Manaˈo faufaa o te buka a Esetera
Mea ora te parau a Iehova
Manaˈo faufaa o te buka a Esetera
E TUPU iho â te opuaraa. E haapohe-papu-roa-hia te mau ati Iuda. I te hoê noa mahana i faataa-aˈena-hia, e taparahi-pauroa-hia pauroa te mau ati Iuda e ora ra i roto i te hau emepera, mai Inidia e tae atu i Etiopia. Tera ta te taata faanaho i te opuaraa e manaˈo ra. Hoê râ tuhaa rii faufaa roa tei moe ia ˈna. E nehenehe te Atua o te raˈi e faaora i to ˈna nunaa maitihia i te mau fifi atâta atoa. Ua papaihia teie faaoraraa i roto i te buka bibilia a Esetera.
Papaihia e te hoê ati Iuda ruhiruhia o Moredekai te iˈoa, e puohu te buka a Esetera i te hoê tau fatata 18 matahiti o te faatereraa a te arii Peresia ra o Ahasueru, aore ra Xerxès I. Te faaite ra teie faatiaraa peapea roa e nafea Iehova e faaora ˈi i to ˈna nunaa i te mau opuaraa iino a to ratou mau enemi, noa ˈtu e ua purara roa ta ˈna mau tavini e ati aˈe te hoê hau emepera aano. I teie tau, e haapuai mau taua ite ra i te faaroo o te nunaa o Iehova, o te pûpû nei na ˈna i te taviniraa moˈa i roto e 235 fenua. Hau atu â, e hiˈoraa te mau taata i faataahia i roto i te buka a Esetera ta tatou e pee e te tahi atu ta tatou e hinaaro e ape. Oia mau, ‘e mea ora te parau a te Atua, e te puai rahi.’—Hebera 4:12.
E MEA TIA IA HAA MAI TE ARII VAHINE
I te toruraa o ta ˈna matahiti faatereraa (493 H.T.T.), e faatupu te arii Ahasueru i te hoê amuraa maa rahi. E roohia te arii vahine ra o Vaseti, tei tui te roo no to ˈna haviti, i te mauruuru ore rahi o te arii e e ere oia i to ˈna tiaraa. E maitihia te vahine ati Iuda ra o Hadasa i rotopu i te mau paretenia purotu atoa o te fenua no te rave i to ˈna parahiraa. Ia au i te aratairaa a to ˈna taeae fetii ra o Moredekai, e huna oia i to ˈna ihotaata ati Iuda e e rave oia i to ˈna iˈoa Peresia ra o Esetera.
I muri aˈe, e faateiteihia te hoê taata teoteo o Hamana te iˈoa i nia i te tiaraa faatere hau nui. E riri roa Hamana i to Moredekai patoiraa i ‘te piˈo i raro aore ra i te faatura ia Hamana,’ e opua ˈtura oia i te taparahi pauroa i te mau ati Iuda o te Hau emepera Peresia. (Esetera 3:2) E turai Hamana ia Ahasueru ia farii i ta ˈna opuaraa e e manuïa oia i te ani i te arii ia horoa mai i te hoê faaueraa mana no te faatupu i teie haapoheraa. ‘E ahu Moredekai i te ahu oto e te rehu auahi.’ (Esetera 4:1) E mea tia ia haa mai Esetera i teie nei. E titau manihini oia i te arii e ta ˈna faatere hau nui i te hoê amuraa maa o ratou anaˈe. I to raua haereraa ˈtu ma te oaoa, e ani Esetera ia raua ia haere mai i te tahi atu amuraa maa i te mahana i muri iho. E oaoa o Hamana. E riri râ oia i to Moredekai patoiraa i te faahanahana ia ˈna. E opua Hamana i te haapohe ia Moredekai hou te amuraa maa i te mahana i muri iho.
