Aamu

E hopoi mai te fariiraa i ta Iehova mau titau-manihini-raa i te mau haamaitairaa

FAATIAHIA E MARIA DO CÉU ZANARDI

“Ua ite Iehova eaha ta ˈna e rave ra. Mai te peu e ua titau manihini oia ia oe, mea maitai ia farii atu oe ma te haehaa.” Ua tauturu mai teie mau parau ta to ˈu papa i faahiti fatata e 45 matahiti aˈenei, ia ˈu ia farii i te titau-manihini-raa matamua ta te faanahonahoraa a Iehova i faatae mai na ˈu, e riro ei tavini taime taatoa. I teie mahana, te mauruuru noa ra vau i te aˈoraa a to ˈu papa no te mea ua hopoi mai te fariiraa i taua mau titau-manihini-raa ra i te mau haamaitairaa rahi.

I TE matahiti 1928, ua tamatahiti o Papa ia ˈna i Te Pare Tiairaa e ua anaanatae oia i te Bibilia. I te mea e e faaea oia i ropu ia Potiti, mea na roto noa ïa i te mau papai tei haponohia mai na ˈna e te hoê Bibilia a to ˈna papa e a to ˈna mama ruau i matau ai oia i te amuiraa a te Atua. I te matahiti 1949, i te 13raa o to ˈu matahiti, ua reva to matou utuafare e faaea i Beresilia, i te fenua tumu o Mama, e ua parahi matou i pihai i te oire o Rio de Janeiro.

Ua titau manihini mai te feia tapiri apî ia matou ia haere i ta ratou fare pure, e ua haere matou tau taime i te maoro. Mea au na Papa e uiui ia ratou no nia i te po auahi, te nephe, e no nia i te tupu i nia i te fenua a muri aˈe—tera râ, aita ta ratou e pahonoraa. “E tiai noa ïa tatou i te feia haapii mau i te Bibilia,” tera ïa ta Papa i matau i te parau.

I te hoê mahana, ua haere mai te hoê taata matapo i ǒ matou e ua pûpû mai i Te Pare Tiairaa e te A ara mai na! Ua uiui Papa ia ˈna no nia i taua noâ mau tumu parau ra, e ua horoa mai te taata matapo i te mau pahonoraa papu niuhia i nia i te Bibilia. I te hebedoma i muri iho, ua haere mai te  tahi atu Ite no Iehova i te fare. I muri aˈe i to ˈna pahonoraa i te tahi atu â mau uiraa, ua tatarahapa maira te vahine Ite no Iehova no te mea e tia ia ˈna ia haere i roto i te “aua taviniraa.” I te mea e aita i taa ia Papa eaha te auraa o ta ˈna e parau ra, ua taio atu te vahine i te Mataio 13:38 ia ˈna: “Te aua ra, oia teie nei ao.” Ua ui atura Papa e: “E nehenehe anei au e haere atoa?” “E,” ta te vahine ïa i pahono mai. Ua oaoa roa matou e ua itea faahou mai ia matou te parau mau bibilia! Ua bapetizohia Papa i te tairururaa i tupu i muri iho, e ua bapetizohia vau i muri iti noa ˈˈe, i te avaˈe Novema 1955.

Fariiraa i ta ˈu titau-manihini-raa matamua

Hoê matahiti e te afa i muri aˈe, ua tae mai ta ˈu hoê vehî rata rahi mauteute no ǒ mai i te amaa a te mau Ite no Iehova i Rio de Janeiro, o te titau manihini maira ia ˈu ia rave i te ohipa pororaa taime taatoa. Mea maˈimaˈi roa hoi Mama i taua taime ra, e no reira, ua ani au i te manaˈo o to ˈu papa. “Ua ite Iehova eaha ta ˈna e rave ra,” tera ïa ta ˈna pahonoraa papu maitai. “Mai te peu e ua titau manihini oia ia oe, mea maitai ia farii atu oe ma te haehaa.” Faaitoitohia e teie mau parau, ua faaî au i te parau aniraa e ua haamata i te taviniraa taime taatoa i te 1 no Tiurai 1957. Ua tono-na-mua-hia vau i te oire o Três Rios, i te Hau o Rio de Janeiro.

