A pahono i to oe manaˈo haava

“E mea viivii ore te mau mea atoa nei i te feia viivii ore; area te feia viivii e te faaroo ore ra, aore roa ïa mea viivii ore.”—TITO 1:15.

1. Mea nafea to Paulo anaanataeraa i te mau amuiraa i Kereta?

 I MURI aˈe i te hope-roa-raa na tere mitionare e toru, ua haruhia te aposetolo Paulo e ua afaihia ˈtura oia i Roma, i reira to ˈna tapearaahia e piti matahiti. Ua aha oia i to ˈna tuuraahia mai? Ua haere oia i te motu o Kereta e o Tito ta Paulo hoi i papai: “I vaiiho ai au ia oe i Kereta na, ia faanehenehe oe i tei toe ra, ia faatoroa i te [mau matahiapo].” (Tito 1:5; MN) No te rave i teie ohipa, e mea tia ia faaaraara Tito i te manaˈo haava o to ˈna mau hoa Kerisetiano.

2. Eaha te fifi i titauhia ia faatitiaifaro Tito i te motu o Kereta?

² Ua faaara Paulo ia Tito no nia i te mau titauraa a te mau matahiapo o te amuiraa, e ua faaite oia e ‘e rave rahi te taata haapao ore, te parau faufaa ore, e te haavare.’ ‘E fetii taatoa ta ratou e taihitumu ra, i te haapiiraa i te parau-tia ore.’ Ua titauhia ‘ia [tamau] Tito i te aˈo ia ratou.’ (Tito 1:10-14; MN; Timoteo 1, 4:7) Ua parau Paulo e ua “viivii” to ratou aau e to ratou manaˈo haava, ma te faaohipa i te hoê taˈo e tafetafeta te auraa, mai te hoê ahu maitai roa i tafetafeta i te ǔ. (Tito 1:15) E ati Iuda paha vetahi o taua mau taata ra, no te mea ua ‘[“ati maite,” MN] ratou i te peritome.’ Aita te mau amuiraa i teie mahana e taihitumuhia ra e te mau taata tera ta ratou huru hiˈoraa; e nehenehe râ tatou e haapii atu â no nia i te manaˈo haava no roto mai i ta Paulo aˈoraa ia Tito.

Feia i viivii te manaˈo haava

3. Eaha ta Paulo i papai ia Tito no nia i te manaˈo haava?

³ A tapao na i te tupuraa i faahiti ai Paulo i te manaˈo haava. “E mea viivii ore te mau mea atoa nei i te feia viivii ore; area te feia viivii e te faaroo ore ra, aore roa ïa mea viivii ore; ua viivii atoa hoi to ratou aau e te manaˈo [haava] atoa. Te parau nei ratou e ua ite i te Atua, area ta ratou ohipa, te parau nei ïa aore i ite ia ˈna.” Mea maramarama maitai, ua titauhia ia rave te tahi pae i taua tau ra i te mau tauiraa “ia tia to ratou faaroo.” (Tito 1:13, 15, 16; MN) Ua fifihia ratou i te faataa-ê-raa i te mea viivii ore e te mea viivii, e ua titau te reira i to ratou manaˈo haava.

4, 5. Eaha te manaˈo hape o vetahi i roto i te mau amuiraa, e mea nafea te reira i ohipa ˈi i nia ia ratou?

⁴ Ahuru tiahapa matahiti na mua ˈtu, ua faaoti te tino aratai e aita i titau-faahou-hia te peritomeraa no te riro ei taata haamori mau, e ua faaara ratou i te mau amuiraa. (Ohipa 15:1, 2, 19-29) Ua “ati maite” noa râ vetahi i Kereta ‘i te peritome.’ Ua patoi roa ratou i te tino aratai, ma te ‘haapii i te parau-tia ore.’ (Tito 1:10, 11) Ma te manaˈo tano ore, ua paturu paha ratou i te mau faatureraa a te Ture no nia i te  maa e te peu tamâraa. Ua faaaano atoa paha ratou i ta te Ture i parau, mai ta te mau taata o te tau o Iesu i rave, e ua paturu atoa i te mau fabula ati Iuda e te mau faaueraa a te taata.—Mareko 7:2, 3, 5, 15; Timoteo 1, 4:3.

