E tia anei ia outou ia riro ei taata haapeapea ore?

E MANAˈO paha te rahiraa o te taata e e parau haapopou ia hiˈohia ratou mai te hoê taata haapeapea ore, te hoê taata natura mǎrû, te hau, te farii noa. Teie râ, te vai ra te tahi atu huru haapeapea ore. Te na ô ra te Bibilia e: “Na te [haapeapea ore] o te maamaa ra ratou e haamou.” (Maseli 1:32; MN) Eaha ïa te auraa?

Te huri nei te tahi atu mau tatararaa o te Bibilia i te taˈo Hebera tumu na roto i te mau parau “tâuˈa ore” (American Standard Version) e “mauruuru ia ˈna iho” (The New American Bible). Te auraa, ua taaihia teie haapeapea ore i te hupehupe e te tâuˈa ore e i te maamaa ïa.

I te senekele matamua, aita te mau Kerisetiano i roto i te amuiraa no Laodikea i tâuˈa noa ˈˈe i to ratou paruparu i te pae varua. Ma te faaahaaha ua faatietie ratou e “aore e mea toe ia ˈu.” Ua faatitiaifaro o Iesu Mesia ia ratou, ma te titau ia faaapî i to ratou itoito rahi Kerisetiano.—Apokalupo 3:14-19.

Ua ite-atoa-hia te huru haapeapea ore ma te mauruuru ia ˈna iho i nia i te mau taata i te tau o Noa. Ua tapitapi ratou no te mau mea matauhia o te oraraa, “te amu ra ratou i te maa e te inu ra, te faaipoipo ra e te horoa ra ia faaipoipohia . . . ; aore roa i ite, e roohia noa ihora ratou e te diluvi, pau roa ˈtura ratou.” I muri iho, ua na ô faahou o Iesu e: “Oia atoa te haerea mai o te Tamaiti a te taata nei.”—Mataio 24:37-39.

Te faaite ra te mau parau tohu bibilia i tupu e te ora nei tatou i te tau o “te haerea mai o te Tamaiti a te taata,” o Iesu Mesia. Eiaha roa ˈtu tatou e riro ei taata tâuˈa ore, te mauruuru ia ˈna iho—te haapeapea ore tano ore.—Luka 21:29-36.