Uiraa bibilia pahonohia:
1:3-5—Ua tupu anei te amuraa maa 180 mahana i te maoro? Aita te irava e parau ra e ua tupu maoro te amuraa maa, teie râ ua faaite te arii i te mau tia mana i te taoˈa rahi e te hau ê o to ˈna ra basileia 180 mahana i te maoro. Ua faaohipa paha te arii i teie tupuraa roaroa no te faaite ma te teoteo i te hanahana o to ˈna basileia ei haamaereraa i te feia rarahi e ei haapapuraa ia ratou i to ˈna aravihi i te faatupu i ta ˈna opuaraa. I roto i tera tupuraa, e nehenehe na irava 3 e te 5 e au i na mahana amuraa maa e 7 i tupu i te hopea o na mahana putuputuraa 180.
1:8—Eaha te auraa e aita hoê aˈe i “faatinahia,” aore ra faahepohia ‘ia haapao i te ture i te inuraa’? I reira, ua taui te arii Ahasueru i te huru raveraa i te mea e hiˈohia ra ei peu Peresia matauhia e turai te tahi i te tahi ia inu i te tahi faito i tera mau putuputuraa. Te na ô ra te hoê buka e: “E nehenehe ratou e inu rahi aore ra e inu rii mai ta ratou i hinaaro.”
1:10-12—No te aha te arii vahine ra o Vaseti i ore ai i haere atu i te arii ra? Te horoa ra te tahi mau aivanaa i te manaˈo e aita te arii vahine i auraro no te mea ua maiti oia eiaha e haaviivii ia ˈna iho i mua i te mau manihini i taero a te arii. Aore ra peneiaˈe e ere iho â teie arii vahine haviti i te vahine auraro. Noa ˈtu e aita te Bibilia e faahiti ra i to ˈna mau manaˈo turai, ua manaˈo te feia paari o tera ra tau e mea faufaa te auraroraa i te tane e e ohipa te hiˈoraa ino o Vaseti i nia i te mau vahine atoa o te mau mataeinaa o Peresia.
2:14-17—Ua rave anei Esetera i te taatiraa morare ore e te arii? Teie te pahonoraa, aita. Te na ô ra te faatiaraa e ia ao aˈe, ua hoˈi te tahi atu mau vahine i arataihia i te arii ra i te piti o te fare e haapaohia e te eunuka a te arii, “tei tiai i te mau vahine.” Ua riro ïa te mau vahine o tei faaea i pihaiiho i te arii i te po ei vahine, aore ra ei vahine piti na ˈna. Aita râ Esetera i arataihia i te fare o te mau vahine i muri aˈe i te iteraa i te arii. I te aratairaahia Esetera i mua ia Ahasueru, “hau atura to te arii hinaaro ia Esetera i te mau vahine atoa, herehia mai hoi oia e ana i te mau paretenia atoa.” (Esetera 2:17) Mea nafea oia i ‘herehia ˈi’ e Ahasueru? Mai ia ˈna atoa i herehia e vetahi ê. ‘Ua au maite Hegai i te vahine ra e ua herehia oia e ana.’ (Esetera 2:8, 9) Ua au roa Hegai ia ˈna ia au i te mea ta ˈna i hiˈopoa—to ˈna rapaeauraa e to ˈna mau huru maitatai. Oia mau, “i auhia mai Esetera i te aro o te feia atoa i hiˈo mai ia ˈna ra.” (Esetera 2:15) Oia atoa, ua maere te arii i ta ˈna i ite i nia ia Esetera e no reira oia i hinaaro ai ia ˈna.
3:2; 5:9—No te aha Moredekai i patoi ai i te piˈo i mua ia Hamana? E ere i te mea ino no te mau Iseraela ia farii i te tiaraa teitei o te hoê taata i faateiteihia ma te piˈo i mua ia ˈna. I roto râ i te tupuraa o Hamana, e ere tera anaˈe. E ati Agaga o Hamana, e ati Amaleka paha, e ua tapao Iehova i te ati Amaleka no te haamouraa. (Deuteronomi 25:19) No Moredekai, te piˈoraa i mua ia Hamana, o te taivaraa ïa ia Iehova. Ua patoi etaeta oia, ma te faaite e e ati Iuda oia.—Esetera 3:3, 4.
