Ua matau anei ia outou o Saphana e to ˈna fetii?

A TAIO ai outou i ta outou Bibilia, ua ite aˈena anei outou i te mau faahitiraa ia Saphana e i te tahi mau fetii mana to ˈna? O vai na ratou? Eaha ta ratou i rave? Eaha te haapiiraa ta tatou e huti mai na roto ia ratou?

Te faaite maira te Bibilia ia “Saphana a Azalia a Mesulama” i roto i te haamau-faahou-raa i te haamoriraa mau i faauehia e Iosia i te matahiti 642 H.T.T. (Mau arii 2, 22:3) I te roaraa o na 36 matahiti i muri mai, e ia haamouhia ˈtu Ierusalema i te matahiti 607 H.T.T., e faataahia mai ta ˈna na tamaiti e maha, o Ahikama, Elasa, Gemaria, e o Iaazania, e ta ˈna na mootua e piti, o Mikaia e o Gedalia. (A hiˈo i te tapura.) “E tiaraa faahiahia to te fetii o Saphana i roto i te pǔpǔ feia toroa [o te basileia o Iuda] e o ratou te mau papai parau a te arii mai te tau o Iosia e tae noa ˈtu i te Revaraa,” o ta te Encyclopaedia Judaica ïa e faataa ra. Ia hiˈo faahou tatou i ta te Bibilia e parau ra no Saphana e to ˈna fetii, e taa ia tatou mea nafea to ratou tururaa i te peropheta Ieremia e i te haamoriraa mau a Iehova.

To Saphana tururaa i te haamoriraa mau

I te matahiti 642 H.T.T., i te 25raa o to te arii Iosia matahiti, te tavini ra o Saphana ei papai parau na te arii e ei papai i te Parau a te Atua. (Ieremia 36:10) Eaha ïa te auraa? Te parau ra te faatoro parau i nia nei e e taata aˈo piri roa i te arii te hoê papai parau na te arii, e haapao oia i te mau ohipa pae moni, mea aravihi i te pae o te mau taairaa e te fenua ê, e e tahuˈa oia i te pae o te mau ohipa i te fenua ê, o te ture i rotopu i te mau fenua rau, e o te mau faaauraa parau tapihooraa. No reira, ei papai parau na te arii, ua riro o Saphana ei hoê o te mau tane mana roa ˈˈe o te basileia.

Hoê ahuru matahiti na mua ˈˈe, ua “imi ihora” Iosia a tamarii ai oia “i te Atua o tana tupuna o Davida.” E au ra e mea paari roa ˈˈe o Saphana ia Iosia e i nehenehe na ïa oia e riro ei aˈo maitai na ˈna e ei taata turu i ta Iosia ohipa matamua e haamau faahou i te haamoriraa mau. a—Paraleipomeno 2, 34:1-8.

A tataîhia ˈi te hiero, ua itehia mai “te buka ture,” e “taio ihora Saphana i mua i te aro o te arii.” Ua hitimahuta Iosia i te faarooraa i te reira e, tono atura i te tahi mau tia ta ˈna e tiaturi ra ia Hulada te peropheta vahine ra ia ui oia ia Iehova no nia i te buka. Ua faaite te arii i te tiaturi ia Saphana e i ta ˈna tamaiti o Ahikama na roto i te tono-atoa-raa ia raua ei tia.—Mau arii 2, 22:8-14; Paraleipomeno 2, 34:14-22.

Teie anaˈe te faahitiraa i ta Saphana iho i rave i roto i te mau Papai. I roto i te tahi atu mau irava bibilia, e faahitihia oia ei metua noa aore ra ei metua tupuna. I muri aˈe, ua piri roa te mau tamarii a Saphana i te peropheta Ieremia.

