Faaipoiporaa tura i te aro o te Atua e o te taata

“E [oroa tamaaraa] faaipoiporaa tei Kana . . . E parauhia maira Iesu e ta ˈna mau pǐpǐ atoa e haere i taua [oroa tamaaraa] faaipoiporaa ra.”—IOANE 2:1, 2; MN.

1. Eaha ta te faatiaraa no nia i ta Iesu i rave i Kana e faaite maira?

 UA ITE Iesu, to ˈna metua vahine, e vetahi o ta ˈna mau pǐpǐ i te oaoa ta te hoê faaipoiporaa tura i rotopu i te nunaa o te Atua e nehenehe e hopoi mai. Ua faariro atoa te Mesia i te hoê faaipoiporaa ei mea faahiahia ma te faatupu i ta ˈna semeio matamua i reira, a au roa ˈtu ai te oroa. (Ioane 2:1-11) Ua haere paha oe i te faaipoiporaa o te mau Kerisetiano o tei hinaaro e tavini ia Iehova ma te oaoa ei feia faaipoipo. Aore ra te tiai ra paha oe i to oe iho faaipoiporaa aore ra i te tauturu i te hoê hoa ia manuïa to ˈna faaipoiporaa. Eaha te nehenehe e tauturu mai?

2. Eaha te mau haamaramaramaraa ta te Bibilia e horoa ra no nia i te tereraa o te hoê faaipoiporaa?

² Ua ite te mau Kerisetiano e e tauturu mau te mau aˈoraa i roto i te Parau faaurua a te Atua ia opua te hoê tane e te hoê vahine e faaipoipo. (Timoteo 2, 3:16, 17) Parau mau, aita te Bibilia e tatara huˈahuˈa ra i te tereraa o te hoê faaipoiporaa Kerisetiano. Eiaha e maere no te mea e ere hoê â peu tumu e titauraa e au i te ture i tera fenua i tera fenua e i tera tau i tera tau. I Iseraela i tahito ra, ei hiˈoraa, aita e oroa faaipoiporaa taa ê. I te mahana faaipoiporaa, e aratai te tane faaipoipo apî i ta ˈna vahine i to ˈna fare aore ra i te fare o to ˈna metua tane. (Genese 24:67; Isaia 61:10; Mataio 1:24) E faaipoiporaa taua raveraa ra i mua i te taata e aita hoi e oroa taa ê, mai te rave-pinepine-hia ra i teie mahana.

3. Eaha ta Iesu i rave i Kana?

³ No te mau Iseraela, e faaipoiporaa taua raveraa ra. I muri iho, e haere ratou i te hoê oroa tamaaraa, mai tei faahitihia i roto i te Ioane 2:1. Mea rahi te Bibilia e huri ra i teie irava mai teie: “E faaipoiporaa tei Kana.” Area te taˈo tumu ra, ua huri-maitai-hia ïa ei “oroa tamaaraa faaipoiporaa” aore ra “amuraa maa faaipoiporaa.” *  (Mataio 22:2-10; 25:10; Luka 14:8) Te faaite maitai ra te faatiaraa e ua haere Iesu i te hoê oroa tamaaraa i te hoê faaipoiporaa ati Iuda e ua turu oia i te oaoaraa o te reira. A tapao râ e mea taa ê tera huru faaipoiporaa i tera ra tau e tei matauhia i teie mahana.

4. E maiti te tahi mau Kerisetiano i teihea huru faaipoiporaa, e no te aha?

⁴ I teie mahana, i te fenua e rave rahi, e mea tia ia haapao te mau Kerisetiano o te hinaaro e faaipoipo i te tahi mau titauraa e au i te ture. Ua na reira anaˈe ratou, e nehenehe ïa ratou e faaipoipo ia au i te raveraa atoa e fariihia e te ture. E nehenehe e faatupu i te hoê faaipoiporaa nainai peretitenihia e te hoê haava, tavana oire, aore ra tia faaroo faatiahia e te Hau. E maiti vetahi i taua huru faaipoiporaa ra, e e ani i te tahi mau fetii aore ra hoa Kerisetiano ei ite no ratou aore ra ia apiti noa ˈtu i te oaoaraa o taua oroa faufaa ra. (Ieremia 33:11; Ioane 3:29) Oia atoa, e maiti paha te tahi atu mau Kerisetiano eiaha e faatupu i te hoê tamaaraa rahi o te titau i te faanahoraa e te haamâuˈaraa rahi. E faanaho râ paha ratou i te hoê tamaaraa hau e te tahi noa mau hoa rahi. Noa ˈtu eaha ta tatou e au aˈe i roto i teie tuhaa, e mea tia ia farii tatou e e nehenehe te tahi atu mau Kerisetiano feruriraa paari e horoa mai i te hoê manaˈo taa ê.—Roma 14:3, 4.

