Aita raua e mǎtaˈu faahou ra i te hopea

I TE hopea o te mau matahiti 1970, ua papu ia Gary raua Karen e ua fatata te hopea o teie nei ao. Ua faarue atura raua i te oire no te ora i te mataeinaa e ua faaoti e e ravai noa raua ia raua. Ua hinaaro raua e ora ˈtu.

Ia manuïa, ua hoo raua i te mau buka, ua apiti atu i te mau faaineineraa e apooraa, e ua aparau i te taata e rave rahi roa. Ua faaapu e ua tanu raua e 50 raau hotu nainai; ua haapue i te huero e te taihaa; ua haapii i te tanu e i te haaputu i te maa, i te tupai e i te tunu atoa i te animara. Ua ite Karen eaha te mau raau tupu e te mau aˈa te nehenehe e amu aita anaˈe e maa. Ua ite Gary i te hamani i te hinu i te to popaa, i te umu auri tahuhia e te raau, e i te hoê fare tei ore e titau i te mau mea no rapae.

“No te mau tupuraa ino mau na te ao atoa i tera taime,” ta Karen ïa e parau ra, “ua tiaturi au e ua fatata te huitaata i te mou.” Te faataa ra Gary: “Mai te tahi atu feia apî, ua tutava vau i te faaore i te au-ore-raa i te nunaa ê, te tamaˈi i te fenua Vietnam, e te ohipa piˈo. Ua ite oioi râ vau e eita e manuïa. No ˈu, e au ra e ia tamau noa mai tera, na te huitaata iho e haamou ia ˈna iho.”

“I te hoê po,” ta Gary e parau ra, “i te mea e e taime â to ˈu, ua rave au i te hoê Bibilia e ua taio atu mai  Mataio e tae atu i te Apokalupo. I na po e maha i muri iho, ua na nia iho faahou vau i te taio. I te poipoi aˈe, ua parau vau ia Karen: ‘Te ora nei tatou i te mau mahana hopea. Fatata te Atua i te tamâ i te fenua. E titauhia ia imi taua i te feia e ora ˈtu.’” Ua haere atura Gary e Karen i tera e tera haapaoraa, ma te imi i te feia e faaineine ra ia ratou no te hopea.

Aita i maoro, ua patoto maira te hoê Ite no Iehova, e ua haamata ihora te hoê haapiiraa Bibilia. Te haamanaˈo ra Karen: “Ua oaoa roa vau e ua faataa-maitai-hia mai te mau Papai. Te parau mau no nia i te tau hopea, o ta ˈu hoi i imi na, ua itea mai ïa ia ˈu. E tiaturiraa papu te vai ra no a muri aˈe. Te mea maitai roa ˈtu â râ, ua tupu te hoê auhoaraa i rotopu ia ˈu e te Metua i te raˈi, te Atua Poiete o te ao taatoa nei.”

Te na ô ra Gary: “E auraa mau atura to to ˈu oraraa. Ia ˈu i haamata i te haapii i te Bibilia, aita vau i fiu. Ua taio vau i te mau parau tohu Bibilia, ua hiˈopoa i te mau haapapuraa e ua tupu mau te reira, e ua papu ia ˈu e fatata te Atua i te ohipa mai. Feruri aˈera vau, ‘E titauhia ia faaineine te taata ia ratou no te oraraa ta te Atua e hinaaro no tatou, eiaha râ no te haamouraa.’” E manaˈo maitai atura to Gary e Karen no te a muri aˈe. Aita raua i haapeapea faahou no nia i te hopea o teie nei ao. Ua tiaturi râ e e faatitiaifaro te Atua i te mau fifi o te huitaata e e faariro i te fenua ei Paradaiso.

Tau 25 matahiti i muri aˈe, te aha nei Gary raua Karen? Te na ô ra Karen: “Te tamau noa nei au i te atuatu i to ˈu here no Iehova e to ˈu tiaturi ia ˈna, e te tutava ra vau i te tauturu ia vetahi ê ia na reira atoa. Te tururaa te tahi i te tahi, ta maua ia Gary e rave ra ia vai puai e tahoê noa to maua utuafare no te haamori i te Atua. Te tutava ra maua ia naho noa e ia vai ohie noa to maua oraraa no te haapao ia vetahi ê e to ratou mau hinaaro.”

Te na ô ra Gary: “Te pure tamau nei au ia tae mai te Basileia o te Atua no te tamahanahana i te mau mirioni taata. I te mau taime atoa ia tufa vau i te parau apî maitai o te Basileia o te Atua ia vetahi ê, e pure au ia nehenehe te tahi aˈe taata ia faaroo mai i te tiaturiraa Bibilia ta ˈu e poro atura. A tau 25 matahiti i teie nei to Iehova pahonoraa ma te au i tera pure. Te tiaturi ra maua e fatata Iehova i te hopoi mai i te mau tauiraa rahi i te fenua, aita râ maua e mǎtaˈu faahou ra i te hopea.”—Mataio 6:9, 10; Petero 2, 3:11, 12.

[Hohoˈa i te api 9]

Te oaoa nei Gary raua Karen i te tauturu ia vetahi ê ia noaa te tiaturiraa maoti te Bibilia