O Ahikama e o Gedalia

Mai ta tatou i tapao aˈena, ua faahiti-matamua-hia o Ahikama i roto i te mau tia i tonohia ˈtu i te peropheta vahine ra o Hulada. Te na ô  ra te hoê faatoro parau e: “Noa ˈtu e aita i faaitehia te tiaraa o Ahikama i roto i te Bibilia Hebera, e au ra e e tiaraa teitei to ˈna.”

Fatata 15 matahiti i muri aˈe i taua tupuraa ra, te faaû ra Ieremia i te pohe. I to ˈna faaararaa i te nunaa no nia i te opuaraa a Iehova e haamou ia Ierusalema, “ua tii atura te mau tahuˈa, e te mau peropheta, e te taata atoa e rave ia ˈna; na ô atura ia ˈna, E pohe oe na.” Eaha ˈtura tei tupu mai? Te na ô râ te aamu e: “Tiahia maira Ieremia e Ahikama a Saphana, ia ore oia ia tuuhia ˈtu i te rima o te taata ia taparahi mai ia ˈna ra.” (Ieremia 26:1-24) Eaha ta te reira e faaite ra? Te na ô ra The Anchor Bible Dictionary e: “Aita noa teie ohipa e haapapu ra i te mana i faaohipahia e Ahikama, te faaite atoa ra râ e e taata au oia, mai te tahi atoa ˈtu mau fetii o Saphana, ia Ieremia.”

Fatata e 20 matahiti i muri aˈe, ua mou ïa Ierusalema i te matahiti 607 H.T.T. i to Babulonia e ua hopoi-tîtî-hia ïa te rahiraa o te taata, ua faatoroahia o Gedalia, mootua o Saphana e tamaiti a Ahikama, ei tavana i nia i te toea ati Iuda. Ua rave maitai anei oia, mai te tahi atu mau fetii o Saphana, ia Ieremia? Te na ô ra te aamu bibilia e: “Haere atura Ieremia ia Gedalia a Ahikama, i Mizepa, parahi ihora i o ˈna ra.” Tau avaˈe i muri aˈe, haapohehia ˈtura o Gedalia, e rave atura te toea ati Iuda ia Ieremia na muri ia ratou a haere atu ai ratou i Aiphiti.—Ieremia 40:5-7; 41:1, 2; 43:4-7.

O Gemaria e o Mikaia

Ua rave o Gemaria, tamaiti a Saphana, e o Mikaia, to ˈna mootua, i te hoê tuhaa rahi i roto i te mau tupuraa i faataahia i roto i te Ieremia pene 36. Tei te matahiti 624 H.T.T. tera i te 5raa o te matahiti faatereraa a te arii Iehoiakima. Ua taio o Baruka, te papai a Ieremia, ma te reo puai i te mau parau a Ieremia i roto i te buka i te fare o Iehova, i roto “i te piha [tamaaraa] o Gemaria a Saphana.” No reira, “te faaroo ra Mikaia, a Gemaria, o Saphana, i te mau parau atoa a Iehova i roto i taua buka ra.”—Ieremia 36:9-11; MN.

Ua faaite o Mikaia i to ˈna metua tane e i te mau tamaiti hui arii atoa no nia i te otaro, e ua hinaaro ratou paatoa e faaroo eaha ta te reira e parau ra. Ua nafea ratou? “E hope aˈera taua parau ra i te faaroohia e ratou ra, ua hiˈo noa ihora ratou ia ratou iho ma te maere; e ua parau atura ia Baruka, E riro matou i te faaite i te arii i teie nei mau parau.” Hou râ ratou a parau ai i te arii, ua aˈo ratou ia Baruka e: “A haere a tapuni, orua o Ieremia, e eiaha roa e faaite i te taata i to orua pupuniraa.”—Ieremia 36:12-19.