⁵ Ua ohipa teie huru feruriraa ma te tano ore i nia i ta ratou huru hiˈoraa e to ratou manaˈo morare, to ratou manaˈo haava. Ua papai Paulo: “Te feia viivii e te faaroo ore ra, aore roa ïa mea viivii ore.” Ua hape roa to ratou manaˈo haava e e ere faahou i te hoê aratai papu no te haa e no te faito. Hau atu â, ua haava ratou i te mau hoa Kerisetiano i nia i te mau mea e na te taata taitahi e maiti, te mau mea ta te hoê Kerisetiano e nehenehe e faaoti, mea taa ê râ ta te tahi atu e maiti. I roto i teie tuhaa, ua hiˈo teie feia o Kereta ei mea viivii i te mea viivii ore mau. (Roma 14:17; Kolosa 2:16) A parau noa ˈi ratou e ua ite ratou i te Atua, te haapapu ra ta ratou mau ohipa e aita.—Tito 1:16.

‘E mea viivii ore i te feia viivii ore’

6. Eaha na huru taata e piti ta Paulo i faahiti?

⁶ E nafea tatou e faufaahia ˈi i ta Paulo i papai ia Tito? A tapao na i te taa-ê-raa e itehia ra i roto i teie faahitiraa: “E mea viivii ore te mau mea atoa nei i te feia viivii ore; area te feia viivii e te faaroo ore ra, aore roa ïa mea viivii ore; ua viivii atoa hoi to ratou aau e te manaˈo [haava] atoa.” (Tito 1:15; MN) Aita mau â Paulo i parau e e mea viivii ore e mea faatiahia te mau mea atoa no te hoê Kerisetiano viivii ore i te pae morare. E nehenehe tatou e papu i te reira no te mea ua haamaramarama Paulo i roto i te tahi atu rata e “e ore” te faaturi, te haamori idolo, e te tahutahu, e te vai ra ˈtu â “e parahi i te basileia o te Atua.” (Galatia 5:19-21) No reira, e mea tia ia faaoti tatou e ua faahiti Paulo i te hoê parau mau taatoa no nia e piti huru taata, te feia viivii ore i te pae morare e pae varua e te feia e ere roa.

7. Te opani ra te Hebera 13:4 i te aha, eaha râ te uiraa e nehenehe e hiti mai?

⁷ Aita i taotiahia te mau mea e titauhia ia ape te hoê Kerisetiano haavare ore i ta te Bibilia e opani maitai ra. Ei hiˈoraa, a rave na i teie faahitiraa huna ore: “Ia haamaitaihia te faaipoipo i te taata atoa ra, e te viivii ore hoi te roi; e haava hoi te Atua i te poreneia e te faaturi ra.” (Hebera 13:4) E faaoti te feia atoa e ere i te Kerisetiano e te feia aita e ite aˈe i te Bibilia ma te tano roa e te opani ra teie irava i te faaturi. Mea papu maitai ia au i teie e te tahi atu mau irava bibilia e te faautua ra te Atua i te taatiraa i rotopu i te hoê tane aore ra vahine faaipoipo e te tahi atu taata e ere to ˈna apiti. Eaha ïa no nia i te ai mero taatiraa i rotopu i na taata faaipoipo-ore-hia e piti? Te parau ra e rave rahi taurearea e e ere i te mea ino te reira no te mea e ere i te taatiraa. E tia anei i te hoê Kerisetiano ia hiˈo i teie huru taatiraa ei mea viivii ore?

