A tamau i te faaohipa i te mau mea ta outou i haapii

“I te mau mea ta outou i ite, ta outou i farii, ta outou i faaroo, e ta outou i hiˈo mai ia ˈu nei, e rave ïa: e e riro te Atua hau ei pihai atoa iho ia outou.”—PHILIPI 4:9.

1, 2. I te rahiraa o te taime, te ohipa ra anei te Bibilia i roto i te oraraa o te taata o te parau e e haapaoraa ta ratou? A faataa na.

 “TE MANA noa ˈtura te haapaoraa, area te morare ra, te mana ore noa ˈtura ïa.” Te haapoto ra teie upoo parau i roto i te hoê vea (Emerging Trends) i te faahopearaa o te hoê uiuiraa manaˈo na te Hau Amui atoa. E au ra e, i taua fenua ra, ua tupu te hoê maraaraa o te rahiraa taata e haere i te fare pure e te parau e mea faufaa te haapaoraa i roto i to ratou oraraa. Te na ô ra râ te parau faataa e: “Noa ˈtu teie mau numera rarahi, te feaa mau ra te mau Marite e rave rahi i te mana o te faaroo i nia i te oraraa o te taata taitahi e i te huitaata atoa.”

² Aita teie huru tupuraa e itehia ra i te hoê noa fenua. Na te ao atoa, e rave rahi taata o te parau e e farii ratou i te Bibilia e e haapaoraa ta ratou, o te ore e vaiiho ra i te mau Papai ia ohipa mau i roto i to ratou oraraa. (Timoteo 2, 3:5) “Te faatura rahi nei â matou i te Bibilia,” o ta te upoo ïa o te hoê pǔpǔ maimi i parau, “no te parau râ e rave mau i te taime no te taio atu, haapii atu e faaohipa ˈtu—no mutaa ihora ïa te reira.”

3. (a) E nafea te Bibilia ia ohipa i nia i te feia e riro mai ei Kerisetiano mau? (b) E nafea te mau pǐpǐ a Iesu e faaohipa ˈi i te aˈoraa a Paulo i roto i te Philipi 4:9?

 ³ I te pae râ o te mau Kerisetiano mau, mea ê ïa. Ua faatupu te faaohiparaa i te aˈoraa o te Parau a te Atua i te mau tauiraa i roto i to ratou feruriraa e to ratou haerea. E e ite-haere-noa-hia e vetahi ê te huru taata apî ta ratou e faaite. (Kolosa 3:5-10) No te mau pǐpǐ a Iesu, e ere te Bibilia i te hoê buka o te vai noa i nia i te iri vairaa e te î noa ˈtu i te huˈa repo. I te tahi roa ˈˈe pae, ua parau te aposetolo Paulo i te mau Kerisetiano i Philipi e: “I te mau mea ta outou i ite, ta outou i farii, ta outou i faaroo, e ta outou i hiˈo mai ia ˈu nei, e rave ïa: e e riro te Atua hau ei pihai atoa iho ia outou.” (Philipi 4:9) Eita noa te mau Kerisetiano e farii e e parau mau te Parau a te Atua. E haa râ ratou ia au i ta ratou i haapii, a faaohipa tamau ai i te aˈoraa bibilia—i roto i te utuafare, i te vahi raveraa ohipa, i roto i te amuiraa, e i roto i te tahi atoa ˈtu mau tuhaa o te oraraa.

4. No te aha e riro ai ei tautooraa te faaohiparaa i te mau ture a te Atua?

⁴ E ere i te mea ohie ia faaohipa i te mau ture e te mau faaueraa tumu a te Atua. Te ora nei tatou i roto i te hoê ao to raro aˈe i te mana o Satani te Diabolo ta te Bibilia e parau ra “te atua o teie nei ao.” (Korinetia 2, 4:4; Ioane 1, 5:19) No reira, mea faufaa roa ia ara maitai i te mau mea atoa o te haafifi i to tatou haerea taiva ore i te Atua ra o Iehova. E nafea tatou ia tapea i te taiva ore?