I te omuaraa, aita te feia no Três Rios i hinaaro roa e faaroo i ta matou poroi no te mea aita matou e faaohipa ra i te hoê huriraa bibilia Katolika. Ua tae mai te tauturu i to matou haamataraa i te haapii i te Bibilia e o Geraldo Ramalho, hoê Katolika haere pure. Maoti ta ˈna tauturu i noaa mai ai ia ˈu hoê Bibilia ta te perepitero no reira i tarima. Mai reira mai, i te mau taime atoa e faahiti ai te taata i te hoê patoiraa, e faaite atu vau i te tarimaraa a te perepitero, e eita ratou e uiui faahou mai. Ua bapetizohia o Geraldo i muri aˈe.

Ua oaoa roa vau i te faatupuraahia te hoê tairururaa haaati i roto iho i te oire o Três Rios i te matahiti 1959. Ua faanaho atoa te mutoi rahi, o te haapii ra hoi i te Bibilia i taua taime ra, e ia papaihia te porotarama i nia i te mau ripene ahu a faaiteitehia ˈtu ai na roto i te oire taatoa. I muri aˈe i to ˈu haaraa i Três Rios e toru matahiti, ua titau-manihini-hia vau ia tavini i Itu, fatata 110 kilometera i te atea i te pae tooa o te râ o te oire o São Paulo.

Mau buka uteute, te ninamu, e te rearea

I muri aˈe i te tahi maimiraa, ua itea mai ia mâua to ˈu hoa pionie i te tahi nohoraa naho i ropu i te oire i te fare o Maria, te hoê vahine ivi aau maitai. Ua riro mâua mai te mau tamahine na Maria. Aita râ i maoro, ua haere mai te epikopo Katolika Roma no Itu e farerei ia ˈna no te parau ia ˈna e tiahi ia mâua, tera râ, ua haapaari atu o Maria: “I te poheraa ta ˈu tane, aita roa ˈtu outou i tamahanahana mai ia ˈu. Na teie nau Ite no Iehova i tauturu mai ia ˈu noa ˈtu e aita vau i roto i ta raua haapaoraa.”

I taua area tau ra, ua faaara mai te hoê vahine ia mâua e ua opani te mau perepitero Katolika no Itu i te feia o ta ratou ekalesia eiaha e farii i “te buka uteute no nia i te Diabolo.” O te buka bibilia “Que Dieu soit reconnu pour vrai!” ta ratou e  parau ra, tera hoi te buka ta matou e pûpû na te taata i te hebedoma. I te mea hoi e ua “opani” te mau perepitero i te buka uteute, ua faaineine ïa mâua i te hoê faaiteraa no te pûpû i te buka ninamu (“De nouveaux cieux et une nouvelle terre”). I muri aˈe, i to te pǔpǔ ekalesiatiko faaroorooraa i teie tauiraa, ua faaohipa mâua i te buka rearea (La religion a-t-elle servi l’humanité?), e mai te reira noa. E ohipa maitai te neneiraahia e rave rau buka ma te mau peni taa ê!

Fatata hoê matahiti i muri aˈe i Itu, ua tae mai ta ˈu poroi o te titau manihini maira ia ˈu ia rave i te ohipa no te hoê taime i te Betela, te amaa a te mau Ite no Iehova i Rio de Janeiro, no te faaineine i te tairururaa i te Hau o Rio de Janeiro. Ua farii au ma te oaoa.

Te tahi atu â mau tuhaa taviniraa e mau haafifiraa

I te Betela, mea rahi te ohipa, e ua oaoa vau i te tauturu na roto i te mau ravea atoa e nehenehe. Auê te au e i te apitiraa ˈtu i te aparauraa o te irava mahana i te mau poipoi atoa e i te Haapiiraa o Te Pare Tiairaa e te fetii o te Betela i te mau po Monire! Ua putapû roa vau i te mau pure haavare ore a Otto Estelmann e a te tahi atu mau melo aravihi o te fetii o te Betela.