Haapiiraa no tatou:
2:10, 20; 4:12-16. Ua farii Esetera i te aratairaa e te aˈoraa a te hoê taata paari haamori o Iehova. E haerea paari ‘ia faaroo tatou i to tatou mau aratai e ia auraro atu tatou.’—Hebera 13:17.
2:11; 4:5. ‘Eiaha tatou e haapao i ta tatou anaˈe ihora, e haapao atoa râ i ta vetahi ê ra maitai.’—Philipi 2:4.
2:15. Ua faaite Esetera i te aau faahaihai e te hitahita ore ma te ore e ani i te tahi atu â mau taoˈa faanehenehe aore ra ahu nehenehe roa i tei horoahia e Hegai. Maoti ‘te taata moe o te aau ra te faaunauna, i te mea tahuti ore ra, o te aau mǎrû e te mamahu’ i auhia ˈi Esetera e te arii.—Petero 1, 3:4.
2:21-23. E hiˈoraa maitai Esetera raua Moredekai i ‘te auraro-maite-raa i te feia mana toroa.’—Roma 13:1.
3:4. I roto i te tahi mau tupuraa, e haerea paari paha ia mamû noa no nia i to tatou ihotaata, mai ia Esetera no nia i to ˈna. Ia titauhia râ ia paturu i te mau tumu parau faufaa, mai te mana arii o Iehova e to tatou hapa ore, eiaha tatou e mǎtaˈu i te faaite e e Ite no Iehova tatou.
4:3. Ua û anaˈe tatou i te mau tamataraa, e mea tia ia fariu tatou ia Iehova ra na roto i te pure no te ani i te puai e te paari.
4:6-8. Ua imi Moredekai i te hoê ravea e au i te ture i mua i te haamǎtaˈuraa ta te opuaraa ino a Hamana i faatupu.—Philipi 1:7, MN.
4:14. E hiˈoraa maitai roa te tiaturi o Moredekai ia Iehova.
4:16. Maoti te tiaturi roa ia Iehova i faaû ai Esetera ma te haapao maitai e te itoito i te hoê tupuraa o te nehenehe e aratai ia ˈna i te pohe. Mea faufaa roa ia haapii tatou i te tiaturi ia Iehova e eiaha ia tatou iho.
5:6-8. Ia farii-maitai-hia oia e Ahasueru, ua titau manihini Esetera ia ˈna i te piti o te amuraa maa. Ua ohipa oia ma te paari, ia na reira atoa tatou e tia ˈi.—Maseli 14:15.
TE HOÊ ANAIRAA TAUIRAA
A tupu noa ˈi te mau mea, e huri te mataˈi. Ua tarîhia Hamana i nia i te rîraa ta ˈna i hamani no Moredekai, e riro te taata i opuahia i te haapohe ei faatere hau nui! Eaha ˈtura no te haapoheraa opuahia o te mau ati Iuda? E tauiraa taue atoa ïa te tupu e tia ˈi.
E paraparau faahou Esetera haapao maitai. Ma te faaû i te pohe, e tia ˈtu oia i mua i te arii ma te hoê aniraa ia itea mai te tahi ravea no te faaore i te opuaraa a Hamana. Ua ite Ahasueru eaha te titauhia ia rave. No reira, i te taeraa mai te mahana o to ratou haapoheraa, ua haapohehia, eiaha te mau ati Iuda, te feia râ o te imi i te rave ino ia ratou. E faaue Moredekai e ia faatupuhia te Oroa o te Purima i te mau matahiti atoa ei haamanaˈoraa i teie faaoraraa rahi. ‘E imi Moredekai’ tei raro aˈe i te arii Ahasueru, ‘i te maitai no to ˈna ra mau taata, e e parau i te parau hau i to ˈna atoa ra mau huaai.’—Esetera 10:3.
