E nafea ia haafatata ˈtu i “Tei faaroo i te pure”

“E [T]ei faaroo i te pure ra, e tae atoa mai te taata atoa ia oe ra.”—SALAMO 65:2.

1. E nafea te taata e taa ê ai i te mau mea ora ê atu o te fenua, e te horoa nei te reira i teihea ravea?

 O TE taata anaˈe i rotopu i te mau tausani mea ora i te fenua te nehenehe e haamori i te Atua Poiete. O te taata anaˈe te taa e hinaaro pae varua to ratou e te hinaaro e haamâha i te reira. Te horoa nei te reira i te ravea faahiahia no te faatupu i te hoê taairaa piri e to tatou Metua i te raˈi.

2. Eaha te hopea ino a te hara i nia i te taairaa o te taata e to ˈna Atua Poiete?

² Ua poiete te Atua i te taata e te ravea no te aparau atu i Tei Hamani ia ˈna. Ua poietehia Adamu e o Eva ma te hara ore. E nehenehe ïa raua e haafatata noa ˈtu i te Atua mai te hoê tamarii o te haafatata i to ˈna metua tane. I to raua râ hararaa, ua ere raua i tera fanaˈoraa taa ê. Ua faaroo ore Adamu e o Eva i te Atua e ua ere raua i to raua taairaa piri e o ˈna. (Genese 3:8-13, 17-24) Tera anei te auraa e eita te huaai hara a Adamu e nehenehe faahou e aparau atu i te Atua? Aita, te faatia noa nei Iehova ia ratou ia haafatata ˈtu ia ˈna mai te peu noa râ e faaî ratou i te tahi mau titauraa. Eaha teie mau titauraa?

Te mau titauraa no te haafatata ˈtu i te Atua

3. E nafea te mau taata hara e haafatata ˈtu ai i te Atua, e eaha te hiˈoraa e faahohoˈa ra i te reira?

³ No te ite eaha ta te Atua e titau nei i te hoê taata tia ore o te hinaaro nei e haafatata ˈtu ia ˈNa, e tauturu mai te hoê ohipa i tupu i nia i na tamaiti e piti a Adamu. Ua tamata Kaina raua o Abela i te haafatata ˈtu i te Atua ma te pûpû i te mau tusia. Ua farii te Atua i te taoˈa horoa a Abela, aita râ ta Kaina. (Genese 4:3-5) Eaha te taa-ê-raa? Te na ô ra te Hebera 11:4 e: “No te faaroo i maitai roa ˈi ta Abela tusia i pûpû i te Atua i ta Kaina; i parauhia mai ai oia e, e taata parau-tia.” Papu maitai, e titauhia te faaroo ia farii te Atua ia tatou. E taahia te tahi atu titauraa i ta Iehova parau ia Kaina: “Ia rave oe i te parau maitai ra, eita anei e itehia mai?” E, e farii te Atua ia Kaina ia haafatata ˈtu ia ˈna ahiri Kaina i rave i te mea maitai. Ua patoi râ Kaina i te aˈoraa a te Atua, ua taparahi pohe oia ia Abela e riro atura ei oere. (Genese 4:7-12) Mai te haamataraa iho â, e mea faufaa roa te faaroo ma te rave i te mau ohipa maitatai no te haafatataraa ˈtu i te Atua.

4. E mea tia ia farii tatou i te aha no te haafatata ˈtu i te Atua?

⁴ E mea titauhia ia farii tatou i to tatou iho tiaraa taata hara mai te peu e te hinaaro nei tatou e haafatata ˈtu i te Atua. E feia hara te taata atoa, e e haafifi ïa te hara ia haafatata ˈtu i te Atua. Ua papai te peropheta Ieremia no nia ia Iseraela e: “Ua hara matou . . . ua tapoˈi oe ia oe iho i te ata, ia ore te pure ia pǔpû atu i roto ra.” (Oto o Ieremia 3:42, 44) Noa ˈtu te reira, i te roaraa o te tuatapaparaa o te taata ua faaite te Atua e ua ineine oia i te farii i te mau pure a te feia o te haafatata ˈtu ia ˈna ma te faaroo e te huru aau tano, ma te haapao i ta ˈna mau faaueraa. (Salamo 119:145) O vai ma te tahi o taua mau taata ra, e eaha ta tatou e nehenehe e haapii mai i ta ratou mau pure?

