Pure

3 E nafea?

TE MEA faufaa roa i roto e rave rahi tutuu faaroo, o to te taata iho ïa huru a pure ai oia, mai te tino anei, te huru paraparau, e te peu tumu. Te tauturu nei te Bibilia ia tatou, eiaha ia haamau i te feruriraa i nia i te reira, ia hiˈo râ i te tahi mau tuhaa faufaa aˈe o teie uiraa: “E nafea ia pure?”

Ia au i te Bibilia, e rave rahi vahi e huru tiaraa ta te mau tavini haapao maitai a te Atua i rave a pure ai ratou. Ua na reira ratou ma te mamû aore ra ma te reo puai ia au i te mau tupuraa. Ua pure atoa ratou ma te hiˈo atu i te raˈi aore ra ma te piˈo i raro. Aita ta ratou e hohoˈa, e korona, aore ra e buka pure, ua pure noa râ ratou ma to ratou aau atoa, e na roto i ta ratou iho mau parau. No te aha te Atua i faaroo ai i ta ratou pure?

Mai tei faataahia ˈtu i roto i te tumu parau na mua ˈtu, ua pure ratou i te Atua anaˈe ra, ia Iehova. Teie te tahi atu â tumu faufaa. Te na ô ra te Ioane 1, 5:14: “Teie taua taiâ ore no tatou i noaa ia ˈna ra, ia ani noa ˈtu tatou i te mau mea atoa i au ia ˈna ra, te faaroo maira ïa oia ia tatou.” E titauhia ia au ta tatou mau pure i to te Atua hinaaro. Eaha ïa te auraa?

No te pure ia au i te hinaaro o te Atua, e mea tia ia ite tatou eaha to ˈna hinaaro. O te haapiiraa ïa i te Bibilia te hoê tuhaa faufaa o te pure. Te auraa anei e eita te Atua e faaroo mai ia tatou no te mea e ere tatou i te aivanaa Bibilia? Eita, te titau maira râ te Atua ia haapao tatou i to ˈna hinaaro, ia taa e ia ohipa ia au i te reira. (Mataio 7:21-23) E mea tia ia pure ia au i ta tatou e haapii ra.

A haapii ai tatou no nia ia Iehova e i to ˈna hinaaro, e rahi to tatou faaroo, o teie te tahi tumu faufaa ˈtu â no te pure. Ua na ô Iesu: “Te mau mea atoa ta outou e ani ma te faaroo, ia pure, e noaa ïa ia outou.” (Mataio 21:22) Te faaroo, e ere ïa i te vare-haere-noa-raa, o te tiaturiraa râ i te mau mea aore hoi e itehia, paturuhia e te mau faaiteraa puai mau. (Hebera 11:1) Eita e tia ia ite ia Iehova. Ua î râ te Bibilia i te mau haapapuraa e e mea mau te Atua, e nehenehe oia e tiaturihia, e ua ineine iho â oia i te pahono i te mau pure a te feia e faatupu i te faaroo ia ˈna. Hau atu â, e nehenehe noa tatou e ani ia rahi atu â to tatou faaroo i te mea e ua oaoa Iehova i te ho mai i ta tatou e hinaaro ra.—Luka 17:5; Iakobo 1:17.

Teie te tahi atu tuhaa faufaa e nafea ia pure. Ua parau Iesu: “Aore roa e taata e tae i te Metua ra, maori râ ei ia ˈu.” (Ioane 14:6) O Iesu ïa te ravea e haafatata ˈtu ai tatou i te Metua ra ia Iehova. Ua faaue hoi Iesu i ta ˈna  mau pǐpǐ ia pure ma to ˈna iˈoa. (Ioane 14:13; 15:16) E ere te auraa e e pure tatou ia Iesu. E pure râ tatou ma te iˈoa o Iesu, ma te haamanaˈo e maoti o ˈna e nehenehe ai tatou e haafatata ˈtu i to tatou Metua moˈa e te tia roa.

I te hoê taime, ua ani atu ta Iesu mau pǐpǐ piri roa ˈˈe: “E te Fatu, a haapii mai ia matou i te pure.” (Luka 11:1) Mea papu, aita ratou e ani atura no nia i te mau mea ta tatou i aparau noa aˈenei. Te hinaaro mau nei râ ratou e ite no nia i te mau mea e ani, ia ratou i parau, ‘Ia pure matou no teihea mea?’

[Parau iti faaôhia i te api 6]

Ia pahonohia te mau pure, ia au te reira i to te Atua hinaaro, ia pûpûhia ma te faaroo, e ia faataehia ma te iˈoa o Iesu