Ei haerea paari to tatou—e mǎtaˈu anaˈe i te Atua!

“O te matamua o te paari ra, o te mǎtaˈu ïa ia Iehova.”—MASELI 9:10.

1. No te aha e mea fifi ai no e rave rahi ia taa i te manaˈo o te mǎtaˈuraa i te Atua?

 I TE hoê tau, ia parauhia no te hoê taata e e taata mǎtaˈu oia i te Atua, e haapopouraa ïa. I teie tau, no e rave rahi e manaˈo tahito te mǎtaˈuraa i te Atua e mea fifi râ ia taa. ‘I te mea e e aroha te Atua,’ e ui mai paha ratou, ‘no te aha vau e mǎtaˈu ai ia ˈna?’ No ratou, e huru aau o te faatoaruaru e o te haaparuparu atoa te mǎtaˈu. Mai ta tatou e ite mai, e auraa rahi atu â râ to te mǎtaˈu mau i te Atua, e ere noa i te hoê manaˈo aore ra i te hoê huru aau.

2, 3. Eaha te vai ra i roto i te mǎtaˈu mau i te Atua?

² Ia au i te Bibilia e manaˈo maitai te mǎtaˈu i te Atua. (Isaia 11:3) E faatura e e tura hohonu i te Atua te reira, e hinaaro puai eiaha e faariri ia ˈna. (Salamo 115:11) Te vai atoa ra te fariiraa e te pee-maite-raa i te mau ture aveia morare a te Atua e te hoê hinaaro e ora ia au i ta te Atua e parau ra e mea tia aore ra e mea hape. Te parau ra te hoê buka e te faataa ra teie huru mǎtaˈu i “te hoê huru feruriraa papu no nia i te Atua o te faatupu mai i te hoê haerea paari e i te faarueraa i te mau ohipa ino atoa.” Ma te tano, te na ô maira te Parau a te Atua e: “O te matamua o te paari ra, o te mǎtaˈu ïa ia Iehova.”—Maseli 9:10.

³ Oia mau, te taaihia ra te mǎtaˈu i te Atua i te ohipa huru rau a te taata. E faatupu te reira eiaha i te paari anaˈe i te oaoa atoa râ, te hau, te taoˈa rahi, te oraraa maoro, te tiaturiraa, te tiaturi e te itoito rahi. (Salamo 2:11; Maseli 1:7; 10:27; 14:26; 22:4; 23:17, 18; Ohipa 9:31) Te taai-roa-hia ra te reira i te faaroo e i te here. Inaha, te taamuhia ra te reira i to tatou taairaa taatoa e te Atua e to tatou taata-tupu. (Deuteronomi 10:12; Ioba 6:14; Hebera 11:7) Te vai ra i roto i te mǎtaˈu i te Atua te manaˈo papu e te haapao nei to tatou Metua i te raˈi ra ia tatou e ua ineine oia i te faaore i ta tatou mau hara. (Salamo 130:4) O te feia ino tatarahapa ore anaˈe te riaria i te Atua. *—Hebera 10:26-31.

Te haapiiraa i te mǎtaˈu ia Iehova

4. Eaha te nehenehe e tauturu ia tatou ia ‘haapii i te mǎtaˈu ia Iehova’?

⁴ I te mea e e mea faufaa roa te mǎtaˈu i te Atua no te rave i te mau faaotiraa paari e no te fanaˈo i te mau haamaitairaa a te Atua, e nafea tatou e nehenehe ai ‘e haapii i te mǎtaˈu maitai ia Iehova’? (Deuteronomi 17:19; MN) Ua papaihia i roto i te mau Papai e rave rahi hiˈoraa o te mau tane e vahine mǎtaˈu i te Atua “ia ite tatou.” (Roma 15:4) No te tauturu ia taa tatou i te auraa mau o te mǎtaˈuraa i te Atua, e feruri anaˈe i te oraraa o te hoê o tera mau hiˈoraa, o Davida te arii o Iseraela i tahito ra.