Mai tei manaˈohia iho â, ua patoi te arii i te poroi o te otaro e ua tutui atu i te auahi e ia pau  roa ˈtu. “Taparu noa ˈtu hoi” te tahi mau tamaiti hui arii, tae noa ˈtu o Gemaria tamaiti a Saphana, “i te arii ra, e eiaha e tuia taua otaro ra i te auahi, aore roa oia i faaroo ia ratou.” (Ieremia 36:21-25) Te na ô ra te buka ra Jeremiah—An Archaeological Companion e: “Ua riro o Gemaria ei tauturu puai no Ieremia i te aorai o te arii Iehoiakima.”

O Elasa e o Iaazania

I te matahiti 617 H.T.T., ua haru o Babulonia i te basileia o Iuda. Ua hopoi-ê-hia “te feia rarahi, e te mau taata aito . . . e te mau tahuˈa tarai fare, e te mau tupai auri,” e tae noa ˈtu te peropheta Ezekiela. O Matania ˈtura, tei tauihia te iˈoa ei Zedekia e to Babulonia, te arii tiamâ ore apî. (Mau arii 2, 24:12-17) I muri aˈe, ua tono o Zedekia i te tahi mau tia, to roto atoa hoi o Elasa tamaiti a Saphana, i Babulonia. Ua horoa ˈtu Ieremia i te hoê rata ia Elasa ra e poroi faufaa a Iehova to roto na te mau ati Iuda i hopoi-ê-hia.—Ieremia 29:1-3.

Te faaite ra ïa te aamu bibilia e ua faaohipa o Saphana, e toru o ta ˈna mau tamaiti, e e piti o ta ˈna mau mootua i to ratou tiaraa mana no te turu i te haamoriraa mau e i te peropheta haapao maitai ra o Ieremia. Eaha ïa no te tamaiti a Saphana, o Iaazania? Eiaha mai te toea o te fetii o Saphana, e au ra e ua rave oia i te haamoriraa idolo. I te 6raa o te matahiti o to Ezekiela faatîtîraahia i Babulonia, aore ra i te matahiti 612 H.T.T., ua ite te peropheta i te hoê orama i reira na tane e 70 e pûpû ai i te mea noˈanoˈa na te mau idolo i te hiero i Ierusalema. I roto ia ratou, te vai ra o Iaazania, te taata hoê i faahiti-roa-hia te iˈoa. Te faaite ra paha te reira e e melo rahi oia o teie pǔpǔ. (Ezekiela 8:1, 9-12) Te faaite ra te hiˈoraa o Iaazania e e ere no te mea e ua arataihia te hoê i roto i te hoê utuafare paieti, mea papu ïa e e riro mai oia ei taata haamori taiva ore ia Iehova. Na te taata taitahi iho e amo i te utua no to ˈna iho haerea.—Korinetia 2, 5:10.

Tuatapaparaa no Saphana e to ˈna utuafare

I te tau i rave ai o Saphana e to ˈna fetii i te hoê tuhaa i roto i te mau ohipa i tupu i Ierusalema, e peu matauhia i te faaohipa i te mau tapao taati i Iuda. I faaohipahia na te mau tapao taati ei ite aore ra ei tarimaraa i te mau parau e i hamanihia na i te ofai maitatai, te metara, te ivori, aore ra i te hiˈo. E pinepine, e nanaˈohia te iˈoa o te fatu tapao taati, te iˈoa o to ˈna metua tane e, i te tahi taime, te tiaraa o te fatu tapao taati, i nia iho.

Ua itea mai te mau hanere neneiraa tapao  taati Hebera i nia i te araea. Ua papai te aivanaa o te mau parau nanaˈo Hebera ra o Nahman Avigad e: “O te mau nanaˈoraa tapao taati anaˈe te mau parau nanaˈo Hebera o te faahiti i te mau taata matauhia na roto i te Bibilia.” Ua itehia anei te tahi mau nanaˈoraa tapao taati a Saphana aore ra a to ˈna mau fetii? Oia, te itehia ra te iˈoa o Saphana e o ta ˈna tamaiti o Gemaria i nia i te tapao taati i te mau api 19 e te 21.

