Te taata hamani ino—Te ite ra oia i te hoê maramarama rahi

UA UˈANA roa ˈtu te riri o Saulo i te mau pǐpǐ a Iesu. Aita oia i mauruuru noa i te hamani-ino-raa tei faatupu-aˈena-hia i nia ia ratou i Ierusalema, oia atoa te pehiraa o Setephano i te ofai, i teie nei, te imi ra oia i te faaaano atu â i te haavîraa. “Te rahi noa ra ïa ta ˈna parau haamǎtaˈu e te taparahi i te mau pǐpǐ a te Fatu ra, e haere atura [Saulo] i te tahuˈa rahi ra, ua ani atura ia ˈna i te leta e hopoi i te mau sunago i Damaseko ra, e ia itea ˈtu ia ˈna te feia i mau i taua parau ra, ia aratai mai oia ia ratou ma te tapea auri atoa i Ierusalema, te tane e te vahine atoa hoi.”—Ohipa 9:1, 2.

A haere ai Saulo i Damaseko, eita e ore e ua feruri oia nafea oia e nehenehe ai e amo i ta ˈna hopoia ma te manuïa roa ˈˈe. Papu maitai e maoti te mana i horoahia ia ˈna e te tahuˈa rahi, e tahoê mai ïa te mau aratai o te huiraatira rarahi ati Iuda i roto i taua oire ra. E imi iho â ïa Saulo i ta ratou tauturu.

Eita e ore e te rahi noa ra Saulo i te horuhoru a fatata ˈi oia i te tapae. Mea rohirohi te tere mai Ierusalema e tae atu i Damaseko—e hitu aore ra e vau mahana na raro tau 220 kilometera i te atea. I te avatea, ua atihia ihora Saulo i te hoê maramarama anaana aˈe i te mahana, e ua mairi ihora oia i raro i te repo. Ua faaroo aˈera oia i te hoê reo i te parauraa mai ia ˈna na roto i te reo Hebera e: “E Saulo, e Saulo, eaha oe e hamani ino mai ai ia ˈu? eita e tia ia oe ia tue i te tara.” Ua ui atura Saulo e: “E te Fatu, o vai oe?” “O vau o Iesu ta oe i hamani ino mai nei,” tei pahonohia mai. “A tia râ, a tia hua mai to avae i nia; i faaite hua ˈtu ai hoi au ia oe, e haapao ia oe ei tahuˈa e ei ite i te mau mea atoa ta oe i ite nei, e te mau mea ta ˈu e faaite atu â ia oe; i te maitiraa ia oe mai roto mai i te mau taata nei, e i te mau Etene, ta ˈu e faatono atu ia oe i teie nei.” Ua ui aˈera Saulo e: “E te Fatu, eaha vau?” “A tia, a haere i Damaseko ei reira oe e  faaitehia mai ai i te mau ohipa atoa i haapaohia na oe e rave ra.”—Ohipa 9:3-6; 22:6-10; 26:13-17.

Ua faaroo te feia i tere mai na muri ia Saulo i te hoê reo, aita râ ratou i ite i te taata paraparau aore ra i taa eaha ta ˈna i parau. No te anaana o te maramarama, eita o Saulo e nehenehe e ite faahou i to ˈna tiaraa mai e aratai-rima-hia ˈtura oia. “E rui toru aˈera oia ma te ite ore, e aore â hoi i amu e te inu hoi.”—Ohipa 9:7-9; 22:11.

Toru mahana feruri-hohonu-raa

Ua farii-maitai-hia Saulo e Iuda, o te ora ra i te aroâ e parauhia o Titiaifaro. * (Ohipa 9:11) Teie aroâ—e parauhia te Darb al-mustaqîm na roto i reo Arabia—o te hoê noâ ïa purumu faufaa roa ˈˈe i Damaseko. A feruri na eaha tei fa mai i roto i te feruriraa o Saulo a faaea ˈi oia i te fare o Iuda. Ua matapohia e ua huru ê Saulo i te ohipa i tupu. I teie nei, e taime ïa no te feruri hohonu i to ˈna mau faahopearaa.

Ua û atu te taata hamani ino i te mea ta ˈna i patoi ei mea maamaa. Te ora noa ra te Fatu ra o Iesu Mesia i patitihia—tei faautuahia e te mau tia mana teitei ati Iuda e ‘i vahavahahia e aore i haapaohia e te taata.’ Ua tia atoa hoi oia ma te fariihia i te rima atau o te Atua i roto i “te maramarama taea-ore-hia”! O Iesu te Mesia. Ua tano Setephano e te tahi atu mau taata. (Isaia 53:3; Ohipa 7:56; Timoteo 1, 6:16) Ua hape roa Saulo, no te mea ua faaite Iesu e tei rotopu oia i te feia ta Saulo e hamani ino ra! I mua i teie haapapuraa, nafea Saulo e nehenehe ai e “tue i te tara”? I te pae hopea e turai-atoa-hia te hoê puaatoro etaeta i te vahi ta to ˈna fatu e hinaaro ra. Ma te patoi i te auraro i te mau faaueraa a Iesu, no reira, te faaino ra ïa Saulo ia ˈna iho.