5. Mea nafea to Davida tiairaa i te mau mamoe i tauturu ai ia ˈna ia haapii i te mǎtaˈu ia Iehova?

⁵ Ua faarue Iehova ia Saula te arii matamua o Iseraela no to ˈna mǎtaˈu i te taata e to ˈna ereraa i te mǎtaˈu paieti. (Samuela 1, 15:24-26) Area te faataa ra te oraraa o Davida e to ˈna taairaa piri e o Iehova e e taata mǎtaˈu mau o ˈna i te Atua. Mai to ˈna apîraa ra, ua tiai pinepine o Davida i te mau mamoe a to ˈna metua tane. (Samuela 1, 16:11) I to ˈna tiairaa i te mau mamoe i te po i rapae au ua tauturu paha te reira ia Davida ia taa i te mǎtaˈu ia Iehova. Noa ˈtu e ua nehenehe Davida e haroaroa i te hoê noa tuhaa iti o te rahi o te ao nui, ua faaoti maitai oia e—e au ia faatura e ia haamori tatou i te Atua. “Ia  hiˈo vau i te mau raˈi i te ohipa a to rima ra; te marama e te mau fetia ta oe i faaau ra,” ua papai oia i muri iho e, “eaha te taata nei i manaˈo mai ai oe ia ˈna? e ta te taata nei tamaiti i haapao mai ai oe ia ˈna?”—Salamo 8:3, 4.

6. Mai te aha to Davida huru a haroaroa ˈi oia i te rahi o Iehova?

⁶ Ua putapû mau â o Davida i to ˈna faaauraa i to ˈna haihai i te rahi o te raˈi î i te fetia. Aita oia i riaria, ua turai râ teie ite ia arue o ˈna ia Iehova e ia na ô e: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima!” (Salamo 19:1) Ua turai teie faatura i te Atua ia haafatata ˈtu â Davida ia Iehova e ia hinaaro o Davida e haapii e e pee i to ˈNa mau eˈa tia roa. A feruri na i to Davida huru a himene ai oia ia Iehova e: “E Atua rahi . . . oe, e te ohipa taa ê ta oe e rave ra! o oe anaˈe ra te Atua mau! E haapii mai oe, e Iehova, i to oe ra eˈa, e haapao vau i ta oe ra parau mau: ia rotahi maite hoi tau aau i te mǎtaˈuraa i to iˈoa na.”—Salamo 86:10, 11.

7. Mea nafea te mǎtaˈuraa i te Atua i tauturu ai ia Davida ia aro atu ia Golia?

⁷ I to te mau Philiseti haruraa i te fenua o Iseraela, ua aa ˈtu o Golia te aito Philiseti fatata e 3 metera i te roa, i te mau Iseraela, e ua na ô hoi e: ‘A imi i te hoê taata no te aro mai ia ˈu nei! E ia pohe au ia ˈna, e tavini ïa matou ia outou.’ (Samuela 1, 17:4-10) Ua taiâ ihora o Saula e ta ˈna nuu taatoa—aita râ o Davida. Ua ite oia e e mea tia ia mǎtaˈu ia Iehova anaˈe, eiaha te taata, noa ˈtu eaha to ˈna puai. “Te haere atu nei . . . vau ia oe, ma te iˈoa o te Atua sabaota ra o Iehova,” ta Davida ïa i parau atu ia Golia, “e ite hoi teie nei feia rahi atoa ra, e e tia ia Iehova ia faaora eiaha noa ˈtu ei ˈoˈe, eiaha ei mahae: na Iehova hoi teie nei tamaˈi.” Ua tairi pohe roa o Davida i te tiapai taata ra i ta ˈna maa e te hoê anaˈe iho ofai—e te tauturu a Iehova.—Samuela 1, 17:45-47.

8. Eaha ta te mau hiˈoraa bibilia o te feia mǎtaˈu i te Atua e haapii maira?

⁸ Te faaû nei paha tatou i te mau fifi aore ra te mau enemi o ta tatou e taiâ nei mai te feia o ta Davida i aro atu. E nafea ïa tatou? E nehenehe tatou e faaruru atu i te reira mai ia Davida e te tahi atu feia haapao maitai i tahito ra—ma te mǎtaˈu paieti. E nehenehe te mǎtaˈu i te Atua e haavî i te mǎtaˈu i te taata. Ua faaitoito o Nehemia, te hoê tavini haapao maitai a te Atua, i to ˈna ra mau hoa Iseraela, i teimaha na i te mau enemi: “Eiaha outou e mǎtaˈu ia ratou; e  haamanaˈo ia Iehova, i te rahi e te mana.” (Nehemia 4:14) Ma te turu a Iehova, ua manuïa o Davida, o Nehemia, e te tahi atu mau tavini haapao maitai a te Atua i te raveraa i ta ratou mau hopoia no ǒ mai i te Atua ra. Ma te mǎtaˈu paieti, e nehenehe atoa tatou e manuïa.

