Uiraa a te feia taio

To roto anei te Basileia o te Atua i to outou aau?

E, o te pahonoraa ïa o te uiraa i nia nei ia au i te manaˈo o te taata e rave rahi i teie mahana. Ei hiˈoraa, te na ô ra te buka ite rahi The Catholic Encyclopedia e: “Te auraa o te basileia o te Atua . . . o te faatereraa ïa a te Atua i roto i to tatou aau.” E pinepine te pǔpǔ ekalesiatiko i te haapii i teie manaˈo. Te haapii ra iho â anei te Bibilia e to roto te Basileia o te Atua i te aau o te taata?

Te manaˈo ra vetahi e na Iesu iho i paturu matamua i te manaˈo e to roto te Basileia o te Atua i te aau o te taata. Ua parau Iesu e: “Inaha hoi te basileia o te Atua tei roto[pu] ïa ia outou nei.” (Luka 17:21; MN) Te na ô ra te tahi mau huriraa i ǒ nei e: “Te basileia o te Atua tei roto ïa ia outou nei.” E huriraa tano anei tera i ta Iesu parau? Ua hinaaro iho â anei oia e parau e to roto te Basileia o te Atua i te aau o te taata?

A tahi, a hiˈo na eaha te aau o te taata. Te aau taipe i roto i te Bibilia, o te taata o roto ïa, te tumu o te manaˈo, haerea, e huru aau o te hoê taata. Te manaˈo e to roto te Basileia o te Atua, te hoê mea faahiahia roa, i te aau o te taata—oia hoi e nehenehe te reira e taui e e faateitei i te taata ei hiˈoraa—mea au roa ïa ia hiˈohia, tera râ te tano ra anei te reira?

Te na ô maira te Bibilia e: “E haavare rahi to te aau i te mau mea atoa nei, e ua ino roa.” (Ieremia 17:9) Ua parau Iesu iho e: “No roto mai . . . i te aau taata te manaˈo ino, te faaturi, te poreneia, te taparahi taata, te eiâ, te nounou taoˈa, te feii.” (Mareko 7:20-22) A feruri na: E ere anei no ǒ mai te ati e rave rahi ta tatou e ite nei i roto i te ao i teie mahana, i te aau hara o te taata? E nafea ïa te Basileia tia roa o te Atua e nehenehe ai e vai i reira? Oia mau, eita ta te aau o te taata e nehenehe e faahotu i te Basileia o te Atua mai te hoê motuu e ore e nehenehe e faahotu mai i te suke.—Mataio 7:16.

A piti, a hiˈo na o vai ma ta Iesu e paraparau ra ia ˈna i faahiti i te Luka 17:21. Te na ô ra to na mua ˈtu irava: “I uihia mai oia e te mau Pharisea i te tupuraa o te basileia o te Atua, ua parau atura oia ia ratou.” (Luka 17:20) E enemi te mau Pharisea no Iesu. Ua parau Iesu e eita taua feia haavarevare ra e ô i te Basileia o te Atua. (Mataio 23:13) I teie nei, mai te peu e eita te mau Pharisea e ô i te Basileia o te Atua, e nehenehe anei ïa te Basileia e vai i roto i to ratou aau? Eita ïa! Eaha ïa te auraa o ta Iesu parau?

Ei huriraa i tera mau parau a Iesu, te faaohipa ra te tahi mau huriraa bibilia haapao maite i te hoê â parau e to te Traduction du monde nouveau. Te na ô ra te tahi e te Basileia, “tei rotopu ïa ia outou” aore ra “i ropu ia outou.” Mea nafea te Basileia o te Atua i vai ai i rotopu i tera mau taata, te mau Pharisea atoa, i taua tau ra? O Iesu ta te Atua ra o Iehova i faatoroa ei Arii o te Basileia. Ei Arii maitihia, to rotopu maitai Iesu i taua mau taata ra. Ua haapii atu oia i te Basileia o te Atua e ua rave atoa i te mau semeio, a horoa ˈtu ai i te hoê hiˈoraa o ta te Basileia e faatupu. To rotopu ïa te Basileia ia ratou i roto i te auraa mau.

Mea maramarama maitai, aita te mau Papai e turu ra i te manaˈo e to roto te Basileia o te Atua i te aau o te taata. Teie râ, e faatereraa mau te reira, o te faatupu i te mau tauiraa rahi i nia i te fenua, mai ta te mau peropheta i faaite atea.—Isaia 9:6, 7; Daniela 2:44.