5, 6. Eaha ta tatou e nehenehe e haapii i to Aberahama haafatataraa ˈtu i te Atua?

⁵ O Aberahama te hoê o taua mau taata ra.  Ua farii te Atua ia haafatata ˈtu oia ia ˈna, i parau ai te Atua ia Aberahama e “tau hoa.” (Isaia 41:8) Eaha ta tatou e nehenehe e haapii i to Aberahama haafatataraa ˈtu i te Atua? Ua ui taua patereareha haapao maitai ra ia Iehova, no nia i te hoê tamarii aiˈa, a parau atu ai e: “Eaha ta oe e homai no ˈu, teie hoi au a pohe ma te tamarii ore?” (Genese 15:2, 3; 17:18) I te tahi atu taime, ua faaite oia i to ˈna haapeapea no te feia e faaorahia i to te Atua faataeraa i ta ˈna haavaraa i nia i te feia iino no Sodoma e Gomora. (Genese 18:23-33) Ua taparuparu haehaa atoa o Aberahama no vetahi ê. (Genese 20:7, 17) E, mai ia Abela ra, i te tahi taime, ua haafatata ˈtu Aberahama i te Atua ma te pûpû i te tusia ia Iehova.—Genese 22:9-14.

⁶ I taua mau taime atoa ra, aita Aberahama i taiâ i te tauaparau ia Iehova. Ua parau noa râ oia ma te faaite i te hoê manaˈo haehaa ia au i to ˈna tiaraa i mua i to ˈna Atua Poiete. A tapao na i ta ˈna mau parau faatura i roto i te Genese 18:27: “Inaha, ua tamata iho nei au i te parau atu [ia Iehova], e e repo hoi au e te rehu auahi.” E haerea maitai teie no te pee atu!

7. Eaha te mau ohipa ta te mau patereareha i ani ia Iehova na roto i te pure?

⁷ Ua pure te mau patereareha no nia e rave rau ohipa, e ua faaroo maitai Iehova ia ratou. Ua faahiti o Iakoba i te hoê pure mai te hoê euhe te huru. I muri aˈe i to ˈna aniraa i te tauturu a te Atua, ua fafau roa ˈtu oia e: “E te ahuru o te mau mea atoa ta oe e ho mai na ˈu nei, e hopoihia ïa e au na oe.” (Genese 28:20-22) I muri aˈe, ia fatata oia i te farerei i ta ˈna tuaana, ua taparuparu Iakoba i te paruru a Iehova, i te na ôraa e: “E faaora oe ia ˈu nei i te rima o tau tuaana, i te rima o Esau nei; te mǎtaˈu nei hoi au ia ˈna.” (Genese 32:9-12) Ua haafatata ˈtu te patereareha ra o Ioba ia Iehova no to ˈna utuafare, ma te pûpû atu i te mau tusia no ratou. I to Ioba mau hoa hararaa i ta ratou mau parau, ua pure Ioba no ratou, e “ua ite maira Iehova ia Ioba.” (Ioba 1:5; 42:7-9) Te tauturu ra teie mau aamu ia ite tatou i te mau ohipa ta tatou e nehenehe e faahiti ia pure tatou ia Iehova. Te ite atoa ra tatou e ua ineine Iehova i te farii i te mau pure a te feia o te haafatata ˈtu ra ia ˈna ma te hoê huru tano.

I raro aˈe i te faufaa o te Ture

8. I raro aˈe i te faufaa o te Ture, mea nafea i tuuhia ˈtu ai te tahi mau tupuraa o te nunaa i mua ia Iehova ma te pure?

⁸ I muri aˈe i to Iehova faaoraraa i te nunaa Iseraela mai Aiphiti mai, ua horoa ˈtu oia i te faufaa o te Ture. Ua haamau te Ture i te faanahoraa o te hoê autahuˈaraa nominohia no te haafatataraa ˈtu i te Atua. Ua faatoroahia te tahi mau ati Levi no te ohipa ei tahuˈa no te  taata. Ia farerei noa ˈtu te nunaa i te tahi mau tupuraa faufaa roa, na te hoê tia o te nunaa—i te tahi taime e arii aore ra e peropheta—e tuu atu i te reira i mua i te Atua ma te pure. (Samuela 1, 8:21, 22; 14:36-41; Ieremia 42:1-3) Ei hiˈoraa, i te avariraahia te hiero, ua haafatata ˈtu te arii Solomona ia Iehova na roto i te pure ma te aau tae. Ei faahoˈiraa, ua faaite Iehova e ua farii o ˈna i ta Solomona pure ma te faaî i te hiero i to ˈNa hanahana e ma te parau e: “E faaroo vau i te pure i purehia i ǒ nei.”—Paraleipomeno 2, 6:12–7:3, 15.

