E haafatata ˈtu i te Atua

E haapao oia i to tatou mau taotiaraa

Levitiko 5:2-11

UA PARAU te hoê vahine no nia i ta ˈna mau tutavaraa ia mauruuru te Atua ia ˈna: “Ua faaitoito iho â vau, aita râ i navai i to ˈu manaˈo.” Te farii ra anei te Atua ra o Iehova i te mau tutavaraa maitai roa ˈˈe a ta ˈna mau tavini? Te haapao ra anei oia i to ratou aravihi e tupuraa? No te pahono i teie mau uiraa, e mea maitai ia hiˈopoa tatou i ta te Ture a Mose e parau ra i roto i te Levitiko 5:2-11 no nia i te tahi mau tusia.

I raro aˈe i te Ture, ua titau te Atua i te mau tusia rau no te faaore i te hara. I roto i te mau tupuraa e faahitihia ra i roto i teie mau irava, ua hara ru noa te hoê taata ma te opua ore. (Irava 2-4) I to ˈna iteraa e ua hara o ˈna, ia faˈi ïa oia i ta ˈna hara e ia hopoi i te hoê tusia taraehara, ‘ei ufa pinia mamoe aore ra ei pinia puaaniho.’ (Irava 5, 6) E nafea râ oia aita anaˈe ta ˈna e pinia mamoe aore ra puaaniho no to ˈna veve? Ua titau anei te Ture ia hoo tarahu mai oia i taua animara ra, a aitarahu atu ai? E rave anei oia i te ohipa ia pee tera tarahu, a maoro atu ai te faaoreraa i ta ˈna hara?

Ua parau te Ture no nia i to Iehova anaanatae î i te here: “Ia ore ia tia ia ˈna ia hopoi mai i te pinia mamoe, e te pinia puaaniho, ei uupa ta ˈna e hopoi mai ia Iehova ia piti aˈe, e aore ïa, ia piti aˈe uuairaˈo, no taua hara i ravehia e ana ra; ei taraehara.” (Irava 7) Mai te peu e e Iseraela veve roa oia no te pûpû i te hoê mamoe, e oaoa ïa te Atua i te farii i te tahi mea ta ˈna e nehenehe e hopoi mai, e piti uupa aore ra e piti uuairaˈo.

E nafea te taata ia ore e pee ia ˈna e piti manu? Ua parau te Ture: “Ei faraoa huˈa ta ˈna e hopoi mai hoê omera [fatata hoê kilo], ei taraehara na ˈna.” (Irava 11) No te feia rii anaˈe i faaoti ai Iehova e farii i te hoê tusia taraehara ma te ninii ore i te toto. a I Iseraela, aita te feia veve i ere i te haamaitairaa o te faaoreraa i te hara aore ra o te faahauraa e te Atua.

Eaha ta te mau tusia taraehara a te Ture e haapii maira no nia ia Iehova? E Atua aumihi oia o te taa i te huru o te taata e o te haapao i te mau taotiaraa o ta ˈna mau tavini. (Salamo 103:14) Te hinaaro ra oia ia haafatata ˈtu tatou ia ˈna e ia atuatu i te taairaa maitai e o ˈna, noa ˈtu e tei roto tatou i te mau tupuraa fifi, mai te matahiti rahi, te maˈi, te mau hopoia utuafare aore ra te tahi atu. E tamahanahanahia tatou i te iteraa e e mauruuru te Atua ra o Iehova ia rave tatou i tei maraa ia tatou.

[Nota i raro i te api]