Ei Mesia, aita Iesu i faautuahia e te Atua. Ua faatia râ Iehova ia ˈna ia faaruru i te pohe ino roa ˈˈe e ia topa oia i raro aˈe i te faautuaraa a te Ture: “O te taata atoa hoi i rîhia i nia i te raau ra, ua katarahia ïa e te Atua.” (Deuteronomi 21:23) Ua pohe Iesu a rîhia ˈi oia i nia i te pou haamauiuiraa. Ua faainohia oia, eiaha no ta ˈna iho mau hara, i te mea e aita ta ˈna e hara, no te tiaraa taata hara râ o te huitaata nei. I muri aˈe, ua faataa Saulo e: “O te feia atoa i nia i te ohipa a te ture ra, ua faainohia ïa; ua oti hoi i te papaihia e, Ia faainohia te feia atoa aore i tamau i te rave i te mau mea atoa i papaihia i roto i te buka ra o te Ture. I te parau râ e, aore roa e taata parau-tia i te aro o te Atua i te ture, ua itea-maitai-hia ïa . . . Ua faaorahia tatou e te Mesia i te faaino a te Ture oia i faarirohia ei faaino no tatou; ua oti hoi i te papaihia e, O tei rîhia i nia i te raau ra, ua faaino-anaˈe-hia ïa.”—Galatia 3:10-13.

E faufaaraa taraehara te tusia a Iesu. Ma te farii i taua tusia ra, ua patiti Iehova ei auraa parau i te Ture e ta ˈna faainoraa i nia i te pou. No te titau i te reira, e nehenehe Saulo e hiˈo i te “ravea paari a te Atua” te pou haamauiuiraa tei riro ei “turoriraa no te ati Iuda.” (Korinetia 1, 1:18-25; Kolosa 2:14) No reira ˈtura, mai te peu e eita te faaoraraa e noaa mai na roto i te mau ohipa a te ture na roto râ i to te Atua faaohiparaa i to ˈna hamani maitai faito ore i nia i te feia hara mai ia Saulo iho, ua matara roa ïa te reira no te feia i rapaeau i te Ture. E tei te mau Etene to Iesu tonoraa ia Saulo.—Ephesia 3:3-7.

Aita tatou i ite i teihea faito mau i taa ˈi ia Saulo te reira i te taime o to ˈna tauiraa i te faaroo. Ua tia ia Iesu ia paraparau faahou ia ˈna, peneiaˈe hau atu i te hoê taime, no nia i ta ˈna ohipa i te mau nunaa ra. Hau atu â, e rave rahi matahiti tei mairi na mua ˈˈe o Saulo i papai taatoa ˈi i te reira ma te faauruahia e te Atua. (Ohipa 22:17-21; Galatia 1:15-18; 2:1, 2) Teie râ, tau mahana anaˈe tei mairi na mua ˈˈe o Saulo i fanaˈo ai i vetahi atu mau aratairaa no ǒ mai i to ˈna ra Fatu apî.

 Te farereiraa ia Anania

I muri aˈe i te faraa ia Saulo, ua fa atoa Iesu ia Anania, ma te parau atu ia ˈna e: “A haere i te aroâ i parauhia ra, o Titiaifaro, e te utuafare roa o Iuda ra, a ui atu ai i te hoê taata no Tareso, o Saulo te iˈoa, inaha hoi te pure ra oia; e ua ite aˈenei hoi oia i te orama i te hoê taata o Anania te iˈoa i te tomoraa i roto, e te tuuraa i te rima i nia iho ia ˈna, ia ite faahou oia ra.”—Ohipa 9:11, 12.

I te mea e ua ite Anania o vai o Saulo, te taahia ra to ˈna maere i te mau parau a Iesu. Ua na ô oia e: “E te Fatu, e rave rahi aˈenei to ˈu ite i te reira taata, i to ˈna hamani ino rahi i te mau taata no oe i Ierusalema ra. E mana hoi to ˈna i ǒ nei no te mau tahuˈa rarahi ra, ia tapea oia i te mau taata atoa e faahiti i to iˈoa na.” Ua parau râ Iesu ia Anania e: “E haere oe, e farii maitihia hoi oia na ˈu, ei hopoi i tau iˈoa i mua i te aro o te mau Etene ra, e i te hui arii ra, e i te tamarii hoi a Iseraela ra.”—Ohipa 9:13-15.

