Eaha te niu o to oe panaˈonaˈo ore?

I roto i te hoê oire iti i Afirika Tooa o te râ, te aroha ra te taurearea ra o Josué i to ˈna utuafare e to ˈna mau hoa. a Te reva ra oia i te oire rahi no te imi i te panaˈonaˈo ore i te pae faaravairaa faufaa. I muri iti noa ˈˈe râ i to ˈna taeraa ˈtu, e iti mai to ˈna tiaturiraa a ite ai oia e e ere i te mea ohie ia riro mai ei taata taoˈa rahi i roto i te oire rahi.

A FAAITOITO ai oia i te faaau atu i nia i te oraraa i te oire rahi, e haamata oia i te inoino. Mea ê roa te oire rahi i ta ˈna iho i manaˈo. I taua area taime ra, e hinaaro roa o Josué e hoˈi i to ˈna utuafare e i to ˈna mau hoa ra i tera oire iti riirii ta ˈna i faarue. E taiâ râ oia e ia faaooo mai te tahi mau taata o te oire iti ia ˈna. ‘E parau mai paha ratou e aita vau i manuïa,’ ta ˈna ïa e haapeapea ra, ‘no te mea aita i noaa mai ta ˈu i hinaaro i roto i te oire rahi.’

Te mea teimaha roa ˈtu â no ˈna, oia ïa ia inoino to ˈna nau metua. Te tiaturi ra hoi raua ia ˈna no te tauturu ia raua i te pae moni. A faaruru noa ˈi i teie huru teimaha o te aau, e rave o Josué i te hoê ohipa faahaehaa e rave rahi hora i te maoro, e e noaa mai ia ˈna hoê noa tuhaa o ta ˈna i moemoeâ na. E rohirohi roa oia no te rahi o te ohipa. E e iti mai te taime e toe mai no te mau ohipa Kerisetiano, ta ˈna hoi e haafaufaa rahi roa, a mairi ai te mau hebedoma. No te mea ua atea ê oia i te mahanahana o to ˈna utuafare e o to ˈna mau hoa tahito, e peapea e e moemoe oia. Ua ite oia e eita te oire rahi e horoa mai i te panaˈonaˈo ore ta ˈna e hinaaro rahi roa ra.

Noa ˈtu e e taui te iˈoa e te fenua, te ite-pinepine-hia ra te aamu peapea o Josué. E ere no to Josué hinaaro miimii e taui i te fenua—te imi noa ra râ oia i te panaˈonaˈo ore. Ua manaˈo mau â oia e e fanaˈo aˈe oia i te oire rahi eiaha râ i to ˈna oire iti. Parau mau, e haamaitai paha te hoê taata i to ˈna huru tupuraa materia, e ere râ te reira i te panaˈonaˈo ore mau. Aita i tupu no Josué, e papu roa, no te rahiraa atoa o te taata o te tamata ra i te hoê â mea. E turaihia ïa tatou ia ui e, ‘Eaha te panaˈonaˈo ore?’

E ere hoê â manaˈo to te taata no nia i te panaˈonaˈo ore. Te faataa ra te hoê titionare i te panaˈonaˈo ore mai te “tiamâraa i te fifi atâta” aore ra te “tiamâraa i te mǎtaˈu aore ra te ahoaho.” Ua ite te rahiraa o te taata e aita e “tiamâraa i te fifi atâta” i teie mahana. Te mauruuru nei ratou a ite noa ˈi ratou i te panaˈonaˈo ore, noa ˈtu te mau huru tupuraa atâta e nehenehe e fa mai.

E o oe? Ihea oe e imi ai i te panaˈonaˈo ore? I roto anei i te oire rahi eiaha râ i te oire iti, mai ta Josué i manaˈo? Aore ra i roto i te moni, noa ˈtu eaha te vahi aore ra te ravea e noaa mai ai te reira? I roto paha i te titauraa i te hoê tiaraa teitei? Noa ˈtu eaha to oe manaˈo no nia i te niu o to oe panaˈonaˈo ore, eaha râ te maororaa o taua panaˈonaˈo ore ra no oe e no to oe utuafare?

E hiˈo mai tatou e toru tuhaa i reira te taata e rave rahi e imi ai i te panaˈonaˈo ore—te vahi; te moni; te tiaraa. Ia oti, e hiˈopoa mai tatou eaha te niu o te panaˈonaˈo ore mau e te vai tamau.

[Nota i raro i te api]