I muri aˈe i te tairururaa i te Hau o Rio de Janeiro, ua otaa vau i ta ˈu mau taihaa no te hoˈi i Itu, tera râ, ua maere roa vau i to Grant Miller, te tiaau o te amaa, horoaraa mai i te hoê rata ma te titau manihini mai ia ˈu ia tavini ei melo tamau o te fetii o te Betela. O Tuahine Hosa Yazedjian to ˈu hoa piha e te tavini noa ra oia i te Betela no Beresilia. I taua tau ra, mea iti te fetii o te Betela—e 28 noa matou—e e mau hoa rahi roa matou.

I te matahiti 1964, ua haere mai o João Zanardi, te hoê tavini taime taatoa apî, i te Betela no te tahi haapiiraa. I taua taime ra, ua tonohia oia ei tavini haaati, aore ra tiaau haaati, i pihai mai. I te tahi taime, e farerei mâua ia afai mai oia i ta ˈna mau parau faataa i te Betela. Ua faatia te tiaau amaa e ia apiti o João i te haapiiraa utuafare i te mau po Monire, mea na reira ïa mâua i matau atu â ˈi. Ua faaipoipo mâua João i te avaˈe Atete 1965. Ua farii au ma te oaoa i te titau-manihini-raa e apee i ta ˈu tane i roto i te ohipa haaati.

I taua tau ra, e au rii te ohipa ratere i roto ia Beresilia i te raveraa i te tahi ohipa atâta. Eita roa ˈtu e moe ia ˈu i to mâua mau tere i roto i te pǔpǔ feia poro i te Hau o Aranha Minas Gerais. E tia ia mâua ia rave i te pereoo auahi e ia haere avae i muri iho e tae noa ˈtu i ǒ—ma te amo i te mau vairaa ahu, te matini patapata parau, te matini taviri hohoˈa, te mau pute buka, e te mau papai. E oaoa roa mâua ia farerei mâua ia Lourival Chantal, te hoê taeae ruhiruhia, o te tiai noa ra i te vahi tapearaa pereoo auahi no te tauturu ia mâua i te amo i ta mâua mau taihaa.

E faatupuhia te mau putuputuraa i Aranha i roto i te hoê fare tarahu. E taoto mâua i roto i te hoê piha nainai i muri mai. I te hoê pae o te piha, te vai ra te hoê vahi tahuraa auahi i reira mâua e tunu ai i te maa e e faaahu ai i te pape ta te mau taeae e afai mai na mâua i roto i te mau patete. Ua ǒhia te hoê apoo i ropu i te hoê faaapu ofe i pihai mai ei haumitiraa. Ia po, e vaiiho matou i te mori gaz ia ama noa no te ape i te mau triatomes—e nehenehe teie mau manumanu e faatupu i te maˈi a Chagas. Ia poipoi, e ereere noa to mâua ihu i te au auahi. Mea huru anaanatae teie tupuraa!

 A tavini ai mâua i roto i te hoê tuhaa haaati i te Hau o Paraná, ua tae faahou mai ta mâua hoê o tera mau vehî rata rahi mauteute no ǒ mai i te amaa ra. Te vai ra râ te tahi atu â titau-manihini-raa a te faanahonahoraa a Iehova—i teie taime, e tavini i Potiti! Ua faaitoito mai te rata ia mâua ia hiˈo i te manaˈo tumu o te Luka 14:28 e ia feruri maitai hou a farii ai i teie tuhaa taviniraa, no te mea ua opanihia te ohipa Kerisetiano i ǒ, e ua haru aˈena te faatereraa Potiti e rave rahi mau taeae.

E reva anei mâua i te hoê fenua e faaruru ai mâua i te hamani-ino-raa i reira? “Mai te peu e e nehenehe to tâua mau taeae Potiti e ora i ǒ e e tavini ia Iehova ma te haapao maitai, no te aha tâua e ore ai e nehenehe atoa?” ta João ïa i parau. A haamanaˈo ai au i te mau parau faaitoitoraa a to ˈu papa, ua na ô atura vau e: “Mai te peu e ua titau manihini mai Iehova ia tâua, mea maitai ia farii atu tâua e ia tiaturi ia ˈna.” I muri iti noa ˈˈe, tei te Betela mâua i São Paulo, ua horoahia mai te tahi atu â mau faaueraa e ua faaineine mâua i ta mâua mau papie no te reva.

