A haapii i ta oe mau tamarii

Ua haapii Iesu ia faaroo

E MEA fifi anei no oe ia faaroo, aore ra ia auraro, i te tahi taime?— a E ere i te mea maere mai te peu e e. E ere i te mea ohie no te mau taata atoa. Ua ite anei oe e ua haapii atoa Iesu ia faaroo?—

E mea tia ia faaroo te mau tamarii atoa ia vai?—E, ia papa raua mama. Te na ô ra te Bibilia: “E faaroo i to outou mau metua i te Fatu ra.” (Ephesia 6:1) O vai te papa o Iesu?— O te Atua, o Iehova, e o ˈna atoa to tatou Metua. (Mataio 6:9, 10) Mai te peu e ua parau mai oe e o Iosepha te papa o Iesu e o Maria to ˈna mama, ua tano atoa oe. Ua ite anei oe mea nafea raua i te riroraa mai ei papa e ei mama no ˈna?—

Ua faaite te melahi Gaberiela ia Maria e nafea oia e riro mai ai ei mama ma te ore e taoto e te hoê tane. E hapû Maria maoti te hoê semeio rahi a Iehova. Ua faataa Gaberiela ia Maria: “Na te mana o te Teitei e tamǎrǔ i nia iho ia oe, e parauhia ˈi hoi tena na tamaiti moˈa, o te Tamaiti na te Atua.”—Luka 1:30-35.

Ua rave te Atua i te ora o ta ˈna Tamaiti i nia i te raˈi e ua tuu mai i roto ia Maria. Rahi mai nei ïa oia i roto i te opu o Maria mai vetahi atu mau aiû i roto i te opu o to ratou mama. Fatata e iva avaˈe i muri aˈe, fanauhia mai Iesu. I taua area taime ra, ua faaipoipo Iosepha ia Maria. No te rahiraa o te taata, o ˈna ïa te papa mau o Iesu. I te mea mau râ, e papa faaamu oia no ˈna. E piti ïa papa to Iesu!

I te 12raa noa o to ˈna matahiti, ua faaite Iesu i to ˈna here rahi i to ˈna Metua i te raˈi ra o Iehova. I tera taime, mai ta ratou i matau, ua tere roa te utuafare o Iesu mai Nazareta ˈtu i Ierusalema no te oroa Pasa. I to ratou râ hoˈiraa mai, aita Iosepha raua Maria i haapao e aita o Iesu. Te uiui ra paha ïa oe, mea nafea hoi to raua haamoeraa ia Iesu?—

Ua fanau â Maria raua Iosepha i te tamarii. (Mataio 13:55, 56) Peneiaˈe ua na muri atoa mai te fetii ia ratou, mai ia Iakobo e Ioane e to raua na metua o Zebedaio e o Salome, to Maria paha tuahine. Ua manaˈo paha o Maria e tei ia ratou ra Iesu.—Mataio 27:56; Mareko 15:40; Ioane 19:25.

I to Iosepha raua Maria iteraa e aita o Iesu, hoˈi oioi aˈera raua i Ierusalema, e imi haere atura ia ˈna ma te peapea. I te toruraa o te mahana, itehia mai nei oia i roto i te hiero. Parau atura Maria ia ˈna: “Eaha oe i na reira mai ai ia mâua? inaha i imi noa na mâua o to metua tane ia oe ma te oto.” Pahono mai ra râ Iesu: “Eaha orua i imi ai ia ˈu? aita orua i ite, e ia haapao vau i ta tau metua e tia ˈi?”—Luka 2:45-50.

I to oe manaˈo, ua hape anei Iesu i te pahonoraa i to ˈna mama mai te reira?—  Ua ite maitai to ˈna na metua e mea au na ˈna ia haamori i te Atua i te hiero. (Salamo 122:1) I to Iesu manaˈo, te vahi matamua i reira raua e imi ai ia ˈna, tei te hiero ïa o te Atua. Ua tano Iesu, e ere anei?— I muri aˈe, ua tapea noa Maria i ta Iesu i parau.

Eaha to Iesu huru i nia ia Iosepha raua Maria?— Te na ô ra te Bibilia: “Hoˈi maira raua e [o Iesu] atoa ra i Nazareta, faaroo atura ia raua.” (Luka 2:51, 52) Eaha te haapii mai i to Iesu hiˈoraa?— E, e mea tia ia faaroo atoa tatou i to tatou mau metua.

E ere râ i te mea ohie noa no Iesu ia faaroo atoa i to ˈna Metua i te raˈi.

I te po hou to ˈna poheraa, ua ani Iesu ia Iehova e taui anei Oia i ta ˈNa e hinaaro ia rave oia. (Luka 22:42) Ua faaroo râ Iesu i te Atua, noa ˈtu e e ere i te mea ohie. Te parau ra te Bibilia e “i ite oia i te auraro i to ˈna ra mau pohe.” (Hebera 5:8) I to oe manaˈo, e nehenehe atoa anei tatou e haapii i te reira?—

[Nota i raro i te api]

UIRAA:

▪ Mea nafea to Maria riroraa mai ei mama no Iesu, e mea nafea to Iesu fanaˈoraa e piti papa?

▪ No te aha to Iesu na metua i ore ai i ite e aita oia ia raua ra?

▪ No Iesu, ihea to ˈna na metua e imi ai ia ˈna?

▪ Eaha ta oe e haapii i to Iesu hiˈoraa?

[Hohoˈa i te api 13]

I to oe manaˈo, no te aha e mea tia ˈi ia imi na mua Iosepha raua Maria ia Iesu i te hiero?