8. No nia i te ai mero taatiraa, e nafea te mau Kerisetiano e taa ê ai i te taata e rave rahi o teie nei ao?

⁸ Te haapapu ra te Hebera 13:4 e te Korinetia 1,  6:9 e te opani ra te Atua i te faaturi e te poreneia atoa (Heleni, por·neiʹa). Eaha te ô mai i roto i te piti o te taˈo? Ua taaihia te taˈo Heleni i te faaohipa-natura-raa aore ra ma te tia ore i te mau mero taatiraa ma te opuaraa hairiiri. E ô mai te mau huru taatiraa tia ore atoa i rapae au i te faaipoiporaa e au i te mau Papai. E ô atoa ïa te ai mero taatiraa noa ˈtu e ua parauhia i te taurearea e rave rahi e ati aˈe te ao nei aore ra ua faaoti ratou e mea fariihia te ai mero taatiraa. Eita te mau Kerisetiano mau e aratai i to ratou feruriraa e ta ratou mau haaraa ia au i te mau manaˈo o ‘te taata parau faufaa ore e te haavare.’ (Tito 1:10) Te pee ra ratou i te ture aveia teitei roa o te mau Papai Moˈa. Te taa ra ia ratou e ia au i te mau Papai, e poreneia te ai mero taatiraa e te haamataro ra ratou i to ratou manaˈo haava eiaha e farii i teie peu, eita râ ratou e tamata i te faatia i te reira. *—Ohipa 21:25; Korinetia 1, 6:18; Ephesia 5:3.

Manaˈo haava taa ê, faaotiraa taa ê

9. Mai te peu e “e mea viivii ore te mau mea atoa,” eaha ta te manaˈo haava ohipa?

⁹ Eaha râ te auraa o ta Paulo mau parau “e mea viivii ore te mau mea atoa nei i te feia viivii ore”? Te faahiti ra Paulo i te mau Kerisetiano o tei faaau i to ratou feruriraa e manaˈo morare i nia i te mau ture aveia a te Atua, ta tatou hoi e ite i roto i ta ˈna Parau faaurua. Te farii ra teie mau Kerisetiano e no nia i te mea e rave rahi aita i faautuahia e te Atua, te vai ra te mau taa-ê-raa i rotopu i te mau Kerisetiano. Te farii ra ratou ei “mea viivii ore” te mau mea ta te Atua e ore e faautua, eita râ ratou e faaino haere. Eita ratou e tiaturi e e manaˈo vetahi ê atoa mai ia ratou no nia i te mau tuhaa o te oraraa ta te Bibilia e ore e horoa i te mau aratairaa taa maitai. E hiˈopoa anaˈe i te tahi mau hiˈoraa.

10. E nafea te hoê faaipoiporaa (aore ra hunaraa) e riro ai ei fifi?

¹⁰ Mea rahi te utuafare hoê noa hoa faaipoipo o te riro mai ei Kerisetiano, aita râ te tahi atu. (Petero 1, 3:1; 4:3) Ua rau te mau fifi e nehenehe e tupu mai no teie huru tupuraa, ia faaipoipo aore ra ia hunahia te hoê fetii. A feruri na i te tupuraa o te hoê vahine Kerisetiano e haapaoraa ê ta ta ˈna tane. Te faaipoipo ra hoê o to ˈna mau fetii, e e tupu te oroa i roto i te hoê fare pure a te Amuiraa faaroo Kerisetiano. (Aore ra ua pohe te hoê fetii, te hoê metua paha, e e tupu te oroa hunaraa i roto i te hoê fare pure.) Ua titau-manihini-hia na hoa faaipoipo, e te hinaaro ra te tane ia haere ta ˈna vahine na muri ia ˈna. Eaha ta to ˈna manaˈo haava e parau ia haere atu oia? E nafea oia? A feruri na i teie na tupuraa e piti.

