Mau uiraa a te feia taio

Ia au i te mau faaueraa Bibilia no nia i te faaohiparaa tano i te toto, eaha te manaˈo o te mau Ite no Iehova i te mau ravea rapaauraa o te rave i to tatou iho toto?

Maoti i te faaoti oia anaˈe ia au i ta ˈna iho e au roa ˈˈe aore ra ia au i te tahi faaitoitoraa a te taote, e tia i te Kerisetiano taitahi ia hiˈopoa maitai eaha ta te Bibilia e parau ra. E ohipa tera na ˈna e o Iehova.

Ua faaoti Iehova, no ˈna hoi to tatou ora, eiaha te toto ia amuhia. (Genese 9:3, 4) I roto i te Ture no Iseraela i tahito ra, ua taotia te Atua i te faaohiparaa i te toto no te mea o te ora tera. Ua faaoti oia e: “Tei te toto hoi te maa ora e ora ˈi te mau mea atoa ra, i haapao ai au i te reira e o ta outou ïa e hopoi i nia i te fata ei taraehara na outou iho.” E ia tupai te hoê taata i te hoê animala ei maa? Ua parau te Atua e: “E faatahe oia i te toto i raro a tapoˈi ai i te repo.” * (Levitiko 17:11, 13) Ua faahitihiti noa Iehova i teie faaueraa. (Deuteronomi 12:16, 24; 15:23) Te na ô ra te Soncino Chumash ati Iuda e: “Eiaha te toto ia haapuehia, ia ravehia râ eiaha ia amuhia na roto i te maniiraa ˈtu i raro i te repo.” Aita e ati Iseraela e tia ia ˈna ia rave na ˈna, ia haapue, e ia faaohipa i te toto o te tahi atu mea ora, no te Atua hoi to ˈna ora.

Ua hope te titauraa e haapao i te Ture a Mose i to te Mesia poheraa. Te vai noa ra râ te manaˈo o te Atua no nia i te moˈaraa o te toto. Ma te turaihia e te varua moˈa o te Atua, ua faaue te mau aposetolo i te mau Kerisetiano e ‘haapae i te toto.’ Eiaha taua faaueraa ra ia haafaufaa-ore-hia. I te pae morare, hoê â faufaaraa to te reira e te haapaeraa i te peu taatiraa tia ore aore ra te haamoriraa idolo. (Ohipa 15:28, 29, MN; 21:25) I te matauraahia i te horoa e te pâmu i te toto i te senekele 20, ua taa i te mau Ite no Iehova e te patoi ra teie peu i te Parau a te Atua. *

I te tahi taime, e faaitoito te hoê taote i te hoê taata maˈi ia haapue i to ˈna iho toto tau hebedoma hou te tâpûraa (TAD, haapotoraa na roto i te reo Farani no horoaraa i to ˈna iho toto hou te tâpûraa) ia nehenehe oia e pâmu i te taata maˈi i to ˈna iho toto i haapuehia, i te taime e hinaarohia ˈi. Te patoi tia ˈtura râ te raveraa, te haapueraa, e te pâmuraa i te toto i tei parauhia i roto i te Levitiko e te Deuteronomi. Eiaha te toto ia haapuehia; ia maniihia râ—mai te huru ra e ia faahoˈihia i te Atua ra. Parau mau, aita to te Ture a Mose e mana i teie nei. Teie râ, e faatura te mau Ite no Iehova i te mau  faaueraa tumu ta te Atua i tuu i roto, e ua faaoti papu ratou e ‘haapae i te toto.’ No reira, eita matou e horoa i te toto, eita atoa matou e haapue i to matou toto e tia ia ‘faatahehia i raro’ no te pâmuraa. E patoi taua peu ra i te ture a te Atua.

Aita te tahi atu mau raveraa aore ra hiˈopoaraa i te toto o te hoê taata e patoi tia ˈtura i te mau faaueraa tumu ta te Atua i faahiti. Ei hiˈoraa, ua farii te mau Kerisetiano e rave rahi ia ravehia te tahi maa toto to ratou no te hiˈopoaraa, e ia oti e faaruehia te reira. E faaitoito-atoa-hia paha te tahi atu mau ravea fifi aˈe.