O João Maria e o Maria João

Ua faarue to mâua pahi, te Eugênio C, i te uahu o Santos, i te Hau o São Paulo i te 6 no Tetepa 1969. I muri aˈe e iva mahana i nia i te moana, ua tapae mâua i Potiti. Na mua, ua haa mâua tau hebedoma i te maoro e te tahi mau taeae aravihi i na aroâ ǒaǒa o Alfama e o Mouraria, i te mataeinaa tahito o Lisbonne. Ua haapii mai ratou ia mâua ia hiˈo haere ia ore mâua e noaa-ohie-hia e te mutoi.

Ua faatupuhia te mau putuputuraa a te amuiraa i te fare o te mau Ite. Ia ite matou e te haamata ra te feia tapiri i te manaˈo ino, e taui-oioi-hia te vahi o te mau putuputuraa ia ore te fare aore ra te mau taeae e haruhia. Ua faatupuhia te tahi mau tamaaraa i rapaeau, mea na reira matou ia parau i ta matou tairururaa, i Monsanto Park, i pihai ia Lisbonne, e i Costa da Caparica, te hoê vahi uru raau i te pae tahatai. E oomo iho â ïa matou i te ahu e tano i taua tupuraa ra, e na te tahi pǔpǔ taata e tiai i te tahi mau vahi taa maitai. Ia tapiri mai te tahi taata manaˈo ino, e taime ïa to matou no te faanaho i te tahi hauti, no te tamaa, aore ra no te haamata i te hoê himene matauhia.

Ia fifi atu â te mutoi paruru i te ite o vai matou, eita matou e faaohipa i to matou mau iˈoa mau. Ua matau te mau taeae i te pii ia mâua João Maria e Maria João. Aita to mâua nau iˈoa e papaihia  i roto i te rata aore ra te mau tapaoraa iˈoa. E numera râ to mâua. Ua tutava maite au i te ore e tamau aau i te vahi nohoraa o te mau taeae. No te mea ia haru-noa-hia ˈtu vau, eita ïa vau e nehenehe e hoo ia ratou.

Noa ˈtu te mau opaniraa, ua faaoti papu mâua João e faaohipa i te mau taime maitatai atoa no te poro i te taata, i te mea e ua ite mâua e e nehenehe mâua e ere i to mâua tiamâraa i te mau huru taime atoa. Ua haapii mâua i te tiaturi i to mâua Metua i te raˈi, o Iehova. Ei Paruru ia mâua, ua faaohipa oia i ta ˈna mau melahi ma te hoê raveraa e manaˈo ai mâua e te ‘ite ra mâua i tei ore e itea.’—Hebera 11:27, MN.

I te hoê taime, a poro ai mâua i tera e tera fare i Porto, ua farerei mâua i te hoê taata o tei parau onoono mai ia mâua e tomo mai. Ua farii te tuahine o mâua te pororaa ma te feaa ore, e i te mea e aita vau i nehenehe e patoi, ua apee au ia ˈna. Ua huru ê roa vau i to ˈu iteraa i te hohoˈa o te hoê taata ahu faehau to ˈna i roto i te vahi haereraa taata. E nafea mâua i teie nei? Ua parau mai te taata ia mâua e parahi, e ua ui maira oia e: “E tuu anei orua i ta orua tamaiti ia tavini i roto i te nuu ia titauhia mai oia?” Mea hoata ore teie tupuraa. Ma te hau, e i muri aˈe i to ˈu pureraa i roto ia ˈu, ua pahono atu vau e: “Aita ta ˈu e tamarii, e ua papu ia ˈu e mai te peu e e ui au ia oe i teie huru uiraa papu ore, e horoa mai ïa oe i te hoê â pahonoraa.” Ua mamû noa oia. No reira, ua na ô â vau e: “Mai te peu i teie nei e e ui mai oe ia ˈu mai te aha te huru ia pohe te hoê taeae aore ra te hoê papa, e nehenehe ïa ta ˈu e pahono atu no te mea ua pohe to ˈu teina e to ˈu papa atoa.” Ua tahe to ˈu roimata a paraparau noa ˈi au, e ua ite au e te fatata atoa ra oia i te taˈi. Ua faataa maira oia e ua pohe ta ˈna vahine aita i maoro aˈenei. Ua faaroo maite mai oia a faataa ˈi au i te tiaturiraa o te tia-faahou-raa. I muri iho, ua aroha mâua ia ˈna ma te faatura e ua reva ˈtura ma te fifi ore, a vaiiho atu ai i te tupuraa i roto i te rima o Iehova.

