O vai te Atua?

EAHA ta oe pahonoraa? Te manaˈo ra vetahi e ua matau maitai ratou i te Atua—e hoa piri oia. Te hiˈo ra te tahi atu i te Atua mai te hoê fetii atea. Te tiaturi ra ratou e te vai mau ra o ˈna, aita râ ratou i matau maitai ia ˈna. Mai te peu e te tiaturi ra oe i te Atua, eaha ta oe pahonoraa i te mau uiraa i muri nei?

1. E ihotaata mau anei te Atua?

2. E iˈoa anei to te Atua?

3. O Iesu anei te Atua Manahope?

4. Te tâuˈa ra anei te Atua ia ˈu?

5. Te farii ra anei te Atua i te mau huru haamoriraa atoa?

Mai te peu e e ui oe i teie mau uiraa ia vetahi ê, ua rau ïa ta ratou pahonoraa. No reira ïa i fa mai ai te mau aai e te mau manaˈo hape no nia i te Atua.

Mea faufaa roa te mau pahonoraa

A paraparau ai oia e te hoê vahine faaroo ta ˈna i farerei i te hoê apoo pape, ua haapapu Iesu Mesia i te faufaaraa ia ite i te parau mau no nia i te Atua. Ua farii teie vahine Samaria e e peropheta Iesu. Te huru ê ra râ oia. E ere hoê â haapaoraa ta raua Iesu. I to ˈna faaiteraa i to ˈna tapitapi, ua parau roa ˈtu Iesu e: “Aore outou i ite i ta outou e haamori nei.” (Ioane 4:19-22) Te taa ra ia tatou te manaˈo o Iesu,  e ere o te taatoaraa o te taata faaroo tei ite mau i te Atua.

Te parau ra anei ïa Iesu e aita hoê aˈe taata e tia ia ite mau i te Atua? Aita. Ua na ô Iesu i teie vahine e: “E haamori ai i te Metua te feia haamori mau ra, ma te varua e te parau mau: o te huru ïa o te feia haamori ta te Metua e titau nei.” (Ioane 4:23) O oe atoa anei te haamori ra i te Atua “ma te varua e te parau mau”?

Mea faufaa roa ino ia papu ia oe te pahonoraa o tera uiraa. No te aha hoi? Ua haapapu Iesu i te faufaaraa o te ite mau i to ˈna pureraa: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Oia, ua taai-roa-hia to oe tiaturiraa i te ora no a muri aˈe i te iteraa oe i te parau mau no nia i te Atua!

E nehenehe iho â anei e ite i te parau mau no nia i te Atua? E! E nafea ïa? Teie ta Iesu i parau no ˈna iho: “O vau te eˈa, e te parau mau, e te ora, aore roa e taata e tae i te Metua ra, maori râ ei ia ˈu.” (Ioane 14:6) Ua na ô atoa o ˈna e: “Aore hoi te hoê i ite i te Metua, maori râ o te Tamaiti, e o ta te Tamaiti i hinaaro i te faaite atu.”—Luka 10:22.

No reira, no te ite i te Atua, a hiˈo ïa i te mau haapiiraa a Iesu Mesia, te Tamaiti a te Atua. Inaha, ua fafau mai Iesu e: “I mau maite outou i ta ˈu parau, e pǐpǐ mau ia outou na ˈu i reira. E ite ïa outou i te parau mau, e na te parau mau outou e faatiamâ.”—Ioane 8:31, 32.

Eaha ïa ta Iesu pahonoraa i na uiraa e pae i nia nei?

[Hohoˈa i te api 4]

Te haamori ra anei oe i te hoê Atua ta oe hoi i ore i matau?