E tapea maitai anaˈe i “te hiroa parau ora”

5. Eaha te auraa ia parau Iesu e: ‘A pee tamau mai ia ˈu’?

⁵ I roto i ta tatou faaohiparaa i te mea ta tatou i haapii, mea faufaa ia paturu ma te taiva ore i te haamoriraa mau, noa ˈtu te patoiraa a te feia faaroo ore. E titau te faaoromai i te tutavaraa. “O te taata i hinaaro i te pee mai ia ˈu,” o ta Iesu ïa i parau, “e faarue oia ia ˈna iho, a rave ai i ta ˈna [pou haamauiuiraa], a pee [tamau] mai ai ia ˈu.” (Mataio 16:24; MN) Aita Iesu i parau e e tia ia tatou ia pee ia ˈna hoê hebedoma, hoê avaˈe, aore ra hoê matahiti i te maoro. Ua parau râ oia e: ‘A pee tamau mai ia ˈu.’ Te faaite ra ta ˈna mau parau e e ere to tatou tiaraa pǐpǐ no te hoê noa anotau o to tatou oraraa, e ere atoa i te hoê taime paieti e vai ra i teie mahana, e ananahi ra, aita faahou. Te patururaa ma te taiva ore i te haamoriraa mau, te faaoromairaa ïa ma te tuutuu ore i te eˈa ta tatou i maiti, noa ˈtu te mea e tupu mai. E nafea tatou ia na reira?

6. Eaha te hohoˈa parau ora ta te mau Kerisetiano no te senekele matamua i haapii mai ia Paulo ra?

⁶ Ua faaitoito Paulo i to ˈna hoa ohipa o Timoteo e: “E tapea maitai i te hiroa parau [ora] ta oe i ite ia ˈu nei ra, ma te faaroo e te hinaaro i te Mesia ra ia Iesu.” (Timoteo 2, 1:13; MN) Eaha ta Paulo i hinaaro e parau? Te taˈo Heleni i hurihia i ǒ nei ei “hiroa,” o te hohoˈa mau ïa ta te hoê rimaî i peni. Noa ˈtu e aita i rahi te mau mea rii, mea reni-maitai-hia te mau mea e ia taa i te hoê taata e haroaroaraa to ˈna te taatoaraa o te hohoˈa. Oia atoa, aita te hohoˈa parau mau ta Paulo i haapii ia Timoteo e ia vetahi ê i opuahia no te horoa i te hoê pahonoraa taa maitai i te mau uiraa atoa e manaˈohia. E horoa râ teie puea haapiiraa i te aratairaa e navai—te hoê reni, ei auraa parau—e ia haroaroa te feia aau tia eaha ta Iehova e titau ra ia ratou. No te faaoaoa i te Atua, e titauhia iho â ïa ia ratou ia tamau i te haapao i te hohoˈa parau mau na roto i te faaohiparaa i ta ratou i haapii.

7. E nafea te mau Kerisetiano e nehenehe ai e pee maite i te hohoˈa parau ora?

⁷ I te senekele matamua, ua paturu te tahi mau taata mai ia Humenaio, Alesanedero, e Phileto i te mau manaˈo tu ore e “te hiroa parau ora.” (Timoteo 1, 1:18-20; Timoteo 2, 2:16, 17) Mea nafea te mau Kerisetiano matamua ia ara eiaha ia haavarehia e te feia taiva? Na roto ïa i te faahohonu-maitai-raa i te mau papai faauruahia e te faaohiparaa ˈtu i roto i te oraraa. Ua tia i te feia e pee ra i te hiˈoraa o Paulo e o te tahi atu feia haapao maitai, ia ite atu e ia patoi atu i te mea tu ore e te hohoˈa parau mau ta ratou i haapii. (Philipi 3:17; Hebera 5:14) Aita ratou i “aoaoa noa i te ui e te mârôraa parau,” ua tamau râ ratou i te haere i mua i nia i to ratou eˈa maitai e te paieti. (Timoteo 1, 6:3-6) E na reira  atoa tatou ia tamau tatou i te faaohipa i te pue parau mau ta tatou i haapii. E paari mau â to tatou faaroo ia hiˈo tatou e te pee maite noa ra te mau mirioni taata e tavini ra ia Iehova na te ao nei, i te hohoˈa o te parau mau bibilia ta ratou i haapii.—Tesalonia 1, 1:2-5.