Noa ˈtu te opaniraa, ua tauturuhia te feia aau haavare ia ite ratou i te parau mau. I Porto to ta ˈu tane haamataraa i te haapii e te hoê taata tapihoo o Horácio te iˈoa, ua haere oioi teie taata i mua. I muri aˈe, ua tia atoa ta ˈna tamaiti o Emílio, te hoê taote maitai roa, i te pae o Iehova e ua bapetizohia oia. Oia mau, eita hoê noa ˈˈe mea e nehenehe e tapea i te varua moˈa o Iehova.

“Aita roa ˈtu outou i ite eaha ta Iehova e faatia”

I te matahiti 1973, ua titau-manihini-hia mâua João i te tairururaa nunaa rau “Upootiaraa a te Atua” i tupu i Bruxelles, i Beletita. E mau tausani taeae no Paniora e no Beletita tei tae mai, e te mau tia atoa no Mozambique, no Angola, no Cape-Vert, no Madère, e no Açores. I roto i ta ˈna mau parau hopea, teie ta Taeae Knorr, no te pu rahi i New York, i aˈo mai: “A tamau i te tavini ia Iehova ma te haapao maitai. Aita roa ˈtu outou i ite eaha ta Iehova e faatia. O vai i ite, peneiaˈe e e haere outou i ta outou iho tairururaa nunaa rau i mua nei i Potiti!”

I te matahiti i muri mai, ua fariihia te ohipa  pororaa i mua i te ture i Potiti. E mai ta Taeae Knorr iho â i parau, ua faatupu matou i ta matou tairururaa nunaa rau matamua i Lisbonne i te matahiti 1978. Auê ïa fanaˈoraa faufaa e haere avae na roto i te mau aroâ o Lisbonne, e poro haere ma te mau iri, te mau vea, e te mau titau-manihini-raa i te oreroraa parau no te taatoaraa! E moemoeâ teie o tei tupu.

Ua haapii mâua i te here i to mâua mau taeae Potiti, mea rahi hoi o ratou tei faaruru i te fare tapearaa e te mau tairiraa no to ratou tapearaa i to ratou tiaraa amui ore Kerisetiano. Ua hinaaro mâua e tamau noa i te tavini i Potiti. Tera râ, aita i nehenehe. I te matahiti 1982, ua tupuhia o João i te hoê maˈi mafatu ino, e ua parau mai te amaa ia mâua e hoˈi i Beresilia.

Hoê tau mauiui

Ua turu rahi mai te mau taeae o te amaa no Beresilia e ua tonohia mâua e tavini i roto i te Amuiraa no Quiririm i Taubaté, i te Hau no São Paulo. Ua ino oioi te ea o João, e aita i maoro, ua mau roa oia i te fare. E haere mai te feia i anaanatae e haapii i te Bibilia i ǒ mâua, e te vai ra te mau putuputuraa no te taviniraa i te mau mahana atoa, e tae noa ˈtu te haapiiraa buka i te mau hebedoma atoa. Ua tauturu mai teie mau faanahoraa ia mâua ia atuatu i to mâua ea pae varua.