Te faaûraa i te mau fifi ma te mǎtaˈu paieti

9. I roto i teihea mau tupuraa i faaite ai Davida i te mǎtaˈu i te Atua?

⁹ I muri aˈe i to Davida haapoheraa ia Golia, ua faaupootia rahi Iehova ia ˈna. No to ˈna pohehae, ua tamata hoi o Saula—na mua ma te haa taue, i muri iho ma te haavarevare e i te pae hopea ma te tono i te nuu—e taparahi ia Davida. Ua haapapu râ Iehova ia Davida e e riro mai o ˈna ei arii, ua horo noa na o Davida e mau matahiti i te maoro, ua aro, e ua tiai i te taime e faaarii ai Iehova ia ˈna. I te roaraa o teie mau mea atoa ua faaite Davida e o te Atua mau ta ˈna i mǎtaˈu.—Samuela 1, 18:9, 11, 17; 24:2.

10. Mea nafea to Davida faaiteraa i te mǎtaˈu i te Atua i mua i te tamataraa?

¹⁰ I te hoê taime, ua horo o Davida i te arii ia Akisa ra no te oire Philiseti o Gata, te oire hoi o Golia. (Samuela 1, 21:10-15) Ua pari te mau tavini a te arii ia Davida ei enemi no to ratou nunaa. Ua nafea o Davida i mua i tera tupuraa atâta? Ua pure oia ma te ninii i to ˈna aau i mua ia Iehova. (Salamo 56:1-4, 11-13) Noa ˈtu e ua faapeu maamaa oia ia ˈna ia ora ˈtu oia, ua ite Davida e na Iehova i faaora mau ia ˈna ma te haamaitai i ta ˈna mau tutavaraa. Ua faaite to Davida imiraa ia Iehova ma to ˈna aau atoa e tiaturi ia ˈna e e taata mǎtaˈu mau oia i te Atua.—Salamo 34:4-6, 9-11.

11. Mai ia Davida ra, e nafea tatou e faaite ai i te mǎtaˈu paieti i mua i te ati?

¹¹ Mai ia Davida, e nehenehe tatou e faaite i te mǎtaˈu i te Atua ma te tiaturi i ta ˈna parau fafau e tauturu mai ia faaruru i to tatou mau fifi. “E tuu atu i to parau ia Iehova; e tiaturi ia ˈna, e na ˈna e faatupu i te reira,” o ta Davida ïa i parau. (Salamo 37:5) E ere ïa i te auraa e e tuu noa tatou i to tatou mau fifi i te rima o Iehova ma te ore e rave i tei maraa ia tatou e ma te tiai e na ˈna e faaafaro i te reira. Aita Davida i pure i te Atua no te ani i te tauturu a vaiiho noa ˈtu ai i te mau mea ia tupu. Ua faaohipa oia i te mau ravea pae tino e pae feruriraa ta Iehova i horoa na ˈna e ua faaû oia i te fifi. Ua ite râ o Davida e ere i te mau tutavaraa a te taata anaˈe e manuïa ˈi. Mai te reira atoa no tatou nei. E rave anaˈe i te mau mea atoa e maraa ia tatou, e na Iehova e haapao i te toea. Inaha, e pinepine aita ta tatou e ravea maoti i te tiai ia Iehova. I reira tatou e faaite ai i to tatou iho mǎtaˈu i te Atua. E nehenehe tatou e mahanahana i te parau putapû a Davida: “Te [taairaa piri roa e o] Iehova ra, tei te feia ïa i mǎtaˈu ia ˈna ra.”—Salamo 25:14; MN.

12. No te aha tatou e haafaufaa ˈi i ta tatou mau pure, e eiaha roa tatou e faaite i teihea huru?

¹² No reira tatou e faariro ai i ta tatou mau pure e to tatou taairaa e te Atua ei ohipa faufaa. Ia haafatata ˈtu tatou ia Iehova, ia ‘[tiaturi] ïa tatou e, e Atua, e tia ˈi, e o oia te faautua i te feia i imi papu ia ˈna ra.’ (Hebera 11:6; MN; Iakobo 1:5-8) E ia tauturu mai oia ia tatou, e mea titauhia ia ‘mauruuru roa tatou,’ mai ta te aposetolo Paulo i aˈo mai. (Kolosa 3:15, 17) Eiaha roa tatou e riro mai te feia ta te hoê Kerisetiano faatavaihia aravihi i faataa: “Te faariro nei ratou i te Atua mai te hoê tuati i te raˈi ra,” o ta ˈna ïa i parau. “Ia hinaaro ratou i te tahi mea, e pata rima noa ratou ia haapao oioi mai te Atua. E ia noaa ia ratou te mea o ta ratou e hiaai ra, e hinaaro ratou ia haere ê oia.” Te faaite ra tera huru i te hoê ereraa i te mǎtaˈu paieti.