11. A faataa e nafea te hoê vahine faaipoipo Kerisetiano e feruri ai e haere anei oia i te hoê faaipoiporaa i roto i te hoê fare pure, o te aratai atu i teihea faaotiraa?

¹¹ Te feruri ra Loidi i te faaueraa bibilia faufaa roa, ‘A haere mai na i rapae ia Babulonia Rahi,’ te hau emepera o te ao atoa o te haapaoraa hape. (Apokalupo 18:2, 4) E melo oia na mua ˈˈe o te haapaoraa i reira e faatupuhia ˈi te faaipoiporaa e ua ite oia e i te roaraa o te oroa, e anihia i te mau taata atoa ia apiti i te mau ohipa faaroo, mai te pure, te himene, aore ra te tahi atu peu. Ua faaoti papu oia eiaha e apiti atu e eita oia e hinaaro e faaea i reira a faahepohia ˈtu ai oia ia ofati i to ˈna hapa ore. Te faatura ra Loidi i ta ˈna tane e te hinaaro ra oia e ohipa amui e o ˈna, to ˈna upoo ia au i te mau Papai; aita râ oia e hinaaro ra e ofati i ta ˈna mau faaueraa tumu bibilia. (Ohipa 5:29) No reira, e faataa oia ma te faatano i te parau i ta ˈna tane e ia opua noa ˈtu oia i te haere i ǒ, eita ta ˈna iho e nehenehe. E faataa ˈtu paha oia e ia haere noa ˈtu oia e ia ore oia e apiti atu i te tahi ohipa, e faahaama paha te reira ia ˈna, te auraa ïa e mea maitai aˈe no ta ˈna tane ia ore oia e haere. E vaiiho ta ˈna faaotiraa ia ˈna e te hoê manaˈo haava viivii ore.

12. E nafea te hoê taata e nehenehe ai e feruri e e ohipa ia titau-manihini-hia oia i te hoê faaipoiporaa i roto i te hoê fare pure?

 ¹² Te faaruru ra Ruta fatata i te hoê â fifi. Te faatura ra oia i ta ˈna tane, ua faaoti papu oia e ore e taiva i te Atua, e e pahono oia i to ˈna manaˈo haava haamatarohia e te Bibilia. I muri aˈe i te feruriraa i te mau manaˈo faufaa mai ta Loidi i hiˈopoa, e hiˈo Ruta na roto i te pure i te “Uiraa a te feia taio” o Te Pare Tiairaa o te 15 no Me 2002. Te haamanaˈo ra oia e ua auraro na Hebera e toru i te hoê faaueraa e haere i te vahi i reira e tupu ai te haamoriraa idolo, ua tapea râ ratou i to ratou hapa ore ma te ore e rave i te hoê ohipa haamori idolo. (Daniela 3:15-18) E faaoti oia e haere na muri i ta ˈna tane, eita râ oia e apiti i te mau ohipa faaroo atoa, e e ohipa oia ia au i to ˈna manaˈo haava. E faataa oia ma te faatano i te parau e te maramarama i ta ˈna tane i ta to ˈna manaˈo haava e faatia ia ˈna ia rave e ta ˈna e ore e nehenehe. Te tiaturi ra Ruta e e ite ta ˈna tane i te taa-ê-raa i rotopu i te haamoriraa mau e te mea hape.—Ohipa 24:16.

13. No te aha e ere ai i te fifi ia rave e piti Kerisetiano i te mau faaotiraa taa ê?

¹³ I te mea e e faaotiraa taa ê ta e piti Kerisetiano, te auraa anei ïa e e ere i te mea faufaa ta te hoê taata e rave ra aore ra e manaˈo haava paruparu paha to te hoê? Eita. No to ˈna oraraa i mutaa iho ma te upaupa e te mau peu i te mau oroa a te haapaoraa, te ite ra paha Loidi e e mea atâta iho â no ˈna ia tae atu oia. E e ohipa paha to ˈna apitiraa i mutaa iho e ta ˈna tane i te mau ohipa faaroo, i nia i to ˈna manaˈo haava. Ua papu ïa ia ˈna e mea maitai roa no ˈna ta ˈna faaotiraa.