9. Eaha tei titauhia no te haafatata ˈtu ma te au ia Iehova i roto i te sekene?

⁹ I roto i te Ture i horoahia ia Iseraela, ua tuu Iehova i te hoê titauraa no te haafatataraa ˈtu ia ˈna i roto i te sekene ma te fariihia. Eaha tera mea? I te mau poipoi e ahiahi atoa, hau atu i te pûpûraa i te mau tusia animara, e titauhia te tahuˈa rahi ia tutui i te mea noˈanoˈa i mua i te aro o Iehova. I muri aˈe, ua na reira atoa te mau tahuˈa apiti, eiaha râ i te Mahana taraehara. Aita anaˈe te mau tahuˈa i faahanahana ia au i teie huru faaturaraa, eita ïa Iehova e oaoa i ta ratou taviniraa.—Exodo 30:7, 8; Paraleipomeno 2, 13:11.

10, 11. Eaha te haapapuraa e vai ra e ua farii Iehova i te mau pure a te taata tataitahi?

¹⁰ I Iseraela i tahito ra, mea na roto noa anei i te mau tia i maitihia e nehenehe ai e haafatata ˈtu i te Atua? Aita, te faaite ra te mau Papai e e oaoa Iehova i te farii i te mau pure a te taata tataitahi. I roto i te pure a Solomona no te avariraa i te hiero, ua taparuparu oia ia Iehova, ma te parau e: “I te mau pure atoa e te mau aniraa e anihia e te taata atoa, e to mau taata atoa e Iseraela nei, . . . e ua hohora tia maira i tana rima i teie nei fare: a faaroo mai ai i nia i te raˈi.” (Paraleipomeno 2, 6:29, 30) Te parau maira te faatiaraa a Luka e ia pûpû atu Zekaria, te metua tane o Ioane Bapetizo, i te mea noˈanoˈa i roto i te hiero, “te pure ra” te taata haamori ia Iehova e rave rahi e ere i te tahuˈa “i rapae au.” E au ra e, ua riro te reira ei peu na te taata i te putuputu no te pure i rapae au i te hiero a pûpûhia ˈi te mea noˈanoˈa ia Iehova i nia i te fata auro.—Luka 1:8-10.

¹¹ Ia haafatata ˈtu te taata ia Iehova ma te tano, ua mauruuru ïa oia i te farii i te mau pure a te feia o te tia mai no te nunaa taatoa e a te taata tataitahi e haafatata ˈtu ia ˈna. I teie nei râ tau, aita faahou tatou i raro aˈe i te faufaa a te Ture. I teie mahana, e nehenehe tatou e huti mai i te tahi mau haapiiraa faufaa roa no nia i te pure ia au i te huru o te mau Iseraela i tahito ra i te haafatataraa ˈtu i te Atua.

I raro aˈe i te faanahoraa Kerisetiano

12. Eaha te faanahoraa e vai nei ia haafatata ˈtu te mau Kerisetiano ia Iehova?

¹² I teie nei tei raro aˈe tatou i te faanahoraa Kerisetiano. Aita ïa e hiero mau faahou i reira e tia ˈi te mau tahuˈa no te taatoaraa o te nunaa a te Atua aore ra e fariu ai tatou no te pure i te Atua. Te vai noa nei râ ta Iehova faanahoraa ia nehenehe tatou e haafatata ˈtu ia ˈna. Eaha te reira? I te matahiti 29 T.T., ia faatavaihia te Mesia e ia faatoroahia oia ei Tahuˈa  Rahi, ua haamata te hiero pae varua i te ohipa mai. * O teie hiero pae varua te faanahoraa apî no te haafatata ˈtu ia Iehova ma te haamori na nia i te niu o te tusia taraehara a Iesu Mesia.—Hebera 9:11, 12.