Ei hiˈoraa, i roto i te tahi mau tâpûraa, e faahaerehia te tahi maa toto i rapae i te tino maoti te hoê ravea parauhia faatarapaperaa toto. E faatarapapehia te toto e toe ra i roto i te taata maˈi. I muri aˈe, e faahoˈihia to ˈna toto e vai ra i roto i te taheraa rapaeau, i roto ia ˈna, o te haamaraa faahou ïa i to ˈna faito toropuru i nia i te huru au. Oia atoa, e nehenehe e otehia mai te toto e tahe atu ra i roto i te tâpû e e titiahia ia faahoˈihia te mau toropuru ura i roto i te taata maˈi, e parauhia teie ravea te rave-faahou-raa mai i te toropuru. Na roto i te hoê ravea ê, e nehenehe te toto e faahaerehia i roto i te hoê matini o te rave, no te hoê taime poto, i te hoê ohipa e ravehia iho â e te mau melo o te tino (ei hiˈoraa, te mafatu, te mahaha, aore ra te mape). E faahoˈihia ˈtu ai te toto mai te matini atu e i roto i te taata maˈi. I roto i te tahi atu mau ravea, e faahaerehia te toto i roto i te hoê matini o te faataa ê (centrifugeuse) ia faaorehia te mau tuhaa ino. Aore ra e riro paha te fa i te faataa-ê-raa i te tahi maa tuhaa o te toto e te faaohiparaa i te reira i te tahi atu vahi o te tino. Te vai atoa ra te mau hiˈopoaraa e ravehia te tahi maa toto no te tapao i te titeti i nia iho aore ra no te anoi i te reira i te raau, i reira e tuu-faahou-hia ˈtu ai i roto i te taata maˈi.

E tauiui paha te mau mea rii, e e faatupuhia te mau ravea, te mau rapaauraa, e te mau hiˈopoaraa apî. Eiaha na matou e hiˈopoa i te mau tauiraa rii atoa e rave atu ai i te faaotiraa. E tia i te hoê Kerisetiano ia faaoti no ˈna iho nafea to ˈna toto ia ravehia i roto i te taime tâpûraa, hiˈopoaraa a te taote, aore ra rapaauraa au noa. Ia na mua ˈˈe oia i te uiui atu i te taote aore ra i te taata anohaa no nia i te mea e ravehia e to ˈna toto i te taime haaraa. I reira oia e faaoti ai ia au i ta to ˈna manaˈo haava e faatia. (A hiˈo i te tumu parau tarenihia.)

Ia haamanaˈo te mau Kerisetiano i to ratou pûpûraa na te Atua e te titauraa e ‘hinaaro ia ˈna ma te aau atoa e ma te [nephe] atoa, e ma te puai atoa, e ma te manaˈo atoa ia hope.’ (Luka 10:27; MN) Taa ê atu i te rahiraa i roto i te ao, e poihere rahi roa te mau Ite no Iehova i to ratou taairaa maitai e te Atua. Te aˈo mai ra Tei horoa mai i te ora ia tiaturi te taatoaraa i te toto o Iesu tei maniihia. Te taio nei tatou e: “No ˈna [o Iesu Mesia] i noaa ˈi te ora ia tatou i to ˈna ra toto, i te hara i faaorehia nei.”—Ephesia 1:7.

[Nota i raro i te api]

[Tumu parau tarenihia/Hohoˈa i te api 31]

MAU UIRAA E TIA IA UIUI IA OUTOU IHO

Ia faahaerehia te tahi maa toto to ˈu i rapae i to ˈu tino e ia tapea-noa-hia ˈtu te taheraa maa taime iti, e faatia anei to ˈu manaˈo haava ia ˈu ia hiˈo i teie toto ei tuhaa noâ no ˈu, o te ore ïa e titau ia ‘faatahehia i raro i te repo’?

E huru ê anei to ˈu manaˈo haava i haapiihia ia au i te Bibilia mai te peu e, i roto i te hoê maimiraa maˈi aore ra te hoê rapaauraa, e ravehia maa vahi iti o to ˈu iho toto, e faahuru-ê-hia, e faahaere-faahou-hia mai ai i roto (aore ra i nia) i to ˈu tino?