Ia erehia i te mǎtaˈu i te Atua

13. Inafea Davida i ore ai i faatura i te Ture a te Atua?

¹³ Ma te ite i te tauturu a Iehova i to ˈna hepoheporaa, ua rahi mai to Davida mǎtaˈu i te Atua e ua haapaari te reira i to ˈna tiaturi ia ˈna. (Salamo 31:22-24) A toru râ taime peapea, ua ere o Davida i te mǎtaˈu i te Atua e ua itehia mai te mau faahopearaa ati. Na mua i to ˈna faaineineraa i te hopoi i te afata faufaa a Iehova i Ierusalema na nia i te hoê pereoo eiaha râ ma te utahia i nia i te tapono o te mau ati Levi, mai tei  faauehia e te Ture a te Atua. I to Uza aratairaa i te pereoo tapearaa ˈtu i te Afata eiaha ia topa, ua pohe roa oia i reira ra no to ˈna “hapa.” E, ua hara rahi Uza, na Davida râ i ore i faatura maitai i te Ture a te Atua i tupu ai tera ati. Te mǎtaˈuraa i te Atua o te raveraa ïa i te mau mea ia au i ta ˈna huru raveraa.—Samuela 2, 6:2-9; Numera 4:15; 7:9.

14. Eaha te faahopearaa i to Davida numeraraa ia Iseraela?

¹⁴ I muri aˈe, ma te turaihia e Satani, ua numera o Davida i te mau faehau Iseraela. (Paraleipomeno 1, 21:1) I te na reiraraa, ua ere o Davida i te mǎtaˈu i te Atua, a pohe ai e 70 000 Iseraela. Noa ˈtu e ua tatarahapa o Davida i mua ia Iehova, ua mauiui roa o ˈna e te feia tapiri.—Samuela 2, 24:1-16.

15. No te aha Davida i hara ˈi i te pae taatiraa?

¹⁵ Ua aratai te tahi atu ereraa taime poto i te mǎtaˈu i te Atua ia Davida i roto i te taatiraa morare ore e o Bate-seba, te vahine a Uria. Ua ite Davida e e mea ino te faaturi aore ra te nounou i ta vetahi ê vahine. (Exodo 20:14, 17) Ua haamata te fifi ia Davida i ite ia Bate-seba i te horoiraa ia ˈna. E titau te mǎtaˈu tia i te Atua ia huri oioi atu Davida i to ˈna na mata e i to ˈna mau manaˈo i te vahi ê. Ua ‘hiˈo noa ˈtu’ râ Davida ia ˈna e ua vî to ˈna mǎtaˈu i te Atua i to ˈna hinaaro e taati. (Mataio 5:28; Samuela 2, 11:1-4) Ua moe ia Davida to ˈna mau taairaa e o Iehova i roto i te mau tuhaa atoa o to ˈna oraraa.—Salamo 139:1-7.

16. Ua roohia Davida i teihea mau faahopearaa no ta ˈna hara?

¹⁶ E tamaroa ta raua i noaa a taoto ai Davida ia Bate-seba. I muri iti noa ˈˈe, ua tono Iehova ia Natana ta ˈna peropheta no te faaite ia Davida i ta ˈna hara. I muri iho i to ˈna feruri-maitai-faahou-raa, ua mǎtaˈu â oia i te Atua e ua tatarahapa. Ua taparu oia ia Iehova eiaha e faarue ia ˈna e eiaha e rave ê atu i to ˈna varua moˈa. (Salamo 51:7, 11, MN) Ua faaore Iehova i te hara a Davida  e ua faaiti i te utua, aita râ Oia i paruru ia Davida i te mau faahopearaa peapea roa o ta ˈna mau ohipa. Ua pohe te tamaroa a Davida, e mai reira mai ua roohia to ˈna utuafare i te oto e te ati. Auê ïa utua teiaha ia ere i te mǎtaˈu i te Atua!—Samuela 2, 12:10-14; 13:10-14; 15:14.

17. A horoa na i te hoê hiˈoraa no te oto e tupu mai i te raveraa i te hara?

¹⁷ I teie tau, e nehenehe te mǎtaˈu ore i te Atua no nia i te mau tumu parau morare e faatupu mai i te mau faahopearaa ino vai maoro. A manaˈo na i te oto o te aau o te hoê vahine faaipoipo apî ia ite oia e ua faaturi ta ˈna tane Kerisetiano a rave ai oia i te ohipa i te mau motu atea. Ma te piˈo i raro i te mihi e te oto, ua huna oia i to ˈna mata i roto i to ˈna na rima e ua taˈi oia. Eaha te maororaa no ta ˈna tane ia tiaturi faahou mai e ia faatura faahou ta ˈna vahine ia ˈna? E nehenehe teie mau faahopearaa peapea roa e apehia i te mǎtaˈu-mau-raa i te Atua.—Korinetia 1, 6:18.