E patoi anaˈe i te mau “fabula”

8. (a) E nafea Satani ia tamata i te faaore i to tatou faaroo i teie tau? (b) Eaha te faaararaa a Paulo e vai ra i roto i te Timoteo 2, 4:3, 4?

⁸ E tamata Satani i te faafati i to tatou taiva ore na roto i te faatupuraa i te feaaraa i te mea ta tatou i haapii. I teie tau, mai i te senekele matamua, te tutava ra te feia taiva e te tahi atu i te faaore i te faaroo o te feia hapa ore. (Galatia 2:4; 5:7, 8) I te tahi taime, e faaohipa ratou i te mau vea no te haaparare i te mau parau tavirihia aore ra te mau haavare rarahi mau no nia i te mau huru raveraa e te mau manaˈo turai o te nunaa o Iehova. Ua faaara Paulo e e faafariu-ê-hia te tahi pae i te parau mau. “Te vai atura hoi te tau,” o ta ˈna ïa i papai, “e ore ai ratou e farii ai i te parau mau, no te anoenoe ra o to ratou tariˈa, e haaputu ïa ratou i te orometua i au i to ratou iho hinaaro; e fariu ê hoi to ratou tariˈa i te parau mau, a opai tia ˈtu ai i te fabula.”—Timoteo 2, 4:3, 4.

9. Eaha paha ta Paulo e manaˈo ra i to ˈna faahitiraa i te mau “fabula”?

⁹ Aita vetahi pae i haapao noa i te hohoˈa parau ora, ua anaanatae atu râ i te “fabula.” Eaha na taua mau fabula ra? Peneiaˈe te manaˈo ra o Paulo i te mau aai feruri-noa-hia, mai tei itehia na i roto i te buka apokirifa ra Tobia. a Te vai atoa ra paha te mau parau atutu faahoruhoru e mea hamani-noa-hia. Ua hema atoa paha ïa te feruriraa o vetahi—ia “au i to ratou iho hinaaro”—i te feia i paturu i te manaˈo e haafaufaa ore i te mau ture aveia a te Atua aore ra tei faaino i te feia e aratai ra i te amuiraa. (Ioane 3, 9, 10; Iuda 4) Noa ˈtu eaha te faaturoriraa i faaohipahia, e au ra e mea au aˈe na vetahi pae te haavare i te parau mau o te Parau a te Atua. Aita i maoro, ua faaea ratou i te faaohipa i ta ratou i haapii, a ino atu ratou iho i te pae varua.—Petero 2, 3:15, 16.

10. Eaha te tahi mau fabula no teie tau, e mea nafea to Ioane haapapuraa e mea titauhia ia ara maitai?

¹⁰ E nehenehe ta tatou eiaha e anaanatae atu i te mau fabula i teie tau mai te peu e e hiˈopoa maitai e e maiti maitai tatou i te mea ta tatou e faaroo e e taio. Ei hiˈoraa, e pinepine te mau mauhaa haapurororaa parau i te paturu i te morare ore. E faaitoito te taata e rave rahi i te agnosticisme aore ra i te tiaturi-ore-roa-raa i te Atua. E tâhitohito te feia faahapa i te parau e mea faauruahia te Bibilia e te Atua. E e tamau te feia taiva no teie tau i te faatupu i te feaaraa no te tuino i te faaroo o te mau Kerisetiano. No nia i te hoê mea atâta mai tera i faaohipahia e te mau peropheta haavare i te senekele matamua,  ua faaara te aposetolo Ioane e: “E au mau here e, eiaha e faaroo atoa ˈtu i te mau [parau faauruahia] atoa, e tamata râ i taua mau [parau faauruahia] ra, i te itearaa e, no ǒ i te Atua ra, no te mea e rave rahi te peropheta haavare i reva ˈtu na na te ao nei.” (Ioane 1, 4:1; MN) No reira, mea titauhia ia ara maitai tatou.