Ua tamau noa o João i te rave i tei maraa ia ˈna i roto i te taviniraa ia Iehova e tae noa ˈtu i to ˈna poheraa i te 1 no Atopa 1985. Ua peapea e ua hepohepo vau, tera râ, ua faaoti papu vau e rave noa i ta ˈu taviniraa. Ua tupu te tahi atu faataupupuraa i te avaˈe Eperera 1986, i te tomoraahia to ˈu fare e te eiâraahia fatata te taatoaraa o ta ˈu mau mea. A tahi ra vau a moemoe ai e a mǎtaˈu ai i roto i to ˈu oraraa. Ua parau mai te tahi nau taata faaipoipo ma te here e faaea vau i ǒ raua tau taime, e ua mauruuru roa vau no te reira.

Ua haafifi atoa te poheraa o João e te eiâraa i ta ˈu taviniraa ia Iehova. Aita vau i tiaturi faahou ia ˈu i roto i te taviniraa. I muri aˈe i to ˈu papairaa i te amaa no teie fifi, ua tae mai ta ˈu titau-manihini-raa e haa tau taime i te Betela ia afaro faahou mai au i te pae o te aau. Mea faaitoito mau â taua tau ra!

I to ˈu iho â maitai-rii-raa mai, ua farii au e tavini i te oire o Ipuã, i te Hau o São Paulo. Ua haa noa vau i roto i te ohipa pororaa, i te tahi râ mau taime, ua toaruaru vau. I reira ïa vau e taniuniu ai i te mau taeae i Quiririm, e e haere mai te hoê utuafare i ǒ ˈu ra tau mahana i te maoro. Mea faaitoito mau â taua mau farereiraa ra! I te matahiti matamua o ta ˈu taviniraa i Ipuã, e 38 mau taeae e tuahine taa ê tei haere mai e hiˈo ia ˈu noa ˈtu te atea.

I te matahiti 1992, e ono matahiti i muri aˈe i te poheraa o João, ua tae mai ta ˈu te tahi atu titau-manihini-raa no ǒ mai i te faanahonahoraa a Iehova, i teie taime, e reva i Franca, i te Hau o São Paulo, e te tavini noa ra vau i reira ma te taime taatoa. Mea hotu roa te tuhaa fenua i ǒ nei. I te matahiti 1994, ua haamata vau i te hoê haapiiraa bibilia e te tavana oire. I taua matahiti ra, te titau ra oia i te hoê parahiraa i roto i te apooraa Beresilia, noa ˈtu râ ta ˈna porotarama î maitai, ua haapii oia i te mau avatea Monire atoa. Ia ore oia e haapeapeahia, e tupohe oia i ta ˈna niuniu paraparau. Mea oaoa mau â ia ite ia ˈna ia vaiiho mǎrû noa i te poritita e ia haapapu faahou i to ˈna faaipoiporaa, auaˈe te parau mau! Ua bapetizohia raua ta ˈna vahine i te matahiti 1998.

Ia hiˈo vau i muri, e nehenehe au e parau e ua riro to ˈu oraraa i roto i te taviniraa taime taatoa ei hoê o te mau haamaitairaa e mau fanaˈoraa taa ê rahi. Oia mau, ua hopoi mai to ˈu fariiraa i te mau titau-manihini-raa ta Iehova i faatae mai na ˈu na roto i ta ˈna faanahonahoraa, i te mau haamaitairaa rahi. E noa ˈtu eaha te mau titau-manihini-raa e faataehia mai a muri aˈe, e puai noa ˈtu to ˈu hinaaro e farii i te reira.

[Hohoˈa i te api 25]

I te matahiti 1957, i to ˈu raveraa i te taviniraa taime taatoa, e i teie mahana

[Hohoˈa i te api 26]

E te fetii o te Betela i Beresilia i te matahiti 1963

[Hohoˈa i te api 27]

To mâua faaipoiporaa i te avaˈe Atete 1965

[Hohoˈa i te api 27]

Hoê tairururaa i Potiti a opanihia ˈi te ohipa pororaa

[Hohoˈa i te api 28]

Pororaa i roto i te aroâ i Lisbonne a tupu ai te tairururaa nunaa rau “Faaroo o tei upootia” i te matahiti 1978