E haafatata ˈtu i te Atua

Te faataa ra Iehova iho i to ˈna mau huru maitatai

Exodo 34:6, 7

E NAFEA oe e faataa ˈi i te Atua—to ˈna huru e ta ˈna haaraa i roto i te mau tupuraa taa ê? A feruri na e e ani roa ˈtu oe i te reira i te Atua iho, a faaroo atu ai ia ˈna ia faataa mai i to ˈna iho mau ateriputi. Ua ora te peropheta Mose i tera tupuraa. Auaa e ua faauruhia oia ia papai i te mea i tupu.

I te mouˈa Sinai, ua taparu Mose ia Iehova: “E faaite mai oe i to oe huru hanahana ra.” (Exodo 33:18) I te mahana i muri aˈe, ua fanaˈo taa ê te peropheta i te hoê hiˈoraa o te hanahana o te Atua. a Aita Mose i tataratara huˈahuˈa i ta ˈna i ite i roto i te orama nehenehe mau. Ua faatia râ oia i te tahi mea faufaa hohonu roa ˈtu â—ta te Atua i parau. E hiˈopoa anaˈe eaha ta Iehova i parau, mai tei itehia i roto i te Exodo 34:6, 7 (MN).

Ta Iehova e faaite matamua, oia ïa “e Atua aroha hamani maitai noa e te aau maitai” oia. (Irava 6) Ia au i te hoê aivanaa Bibilia, te faataa ra te taˈo Hebera faaohipahia no “aroha hamani maitai” i to te Atua “aumihi î i te here, mai to te hoê metua tane i ta ˈna mau tamarii.” Ua taaihia te taˈo tei hurihia ei “aau maitai” i te hoê ihoparau e “faataa ra i te hoê taata tei turaihia e to ˈna mafatu ia tauturu i te tahi atu e hinaaro ra i te tahi mea.” Te hinaaro mau ra Iehova ia ite tatou e te haapao ra oia i to ˈna feia haamori mai te mau metua e haapao ra i ta ratou mau tamarii, ma te here mahanahana e te haapeapea hohonu no to ratou mau hinaaro.—Salamo 103:8, 13.

I muri iho, te parau ra Iehova e e “faaoromai rahi” to ˈna. (Irava 6) Eita oia e riri vave noa i ta ˈna mau tavini taata. E mea faaoromai râ oia i to ratou mau paruparu, a vaiiho ai i te taime ia faarue ratou i to ratou mau haerea hara.—Petero 2, 3:9.

Te na ô râ oia e e Atua oia tei “î i te aau aroha e te parau mau.” (Irava 6) E huru maitai faufaa roa te aau aroha, aore ra aroha taiva ore, mea na reira Iehova e faatupu ai i te hoê taairaa paari, aueue ore i rotopu ia ˈna e to ˈna mau taata. (Deuteronomi 7:9) E tumu atoa Iehova no te parau mau. Eita oia e haavare aore ra e haavarehia. I te mea e o oia “te Atua parau mau,” e nehenehe tatou e tiaturi roa i ta ˈna mau parau atoa, e i ta ˈna i fafau no a muri aˈe.—Salamo 31:5.

Te parau mau faufaa atoa no nia ia ˈna e hinaaro ai Iehova ia ite tatou, e faaore ïa oia i “te hape e te hapa e te hara.” (Irava 7) E ‘tia ia ˈna ia faaore i te hara’ a te feia tei tatarahapa. (Salamo 86:5) Eita atoa Iehova e hiˈo i te ino ei mea maitai. Te faataa ra oia e “eita roa ˈtu oia e haapae i te utua.” (Irava 7) E faautua iho â te Atua moˈa e te parau-tia i te feia i rave mau i te hara. E amo iho â ratou i te mau faahopearaa no ta ratou mau hapa.

Ia au i ta Iehova faataaraa ia ˈna iho, te hinaaro ra iho â oia ia ite tatou ia ˈna, i to ˈna huru e ta ˈna mau haaraa. Aita anei oe e hinaaro ra e haapii hau atu â no nia i to ˈna mau huru maitatai nehenehe?

[Nota i raro i te api]