Eaha te tumu o te oraraa?

NO TE AHA MEA FAUFAA ˈI TE PAHONORAA? I roto i te mau mea ta te taata e horuhoru roa ˈˈe, o te manaˈo ïa e aita to te oraraa e auraa, aita e tumu. I te tahi aˈe pae, e faaoromai te hoê taata e opuaraa taa maitai ta ˈna i roto i te oraraa. Ua papai o Victor Frankl, te hoê taote i te pae uaua uira e o tei ora mai i te Taparahiraa a te mau Nazis e: “Aita hoê noa ˈˈe ohipa i te ao nei o ta ˈu e nehenehe e parau, o te nehenehe e tauturu ma te aravihi i te hoê taata ia ora ˈtu e tae noa ˈtu i te mau huru tupuraa ino roa ˈˈe, maori râ te taaraa e e auraa to te oraraa o te hoê taata.”

E rave rahi râ manaˈo taa ê i nia i tera tumu parau. E rave rahi te manaˈo ra e na te taata taitahi e faaoti no ˈna iho i te tumu o te oraraa. I te tahi aˈe pae, te manaˈo ra te tahi mau taata o te tiaturi nei i te haapiiraa o te tauiuiraa o te mau mea ora e aita e auraa mau to te oraraa.

Inaha, te ravea tano roa ˈˈe râ no te ite i te tumu o te oraraa, o te haapiiraa ïa i te reira mai roto mai i te Tumu o te ora, te Atua ra o Iehova. A feruri na eaha ta ta ˈna Parau e faahiti ra no nia i tera tumu parau.

Eaha ta te Bibilia e parau ra

Te haapii nei te Bibilia e e opuaraa taa maitai ta te Atua ra o Iehova no te tane e te vahine, a poiete ai oia ia raua. Ua horoa Iehova i to tatou na metua matamua i te faaueraa i muri nei.

Genese 1:28. “Ia fanau orua, e ia rahi roa, e faaî i te fenua nei, e e haavi iho; e ia mana orua i nia iho i te iˈa o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.”

Ua opua te Atua e ia faariro Adamu e o Eva e ta raua mau tamarii i te fenua taatoa ei paradaiso. Aita oia i opua e ia ruhiruhia te taata e pohe atu ai; aita atoa oia i hinaaro ia tuino te taata i te heipuni. No te mau maitiraa tano ore râ a to tatou na metua matamua, ua tutuuhia mai te hara e te pohe. (Genese 3:2-6; Roma 5:12) Noa ˈtu râ, aita te opuaraa a Iehova i taui. Ua fatata te fenua i te riro ei paradaiso.—Isaia 55:10, 11.

Ua poiete Iehova ia tatou e te puai i te pae tino e feruriraa no te faatupu hope i ta ˈna opuaraa. Aita oia i poiete ia tatou no te ora ma te faaatea ê mai ia ˈna. A tapao na mea nafea te opuaraa a te Atua no tatou i faataahia ˈi i roto i te mau irava bibilia i muri nei.

Koheleta 12:13; MN. “E faaroo na tatou i te faaotiraa o taua mau parau nei: [A mǎtaˈu i te Atua mau e a haapao i ta ˈna mau faaueraa. O te hopoia taatoa hoi te reira a te taata].”

Mika 6:8. “Eaha ta Iehova hinaaro ia oe ra maori râ o te rave i te parau-tia, e ia hinaaro hoi i te aroha, e te haere ma te haehaa i te aro o to Atua?”

Mataio 22:37-39; MN. “[Ia here] oe i to Atua ia Iehova ma to aau atoa, e ma to [nephe] atoa, e ma to manaˈo atoa. O te ture matamua teie e te hau i te rahi. E mai te reira atoa te piti; E aroha ˈtu oe i to taata-tupu, mai to aroha ia oe iho na.”

E nafea te pahonoraa o te Bibilia e horoa ˈi i te hau mau o te feruriraa

Ia tere maitai te mau tuhaa fifi atoa o te hoê matini, e mea tia ia faaohipahia te reira ia au i te opuaraa e te huru raveraa ta te taata hamani i opua. Oia atoa, ia ore tatou e tuino ia tatou iho  i te pae varua, feruriraa, huru aau aore ra pae tino—e mea tia ia faaohipa tatou i to tatou oraraa ia au i ta to tatou Atua Poiete i opua. A feruri na e nafea te iteraa i te opuaraa a te Atua e nehenehe ai e horoa mai i te hau o te feruriraa i roto i te mau tuhaa o te oraraa i muri nei.