13. No nia i te pure, eaha te hoê faatuearaa o te hiero i Ierusalema e te hiero pae varua?

¹³ Te faahohoˈa maitai ra e rave rahi tuhaa o te hiero i Ierusalema i te mau tuhaa o te hiero pae varua, e oia atoa to te pure. (Hebera 9:1-10) Ei hiˈoraa, eaha ta te mea noˈanoˈa i pûpûhia i te mau poipoi e ahiahi atoa, i nia i te fata o te mea noˈanoˈa i roto i te vahi moˈa o te hiero e faahohoˈa ra? Ia au i te buka o te Apokalupo, “te mea noˈanoˈa, oia te pure a te feia moˈa ra.” (Apokalupo 5:8; 8:3, 4) Ua faauruhia Davida no te papai e: “Ia tano atu tau pure i mua ia oe mai te mea hauˈa noˈanoˈa.” (Salamo 141:2) No reira, i roto i te faanahoraa Kerisetiano, te faahohoˈa maitai ra te mea hauˈa noˈanoˈa i te mau pure e arueraa fariihia e Iehova.—Tesalonia 1, 3:10.

14, 15. Eaha te nehenehe e parau no te haafatataraa ˈtu ia Iehova no (a) te mau Kerisetiano faatavaihia? (b) te mau “mamoe ê atu”?

¹⁴ O vai te nehenehe e haafatata ˈtu i te Atua i roto i teie hiero pae varua? I roto i te hiero mau, ua fanaˈo te mau tahuˈa e ati Levi e tavini i roto i te aua i roto mai, tera râ o te mau tahuˈa anaˈe tei tomo i roto i te vahi Moˈa. Te fanaˈo ra te mau Kerisetiano faatavaihia e tiaturi ra e ora i te raˈi i te hoê huru pae varua otahi, o tei faaite-atea-hia e te aua i roto mai e te vahi Moˈa, a nehenehe ai ratou e pure e e arue i te Atua.

¹⁵ E te feia e tiaturi ra e ora i te fenua, oia hoi te mau “mamoe ê atu”? (Ioane 10:16) Ua faaite te peropheta Isaia e e haere mai te mau taata o te mau fenua e rave rahi no te haamori ia Iehova “i te mau mahana hopea ra.” (Isaia 2:2, 3) Ua papai atoa oia no “te taata ê” te ati atu ia Iehova. Ma te faaite e ua ineine oia i te farii ia ratou ia haafatata ˈtu ia ˈna, ua parau te Atua e: “E faaoaoa vau ia ratou i roto i tau fare pureraa.” (Isaia 56:6, 7) Te horoa ra te Apokalupo 7:9-15 i te tahi atu â mau tuhaa rii ma te faataa i te “feia rahi roa” no “te mau fenua atoa” tei putuputu mai no te haamori e no te pure i te Atua “i te rui e te ao” i te tiaraa i roto i te aua i rapae mai o te hiero pae varua. Auê ïa manaˈo tamahanahana e e nehenehe te mau tavini atoa a te Atua o teie tau e haafatata noa ˈtu i te Atua ma te tiaturi mau e te faaroo maira o ˈna ia ratou!

Eaha te mau pure e fariihia?

16. Eaha ta tatou e nehenehe e haapii mai i te mau pure a te mau Kerisetiano matamua?

¹⁶ E feia pure te mau Kerisetiano matamua. Ua pure ratou no teihea mau mea? Ua ani te mau matahiapo Kerisetiano i te aratairaa no te maiti i te mau tane no te amo i te mau hopoia o te faanahonahoraa. (Ohipa 1:24, 25; 6:5, 6) Ua pure o Epaphera no to ˈna mau hoa faaroo. (Kolosa 4:12) Ua pure te mau melo o te amuiraa i Ierusalema no Petero i roto i te tapearaa. (Ohipa 12:5) Ua ani te mau Kerisetiano  matamua i te Atua te mǎtaˈu ore i mua i te patoiraa, i te na ôraa e: “E teie nei, e hiˈo mai oe, e [Iehova] i ta ratou nei haamǎtaˈuraa mai; e faaitoito mai i to mau tavini ia parau noa i to parau ma te mǎtaˈu ore.” (Ohipa 4:23-30) Ua faaitoito te pǐpǐ ra o Iakobo i te mau Kerisetiano ia pure i te Atua no te paari i roto i te tamataraa. (Iakobo 1:5) E ani atoa anei outou i teie mau mea i roto i ta outou mau pure ia Iehova?