14. E mea tia ia haamanaˈo te mau Kerisetiano i te aha no nia i te mau ohipa ta te hoê taata e faaoti no ˈna iho?

¹⁴ Mea paari ore anei râ ta Ruta faaotiraa? Aita ta vera ma e parau. Eiaha ratou e haava aore ra e faahapa ia ˈna no te maitiraa e haere i te oroa eiaha râ e rave i te mau ohipa faaroo atoa. A haamanaˈo i ta Paulo aˈoraa no nia i te mau faaotiraa a te taata iho e amu aore ra eita i te tahi maa: “Eiaha tei amu ra e vahavaha ˈtu i tei ore i amu ra; e eiaha atoa hoi tei ore i amu ra e faahapa ˈtu i tei amu . . . Tei to ˈna ra fatu to ˈna mau e to ˈna hiˈa: e haamauhia râ oia, e e tia hoi i te Atua ia haamau ia ˈna.” (Roma 14:3, 4) Mea papu maitai, eita te hoê Kerisetiano mau e hinaaro e faaitoito i te hoê taata ia tâuˈa ore i te aratairaa a te hoê manaˈo haava i haamatarohia, no te mea e au te na reiraraa i te oreraa e faaroo i te hoê reo o te nehenehe e horoa i te hoê poroi o te faaora.

15. No te aha e mea tia ˈi ia tâuˈa-mau-hia te manaˈo haava e te huru aau o vetahi ê?

¹⁵ A haere noa ˈi teie tupuraa, e mea tia ia hiˈopoa na Kerisetiano atoa i te mau tuhaa hau, te faahopearaa ïa i nia ia vetahi ê. Te aˈo maira Paulo: “Ta outou e haapao, e eiaha ei turoriraa i tuuhia mai i mua i te hoê taeae, e te  mea e maheaitu ai.” (Roma 14:13) Ua ite paha Loidi e ua faainoino rahi taua noâ mau tupuraa ra i te amuiraa aore ra to ˈna utuafare, e e nehenehe ta ˈna faaotiraa e ohipa mau i nia i ta ˈna mau tamarii. Area o Ruta ra, ua ite paha oia e aita taua noâ mau maitiraa ra i faatupu i te peapea i roto i te amuiraa aore ra i roto i te oire iti. E mea tia ia farii na vahine atoa—e tatou paatoa—e e haapao maitai te hoê manaˈo haava haamatarohia ma te tano i te faahopearaa i nia ia vetahi ê. Ua parau Iesu e: “Te faaturori i te hoê i teie nei mau taata rii i faaroo ia ˈu nei, e huru maitai aˈe oia ia taamuhia te hoê ofai mule i nia i tana aˈî e ia hurihia oia i raro i te moana.” (Mataio 18:6) Mai te peu e e tâuˈa ore te hoê taata i te neheneheraa ta ˈna mau haaraa e faaturori ia vetahi ê, e mea viivii paha to ˈna manaˈo haava, mai to vetahi mau Kerisetiano i Kereta.

16. E nehenehe tatou e tiai i teihea mau tauiraa i nia i te hoê Kerisetiano i te roaraa o te tau?

¹⁶ E mea tia ia maitai noa te tupuraa pae varua o te hoê Kerisetiano, na reira atoa to ˈna faaroo-ohie-raa e to ˈna pahono-ohie-raa i to ˈna manaˈo haava. E feruri anaˈe ia Mareko tei bapetizohia aˈenei. Te faaite ra to ˈna manaˈo haava ia ˈna ia haapae i te tahi mau peu eita e au i te mau Papai ta ˈna i rave na mua ˈˈe, peneiaˈe ua taaihia i te mau idolo aore ra te toto. (Ohipa 21:25) Te mea mau, te ape maite ra oia i teie nei i te mau mea atoa o te hohoˈa rii i ta te Atua e opani ra. I te tahi aˈe pae, te maere ra oia no te aha vetahi e haapae ai i te tahi mau ohipa ta ˈna e farii, mai vetahi mau porotarama afata teata.