Ma te tamǎrûhia, haere ihora Anania i te vahi faaearaa ta Iesu i horoa ia ˈna. I to ˈna iteraa e to ˈna aroharaa ia Saulo, ua tuu aˈera Anania i to ˈna rima i nia ia ˈna. “Ua mairi ihora i reira,” ta te aamu ïa e parau ra, “te hoê mea no nia i [to Saulo] mata, mai te poa iˈa ra te huru, e ite faahou atura oia i reira.” I teie nei, ua ineine Saulo i te faaroo. Ua haapapu te mau parau a Anania i te mea ta Saulo paha i taa i roto i te mau parau a Iesu: “Ua haapaohia na oe e te Atua o to tatou hui metua ra ia ite oe i to ˈna hinaaro, e ia hiˈo oe i taua Taata Parau-Tia ra, e ia faaroo hoi oe i te parau i to ˈna vaha. Ei faaite hoi oe na ˈna i te taata atoa i ta oe i hiˈo na, e ta oe i faaroo na. E teie nei, eaha oe i haamaoro ai? a tia, ia bapetizohia oe, e horoi ê atu i ta oe mau hara i te tauraa ˈtu i te iˈoa o te Fatu.” Te faahopearaa? ‘Ua tia aˈera i nia e ua bapetizohia ihora’ o Saulo e ‘ua amu i te maa, e etaeta aˈera.’—Ohipa 9:17-19; 22:12-16

I muri aˈe i te raveraa i ta ˈna ohipa i faauehia, ua moe ê oioi aˈera te taata haapao maitai ra o Anania mai to ˈna ôraa mai i roto i te aamu, e aita oia i faahiti-faahou-hia. Ua faahitimahuta râ Saulo i te mau taata atoa e faaroo ra ia ˈna! Ua haamata te taata hamani ino tahito, o tei haere mai i Damaseko no te haru i te mau pǐpǐ a Iesu, i te poro i roto i te mau sunago e i te faaite e o Iesu te Mesia.—Ohipa 9:20-22.

“Aposetolo a te Etene”

Na te ohipa ta Saulo i farerei i nia i te purumu o Damaseko i tapea i te taata hamani ino eiaha e hamani ino faahou. Ma te ite i te ihotaata o te Mesia, e nehenehe Saulo e faaohipa e rave rahi manaˈo e parau tohu o te mau Papai Hebera i nia ia Iesu. Maoti te taaraa e ua fa mai Iesu ia ˈna e ua ‘roohia mau oia e ana’ e ua tono ia ˈna ei “aposetolo a te Etene,” ua taui roa te oraraa o Saulo. (Philipi 3:12; Roma 11:13) Ei aposetolo Paulo i teie nei, e haamaitairaa e e mana to ˈna tei ohipa eiaha noa i nia i te toea o to ˈna oraraa i te fenua nei oia atoa râ i roto i te aamu Kerisetiano.

Tau matahiti i muri aˈe, a aimârôhia ˈi te tiaraa aposetolo o Paulo, ua paruru oia i to ˈna mana ma te faaite i ta ˈna i farerei i nia i te purumu i Damaseko. “E ere anei au i te aposetolo? . . . Aita anei au i ite i to tatou Fatu ia Iesu Mesia?,” ta ˈna ïa i ui. E i muri aˈe i to ˈna faahitiraa i te mau faraa a Iesu ia vetahi ê, ua parau o Saulo (Paulo) e: “E te hopea ihora, itea atoa ihora ia ˈu, mai te mea e e mahemo vau.” (Korinetia 1, 9:1; 15:8) Mai te huru ra e na roto i ta ˈna orama no nia ia Iesu i roto i te hanahana i nia i te raˈi, ua horoa-oioi-hia ia Saulo i te haamaitairaa e fanau faahou, aore ra e faatia faahou, i te oraraa varua.

Ua faˈi Saulo i ta ˈna haamaitairaa e ua rohi i te amo i te reira. “E iti . . . au i te mau aposetolo atoa ra, e ore hoi au e au ia parauhia e, e aposetolo, no te mea i hamani ino vau i te [amuiraa a] te Atua,” ta ˈna ïa i papai. “Te maitai” râ ta te Atua “i horoahia mai ia ˈu nei, aore ïa i riro ei mea faufaa ore: e ohipa rahi hoi ta ˈu i rave i ta” te tahi atu mau aposetolo “atoa.”—Korinetia 1, 15:9, 10; MN.

Peneiaˈe mai ia Saulo e haamanaˈo outou i te taime i taa ˈi ia outou e no te fanaˈo i te farii maitai a te Atua, ua tia ia outou ia taui i te mau manaˈo faaroo i vai maoro. Aita e feaaraa, ua oaoa roa outou e ua tauturu Iehova ia outou ia taa i te parau mau. I to Saulo iteraa i te maramarama e te taaraa eaha tei titauhia ia ˈna, aita oia i haamarirau i te na reira. E ua rave noa oia i te reira ma te itoito e ma te papu i te toea o to ˈna oraraa i te fenua nei. Auê ïa hiˈoraa maitai roa no te taata atoa e hinaaro ra i te farii maitai a Iehova i teie mahana!

[Nota i raro i te api]

[Hohoˈa i te api 27]

Te aroâ i parauhia na Titiaifaro i Damaseko i teie mahana

[Faaiteraa i te tumu]

Hohoˈa a ROLOC Color Slides