1 A tiaturi i te Bibilia

“Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa.”—Timoteo 2, 3:16.

EAHA TE HAAFIFIRAA? Te Bibilia i te manaˈo o te taata e rave rahi, e buka noa ïa o te paari o te taata. Te tiaturi ra vetahi e e mea hape te Bibilia i te pae tuatapaparaa. No te tahi atu, e mea tano ore te mau aˈoraa i roto aore ra ua hope to ratou tau.

EAHA TA OE E NEHENEHE E RAVE? E pinepine, aita te feia iho o te faahapa ra i te tia-mau-raa aore ra te faufaaraa o te Bibilia i hiˈopoa i te reira. Te faahiti noa ra ratou i te parau a vetahi ê. Te faaara ra hoi te Bibilia e: “Te faaroo ra te ite ore i te mau parau atoa ra; te hiˈo maitai ra râ te taata haapao ra i to ˈna taahiraa.”—Maseli 14:15.

No te aha e ore ai e pee i te hiˈoraa o te mau Kerisetiano o te senekele matamua i ora na i Berea, i Heleni apatoerau i teie mahana, eiaha râ e farii matapo noa i te parau a vetahi ê? Aita ratou i farii noa i ta vetahi ê i parau ia ratou. Ua matauhia râ ratou no “te imiraa i te parau i papaihia ra i te mau mahana atoa hoi i taua parau ra.” (Ohipa 17:11) E hiˈopoa poto anaˈe e piti tumu no te tiaturi e e Parau faaurua iho â te Bibilia na te Atua.

Mea tano te Bibilia i te pae tuatapaparaa. I te roaraa o te mau matahiti, ua faahapa noa te feia feaa i te tanoraa o te Bibilia no nia i te iˈoa o te tahi mau taata e o te tahi mau vahi. Ia au râ i te mau haapapuraa, ua hape te feia feaa e e nehenehe e tiaturi i te mau faatiaraa bibilia.

I te hoê tau, ei hiˈoraa, ua feaa te feia tuatapapa i te vai-mau-raa o te arii Saragona no Asura, faahitihia i roto i te Isaia 20:1. I te mau matahiti 1840 râ, ua itea mai i te mau ihipǎpǎ te mau toetoea o te aorai o teie arii. I teie nei, o Saragona hoê o te mau arii matau-roa-hia no Asura.

Ua mârô-atoa-hia te vai-mau-raa o Ponotio Pilato, te tavana Roma tei faaue ia pohe Iesu. (Mataio 27:1, 22-24) I 1961 râ, i pihai iho i te oire o Kaisarea i Iseraela, ua itehia mai te hoê ofai ua nanaˈohia te iˈoa e te tiaraa o Pilato i nia iho.

No nia i te tanoraa o te Bibilia i te pae tuatapaparaa, ua parau te hoê vea e: “Na roto i  te mau ravea faahiahia roa, ua haapapu te ihipǎpǎ no teie tau i te tanoraa i te pae tuatapaparaa o te Faufaa Tahito e te Apî—ma te haapapu i te mau tuhaa faufaa o te aamu o te mau patereareha o Iseraela, te Revaraa, te faatereraa hui arii a Davida, e te oraraa i te tau o Iesu.” (U.S.News & World Report, 25 no Atopa 1999) Aita te faaroo i te Bibilia i taaihia i te mau itearaa i te pae ihipǎpǎ, no te hoê râ buka faaurua e te Atua, e nehenehe oe e tiaturi i te tanoraa i te pae tuatapaparaa.

O te mau huru taata atoa te faufaahia i te paari mau i roto i te Bibilia. Na mua roa ˈˈe a itehia ˈi te mau mea ora huˈa roa e ta ratou tuhaa i roto i te haaparareraa i te maˈi, ua poroi te Bibilia i te tahi mau peu matau o te vai-mâ-raa e mea faufaa noâ i teie tau. (Levitiko 11:32-40; Deuteronomi 23:12, 13) E mea oaoa aˈe te mau melo utuafare o te faaohipa ra i te mau aˈoraa bibilia no nia i to ratou mau taairaa te tahi e te tahi. (Ephesia 5:28–6:4) Te hoê taata o te pee i te mau faaueraa tumu bibilia, e riro ïa ei rave ohipa haapao maitai atu â aore ra ei paoti au noa ˈtu â. (Ephesia 4:28; 6:5-9) E mea maitai atoa te faaohiparaa i te mau faaueraa tumu bibilia i te pae aau. (Maseli 14:30; Ephesia 4:31, 32; Kolosa 3:8-10) Ua ite tatou e tera te mau aˈoraa mau ta to tatou Atua Poiete e horoa mai.

EAHA TE HAAMAITAIRAA? Maoti te paari i roto i te Bibilia e paari ai te aau o te hoê maua. (Salamo 19:7) Hau atu â, ua tiaturi anaˈe tatou i te Bibilia, e nehenehe tera buka otahi e tauturu ia tatou ia rave i to muri iho taahiraa no te haapuai atu â i to tatou faaroo.

Ei haamaramaramaraa hau, a hiˈo i te pene 2, “Te Bibilia—te hoê buka no ǒ mai i te Atua ra,” o te buka Eaha ta te Bibilia e haapii mau ra? a

[Nota i raro i te api]