Te tapea nei te mǎtaˈu i te Atua eiaha tatou ia hara

18. Eaha te fa e te huru raveraa a Satani?

¹⁸ Te tuino oioi roa nei Satani i te mau faufaa morare o te ao nei, e te hinaaro iho â ra oia e haaviivii i te mau Kerisetiano mau. No te na reira, e faaohipa o ˈna i te eˈa oioi roa ˈˈe ia puta to tatou mafatu e to tatou feruriraa—na roto iho â râ i to tatou mata e tariˈa. (Ephesia 4:17-19) Eaha to outou huru ia û noa ˈtu outou i te mau hohoˈa, te mau parau, aore ra te feia morare ore?

19. Mea nafea te mǎtaˈu paieti i te tautururaa i te hoê Kerisetiano ia upootia i te faahemaraa?

¹⁹ A hiˈo na i te ohipa i tupu i nia ia André, * te hoê matahiapo Kerisetiano, e metua tane, e e taote oia i Europa. Ia rave o André i te ohipa i te po taatoa i te fare maˈi, e pine noa te mau vahine rave ohipa i te mau parau—e hohoˈa mafatu to nia iho—i nia i to ˈna turuˈa, no te ani ia taoto André ia ratou. Ua patoi uˈana o André i te tâuˈa i ta ratou mau faahinaaroraa. Hau atu â, no te faarue i teie vahi taiata, ua noaa ta ˈna ohipa i te vahi ê. Ua riro mau â te mǎtaˈuraa i te Atua ei haerea paari roa e ei haamaitairaa te itehia mai, i teie mahana te tavini nei o André ma te afa mahana i te piha ohipa a te amaa a te mau Ite no Iehova i to ˈna fenua.

20, 21. (a) E nafea te mǎtaˈu i te Atua e nehenehe ai e tauturu ia ape tatou i te rave i te hara? (b) Eaha te hiˈopoahia i roto i te tumu parau i muri nei?

²⁰ E nehenehe te manaˈonaˈoraa i te mau mea iino e faatupu mai i te hoê huru feruriraa o te turai i te hoê taata ia faarue i to ˈna taairaa faufaa roa e o Iehova no te tahi mea opanihia. (Iakobo 1:14, 15) Ia mǎtaˈu râ tatou ia Iehova, e faaatea—e haere ê—tatou i te feia, te vahi, te ohipa, e te faaanaanataeraa o te nehenehe e haafifi mai i to tatou vai-ara-raa i te pae morare. (Maseli 22:3) Noa ˈtu te haama aore ra te haapaeraa, e mea haihai roa ia faaauhia te reira i te ereraa i ta te Atua farii maitai. (Mataio 5:29, 30) No te mǎtaˈuraa i te Atua eiaha roa ˈtu tatou e tuu ia tatou iho i mua i te tahi mea morare ore, e te tahi noa ˈtu hohoˈa hairiiri, ia fariu ê râ to tatou mata “ia ore ia hiˈo i te mea faufaa ore.” Ia na reira tatou, e nehenehe tatou e tiaturi ia Iehova no te ‘faaora ia tatou’ e no te horoa mai i te mau mea atoa o ta tatou e hinaaro mau ra.—Salamo 84:11; 119:37, MN.

²¹ Oia mau, e haerea paari noa te ohiparaa ma te mǎtaˈu i te Atua. E tumu atoa te reira no te oaoa mau. (Salamo 34:9) E faaite-maitai-hia te reira i roto i te tumu parau i muri nei.

[Nota i raro i te api]

E nehenehe anei outou e faataa?

• Eaha te mau huru maitatai Kerisetiano e vai ra i roto i te mǎtaˈu i te Atua?

• E nafea te mǎtaˈu i te Atua e faaore ai i te mǎtaˈu i te taata?

• E nafea tatou e faaite ai e manaˈo tano to tatou no nia i te pure?

• E nafea te mǎtaˈu i te Atua e tapea ˈi ia ore tatou ia hara?

[Uiraa haapiiraa]

[Hohoˈa i te api 23]

Ua haapii Davida i te mǎtaˈu i te Atua ma te mataitairaa i ta Iehova poieteraa

[Hohoˈa i te api 25]

Eaha to outou huru ia û noa ˈtu outou i te faahemaraa?