5. No te aha e rave rahi Kerisetiano e hinaaro ai i te hoê oreroraa parau i to ratou faaipoiporaa, e no nia te reira i te aha?

⁵ E ani te rahiraa o te mau Kerisetiano o te faaipoipo ia horoahia te hoê oreroraa parau bibilia i to ratou faaipoiporaa. * Te farii ra ratou e o Iehova te tumu o te faaipoiporaa e te horoa ra oia i roto i ta ˈna Parau i te mau aˈoraa paari e nafea te hoê faaipoiporaa e manuïa ˈi e e hopoi mai ai i te oaoa. (Genese 2:22-24; Mareko 10:6-9; Ephesia 5:22-33) Hau atu â, e hinaaro te rahiraa o te feia faaipoipo ia apiti mai te mau hoa e fetii Kerisetiano i taua oroa oaoa ra. E nafea râ tatou ia hiˈo e tia ˈi i te huru rau o te mau titauraa e faanahoraa e au i te ture, e te mau peu matauhia atoa o te fenua? I roto i teie tumu parau, e hiˈopoa tatou i te ravehia ra i te mau fenua rau. Peneiaˈe mea taa ê roa te reira i ta oe i ite aore ra i tei matauhia i te rave i to oe fenua. E nehenehe râ oe e tapao mai i te tahi mau faaueraa tumu aore ra tuhaa matauhia e mea faufaa no te mau tavini a te Atua.

Faaipoiporaa tura—faaipoiporaa ïa e au i te ture

6, 7. No te aha e mea tia ˈi ia haapao tatou i te mau tuhaa e au i te ture o te faaipoiporaa, e e nafea tatou e faaite roa ˈi i te reira?

⁶ O Iehova te tumu o te faaipoiporaa, e mana atoa râ to te mau faatereraa a te taata i nia i te huru tupuraa o te faaipoiporaa. Mea tano te reira. Ua parau Iesu e: “E tuu atu i ta Kaisara ra ia Kaisara, e ta te Atua ra, e tuu atu ïa i te Atua.” (Mareko 12:17) Ua faaue atoa te aposetolo Paulo e: “Ia auraro maite te taata atoa i te feia mana toroa ra. Aore roa hoi e mana maori râ no ǒ mai i te Atua ra; te feia mana e vai nei, ua haapaohia ïa e te Atua.”—Roma 13:1; Tito 3:1.

⁷ I te rahiraa o te mau fenua, na Kaisara, oia hoi te feia mana toroa tivira, e faaoti o vai te tano ia faaipoipo. No reira, ia maiti e piti Kerisetiano tiamâ ia au i te mau Papai e faaipoipo, e auraro maite raua i te mau ture o te fenua. E titauhia paha ia ani raua i te hoê parau faatia, ia rave i te hoê tia fariihia e te Hau no te faatupu i te faaipoiporaa, e ia tapao i to raua faaipoiporaa. I to Kaisara Auguso titauraa i te hoê “papairaa,” ua auraro atu Maria raua Iosepha, ma te haere i Betelehema “ia papaihia” raua.—Luka 2:1-5.

8. I nia i teihea faito e taati ai te faaipoiporaa i na apiti, e eaha te faahopearaa o te reira i nia i te raveraa haapaohia e te mau Ite no Iehova?

⁸ Ia faaipoipo e piti Kerisetiano ma te au i te ture, ua taatihia te tahi i te tahi i te aro o te Atua.  No reira te mau Ite no Iehova e ore ai e faaapî noa i to ratou faaipoiporaa ma te faatupu e rave rau oroa e au i te ture, e ore atoa ˈi e faahiti faahou i ta ratou mau euhe, i te 25raa anei aore ra i te 50raa o to ratou matahiti faaipoiporaa. (Mataio 5:37) (No te tahi mau ekalesia, e ere te hoê faaipoiporaa tivira i te mea mana roa, noa ˈtu e e haamana te ture i te reira; no ratou, mea mana te faaipoiporaa i te taime e faatupu ai te hoê perepitero aore ra te hoê orometua i te hoê oroa aore ra e parau ai oia i na feia momoˈahia ei tane e ei vahine faaipoipo.) I te fenua e rave rahi, e faatia te Hau i te hoê tia Ite no Iehova ia faatupu i te mau faaipoiporaa. Mai te peu e e mai tera, e faatupu paha oia i te faaipoiporaa i te Piha a te Basileia, i reira e horoa-atoa-hia ˈi te oreroraa parau faaipoiporaa. Tera te vahi haamoriraa mau o te tuhaa fenua e te vahi tano ïa no te hoê oreroraa parau no nia i taua faanahoraa ra, ta te Atua ra o Iehova i haamau.

