No te aha e mea fifi roa ia tatarahapa?

I TE avaˈe Tiurai 2000, ua farii te apooraa iriti ture i te Hau Kalifonia, i te mau Hau Amui, i te hoê ture o te faaore i te hopoia a te taata ia faaite noa ˈtu ratou i te aumauiui i nia i te hoê taata tei pepe i roto i te hoê ati e na ratou atoa te hape. No te aha teie ture? Te parauhia ra e ia tupu te pepe aore ra te fifi i roto i te hoê ati, e pinepine, e taiâ te taata i te tatarahapa aˈunei te reira e faataahia ˈi mai te hoê faˈiraa hapa i te haavaraa. I te tahi aˈe pae, e inoino paha te feia e manaˈo ra e e titauhia ia tatarahapa oioi vetahi ê, e e nehenehe te hoê ati haihai e riro ei peapea rahi.

Parau mau, eita e titauhia ia tatarahapa outou no te hoê ati i tupu e ere na outou te hape. E i te tahi taime, e haerea paari ia haapao maitai i ta outou e parau. Te na ô ra te hoê maseli tahito e: “Te rahi ra te parau ra, eita e ore te hara; i parauhia ˈi e paari to ˈna to tei tapea i to ˈna vaha.” (Maseli 10:19; 27:12) E nehenehe râ outou e faaite i te peu maitai e e tauturu atu.

E ere anei râ i te parau mau e mea rahi te taata i faaea i te tatarahapa noa ˈtu e eita  ratou e horohia i te haavaraa? I te fare, e autâ paha te hoê vahine e, ‘Eita roa ˈtu ta ˈu tane e tatarahapa.’ I te ohipa, e parau paha te hoê paoti e, ‘Eita ta ˈu mau rave ohipa e faˈi i ta ratou mau hape, e mea varavara ratou i te parau eiaha e inoino mai.’ I te haapiiraa, e parau paha te hoê orometua haapii e, ‘Aita e haapiihia ra i te mau tamarii ia tatarahapa.’

Hoê tumu e taiâ ˈi paha te hoê taata ia tatarahapa, o te mǎtaˈu ïa ia patoihia mai. Eita paha oia e faaite i te huru mau o to ˈna aau no to ˈna taiâ i te manaˈo e eita oia e tâuˈahia. Oia mau, e ape roa paha te taata e inoino ra i te taata i hape, e mea fifi roa ïa ia faahau.

Te oreraa e tâuˈa i te mau huru aau o vetahi ê, o te tahi atu ïa tumu e taiâ ˈi vetahi ia tatarahapa. E feruri paha ratou e, ‘Eita te tatarahaparaa e faaore i te hape ta ˈu i rave aˈena.’ No te tahi atu râ, e taiâ ïa ratou ia parau eiaha e inoino mai no te mau faahopearaa e nehenehe e tupu mai. E feruri ratou e, ‘E faahapehia anei au e e anihia mai anei te tahi faahoˈiraa?’ Tera râ, te haafifiraa rahi roa ˈˈe e ore ai te taata e faˈi i te hoê hape, o te teoteo ïa. Te hoê taata o te ore e parau “Eiaha e inoino mai” no to ˈna teoteo rahi, e na ô paha ïa oia e ‘Eita vau e hinaaro e faahaehaa ia ˈu na roto i te faˈiraa i ta ˈu hape. E iti mai hoi to ˈu tiaraa.’

Noa ˈtu eaha te tumu, mea fifi na te taata e rave rahi ia faahiti i te mau parau tatarahapa. Teie râ, mea faufaa mau â anei ia tatarahapa? Eaha te maitai e noaa mai ia tatarahapa tatou?

[Hohoˈa i te api 3]

“Aita e haapiihia ra i te mau tamarii ia tatarahapa”

[Hohoˈa i te api 3]

“Eita roa ˈtu ta ˈu tane e tatarahapa”

[Hohoˈa i te api 3]

“Eita ta ˈu mau rave ohipa e faˈi i ta ratou mau hape”