11. Eaha te hoê ravea e hiˈopoa ˈi e tei roto anei tatou i te faaroo?

¹¹ I te reira paeau, ua papai Paulo e: “A hiˈopoa tamau e tei roto anei outou i te faaroo.” (Korinetia 2, 13:5, MN) Ua faaitoito mai te aposetolo Paulo e tamau i te hiˈopoa ia tatou iho e te farii maite ra anei tatou i te taatoaraa o te mau tiaturiraa Kerisetiano. Mai te peu e e tupu to tatou hinaaro e faaroo i te feia mauruuru ore, mea titauhia ia hiˈopoa tatou ia tatou iho i roto i te pure. (Salamo 139:23, 24) Mea huru imi hapa anei tatou i nia i te nunaa o Iehova? Mai te peu e e, no te aha? Ua mauiui anei tatou i te mau parau aore ra te mau haaraa a te hoê taata? Mai te peu e tera iho â, te tuu ra anei tatou i te mau mea i to ratou parahiraa mau? E taime poto to te mau ati atoa ta tatou e faaû nei i roto i teie faanahoraa o te mau mea. (Korinetia 2, 4:17) Noa ˈtu e e farerei tatou i te tahi tamataraa i roto i te amuiraa, eaha hoi tatou e faaea ˈi i te tavini i te Atua? Mai te peu e te inoino ra tatou i te hoê mea, e ere anei i te mea maitai roa ˈˈe e rave i tei maraa ia tatou no te faatitiaifaro i te reira a vaiiho atu ai i roto i te rima o Iehova?—Salamo 4:4; Maseli 3:5, 6; Ephesia 4:26.

12. Mea nafea to Berea i te horoaraa mai i te hiˈoraa maitai no tatou?

¹² Maoti i te faaino haere noa, e atuatu anaˈe i te manaˈo maitai i te pae varua i te ite e noaa mai na roto i ta tatou iho haapiiraa e te mau putuputuraa a te amuiraa. (Korinetia 1, 2:14, 15) Eiaha atoa tatou ia mârô i te Parau a te Atua, mea maitai roa ˈˈe râ ia pee i te haerea o to Berea no te senekele matamua tei hiˈopoa maitai i te mau Papai! (Ohipa 17:10, 11) E ohipa anaˈe atu ai ia au i ta tatou i haapii, ma te patoi i te mau fabula e te mau maite atu i te parau mau.

13. E nafea e riro ai e te haaparare ra tatou i te mau aamu haavare ma te opua ore?

¹³ Te vai ra te tahi atu â huru fabula te tia ia tatou ia ara maitai. Te parare ra te mau aamu faahoruhoru e rave rahi roa, e pinepine na roto i te rata roro uiraa. E haerea paari te araraa i taua mau aamu ra, ia ore iho â râ tatou i ite mau nohea mai taua parau ra. Noa ˈtu e na te hoê Kerisetiano roo maitai i hapono mai i te hoê aamu, e ere paha o oia te taata matamua i ite atu i te mau mea. No reira e mea faufaa ˈi ia haapao maitai ia haaparare atu â tatou i te mau aamu aita i haapapuhia. Eita mau â tatou e hinaaro e afai haere i te mau “fabula paieti ore,” aore ra “te mau aamu haavare o te faaino i te mea moˈa.” (Timoteo 1, 4:7, MN) I te mea e e hopoia na tatou te parauraa i te parau mau te tahi i te tahi, e haerea paari to tatou ia ape tatou i te mau mea atoa o te turai ia tatou ia haaparare  i te parau hape noa ˈtu e mea opua-ore-hia.—Ephesia 4:25.

Mau maitai e noaa i te faaohiparaa i te parau mau

14. Eaha te mau maitai e noaa i te faaohiparaa i te mau mea ta tatou i haapii i roto i te Parau a te Atua?

¹⁴ E hopoi mai te faaohiparaa i te mea ta tatou e haapii na roto i ta tatou iho haapiiraa bibilia e te mau putuputuraa, i te mau maitai e rave rahi. Ei hiˈoraa, e itea mai paha ia tatou e e maitai atu â to tatou taairaa e te fetii faaroo. (Galatia 6:10) E maitai atu â to tatou iho huru mau ia faaohipa tatou i te mau faaueraa tumu bibilia. (Salamo 19:8) Hau atu â, na roto i te faaohiparaa i te mea ta outou e haapii, e ‘faanehenehe tatou i te parau a te Atua’ e peneiaˈe e faatae atoa ia vetahi ê i te haamoriraa mau.—Tito 2:6-10.

