Ta te Parau a te Atua e haapii maira

O vai te Atua?

I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.

1. O vai te Atua?

Na te Atua mau i poiete i te mau mea atoa. Ia au i te Bibilia, o ˈna te “Arii hau mure ore,” oia hoi aita to ˈna e haamataraa e hopea. (Timoteo 1, 1:17) Ia haamori tatou i te Atua anaˈe, o ˈna hoi te Tumu o te ora.—A taio i te Apokalupo 4:11.

2. Mai te aha to te Atua huru?

Aore roa e taata i ite i te Atua, e Varua hoi oia. E huru ora teitei aˈe ïa oia i te mau mea ora i te fenua nei. (Ioane 1:18; 4:24) E itehia to te Atua huru i roto i ta ˈna i poiete. Ei hiˈoraa, ia hiˈo tatou i te nehenehe e te rau o te mau hotu e tiare, e ite tatou i to te Atua here e paari, e te rahi o te ao nui i to ˈNa ïa puai.—A taio i te Roma 1:20.

E haapii atu â tatou no nia i to te Atua huru maoti te Bibilia. Ei hiˈoraa, e ite tatou i ta te Atua e au e e ore e au, to ˈna huru e te taata e i roto i te mau tupuraa taa ê.—A taio i te Salamo 103:7-10.

3. E iˈoa anei to te Atua?

Ua na ô Iesu: “E to matou Metua i te ao ra, ia raa to oe iˈoa.” (Mataio 6:9) Mea rahi to te Atua iˈoa toroa, hoê anaˈe râ iˈoa to ˈna. E faahitiraa taa ê to to ˈna iˈoa i roto i tera e tera reo. I ǒ tatou, o “Iehova” ïa.—A taio i te Salamo 83:18.

I roto e rave rahi Bibilia, ua monohia to te Atua iˈoa e te mau iˈoa toroa Fatu aore ra Atua. A papaihia ˈi râ te Bibilia, e itehia te iˈoa o te Atua fatata e 7 000 taime. Ua faaite Iesu i to te Atua iˈoa ia ˈna i faataa i te Parau a te Atua i te taata e ua tauturu ia ratou ia ite ia ˈNa.—A taio i te Ioane 17:26.

 4. Te tâuˈa maira anei Iehova?

Te anaanatae ra Iehova ia tatou ma te faaroo i ta tatou mau pure. (Salamo 65:2) Te faaite ra anei te mauiui rahi e aita te Atua e tâuˈa maira? No vetahi, te tamata maira te Atua. Te hape nei râ ratou, te na ô ra hoi te Bibilia: “Eiaha roa te parau ino ra e hurihia ˈtu i te Atua!”—Ioba 34:10; a taio i te Iakobo 1:13.

Te haafaufaa ra te Atua ia tatou ma te ho mai i te tiamâraa e maiti. Na tatou iho e maiti e tavini ia ˈNa, e ere anei i te mea au? (Iosua 24:15) Mea rahi te mauiui no to vetahi ê hoi maitiraa e rave i te ino. Te ooo, aore ra oto, nei Iehova i teie mau ohipa tia ore.—A taio i te Genese 6:5, 6.

Ua fatata Iehova na roto ia Iesu i te faaore i te mauiui e te feia e na reira ra. E tumu papu râ to Iehova no te faatia i te mauiui maa taime.—A taio i te Isaia 11:4.

5. Eaha ta te Atua e hinaaro ia rave tatou?

Ua poiete Iehova ia tatou ia nehenehe tatou e ite e e here ia ˈna. Te hinaaro ra oia ia ite tatou i te parau mau no nia ia ˈna. (Timoteo 1, 2:4) E riro mai te Atua ei hoa ia haapii tatou i te Bibilia.—A taio i te Maseli 2:4, 5.

Na Iehova i ho mai i te ora. Ia rahi aˈe ïa to tatou here ia ˈna i te tahi atu. E faaite anaˈe i to tatou here ma te pure ia ˈna e te rave i ta ˈna e ani maira. (Maseli 15:8) Te ani maira Iehova ia here ia vetahi ê.—Mareko 12:29, 30; Ioane 1, 5:3.

No te faahohonu atu â, a hiˈo i te pene 1 o teie buka Eaha ta te Bibilia e haapii mau ra?, piahia e te mau Ite no Iehova.

[Hohoˈa i te api 11]

E tumu papu anei ia faatia i te mauiui maa taime?