Uiraa a te feia taio

E nehenehe anei e rave i te tahi faanahoraa ia ore te hoê Kerisetiano tino paruparu faatavaihia e tae i te haamanaˈoraa a te amuiraa i te Amuraa maa ahiahi a te Fatu?

E. E nehenehe e e mea titauhia ia rave i te tahi faanahoraa no te hoê Kerisetiano tino paruparu faatavaihia o te tarava noa paha i nia i te roi e no reira eita oia e nehenehe e haere atu ia faatupu te amuiraa i te Oroa haamanaˈoraa i te poheraa o te Mesia. I roto i taua huru tupuraa ra, e nehenehe te tino matahiapo e faanaho e ia hopoi te hoê matahiapo aore ra te tahi atu taeae feruriraa paari i te tahi pane e te tahi uaina taipe na tera hoa faaroo i tera noâ po na mua ˈˈe i te hitiraa o te mahana.

Ia au i te mau huru tupuraa, e nehenehe te matahiapo aore ra te tahi atu taeae o te haere atu, e rave i te tahi parau poto e e taio i te mau irava e tano. E nehenehe o ˈna e pee i te raveraa a Iesu i to ˈNa haamauraa i te Amuraa maa ahiahi a te Fatu. Ei hiˈoraa, e nehenehe oia e taio i te Mataio 26:26, i muri aˈe i te hoê pure, e tuu atu i te pane hopue ore. I muri iho, e nehenehe te taeae e taio i te Mataio pene 26, irava 27 e te 28 e, i muri aˈe i te tahi atu pure, e tuu atu i te uaina. E nehenehe te tahi parau poto e ravehia no te faataa i te auraa o na taoˈa taipe e piti, e e au ia faaoti atu i te hoê pure hopea.

Oia mau, e mea tia ia rave i te mau tutavaraa faito noa atoa ia haere atu ia faatupu te amuiraa i te Amuraa maa ahiahi a te Fatu. Eaha râ te nehenehe e ravehia i roto i te hoê tupuraa fifi roa mai te hoê Kerisetiano faatavaihia tei maˈi-ino-roa-hia, tei mau i te fare maˈi, aore ra eita ta ˈna e nehenehe e haapao i te Oroa haamanaˈoraa i muri aˈe i te toparaa mahana o te 14 no Nisana? E nehenehe ta te hoê melo faatavaihia e rave i te hiˈoraa o te Ture a Mose e e haamanaˈo i te reira o ˈna anaˈe e 30 mahana i muri aˈe.—Numera 9:9-14.