9. (a) I roto i te hoê faaipoiporaa tivira, eaha ta te mau Kerisetiano faaipoipo e maiti i te rave? (b) Eaha te tuhaa a te mau matahiapo i roto i te faanahoraa i te faaipoiporaa?

⁹ I te tahi atu mau fenua, te titau ra te ture ia faaipoipo te hoê tane e te hoê vahine i roto i te hoê piha ohipa a te Hau, mai te fare oire aore ra i mua i te hoê tia o te piha tivira. E faaoti pinepine te mau Kerisetiano i muri iho i taua taahiraa e au i te ture ra, i te fanaˈo i te hoê oreroraa parau faaipoiporaa i te Piha a te Basileia, i taua noa mahana ra aore ra i te mahana i muri iho. (Eita ratou e hinaaro ia mairi e rave rahi mahana i rotopu i te oroa tivira e te oreroraa parau bibilia, no te mea ua faaipoipo ratou i te aro o te Atua e o te taata, i te aro atoa o te amuiraa Kerisetiano.) Ia hinaaro na hoa o te faaipoipo i mua i te hoê tia tivira e fanaˈo i te hoê oreroraa parau i te hoê Piha a te Basileia, e titauhia ia ani na mua raua i te parau faatia i te mau matahiapo o te Tomite tiaauraa a te amuiraa. E hiˈo taua mau tiaau ra i te roo maitai o na hoa o te faaipoipo, e ia ore te hora faaipoiporaa ia haafifi i te mau putuputuraa tamau e te mau porotarama faanahohia i te piha. (Korinetia 1, 14:33, 40) E hiˈo atoa ratou i te mau faaineineraa atoa i te piha i anihia e na hoa o te faaipoipo e e faaoti ratou e e faaara anei i te faaohiparaa o te piha.

10. Ia titauhia te hoê faaipoiporaa tivira, eaha ˈtura ïa no te oreroraa parau faaipoiporaa?

¹⁰ E tutava te matahiapo o te horoa i te oreroraa parau faaipoiporaa i te paraparau ma te mahanahana, ma te faaitoito i te pae varua, e ma te tura. Mai te peu e ua faaipoipo nau hoa i mua i te hoê tia tivira, e faaite maitai oia e ua faaipoipo raua ia au i te ture a Kaisara. Mai te peu e aita te mau euhe o te faaipoiporaa i horoahia i te oroa tivira, e hinaaro paha nau hoa faaipoipo e na reira i te oreroraa parau. * Mai te peu e e faahitihia te euhe i te oroa tivira, e e hinaaro râ na hoa faaipoipo e euhe i mua ia Iehova e i te amuiraa, e na reira ïa raua i te tau ahemo, o te faaite ïa e ua ‘taati-ê-na-hia’ raua.—Mataio 19:6; 22:21.

11. I te tahi mau vahi, e nafea te taata e faaipoipo ai, e eaha ïa te faahopearaa i nia i te oreroraa parau faaipoiporaa?

¹¹ I te tahi mau vahi, aita te ture e titau ra i te tahi oroa, i mua atoa i te hoê tia o te piha tivira. E faaite noa na hoa momoˈahia i te hoê tia faatere i te hoê parau tapaoraa tarimahia ia mana te faaipoiporaa. I reira ïa te hoê parau faaipoiporaa e tapaohia ˈi. Mea na reira raua e hiˈohia ˈi ei tane e ei vahine faaipoipo, i te mahana o to raua faaipoiporaa. Mai tei faahitihia i nia nei, e hinaaro paha na hoa faaipoipo ia horoahia te hoê oreroraa parau bibilia i te Piha a te Basileia i muri rii noa ˈˈe i te tapaoraa. E faaara te taeae feruriraa paari i te pae varua i maitihia no te horoa i te oreroraa parau, i te feia atoa i tae mai  e ua faaipoipo raua, no tapao-noa-hia ˈtura hoi to raua faaipoiporaa. E nehenehe te mau euhe e faahitihia ia au i tei faataahia i te paratarafa 10 e te nota i raro i te api. E nehenehe te feia i tae mai i te Piha a te Basileia e oaoa e na hoa faaipoipo e e haafaufaa i te mau aˈoraa i roto i te Parau a te Atua.—Sire a Solomona 3:11.

