E parau tohu faufaa roa ino

“E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira.”—MATAIO 24:14.

TE FARII ra te mau aivanaa Bibilia e mea faufaa mau teie irava. E ohipa na te ao atoa nei hoi te faataahia ra i ǒ nei. Mea faufaa atoa no te mea te faaite ra eaha te mea tia ia rave te mau Kerisetiano: te pororaa o te na mua noa ˈˈe e o te tapao i te tupuraa faufaa rahi e ati aˈe te ao ta Iesu i parau “te hopea.”

Te tupu nei teie parau tohu. Ia anaanatae atu oe, e titauraa e e faaararaa atoa hoi to roto i te evanelia aore ra parau apî maitai. Na oe e maiti: e farii i te Basileia o te Atua aore ra e patoi atu. E ohipa te reira i nia i to oe oraraa taatoa.

A hiˈo na i te mau irava tapiri. Tau mahana hou Iesu i rîhia ˈi, ua haere mai te mau pǐpǐ e ui ia ˈna no nia i te ananahi. Ua hinaaro ratou e ite no nia i te haamauraa o te Basileia o te Atua, ta Iesu i faahiti pinepine na, e i “te hopea o teie nei ao.”—Mataio 24:3.

Ua tohu atura Iesu e e tupu te tamaˈi, te oˈe, te maˈi rahi, e te aueueraa fenua rahi na te ao atoa nei. Ua na ô atoa oia e e maraa te ohipa ino, e haavare te mau aratai o te mau haapaoraa hape i e rave rahi, e ririhia e e hamani-ino-hia atoa te mau Kerisetiano mau. E parau peapea anaˈe teie.—Mataio 24:4-13; Luka 21:11.

E parau apî maitai atoa râ. I muri iho, ua faahiti Iesu i to nia nei mau parau, tei haamaere e tei faaitoito i te taata i te roaraa o te mau senekele. Noa ˈtu e te farii ra te taata i te faufaaraa o ta Iesu mau parau, mea taa ê to ratou maramaramaraa. Eaha mau tera evanelia? Eaha te Basileia? Na vai e faatupu i teie parau tohu e afea? E eaha “te hopea”? E hiˈo anaˈe ïa.

[Hohoˈa i te mau api 2, 3]

 Papai-faahou-raa o na evanelia e maha no Washington. Teie te Mataio 24:14

[Faaiteraa i te tumu]

No roto mai i te buka Facsimile of the Washington Manuscript of the Four Gospels in the Freer Collection 1912