. Te parau ra oia: “Ua vavahi to ˈu papa e ono tuhaa i nia i to ˈna fenua. No te nainai râ o ta ˈu tuhaa, haere atura matou e faaea i roto i te hoê oire. Te amo nei mâua ta ˈu vahine i te pute ofai e one. Aita e haamaramarama to to matou fare. E tii matou i te pape i te hoê apoo pape i te fare mutoi. Hoê tamaaraa ta matou i te mahana, aita anaˈe râ e ohipa, aita ïa e maa no te mahana taatoa. Ia tupu te reira, e haere au i rapae, e mauiui hoi au ia faaroo i ta ˈu mau tamarii ia taˈi i te poia.”

Te tataî nei Victor e Carmen i te tiaa no te ora. Te ora nei raua e ta raua na tamarii e pae i te hoê oire moemoe i Bolivia. Ua tarahu raua i te hoê piha i roto i te hoê fare tahua paparari aita e uira e te punu fare apoopoo. No te rahi o te tamarii i te fare haapiiraa, ua hamani Victor i te hoê iri papairaa ia apiti atu ta ˈna tamahine i te haapiiraa. E haere avae raua ta ˈna vahine 10 kilometera i te atea no te tâpû i te vahie no te tunu i te maa e no te tahu i te pape inu. “Aita ta matou e haumitiraa,” ta Carmen ïa e parau ra. “E haere ïa matou i te tahora pape, faaohipa-atoa-hia hoi no te hopu e no te faarue i te pehu. E pinepine te tamarii i te maˈihia.”

Te ora ra Francisco e Ilídia i te hoê oire iti i Mozambique. E maha tamarii nainai ta raua i teie nei, ua pohe hoi hoê i te maˈi malaria i to te fare maˈi hinaaro-ore-raa e rapaau ia ˈna. Te faaapu ra raua i te raiti e te umara i nia i to raua tâpû fenua iti, ta ratou ïa maa no e toru avaˈe. Te na ô ra Francisco: “Aita  anaˈe e maa, no te mea aita i ûa rahi aore ra ua eiâhia te reira, e tâpû e e hoo ïa vau i te ofe no te mau paturaa fare ia noaa mai maa moni. E haere avae atoa mâua e piti hora i te uru aihere no te imi i te vahie. E piti taamu vahie ta mâua ta ˈu vahine, hoê no te tunu i te maa e te tahi atu no te hoo.”

No e rave rahi mea tano ore mau teie ao. Te ora ra hoi 1 taata i nia i te 7 mai ia Mbarushimana, Victor e Francisco, a ora ai e miria taata i roto i te ruperupe aita i itehia aˈenei. Ua tamata vetahi i te arai i te reira. E hiˈopoa to muri nei tumu parau i ta ratou mau tutavaraa e tiaturiraa.

 [Hohoˈa i te mau api 2, 3]

Carmen e ta ˈna na tamarii e piti e rave ra i te pape i te tahora pape