Eaha to oe manaˈo? E farii anei te Atua i te tamaˈi? Mai te peu e e, teihea te nuu ta te Atua e turu ra? Ia noaa ia oe te pahonoraa o teie mau uiraa, e taui paha to manaˈo i te tamaˈi, e to huru atoa ïa. A hiˈo na. Mai te peu e ite oe, eita noa te Atua e farii i te tamaˈi, te turu atoa ra râ oia i te nuu ta oe e au ra. Eita anei oe e oaoa, mea papu hoi e upootia ratou. I te tahi aˈe pae, eaha to huru ia ite oe o te nuu enemi ta te Atua e turu ra? Eita anei oe e taui?

Te mea faufaa roa ˈtu â, ia ite oe i te pahonoraa, e taui paha to oe manaˈo no nia i te Atua. Mai te peu tei rotopu oe i na mirioni taata o tei mauiui mau no te mau aroraa, eita e ore e hinaaro oe e ite o te Atua anei to muri mai i te reira. Aore ra mai ta vetahi e manaˈo ra, te farii ra aore ra te turu atoa ra anei o ˈna i te mau tamaˈi? E parau mau anei aita te Atua e tâuˈa ra i te feia e mauiui ra?

E maere paha oe mea taa ê roa ta te Bibilia pahonoraa. Hau atu â, aita to te Atua manaˈo i taui mai tahito mai â e tae roa mai i teie mahana. E hiˈo anaˈe i ta te Bibilia e parau ra no nia i te manaˈo o te Atua i te mau tamaˈi i tahito ra, oia atoa to te senekele matamua a haere mai ai Iesu i te fenua nei. E tauturu mai te reira ia ite i te manaˈo o te Atua i te tamaˈi e e faaorehia anei te reira a muri aˈe.