Uiraa bibilia pahonohia:
7:4—E nafea te taparahiraa o te mau ati Iuda ‘e faaere ai i te arii’? Na roto i te faaiteraa ma te faatano i te parau i te neheneheraa e hoo i te mau ati Iuda ei tavini, ua haamahitihiti Esetera i te mea e faaere i te arii ia haapohehia ratou. No te pueraa taoˈa a te arii, mea iti aˈe te hoona o na moni ario 10 000 ta Hamana i fafau i te faufaa e nehenehe e noaa mai ahiri Hamana i opua i te hoo i te mau ati Iuda ei tavini. Ahiri te opuaraa ino a Hamana i tupu, e pohe atoa ïa te arii vahine.
7:8—No te aha te mau eunuka i tapoˈi ai i to Hamana mata? Ua faaite paha te reira i te haama aore ra te pohe fatata roa. Ia au i te hoê buka, “i te tahi mau taime, i tapoˈi na te mau taata no mutaa ihora i te upoo o te feia o tei fatata roa i te haapohehia.”
8:17—Mea nafea ‘e rave rahi taata no te fenua i faariro ai ia ratou ei ati Iuda’? Papu maitai, mea rahi to Peresia tei riro ei peroseluto ati Iuda, ma te manaˈo e e faaiteraa te faaueraa mana apî i te farii maitai a te Atua i te mau ati Iuda. Hoê â huru no te tupuraa o te hoê parau tohu e itehia i roto i te buka a Zekaria. Te na ô ra te reira e: “E haru mai . . . na taata tino ahuru no roto i te mau parau atoa o te mau fenua ra, i te hiti ahu o te hoê ati Iuda ta ratou e haru, a na ô atu ai, E haere atoa matou i ǒ na: ite aˈenei matou e, tei ia outou te Atua.”—Zekaria 8:23.
9:10, 15, 16—Noa ˈtu e ua faatia te faaueraa mana ia rave i te taoˈa, no te aha te mau ati Iuda i ore ai i na reira? Ua haapapu maitai ta ratou patoiraa e ta ratou fa, o te parururaa ïa i to ratou nunaa, eiaha ia noaa i te taoˈa rahi.
Haapiiraa no tatou:
6:6-10. “O te teoteo to te pohe ra na mua, e te aau faateitei to te hiˈa.”—Maseli 16:18.
7:3, 4. E faaite anei tatou ma te itoito e e Ite no Iehova tatou iho, noa ˈtu e e nehenehe tatou e hamani-ino-hia?
8:3-6. E tia e e mea tia ia ani tatou i te mau tia faatere e te mau tiripuna ia paruru ia tatou i mua i to tatou mau enemi.
8:5. Ma te faatano i te parau, aita Esetera i faahapa i te arii i roto i te faaueraa mana e taparahi i to ˈna nunaa. Oia atoa, e mea tia ia faatano tatou i te parau ia poro tatou i te feia toroa teitei.
9:22. Eiaha tatou e haamoe i te taata rii i rotopu ia tatou e tia ˈi.—Galatia 2:10.
“E tamǎrû e e faaora” Iehova
E faahitihiti Moredekai i te opuaraa a te Atua i te noaaraa ia Esetera te hau. I to ratou haamǎtaˈuraahia, e haapae te mau ati Iuda i te maa e e pure no te ani i te tauturu. E tia ˈtu te arii vahine i mua i te arii ma te ore e titau-manihini-hia e e farii-maitai-noa-hia oia i te taime taitahi. Eita te taoto o te arii e topa i tera iho â po faufaa roa. Oia mau, no nia te buka a Esetera i te aratairaa a Iehova i te mau tupuraa no te maitai o to ˈna nunaa.
E faaitoitoraa taa ê te faatiaraa anaanatae a Esetera no tatou e ora nei i “te tau hopea.” (Daniela 12:4) “I te tau hopea,” aore ra i te tuhaa hopea roa o te tau hopea, e aro roa ino Goga no Magoga—Satani te Diabolo—i te nunaa o Iehova. Ta ˈna opuaraa, o te haamou-roa-raa ïa i te feia haamori mau. Mai i te tau râ o Esetera, “e tamǎrû e e faaora” Iehova i to ˈna mau taata haamori.—Ezekiela 38:16-23; Esetera 4:14, MN.