“No ǒ mai te ora ia Iehova ra”

I TE mau taime e fifihia ˈi te hoê fenua e e ino ai te mau taairaa i rotopu i te mau basileia, e imi te taata i te panoonoo ore i ta ratou faatereraa ra. I to ratou ra pae, e haamau te mau hau faatere i te tahi mau porotarama no te tahoê mai i te turu a te nunaa. Ia rahi noa ˈtu te here aiˈa i te faaitoitohia e taua mau porotarama ra, e rahi noa ˈtu te taata i te anaanatae i te haapao pinepine i te mau oroa here aiˈa.

Ia faaû te hoê fenua i te ati, e pinepine, no te uˈana o te here aiˈa, e tahoê te taata, e itoitohia ratou e e tupu mai te varua e haa amui e e haapao atu i te mau hinaaro o te huiraatira. Teie râ, “hoê â atâtaraa to te here aiˈa e to te huru aau atoa,” o ta te hoê ïa tumu parau i roto i te New York Times Magazine i parau, no te mea “ia ore te reira ia vî, e nehenehe e riro ei mea au ore roa.” E nehenehe te mau faaiteraa here aiˈa e riro ei haaraa o te faaere i te mau tiamâraa tivira e faaroo o te tahi mau tino huiraatira o te fenua. I reira iho â râ te mau Kerisetiano mau e faahepohia ˈi e ofati i ta ratou mau tiaturiraa. E nafea ratou ia ati roa ratou i te taata here aiˈa? Eaha te mau faaueraa tumu bibilia o te tauturu ia ratou ia haa ma te haroaroa e ia tapea i te taiva ore i te Atua?

“Eiaha roa oe e piˈo i raro ia ratou”

I te tahi taime, e riro te faahanahanaraa i te reva o te fenua ei faaiteraa here aiˈa a te taata. E pinepine râ, e hohoˈa no te mau mea i nia i te raˈi, mai te mau fetia, e no te mau mea i te fenua nei to nia i te mau reva. Ua faaite te Atua i to ˈna manaˈo i te piˈoraa i raro i taua mau mea ra i to ˈna faaueraa i to ˈna nunaa e: “Eiaha roa oe e hamani i te idolo tarai no oe, e te hohoˈa no te hoê mea i nia i te raˈi ra, e no te hoê mea i raro i te fenua nei, e no te hoê mea o te moana i raro aˈe i te fenua ra: eiaha roa oe e piˈo i raro ia ratou, eiaha hoi e tavini ia ratou; e Atua [hoi au o te titau ia haamori mai ia ˈu anaˈe] o te Atua no oe nei o Iehova.”—Exodo 20:4, 5; MN.

E patoi mau anei te faahanahanaraa aore ra te tuturiraa i mua i te reva e faahohoˈa ra i te Hau, i te faaueraa e haamori i te Atua anaˈe ra o Iehova? Te vai ra iho â ta te mau Iseraela i tahito ra mau “tapao,” aore ra reva, i reira te mau tuhaa e toru opu fetii e putuputu ai a faaea ˈi ratou i te medebara. (Numera 2:1, 2, MN) Teie te tatararaa o te Cyclopedia a McClintock e a Strong no nia i te mau taˈo Hebera e au i taua mau reva ra: “Aita râ hoê aˈe o te reira e faataa ra i te manaˈo ta te ‘reva’ e faatupu i roto i to tatou feruriraa, oia hoi te reva o te hoê fenua.” Hau atu â, aita te mau reva a Iseraela i faarirohia na ei mea moˈa, aita atoa e oroa i taaihia i te reira. I riro noa na te reira ei tapao o te faaite ihea te taata e putuputu ai.

Na mua roa, ua riro te mau hohoˈa o te mau kerubi i roto i te sekene e te hiero a Solomona ei faataaraa i te mau kerubi i te raˈi. (Exodo 25:18; 26:1, 31, 33; Mau arii 1, 6:23, 28, 29; Hebera 9:23, 24) Mea papu e aita i opuahia ia haamorihia taua mau hohoˈa ra no te mea aita roa aˈenei te taata au noa i tapiri atu e aita i opuahia ia haamorihia te mau melahi iho.—Kolosa 2:18; Apokalupo 19:10; 22:8, 9.