17. E farii Iehova i ta vai ma mau pure?

¹⁷ Eita te Atua e farii i te mau pure atoa. E nafea ïa tatou e pure ai ma te papu e e fariihia ta tatou mau pure? Ua faaroo Iehova i te feia haapao maitai o te tau tahito tei haafatata ˈtu ia ˈna ma te haavare ore e ma te huru aau tano. Ua faaite ratou i te faaroo apeehia e te mau ohipa maitatai. E nehenehe tatou e papu e e faaroo Iehova i te feia e haafatata ˈtu ia ˈna mai te reira te huru i teie mahana.

18. Ia faaroohia ta ratou mau pure, e faaî te mau Kerisetiano i teihea titauraa?

¹⁸ Te vai ra te hoê atu â titauraa. Ua faataa te aposetolo Paulo i te reira, ma te parau e: “No ˈna . . . tatou . . . e ô atu ai i te varua hoê i te Metua ra.” Te faahiti ra Paulo ia vai ia ˈna i papai e, “no ˈna”? Ia Iesu Mesia. (Ephesia 2:13, 18) E, e nehenehe tatou e haafatata ˈtu i te Metua na roto noa râ ia Iesu.—Ioane 14:6; 15:16; 16:23, 24.

19. (a) Inafea te mea noˈanoˈa i pûpûhia i Iseraela i te riroraa ei mea faufau na Iehova? (b) E nafea tatou e papu ai e ua riro ta tatou mau pure ei mea hauˈa noˈanoˈa na Iehova?

¹⁹ Mai tei faahiti-aˈena-hia, te faahohoˈa ra te mea noˈanoˈa i pûpûhia e te mau tahuˈa Iseraela i te mau pure fariihia a te mau tavini haapao maitai a te Atua. I te tahi râ mau taime, e mea faufau na Iehova te mea noˈanoˈa i pûpûhia e te mau Iseraela. Ua tupu te reira ia tutui te mau Iseraela i te mea noˈanoˈa i roto i te hiero ma te tipapa râ i te hoê â taime i mua i te mau idolo. (Ezekiela 8:10, 11) I teie atoa mahana, ua riro te mau pure a te feia faahua tavini ia Iehova e rave ra i te hoê â taime i te mau ohipa o te patoi ra i ta ˈna mau ture ei mea hauˈa ino na ˈna. (Maseli 15:8) E tamau anaˈe ïa i te vai mâ i roto i te mau tuhaa atoa o to tatou oraraa ia riro ta tatou mau pure ei mea hauˈa noˈanoˈa na te Atua. Mea au roa na Iehova i te mau pure a te feia e pee i to ˈna mau eˈa tia. (Ioane 9:31) Te vai noa nei â te tahi atu mau uiraa. E nafea tatou ia pure? E nehenehe tatou e pure no te aha? E e nafea te Atua e pahono ai i ta tatou mau pure? I roto i te tumu parau i muri nei tatou e hiˈopoa ˈi i teie mau uiraa e te tahi atu â.

[Nota i raro i te api]

E nehenehe anei oe e faataa?

• E nafea te taata tia ore e nehenehe ai e haafatata ˈtu i te Atua ma te fariihia?

• I roto i ta tatou mau pure, e nafea tatou e nehenehe ai e pee i te hiˈoraa o te mau patereareha?

• Eaha ta tatou e haapii mai i te mau pure a te mau Kerisetiano matamua?

• Afea ta tatou mau pure e riro ai ei mea hauˈa noˈanoˈa na te Atua?

[Uiraa haapiiraa]

[Hohoˈa i te api 23]

No te aha te Atua i farii ai i te taoˈa horoa a Abela aita râ ta Kaina?

[Hohoˈa i te api 24]

“E repo . . . vau e te rehu auahi”

[Hohoˈa i te api 25]

“E te ahuru o te mau mea atoa ta oe e ho mai na ˈu nei, e hopoihia ïa e au na oe”

[Hohoˈa i te api 26]

Ua riro anei ta outou mau pure ei mea hauˈa noˈanoˈa na Iehova?