‘Ei manaˈo haava hapa ore â to tatou’

E RAVE rahi taata o te manaˈo nei e mea titauhia ia pee ratou i to ratou manaˈo haava ia rave ratou i te mau faaotiraa. Teie râ, ia riro to tatou manaˈo haava ei aratai papu, e mea titauhia ia haapiihia ˈtu ma te tano no te ite i te maitai e te ino, e ia tâuˈa tatou i ta ˈna aratairaa e tia ˈi.

E rave anaˈe i te tupuraa o te hoê taata o Zakaio to ˈna iˈoa tei papaihia i roto i te Bibilia. E telona rahi e e taata taoˈa o Zakaio o te faaea ra i Ieriko. Mai ta ˈna iho i faaite, ua noaa ta ˈna faufaa na roto i te taviriraa—te hoê peu tei faaere ia vetahi ê. Ua hauti anei te manaˈo haava o Zakaio no ta ˈna mau ohipa tia ore? Mai te peu e e, aita ïa oia i tâuˈa ˈtu.—Luka 19:1-7.

Teie râ, ua tupu te tahi ohipa o tei turai ia Zakaio ia hiˈopoa i to ˈna haerea. Ua haere mai o Iesu i Ieriko. Ua hinaaro te taata poto ra o Zakaio i te hiˈo ia ˈna, eita râ ta ˈna e nehenehe e ite ia ˈna no te nahoa taata. Ua horo atura oia na mua e ua paiuma ˈtura i nia i te hoê tumu raau no te ite maitai atu. No to ˈna maere i te anaanatae rahi o Zakaio, ua parau o Iesu ia ˈna e e haere atu oia e hiˈo ia ˈna i to ˈna fare. Ua farii maitai o Zakaio ma te oaoa i ta ˈna manihini faahiahia.

No ta Zakaio i ite e i faaroo ia Iesu ra, ua putapû to ˈna aau e ua turaihia oia ia taui i to ˈna mau eˈa. Ua parau oia e: “Inaha, e te Fatu, e horoa vau i te afa i ta ˈu nei taoˈa na te taata rii, e i hamani ino na vau i te tahi taata ˈtu i te hoê mea iti aˈe, ia taimaha ïa ta ˈu e faahoˈi atu na ˈna.”—Luka 19:8.

Ua haapiihia te manaˈo haava o Zakaio, e ua faaroo oia e ua pahono i te reira. E mea rahi te mau faahopearaa maitatai. A feruri na i te huru o Zakaio ia Iesu i parau e: “Ua tae mai te ora i teie nei fare i teie nei mahana.”—Luka 19:9.

Auê ïa hiˈoraa faaitoito mau! Te faaite ra te reira e noa ˈtu eaha to tatou huru haerea na mua ˈˈe, e nehenehe tatou e taui. Mai ia Zakaio, e nehenehe tatou e haapao maitai i ta Iesu parau—o tei papaihia i roto i te Bibilia—e e faahotu i to tatou ite i te maitai e te ino. I reira ïa, mai ta te aposetolo Petero i faaitoito, ‘ei [manaˈo haava] hapa ore â to tatou.’ E nehenehe tatou e faaroo i to tatou manaˈo haava tei haapiihia e e rave i te mea maitai.—Petero 1, 3:16; MN.