E rave atoa anaˈe i te hohoˈa o te ophi veo ta  te peropheta ra o Mose i faatia a faaea ˈi te mau Iseraela i te medebara. Ua riro taua hohoˈa ra ei taipe e e auraa parau tohu to ˈna. (Numera 21:4-9; Ioane 3:14, 15) Aita te reira i haamorihia na. Tau senekele râ i muri aˈe i te tau o Mose, ua haamata te mau Iseraela i te haamori ma te tano ore i tauâ hohoˈa ra, a tutui atoa ˈi i te mea noˈanoˈa i mua. No reira te arii no Iudea ra o Hezekia i vavahi atu ai.—Mau arii 2, 18:1-4.

Ua riro anei te reva o te mau fenua ei tapao noa no te tahi ohipa faufaa? Eaha ta te reira e faataipe ra? “O te reva te taipe rahi roa ˈˈe o te here aiˈa no te tiaturi e te taoˈa tumu no te haamoriraa,” o ta te taata papai buka ra ïa o Paul Williams i parau. Te na ô ra te Encyclopedia Americana e: “Mea moˈa te reva, mai te satauro ra.” Ua riro te reva ei taipe no te Hau. No reira, ua riro te piˈoraa i raro aore ra te faahanahanaraa ˈtu ei oroa faaroo o te faatura i te Hau. Te na ô ra ïa taua haaraa ra e no ǒ mai te ora i te Hau ra, e ere hoi i te mea tano ia au i ta te Bibilia e parau ra no nia i te haamoriraa idolo.

Te parau maitai ra te Bibilia e: “No ǒ mai te ora ia Iehova ra.” (Salamo 3:8) Eiaha te ora ia parauhia e no ǒ mai i te mau faanahonahoraa taata ra aore ra i ta ratou mau taipe. Ua aˈo te aposetolo Paulo i te mau hoa Kerisetiano e: “E au mau here e, e maue ê atu i te haamori idolo.” (Korinetia 1, 10:14) Aita te mau Kerisetiano matamua i rave i te mau ohipa haamoriraa i te Hau. I roto i te buka ra Those About to Die, te na ô ra o Daniel Mannix e: “I patoi na te mau Kerisetiano i te . . . pûpû i te tusia na te varua tiai i te emepera [Roma]—fatata ïa mai te patoiraa i te faahanahana i te reva i teie tau.” Mai te reira atoa te mau Kerisetiano mau i teie tau. No te haamori ia Iehova anaˈe, eita roa ˈtu ratou e faahanahana i te reva o te hoê noa ˈˈe fenua. Ia na reira ratou, te tuu ra ïa ratou i te Atua i te parahiraa matamua a faatura noa ˈtu ai i te mau faatereraa e to ratou feia faatere. Oia mau, te farii ra ratou i ta ratou hopoia e auraro i “te feia mana toroa” a te hau. (Roma 13:1-7) Eaha râ ïa te manaˈo o te Bibilia no nia i te himeneraa i te mau himene here aiˈa?

Eaha te mau himene aiˈa?

“Ua riro te mau himene aiˈa ei faaiteraa i te here aiˈa e, e pinepine, te vai ra te tiaororaa i te Atua e aratai mai e e paruru mai i te taata aore ra i to ratou feia faatere,” o ta te Encyclopedia Americana ïa e parau ra. Ua riro mau â te himene aiˈa ei himene aore ra ei pure no te hoê fenua. E ani noa iho â te reira ia ite te hau i te ruperuperaa materia e te vai-maoro-raa. E tia anei i te mau Kerisetiano mau ia paturu atu i te mau huru aau o taua mau pure ra?

I ora na te peropheta Ieremia i roto i te taata e parau ra e tavini i te Atua. Ua faaue râ Iehova ia ˈna e: “Eiaha oe e pure i teie nei feia; eiaha oe e ani, eiaha e tia ia ratou, eiaha e parau mai ia ˈu nei ia ratou; e ore au e faaroo atu ia oe.” (Ieremia 7:16; 11:14; 14:11) No te aha i horoahia ˈi teie faaueraa na Ieremia? No te mea ua rahi roa a te taata ohipa eiâ, taparahiraa taata, faaturi, tǎpǔ haavare e haamoriraa idolo.—Ieremia 7:9.

