Na mua, ia papu ia oe i teie parau: Te ite ra te Atua i te mauiui e tupu nei na te ao e e ohipa ta ˈna e faaineine ra i te rave. (Salamo 72:13, 14) I roto i ta ˈna Parau, te Bibilia, te fafau ra te Atua i “tei hamani-ino-hia ra, o te ora ïa ta ˈna e tuu mai.” Afea? “Ia fa mai te Fatu ra o Iesu mai te raˈi mai, ma tana mau melahi mana atoa ra . . . i te tuuraa mai i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu Mesia.” (Tesalonia 2, 1:7, 8) E fa mai Iesu i te mahana ta te Bibilia e faaite ra mai “te tamaˈi i taua mahana rahi o te Atua Puai hope,” parau-atoa-hia, Aramagedo.—Apokalupo 16:14, 16.

I tera tamaˈi, eita te Atua e faaohipa i te taata. Ua maiti oia i ta ˈna Tamaiti, Iesu Mesia, oia atoa te tahi atu mau melahi puai no te aro i te feia iino. E faaore te mau nuu o te raˈi i te mau ohipa ino atoa.—Isaia 11:4; Apokalupo 19:11-16.

Tae roa mai i teie mahana, aita te manaˈo o te Atua i te tamaˈi i taui. Ua riro noa te reira ei ravea no te faaore i te mauiui e te ino. Ua haapapu tei tupu i te roaraa o te tau, o te Atua anaˈe te tano ia maiti afea tera tamaˈi e tupu ai e o vai te apiti i tera aroraa. Mai ta tatou i ite aˈenei, ua faaoti aˈena te Atua eaha te tamaˈi o te faaore i  te ino e te faaora i te feia e mauiui ra. Ua maiti atoa o ta ˈna Tamaiti, Iesu Mesia, te tia ˈtu no te tamaˈi. Aita ïa te Atua e turu ra i te mau tamaˈi e tupu ra na te ao nei noa ˈtu eaha te tumu o te reira.

A feruri na i te tahi tamaiti o te taputô e to ˈna taeae, aita râ te metua tane i reira. E faaea raua i te taputô maa taime no te niuniu i te papa. E parau te tahi tamaiti, na to ˈna taeae i haamata. Area te tahi atu, e pahono ïa ua haamauiui to ˈna taeae ia ˈna. Te tiaturi ra toopiti e turu atu te papa. Ua faaroo te metua tane i te faataaraa a te tahi e te tahi. Ua faaue ia faaea i te tamaˈi e ia tiai ia hoˈi atu o ˈna i te fare no te faaafaro i te fifi. E tiai na tamaiti e piti maa taime. Aita râ i maoro, ua taputô faahou. I te taeraa ˈtu te papa, aita oia i mauruuru ia raua toopiti e ua faautua ˈtu no to raua faaroo ore.

I teie mahana, e pinepine te mau nunaa i te ani i te haamaitairaa a te Atua. Aita râ o ˈna e turu ra i te tahi noa ˈˈe nuu tamaˈi. I roto i ta ˈna Parau, te Bibilia, te na ô maitai ra oia:“Eiaha roa te ino e tahoohia i te ino i te taata atoa nei,” e “eiaha outou e tahoo.” (Roma 12:17, 19) Ua faaite atoa e tia i te taata ia “tiai maite atu” ia ohipa o ˈna i Aramagedo. (Salamo 37:7) Ia ore, ua riro ta ratou mau tamaˈi ei patoiraa teoteo e eita roa oia e mauruuru i te reira. I Aramagedo, e faaite te Atua i to ˈna riri e e faaafaro oia i te mau fifi atoa i muri mai i te mau aroraa a te mau nunaa. I muri iho, e “faaore oia i te tamaˈi e tae roa aˈenei i te hopea fenua!” (Salamo 46:9; Isaia 34:2) I te tamaˈi Aramagedo ïa te mau tamaˈi atoa e ore roa ˈi.

E rave rahi atu â haamaitairaa ta te Basileia o te Atua e hopoi mai. Ua faahiti Iesu i tera faatereraa i roto i ta ˈna pure tuiroo a na ô ai: “Ia tae to oe ra basileia. Ia haapaohia to oe hinaaro i te fenua nei mai tei te raˈi atoa na.” (Luka 11:2) Eita noa te Basileia o te Atua e faaore i te mau tamaˈi atoa, i te tumu râ o te reira, te ino. a (Salamo 37:9, 10, 14, 15) Te taahia ra ïa no te aha te mau pǐpǐ a Iesu e tiai ru ai i te mau haamaitairaa a te Basileia o te Atua.—Petero 2, 3:13.

E tiai maoro anei tatou i te taime e faaore ai te Basileia o te Atua i te mauiui, te hamani-ino-raa e te ino? Te tupu ra te mau parau tohu Bibilia. Te faaite ra te reira te ora nei tatou i te “anotau hopea” o te faanahoraa o teie nei ao. (Timoteo 2, 3:1-5) b Fatata roa tera anotau i te hope i te Basileia o te Atua i te tamaˈi Aramagedo.

Mai tei faaitehia ˈtu, e haamouhia te feia i patoi i te “faaroo i te evanelia o to tatou Fatu o Iesu Mesia.” (Tesalonia 2, 1:8) Eita râ te Atua e hinaaro ia pohe noa ˈˈe te hoê noa ˈtu e taata ino. (Ezekiela 33:11) I te mea “aita roa i hinaaro e ia pohe atu te hoê” i te tamaˈi hopea, te ara nei oia ia porohia te parau apî oaoa no nia i to tatou Fatu Iesu Mesia e ati noa ˈˈe te fenua, ia ite te mau nunaa atoa hou te hopea. (Petero 2, 3:8, 9; Mataio 24:14; Timoteo 1, 2:3, 4) Na roto i te ohipa pororaa na te ao a te mau Ite no Iehova, e nehenehe te taata e ite o vai te Atua, e faaroo i te parau apî oaoa no nia ia Iesu e e ite i te mahana e ore roa ˈi te tamaˈi.