15. (a) Mea nafea to te hoê potii faaitoitoraa i te poro i te fare haapiiraa? (b) Eaha ta outou i haapii mai na roto i teie tupuraa?

¹⁵ I roto i te mau Ite no Iehova, te vai ra te feia apî e rave rahi o te faaohipa i ta ratou i haapii i roto i ta ratou iho haapiiraa bibilia e te mau papai Kerisetiano e na roto atoa i te haere-tamau-raa i te mau putuputuraa a te amuiraa. Ua riro to ratou haerea maitai ei faaiteraa puai na te mau orometua haapii e te mau hoa piahi i te fare haapiiraa. (Petero 1, 2:12) E rave anaˈe ia Leslie, te hoê potii 13 matahiti i te Hau Amui. Te faˈi ra oia e i fifi na oia i te paraparau i te mau hoa haapiiraa no nia i to ˈna faaroo, i te hoê râ mahana, ua taui te reira. “Ua paraparau te mau tamarii haapii no nia i te ravea e tamata ˈi te taata i te hoo i te tauihaa ia vetahi ê. Ua tuu te hoê potii i to ˈna rima i nia e ua faahiti i te mau Ite no Iehova.” Ei Ite, ua nafea o Leslie? “Ua faatia vau i to ˈu faaroo,” o ta ˈna ïa e parau ra, “e ua maere roa tera te taatoaraa no te mea e ere au i te mea paraparau roa i te fare haapiiraa.” Eaha te faahopearaa o to Leslie mǎtaˈu ore? “Ua horoa vau i te hoê buka rairai e te hoê api parau na te piahi ra, mai reira mai, ua ui mai oia i te tahi atu mau uiraa,” o ta Leslie ïa e parau ra. Eaha râ ïa Iehova i te oaoa ia faaitoito te feia apî o te faaohipa i te mea ta ratou i haapii, i te poro i te fare haapiiraa!—Maseli 27:11; Hebera 6:10.

16. Mea nafea to te hoê Ite apî fanaˈoraa i te Haapiiraa o te taviniraa teotaratia?

¹⁶ Te tahi atu hiˈoraa, o to Elizabeth ïa. Mai te 7raa o to ˈna matahiti e i te roaraa o te mau matahiti haapiiraa tuatahi, ua titau manihini noa na teie potii i to ˈna mau orometua haapii i te Piha a te Basileia i te mau taime atoa e tuhaa ta ˈna i roto i te Haapiiraa o te taviniraa teotaratia. Ia ore te hoê orometua haapii e tae mai, e faaea rii Elizabeth ia faaoti te haapiiraa e e vauvau oia i ta ˈna tumu parau i mua i te orometua. I te matahiti hopea i haere ai oia i te haapiiraa tuarua, ua papai Elizabeth i te hoê parau faataa 10 api no nia i te mau maitai o te Haapiiraa o te taviniraa teotaratia e ua vauvau i ta ˈna tumu parau i mua i na orometua haapii e maha. Ua titau-atoa-hia oia e horoa i te hoê faahiˈoraa o te hoê tuhaa o te Haapiiraa o te taviniraa teotaratia e ua maiti oia i te tumu parau ra “No te aha te Atua e faatia ˈi i te ino?” Ua fanaˈo Elizabeth i te porotarama a te mau Ite no Iehova no te Haapiiraa o te taviniraa teotaratia. Hoê noa tera o te mau Kerisetiano apî e rave rahi o te arue ia Iehova na roto i te faaohiparaa i te mau mea ta ratou i haapii i roto i ta ˈna Parau.

17, 18. (a) Te pûpû ra te Bibilia i teihea aˈoraa no nia i te haerea tia? (b) Mea nafea to te haerea tia o te hoê Ite no Iehova ohiparaa i nia i te hoê taata?