Faaipoiporaa e au i te peu tumu e faaipoiporaa tivira

12. Eaha te hoê faaipoiporaa e au i te peu tumu, e eaha te titauhia ia rave i muri aˈe i tera faaipoiporaa?

¹² I te tahi mau fenua, te vai ra te mea e parauhia te faaipoiporaa e au i te peu tumu (aore ra te opu fetii). Aita e parauhia ra no nia e piti taata o te ora amui, e ere atoa i te hoê taatiraa fariihia i te tahi mau vahi, e ere hoi i te hoê faaipoiporaa tei au roa i te ture. * Te parau ra tatou no nia i te hoê faaipoiporaa e au i te peu tumu fariihia e te opu fetii aore ra i te tuhaa fenua. I te tahi taime, e titauhia ia aufau e ia farii i te taatoaraa o te mau taoˈa horoa, ei faaiteraa e ua faaipoipo na hoa ia au i te ture e ia au i te mau Papai. No te Hau, mea mana tera faaipoiporaa e au i te peu tumu i mua i te ture. Ia oti, e nehenehe noa e tapao i te reira, a fanaˈo atu ai na hoa faaipoipo i te hoê parau faaipoiporaa mana. E paruru te tapaoraa i na hoa faaipoipo aore ra i te vahine ia pohe ta ˈna tane e i te mau tamarii e fanauhia mai. E faaitoito te amuiraa i te feia atoa i faaipoipo ia au i te peu tumu ia tapao oioi i te reira. Inaha, e au ra e i raro aˈe i te Ture a Mose, e tapao-roa-hia te mau faaipoiporaa e te mau fanauraa.—Mataio 1:1-16.

13. I muri aˈe i te hoê faaipoiporaa e au i te peu tumu, eaha te tano ia rave i roto i te oreroraa parau faaipoiporaa?

 ¹³ E riro na hoa o te taatihia ia au i te ture i roto i taua faaipoiporaa e au i te peu tumu ra ei tane e ei vahine faaipoipo. Mai tei tapaohia i nia nei, e hinaaro paha te mau Kerisetiano o te faaipoipo mai te reira e fanaˈo i te hoê oreroraa parau faaipoiporaa e e faahiti i te mau euhe i te Piha a te Basileia. Ia tupu te reira, e faaite te taeae orero e ua faaipoipo ê na na hoa ia au i te mau ture a Kaisara. Hoê noa oreroraa parau te horoahia. Hoê noa faaipoiporaa, i roto i teie tupuraa te faaipoiporaa mana e au i te peu tumu (opu fetii), e hoê oreroraa parau bibilia. Te raveraa i na tuhaa e piti i te hoê taime piri roa ia nehenehe, i tera noa mahana mea maitai aˈe, e paturu ïa i te tura o te faaipoiporaa Kerisetiano i te aro o te taata.

14. Eaha ta te hoê Kerisetiano e nehenehe e rave ia faatiahia te faaipoiporaa e au i te peu tumu e te faaipoiporaa tivira?

¹⁴ I te tahi mau fenua e mea mana te faaipoiporaa e au i te peu tumu, e nehenehe atoa e faatupu i te faaipoiporaa tivira (aore ra e au i te ture). E tupu pinepine tera faaipoiporaa tivira i mua i te hoê tia a te Hau, o te nehenehe e titau i na hoa ia faahiti i te mau euhe e ia tarima i te hoê parau tapaoraa. Mea au aˈe na te tahi mau Kerisetiano te faaipoiporaa tivira i te faaipoiporaa e au i te peu tumu. Aita e faufaa ia faatupu i na faaipoiporaa e piti, mea mana hoi na faanahoraa taitahi i mua i te ture. Mai te peu e e maiti te tahi nau Kerisetiano o tei faaipoipo ia au i te peu tumu i te faatupu i te hoê faaipoiporaa tivira i te hoê piha a te Hau (eiaha i te hoê Piha a te Basileia), na raua iho e faaoti. Eita te piti o te faanahoraa e au i te ture e haamana ˈtu â i te faaipoiporaa. Aita e tumu i teie nei ia faanaho i te hoê oreroraa parau aore ra oroa tamaaraa. E tano atoa i ǒ nei tei parauhia i na paratarafa 9 e 10 no nia i te oreroraa parau e te mau euhe o te faaipoiporaa. Te mea faufaa, ia faaipoipo na hoa ma te tura i te aro o te Atua e o te taata.—Luka 20:25; Petero 1, 2:13, 14.

A atuatu i te tura i roto i te faaipoiporaa

15, 16. Eaha te tuhaa faufaa roa a te tura i roto i te hoê faaipoiporaa?

