“Na feia paari e toru”—o vai ma ratou?

E pinepine e faahohoˈa te tupuraa o te fanauraa o Iesu e toru taata ahu roa e ta ratou kamela, o te tae atu i te hoê fare animara i reira te aiû ra o Iesu e tarava ˈi i roto i te hoê phatene. Ua matau te taata i te parau i teie mau ratere ahu nehenehe na feia paari e toru. Eaha ta te Bibilia e parau ra no nia ia ratou?

Ia au i te Bibilia, “mai te hitia o te râ mai” tei parau-noa-hia te feia paari, e no reira to ratou iteraa no nia i te fanauraa o Iesu. (Mataio 2:1, 2, 9) Eita e ore e e mea roa te tere o teie mau taata i Iudea. I te pae hopea, i te itearaa mai ia ratou ia Iesu, e ere faahou o ˈna i te aiû fanau apî i roto i te fare animara. Ua itea mai râ i teie mau taata ia Maria e te “tamaiti iti” i roto i te hoê fare.—Mataio 2:11.

E parau te Bibilia i teie mau taata e magoi, aore ra “e feia hiˈo fetia” (MN), e aita e faaitehia ra ehia ratou. Te faataa ra te Oxford Companion to the Bible e: “E itehia te taairaa o te ohipa manamana e te peu hiˈo fetia i roto i te anaanatae taa ê o te mau ratere i te fetia o tei aratai ia ratou i Betelehema.” Te faahapa maitai ra te Bibilia i te huru manamana atoa e te peu a Babulonia e tamata i te maimi i te mau haamaramaramaraa i roto i te mau fetia.—Deuteronomi 18:10-12; Isaia 47:13.

Aita te haamaramaramaraa i tae mai i taua mau taata ra i aratai atu i te tahi faahopearaa maitai. Ua faaara te reira i te pohehae e te riri o te arii ino ra o Heroda. No reira o Iosepha, o Maria, e o Iesu i horo ai i Aiphiti e i pohe ai te mau tamarii tamaroa atoa i Betelehema “o tei tae i te piti o te matahiti ra e tei ore.” Ua ite maitai o Heroda i te taime i fanauhia ˈi o Iesu na roto i ta te feia hiˈo fetia i faaite ia ˈna. (Mataio 2:16) No te mau fifi atoa i tupu mai na roto i to ratou tere, e mea tano ia parau e no ǒ mai te fetia ta ratou i ite e te poroi no nia i ‘te arii fanau apî o te ati Iuda’ i te enemi o te Atua, te Diabolo ra o Satani, o tei hinaaro e haapohe ia Iesu.—Mataio 2:1, 2.