Ua haamau Iesu i te hoê hiˈoraa i to ˈna parauraa e: “Aore au i pure i to teie nei ao, o te feia râ ta oe i ho mai no ˈu ra.” (Ioane 17:9) Te parau ra te Bibilia e “te vai noa nei to te ao atoa i raro aˈe i taua varua ino ra” e “te mou nei hoi.” (Ioane 1, 2:17; 5:19) E nafea ïa e tia ˈi i te mau Kerisetiano mau ia pure ma te ite maite no te ruperuperaa e te vai-maoro-raa o taua faanahoraa ra?

Parau mau, aita e aniraa i te Atua to roto i te mau himene aiˈa atoa. “E rau te huru aau i roto i te mau himene aiˈa,” o ta te Encyclopædia Britannica ïa e parau ra, “mai te pure no te arii e tae noa ˈtu i te mau faahitiraa i te mau aroraa rarahi a te hau aore ra te mau orureraa hau . . . e tae noa ˈtu i te mau faaiteraa i te here aiˈa.” E tia anei râ i te feia e imi ra i te faaoaoa i te Atua ia reˈareˈa mau i te mau tamaˈi e te mau orureraa hau a te tahi fenua? No nia i te feia haamori mau, ua tohu Isaia e: “E tiapai ratou i ta ratou ˈoˈe ei auri arote, e ta ratou mau mahae ei tipi tope raau.” (Isaia 2:4) “Tei roto â hoi to matou haerea i te tino,” o ta aposetolo Paulo ïa i papai, “aita râ matou i tamaˈi mai ta te tino ra: e  ere hoi ta matou nei mauhaa tamaˈi i ta te tino.”—Korinetia 2, 10:3, 4.

E pinepine te mau himene aiˈa i te faaite i te mau huru aau o te teoteo o te fenua aore ra o to ˈna rahi. Aita to teie huru hiˈoraa e niu i roto i te Bibilia. I roto i ta ˈna oreroraa parau i nia i te Areopago, ua parau te aposetolo Paulo e: “Na ˈna [te Atua ra o Iehova] i hamani i te taata i te mau fenua atoa nei i te toto o te taata hoê ra.” (Ohipa 17:26) “E ore te Atua e haapao i te huru o te taata,” o ta te aposetolo Petero ïa i parau, “o tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.”—Ohipa 10:34, 35.

No to ratou maramarama i te Bibilia, e rave rahi taata tei faaoti o ratou iho eiaha e apiti atu i roto i te faahanahanaraa i te reva e te himeneraa i te mau himene aiˈa. Eaha râ to ratou haerea ia farerei ratou i taua huru tupuraa ra, ia faaû atu ratou i taua mau tumu parau ra?

E patoi anaˈe ma te faatura

Ei tutavaraa i te tahoê i to ˈna hau emepera, ua faatia te arii no Babulonia i tahito ra o Nebukanesa i te hoê hohoˈa auro iti rahi i te vahi papu o Dura. Faanaho atura oia i te hoê oroa avariraa e titau manihini maira i ta ˈna mau mono arii raatira, tavana, feia aˈo, e te tahi atu feia toroa teitei. Ia taˈi te upaupa, e tia i te taatoaraa i putuputu mai ia piˈo i raro e haamori i te tii. I roto i te taata i tae mai, te vai ra e toru taurearea Hebera—o Sadaraka, Meseka e o Abede-nego. Mea nafea to ratou faaiteraa e aita ratou e apiti ra i roto i teie oroa faaroo? I te haamataraa te upaupa e te piˈoraa te feia i putuputu mai i raro i te tii, ua tia noa na Hebera e toru.—Daniela 3:1-12.

I teie tau, e pinepine te reva i te faahanahanahia na roto i te faatororaa i te rima aore ra ma te rima i nia i te rae aore ra i nia i te mafatu. I te tahi taime, e ravehia te tahi ohipa taa ê. I te tahi mau fenua, e titauhia i te mau tamarii i te fare haapiiraa ia tuturi i raro e apâ i te reva. Na roto i te tia-noa-raa ma te mamû a faahanahana ˈi vetahi ê i te reva, e faaite te mau Kerisetiano mau e e mataitai noa ratou ma te faatura.