¹⁵ I te fifiraa te faaipoiporaa o te hoê arii Peresia, ua horoa te hoê taata aˈo rahi o Memukana te iˈoa i te hoê manaˈo paari o te nehenehe e faatupu i te maitai—‘ia auraro maite te mau vahine atoa i ta ratou mau tane.’ (Esetera 1:20) I roto i te mau faaipoiporaa Kerisetiano, aita e faufaa ia faauehia te reira e te tahi arii taata; e hinaaro te vahine e auraro maite i ta ˈna tane. Oia atoa, e faatura e e haamaitai te mau tane Kerisetiano i ta ratou mau vahine. (Maseli 31:11, 30; Petero 1, 3:7) E ere e rave rahi matahiti i muri aˈe e faatura ˈi tatou i to tatou faaipoiporaa. Ia itehia te reira e tia ˈi i te haamataraa iho â, i te mahana faaipoiporaa.

¹⁶ E ere o te tane e ta ˈna vahine anaˈe te titauhia ia faatura i te faaipoiporaa. Mai te peu e e horoa te hoê matahiapo Kerisetiano i te hoê oreroraa parau faaipoiporaa, ia tapao-atoa-hia te reira e te tura e tia ˈi. No na hoa faaipoipo te oreroraa parau. Ei faaturaraa atoa ia raua, eita te taeae orero e faaô mai i te mau parau hauti aore ra parau matauhia. Eita oia e horoa i te mau manaˈo faarahi roa a huru ê atu ai na hoa faaipoipo e te feia e faaroo ra. E tutava râ oia i te tamahanahana e i te faaitoito, ma te haamahitihiti i te Tumu o te faaipoiporaa e ta ˈNa mau aˈoraa faahiahia. Oia, e paturu te oreroraa parau faaipoiporaa tura a te matahiapo i te hoê  faaipoiporaa o te faahanahana i te Atua ra o Iehova.

17. No te aha e tuhaa e au i te ture to te mau faaipoiporaa Kerisetiano?

¹⁷ Ua tapao paha oe i roto i teie tumu parau e rave rahi manaˈo no nia i te mau parau rii e au i te ture o te faaipoiporaa. Eita paha te tahi mau manaˈo e tano roa i to oe tuhaa fenua. E titauhia râ ia taa maite ia tatou paatoa e mea faufaa roa no te mau Ite no Iehova ia faaturahia te mau ture o te fenua, ia au i te mau titauraa a Kaisara, i roto i te faaipoiporaa. (Luka 20:25) Te faaue maira Paulo e: “E tuu atu i te mea e au i te taata atoa ra, e taoˈa aufauhia ta ˈna ra, e aufau atu â ïa; e telo ta ˈna ra, ei telo ïa; . . . o tei faateiteihia ra, e faateitei atu â ïa.” (Roma 13:7) Oia, mea tano ia faatura te mau Kerisetiano, mai te mahana faaipoiporaa mai â, i te mau faanahoraa ta te Atua i haamau no teie tau.

18. Eaha te tahi atu tuhaa o te faaipoiporaa e tano ia haapao tatou, e ihea tatou e ite ai i te mau haamaramaramaraa e tano?

¹⁸ I muri aˈe e rave rahi faaipoiporaa Kerisetiano, e faatupuhia te hoê oroa aore ra tamaaraa. A haamanaˈo e ua maiti Iesu i te haere i tera huru oroa tamaaraa. E nafea ïa te mau aˈoraa bibilia e tauturu ai ia tatou ia haapapu e e faahanahana atoa te reira i te Atua e eita te roo o na hoa faaipoipo apî e o te amuiraa Kerisetiano e faainohia? E pahono to muri nei tumu parau i te reira. *

[Nota i raro i te api]

Te haamanaˈo ra anei oe?

• No te aha e titauhia ˈi ia anaanatae tatou i te tuhaa pae varua e te tuhaa e au i te ture o te faaipoiporaa?

• Ia faaipoipo e piti Kerisetiano i mua i te hoê tia tivira, eaha paha ta raua e ani i muri rii noa ˈˈe?

• No te aha te mau oreroraa parau faaipoiporaa e horoahia ˈi i te Piha a te Basileia?

[Uiraa haapiiraa]

[Hohoˈa i te api 12]

I roto i te hoê faaipoiporaa Iseraela i tahito ra, e aratai te tane faaipoipo apî i ta ˈna vahine i to ˈna iho fare aore ra to to ˈna metua tane

[Hohoˈa i te api 15]

I muri aˈe i te hoê faaipoiporaa e au i te peu tumu, e hinaaro paha na Kerisetiano e fanaˈo i te hoê oreroraa parau i te Piha a te Basileia