17. A faataa na roto i te hoê hiˈoraa e nafea te tau e te tupuraa pae varua e nehenehe ai e ohipa i nia i te manaˈo haava o te hoê Kerisetiano e ta ˈna mau faaotiraa.

¹⁷ I te roaraa o te tau, ua rahi to Mareko ite e ua haafatata ˈtu â oia i te Atua. (Kolosa 1:9, 10) Eaha te faahopearaa? Ua haamataro-roa-hia te reo i roto ia ˈna. I teie nei, ua hinaaro roa ˈtu â Mareko e faaroo i to ˈna manaˈo haava e e hiˈopoa maitai atu â i te mau faaueraa tumu bibilia. Inaha, te taa ra ia ˈna e e tu iho â te tahi mau mea “o te hohoˈa rii i ta te Atua e opani ra” ta ˈna i ape, i te huru feruriraa o te Atua. Hau atu â, na roto i te fariiraa ˈtu â i te mau faaueraa tumu bibilia e te ineineraa i te pahono i to ˈna manaˈo haava haamataro-maitai-hia, te turaihia ra Mareko i teie nei e to ˈna manaˈo haava ia ape i te mau porotarama ta ˈna i manaˈo na mua ˈˈe e mea fariihia. Oia, ua haamaitaihia to ˈna manaˈo haava.—Salamo 37:31.

18. Eaha te tumu e oaoa ˈi tatou?

¹⁸ I roto i te rahiraa o te mau amuiraa, te vai ra te mau taata o te mau faito tupuraa Kerisetiano atoa. Mea apî vetahi o ratou i roto i te faaroo. Peneiaˈe fatata to ratou manaˈo haava i te mamû noa i nia i te tahi mau tumu parau, e paraparau puai râ te reo i roto no te tahi atu. E hinaaro paha teie mau taata i te taime e te tauturu no te farii i ta Iehova aratairaa e no te pahono i to ratou iho manaˈo haava i haamatarohia. (Ephesia 4:14, 15) Te vahi oaoa, i roto i taua noâ mau amuiraa ra, te vai ra paha e rave rahi mea hohonu to ratou ite, mea ite roa ratou ia faaohipa i te mau faaueraa tumu bibilia, e te hoê manaˈo haava e au maite roa i te huru feruriraa o te Atua. Auê te oaoa ia haaatihia e teie “feia viivii ore” o te hiˈo ei “mea viivii ore” i te pae varua e pae morare te mau mea ta te Fatu e farii e! (Ephesia 5:10) Ia haamau tatou paatoa i te fa e haere i nia i taua faito ra e e tapea i teie manaˈo haava ia au i te ite mau i te parau mau e te paieti.—Tito 1:1.

[Nota i raro i te api]

Eaha ta oe e pahono?

• No te aha i viivii ai te manaˈo haava o vetahi mau Kerisetiano i Kereta?

• E nafea e piti Kerisetiano ma te mau manaˈo haava haamataro-maitai-hia e nehenehe ai e rave i te mau faaotiraa taa ê?

• I te roaraa o te tau, eaha te tupu mai i nia i to tatou manaˈo haava?

[Uiraa haapiiraa]

[Hohoˈa fenua i te api 18]

(Hiˈo i te papai)

Sicile

HELENI

Kereta

ASIA ITI

Kupero

MITI MEDITERANEA

[Hohoˈa i te api 20]

E nehenehe e piti Kerisetiano i roto i te hoê â tupuraa e rave i te mau faaotiraa taa ê