Eaha ïa mai te peu e e faaterehia te faahanahanaraa i te reva e ia tia noa tatou ra, ua apiti  atu ïa tatou i roto? Ei hiˈoraa, a feruri na e e maitihia hoê tamarii haapii i roto i te fare haapiiraa ei tia no te taatoaraa e e faahanahana oia i te reva i rapaeau i te pou o te reva ra a titauhia ˈi i te tahi atu mau tamarii haapii ia tia mai te faehau ra te huru i roto mai i te piha haapiiraa. Te tia-noa-raa i roto i teie hiˈoraa, te fariiraa ïa e e tia te tamarii haapii i rapaeau no tatou iho i roto i te faahanahanaraa i te reva. Ua riro te tia-noa-raa ei apitiraa i roto i te oroa. Mai te peu e o te reira te tupuraa, e parahi noa te feia e hinaaro ra e riro noa ei feia mataitai ma te faatura. Eaha ïa mai te peu e te tia aˈena ra to tatou pǔpǔ piahi a haamata ˈi taua huru oroa ra? I reira ra, aita ïa tatou e apiti ra i roto mai te peu e e tia noa tatou.

A feruri na e aita i anihia i te hoê taata e faahanahana i te reva, e tapea noa ˈtu râ, i roto anei i te hoê poroteraa aore ra i roto i te piha haapiiraa aore ra i te tahi atu vahi, ia nehenehe te toea e faahanahana ˈtu. E ere te reira i te ‘maue-ê-raa ˈtu i te haamori idolo,’ mai tei faauehia e te Bibilia, ua riro mau râ ei tiaraa i ropu mau i te oroa. Hoê â atoa e te haereraa i roto i te mau poroteraa here aiˈa. No te mea ua riro te raveraa i te reira ei tururaa i tei faahanahanahia e te poroteraa, e patoi atu te mau Kerisetiano mau ia au i to ratou manaˈo haava.

Ia faataˈihia te mau himene aiˈa, e pinepine, no te faaite e hoê â to te hoê taata huru aau e to te himene, e titau-noa-hia ia ˈna ia tia i nia. I roto i taua mau tupuraa ra, e parahi noa te mau Kerisetiano. Mai te peu râ e te tia aˈena ra ratou ia faataˈihia te himene aiˈa, aita e faufaa ia parahi roa ino i raro. E ere mai te huru ra e ua maiti mau â ratou e tia i nia no te himene. I te tahi aˈe pae, ia titauhia i te hoê pǔpǔ taata ia tia mai i nia e himene, ia tia noa ratou ma te faatura e ma te ore râ e himene, aita ïa ratou e farii popou atura i te mau huru aau o te himene.

“Ei aau hapa ore â to outou”

I muri aˈe i te faataaraa i te faufaa ore o te mau tauihaa haamoriraa hamanihia e te taata,  ua na ô te papai salamo e: “Te feia i hamani ia ratou, mai ia ratou atoa ra ïa te huru; e te feia atoa i tiaturi ia ratou ra.” (Salamo 115:4-8) Papu maitai ïa, eita te feia haamori ia Iehova e farii i te hoê ohipa i reira e hamanihia ˈi te mau tauihaa haamoriraa, tae noa ˈtu te reva o te mau fenua. (Ioane 1, 5:21) E tupu atoa te tahi atu mau fifi i te raveraa ohipa ia faaite te mau Kerisetiano ma te faatura e eita ratou e haamori i te reva e i ta te reira e faahohoˈa maori râ o Iehova anaˈe.

E ani paha te hoê paoti ohipa, ei hiˈoraa, i te hoê rave ohipa e huti i te hoê reva i tamauhia i nia i te fare i nia aore ra i raro. E rave anei oia i te reira aore ra eita, tei ta ˈna iho ïa hiˈoraa i te mau huru tupuraa. Mai te peu e e tuhaa te hutiraa i te reva i nia aore ra i raro no te hoê oroa taa ê, ma te taata e tia ra mai te faehau ra te huru aore ra e faahanahana ra i te reira, e riro ïa te raveraa i te reira ohipa ei apitiraa i roto i te oroa.