A haamau ai i te mau fa faufaa roa ˈˈe, e rave rahi taata i teie mahana te pûpû nei i to ratou ora no te haapue i te faufaa. Te faaara nei râ te Bibilia e “te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi.”—Timoteo 1, 6:9, 10.

I te tahi aˈe pae, te ite nei te feia o te haapii ra i te here i te Atua eiaha râ i te nounou i te moni, i te ravea o te mauruuru. (Timoteo 1, 6:7, 8) Ua taa ia ratou te faufaaraa ia ohipa ma te itoito e ua ite ratou e e mea tia ia haapao ratou i to ratou iho mau hinaaro pae tino. (Ephesia 4:28) Te haapao maite atoa ra râ ratou i ta Iesu faaararaa: “E ore te taata e tia ia faaroo i te fatu toopiti; e riro oia i te au ore atu i te hoê, e te hinaaro atu i te tahi; e aore ra, e riro i te au atu i te hoê, e te faarue taue i te tahi. O outou nei hoi, e ore e tia ia faaroo i te Atua e te Mamona.”—Mataio 6:24.

No reira, te faariro ra te feia e here ra i te Atua i te raveraa i to ˈNa hinaaro ei fa matamua na ratou i roto i to ratou oraraa, eiaha râ i te raveraa i te ohipa aore ra te tapiraa i te mau faufaa. Ua ite ratou e ia niu ratou i to ratou oraraa i nia i te raveraa i te hinaaro o te Atua, e aupuru mai te Atua ra o Iehova ia ratou. I te mea mau, no Iehova iho e mea tia ia rave oia i te reira.—Mataio 6:25-33.

I roto i te taairaa e te taata, e rave rahi o te haapao na mua ia ratou iho. I teie mahana te ere nei te ao i te hau, no te mea iho â râ e rave rahi taata o tei riro ei ‘miimii, ei aroha ore.’ (Timoteo 2, 3:2, 3) Ia faainoino vetahi ia ratou aore ra ia ore ratou e farii i to ratou manaˈo, e ‘iria ratou, e riri, e avau e e faaino.’ (Ephesia 4:31) Eita te ereraa i te hitahita ore e horoa mai i te hau o te feruriraa, e “faatupu” noa râ te reira “i te tamaˈi.”—Maseli 15:18.

Area te feia e haapao ra i ta te Atua faaueraa e here i to ratou taata-tupu mai ia ratou iho, e ‘hamani maitai ïa ratou te tahi i te tahi, ma te aau mǎrû aroha noa, ma te faaore i te hara te tahi i te tahi.’ (Ephesia 4:32; Kolosa 3:13) Ia faaite atoa mai vetahi ê i te hoê huru mǎrû ore i nia ia ratou, e tutava ratou i te pee ia Iesu, o “tei ore i faaino atu” ia faainohia mai oia. (Petero 1, 2:23) Mai ia Iesu, te taa ra ia ratou e e itehia te mauruuru mau ia tavini ia vetahi ê, noa ˈtu e aita taua mau taata ra e mauruuru ra i te mea e ravehia ra no ratou. (Mataio 20:25-28; Ioane 13:14, 15; Ohipa 20:35) Te horoa ra te Atua ra o Iehova i to ˈna varua moˈa no te feia e pee ra i ta ˈna Tamaiti, e e faatupu teie varua i te hoê huru aau hau i roto i to ratou oraraa.—Galatia 5:22, MN.

E nafea râ ta oe hiˈoraa i to a muri aˈe e nehenehe ai e ohipa i nia i to oe hau o te feruriraa?

[Hohoˈa/Parau iti faaôhia i te api 6]

E hinaaro te hoê taata i te hoê opuaraa taa maitai

[Hohoˈa i te api 7]

Ua haapii Iesu ia tatou e nafea e noaa ˈi te hau o te feruriraa