Te parau atoa ra te mau aivanaa e e maha paha fetii ê atu tei faahitihia i nia i te mau neneiraa tapao taati—o Azaria, te metua tane o Saphana: o Ahikama, te tamaiti a Saphana; o Gemaria, te tamaiti a Saphana; e o Gedalia, e au ra e tei faahitihia i nia i te hoê neneiraa tapao taati mai “te tiaau o te Fare.” Te manaˈohia ra e na Gedalia, mootua o Saphana, te maharaa o taua mau tapao taati ra, noa ˈtu e aita to ˈna metua tane o Ahikama i faahitihia. Te faaite ra to ˈna tiaraa i nia i te neneiraa tapao taati e hoê oia o te feia toroa rarahi roa ˈˈe a te hau.

Eaha ta tatou e haapii mai?

E hiˈoraa maitai mau ta Saphana e to ˈna fetii i horoa i te faaohiparaa i to ratou tiaraa mana no te turu i te haamoriraa mau e ia Ieremia taiva ore atoa! E nehenehe atoa ta tatou e faaohipa i ta tatou mau faufaa e to tatou mana no te turu i te faanahonahoraa a Iehova e to tatou mau hoa haamoriraa.

E hoona tatou e e itoitohia to tatou faaroo eiaha noa ia taio tamau tatou i te Bibilia, ia faahohonu maite atu râ e ia matau tatou iho i taua mau ite no Iehova i tahito ra mai ia Saphana e to ˈna mau fetii. To roto atoa ratou i te “nahoa rahi i ite” te tia ia tatou ia pee.—Hebera 12:1.

[Nota i raro i te api]

[Tumu parau tarenihia i te api 22]

Hulada—Te hoê peropheta vahine mana

I to ˈna faarooraa i te taioraa i “te buka ture” i itehia i roto i te hiero, ua faaue te arii Iosia ia Saphana e na feia toroa teitei ê atu e maha e “ui ia Iehova” no nia i te buka. (Mau arii 2, 22:8-20) Ihea e itea mai ai i te mau tia te pahonoraa? Te faaea ra Ieremia e oia atoa paha o Nahuma, o Zephania, te mau peropheta e te feia papai Bibilia atoa, i Iuda i taua tau ra. Ua haere atu râ te mau tia ia Hulada te peropheta vahine ra.

Te tatara ra te buka ra Jerusalem—An Archaeological Biography e: “Te mea faahiahia i roto i teie tupuraa, oia hoi, aita roa ˈtu i tapaohia te tiaraa tane e vahine i roto i te aamu. Aita hoê taata i manaˈo e aita i tano e na te hoê tomite e tane anaˈe to roto e afai i te Otaro o te Ture e na te hoê vahine e faataa mai i te auraa. I to ˈna parauraa e o te parau tera a te Fatu, aita hoê taata i feaa i to ˈna mana e faataa i te tumu parau. E pinepine teie tupuraa i te haamoehia e te mau aivanaa o te faataa i te faufaaraa o te tuhaa a te mau vahine i Iseraela i tahito ra.” Papu maitai, no ǒ mai te poroi ia Iehova ra.

[Tapura/Hohoˈa i te api 21]

(Hiˈo i te papai)

Te ihotatau o Saphana

Mesulama

↓

Azaria

↓

Saphana

↓ ↓ ↓ ↓

Ahikama Elasa Gemaria Iaazania

↓ ↓

Gedalia Mikaia

[Hohoˈa i te api 20]

Ua taparu o Gemaria e te tahi atu ia Iehoiakima eiaha e tutui i te otaro a Ieremia i te auahi

[Hohoˈa i te api 22]

Ua ite-orama-hia o Iaazania e haamori ra i te idolo noa ˈtu e e melo oia o te utuafare o Saphana

[Faaiteraa i te fatu o te hohoˈa i te api 19]

Courtesy Israel Antiquities Authority

[Faaiteraa i te fatu o te hohoˈa i te api 21]

Courtesy Israel Antiquities Authority