I te tahi aˈe pae, mai te peu e aita e oroa e apee ra i te hutiraa i te reva i nia aore ra i raro, aita ïa te reira i ê atu i te mau ohipa mai te faaineineraa i te hoê fare no te ohiparaa, te iritiraa e te ponaoraa i te mau opani, e te iritiraa e te tapiriraa i te mau haamaramarama. I reira ra, ua riro te reva ei taipe noa o te Hau, e ua riro te hutiraa ˈtu i nia aore ra i raro ei ohipa matau mai te tahi atu, na te taata iho e faaoti ia au i to ˈna manaˈo haava i haapiihia e te Bibilia. (Galatia 6:5) E turai paha te manaˈo haava o te hoê taata ia ani i ta ˈna tiaau ia rave i te tahi atu rave ohipa no te huti i te reva i nia aore ra i raro. E faatia paha te manaˈo haava o te tahi atu Kerisetiano ia huti oia i te reva aita anaˈe e oroa e faatupuhia. Noa ˈtu te faaotiraa, “ei aau hapa ore â” to te feia haamori mau i mua i te Atua.—Petero 1, 3:16.

Aita te Bibilia e opani ra e ohipa aore ra e haere i roto i te mau fare a te hau, mai te mau piha ohipa a te oire e te mau fare haapiiraa, e reva o te fenua to nia iho. Te vai atoa ra paha te hoê reva i nia i te mau titiro rata, te mau numera pereoo, aore ra te tahi atu tauihaa i hamanihia e te hau. E ere no te mea e ua faaohipa te hoê taata i taua mau mea ra, ua apiti ïa oia i roto i te mau ohipa haamoriraa. Te mea faufaa i ǒ nei, e ere te vairaa o te hoê reva aore ra o te hoê hohoˈa o te reira, e nafea râ te hoê e haa ˈi i mua i te reira.

E pinepine te reva i te tuuhia i nia i te haamaramarama, te opani, te pereoo, te iri papairaa, aore ra te tahi atu mau mea. E hoo-atoa-hia te ahu e reva tei penihia i nia iho. I te tahi mau fenua, e opanihia e te ture ia oomo i te reira. Noa ˈtu e aita tatou e ofati ra i te ture ia oomo atu tatou, eaha râ ta te reira e faaite ra no nia i to tatou tiaraa i roto i teie nei ao? No nia i ta ˈna mau pǐpǐ, ua parau Iesu Mesia e: “E ere ratou i to teie nei ao, mai ia ˈu nei hoi e ere i to teie nei ao.” (Ioane 17:16) Eiaha e haamoe i te faahopearaa o taua mea ra i nia i te mau hoa faaroo. Eita anei te manaˈo haava o te tahi pae e mauiui i te reira? Eita anei ta ratou faaoti-maite-raa e ore e aueue i roto i te faaroo e paruparu atu? Ua aˈo Paulo i te mau Kerisetiano e: “Ia au atu hoi outou i te mau mea i hau i te maitai ra; e ia riro outou ei feia . . . hapa ore [o te ore e faaturori ia vetahi ê].”—Philipi 1:10; MN.

‘Ia mǎrû i te taata atoa nei’

A ino atu ai te mau huru tupuraa i teie nei “mau taime ati rahi,” e papu te here aiˈa i te puai atoa ˈtu. (Timoteo 2, 3:1, MN) Ia ore ia moe i te feia e here ra i te Atua e no ǒ mai te ora ia Iehova anaˈe ra. E au ia ˈna te haamoriraa ia ˈna anaˈe. I to ratou titauraahia e rave i te hoê mea au ore i te hinaaro o Iehova, ua parau te mau aposetolo a Iesu e: “O te Atua ta matou e faaroo e tia ˈi eiaha te taata.”—Ohipa 5:29.

“E ore hoi te tavini o te Fatu nei e tia ia mârô,” o ta te aposetolo Paulo ïa i papai, “ia mǎrû râ oia i te taata atoa nei.” (Timoteo 2, 2:24) No reira te mau Kerisetiano e tutava ˈi i te riro ei feia hau, te faatura, e te mǎrû a turui ai ratou i nia i to ratou manaˈo haava haapiihia e te Bibilia ia rave ratou i te faaotiraa no nia i te faahanahanaraa i te reva e te himeneraa i te himene aiˈa.

[Hohoˈa i te api 23]

Ma te faaoti maite e te faatura râ, ua maiti na Hebera e toru e faaoaoa i te Atua

[Hohoˈa i te api 24]

Ia nafea te hoê Kerisetiano e tia ˈi i roto i te hoê oroa here aiˈa?