¹⁷ Te aˈo ra te Bibilia i te mau Kerisetiano e ei  haerea tia to ratou i te mau mea atoa. (Hebera 13:18) E nehenehe te haerea haavare e tuino i to tatou taairaa e vetahi ê e, te mea faufaa ˈtu â, e Iehova iho. (Maseli 12:22) E haapapu to tatou haerea tia e te faaohipa ra tatou i te mau mea ta tatou i haapii, e na te reira i turai i te taata e rave rahi ia faatura ˈtu â i te mau Ite no Iehova.

¹⁸ E rave anaˈe i te hiˈoraa o te hoê faehau o Phillip te iˈoa. Ua moe ia ˈna te hoê parau moni i tarimahia aita râ e tino moni i papaihia e aita oia i ite atu e tae roa i te taime i faahoˈihia mai ai na roto i te fare rata. Na te hoê Ite no Iehova i ite mai i te parau moni ra, e te na ô ra te hoê papai iti e apee ra i te reira e na te mau tiaturiraa a te taata i ite atu i turai ia ˈna ia faahoˈi i te reira. Ua maere roa o Phillip. “I nehenehe noa na ta ratou e faaere ia ˈu 1 000 000 farane!” o ta ˈna ïa i parau. Ua inoino oia i te tahi atu taime i te eiâraahia to ˈna taupoo i te fare pure. E au ra e na te hoê taata matau i eiâ i to ˈna taupoo, area te parau moni ra o te nehenehe hoi e faafanaˈo ehia rahiraa tausani farane, na te hoê ïa taata matau ore i faahoˈi mai! Oia mau, e faahanahana te mau Kerisetiano haerea tia i te Atua ra o Iehova!

E tamau anaˈe i te faaohipa i te mea ta tatou i haapii

19, 20. E nafea tatou e faufaahia ˈi i te haaraa ia au i te mau mea ta tatou i haapii i roto i te Bibilia?

¹⁹ E ooti te feia e faaohipa i te mea ta ratou i haapii i roto i te Parau a te Atua i te mau maitai e rave rahi. Ua papai te pǐpǐ ra o Iakobo e: “O te hiˈo râ i roto i te ture tia roa o te tiamâ ra, ma te tamau maite, no te mea e ere oia i te taata e moina noa te parau ia faaroo ra, e taata rave râ oia i taua ohipa ra, e haamaitaihia ïa oia i ta ˈna ra raveraa.” (Iakobo 1:25) Oia, ia haa tatou ia au i te mau mea ta tatou i haapii i roto i te Bibilia, e noaa ia tatou te oaoa mau e e faaruru maitai aˈe tatou i te mau faaheporaa o te oraraa. Te mea hau roa ˈˈe, e noaa ia tatou te haamaitairaa a Iehova e te ora mure ore!—Maseli 10:22; Timoteo 1, 6:6.

²⁰ No reira, a tamau ïa i te haapii maitai i te Parau a te Atua. A putuputu tamau e te feia haamori ia Iehova, e a haapao maitai i te tumu parau e vauvauhia ra i te putuputuraa Kerisetiano. A faaohipa i ta outou e haapii ra, a tamau i te na reira e “e riro te Atua hau ei pihai atoa iho ia outou.”—Philipi 4:9.

[Nota i raro i te api]

Te haamanaˈo ra anei outou?

• Eaha “te hiroa parau ora,” e e nafea tatou ia tamau i te pee atu?

• Eaha “te fabula” e tia ia tatou ia patoi?

• Eaha te mau maitai e noaa i te feia e faaohipa i te mau mea ta ratou i haapii i roto i te Parau a te Atua?

[Uiraa haapiiraa]

[Hohoˈa i te api 17]

Mea nafea te mau Kerisetiano matamua ia ara eiaha ia haavarehia e te feia taiva?

[Hohoˈa i te api 18]

E nehenehe te feaaraa e faatupuhia e te mau mauhaa haapurororaa parau, na roto i te Internet, e te feia taiva no teie tau

[Hohoˈa i te api 19]

E ere i te haerea paari te haaparareraa i te mau parau aita i haapapuhia

[Hohoˈa i te api 20]

I te vahi raveraa ohipa, i te fare haapiiraa, e i te tahi atu vahi, e faaohipa te mau Ite no Iehova i ta ratou i taio i roto i te Parau a te Atua