Ua poiete te Atua i to tatou tino ia nehenehe te reira e rapaau ia ˈna iho. Ia mutu, ia pahure aore ra ia puta te tino o te hoê taata ea maitai, e “faanaho te tino e rave rahi ohipa faahiahia mau no te rapaau i te pepe iti anei aore ra rahi.” (Johns Hopkins Medicine) Oioi te tino i te haa ia faaea te toto i te tahe, ia rapaauhia te pepe e ia paari mai te vaehaa o te tino.

A FERURI NA: Inaha ua poiete te Atua i to tatou tino ia nehenehe te reira e rapaau i te pepe, mea papu e tauturu oia ia tatou ia tamǎrû i to tatou aau, e ere anei? Ua parau te papai salamo: “Ua rapaau oia i te feia aau paruparu ra e ua taamu i to ratou mau puta.” (Salamo 147:3) Te mauiui ra anei oe no te hoê ohipa tei tupu aore ra ta oe e faaruru ra? E nafea ïa oe e papu ai e taamu Iehova i to oe mau puta i teie nei e a muri aˈe?

Ua fafau te Atua: “Eiaha e mǎtaˈu, tei pihai-atoa-iho vau ia oe; eiaha e taiâ, o vau hoi to Atua. E faaetaeta vau ia oe, e tauturu vau ia oe.” (Isaia 41:10) Ia ite te hoê taata e te tâuˈa ra Iehova ia ˈna, eita oia e hepohepo faahou e e fanaˈo oia i te puai no te faaruru e rave rau fifi. Ia au i te aposetolo Paulo, e fanaˈo oia i “te hau o te Atua, tei hau ê i te mau manaˈo atoa.” Ua parau atoa oia: “E puai to ˈu ia faaruru i te mau mea atoa maoti tei horoa mai i te puai.”—Philipi 4:4-7, 9, 13.

Maoti te Bibilia, e puai mai to tatou faaroo i roto i te mau parau fafau a Iehova no te a muri aˈe o te huitaata. Ei hiˈoraa, te faaite ra te Apokalupo 21:4, 5 ia tatou eaha ta ˈna e rave e no te aha e nehenehe tatou e tiaturi e:

• “E tamǎrô oia i te mau roimata atoa” o to te taata mata. E faaore roa Iehova i te mau mauiui e haapeapearaa atoa, noa ˈtu e te haafaufaa ore ra vetahi ê i te reira.

• ‘A parahi ai i nia i te terono’ hanahana i te raˈi, e faaohipa te Arii Mana hope i to ˈna puai e to ˈna mana no te faaore roa i te mauiui e no te horoa mai i te tauturu hinaarohia.

• “E parau papu hoi teie e te parau mau.” Na Iehova e haapapu ra i te reira. O ˈna hoi te Atua mau o te faatupu iho â i ta ˈna mau parau fafau.

“E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito. Parau atura te Atua o te parahi ra i nia i te terono: ‘Inaha, te hamani nei au i te mau mea apî atoa.’ Na ô atoa maira oia: ‘A papai, e parau papu hoi teie e te parau mau.’”—Apokalupo 21:4, 5.

Maoti te ao nui e te Bibilia, e ite tatou i te huru mau e te mau huru maitatai o to tatou Metua i te raˈi. Maoti te mau poieteraa, te ite ra tatou e te hinaaro ra te Atua ia riro tatou ei hoa piri no ˈna. Mea papu atu â teie manaˈo maoti te Bibilia o te na ô ra: “A faafatata ˈtu i te Atua, e e faafatata mai oia ia outou.” (Iakobo 4:8) Te parau ra te Ohipa 17:27: “Aita hoi oia i atea ia tatou tataitahi.”

A rave i te taime no te ite o vai mau â te Atua. E papu atu â ia oe “te tâuˈa mai ra oia ia [oe].” (Petero 1, 5:7) Eaha te mau haamaitairaa ta oe e ite a tiaturi ai ia Iehova?

A hiˈo na ia Toru no te fenua Tapone. Ua paari oia e te hoê metua vahine Kerisetiano. Ua ô râ oia i roto i te pǔpǔ taata ino mau o te mafia Tapone, oia hoi te mau yakuza. Te faatia ra oia: “Ua tiaturi au e ua riri te Atua ia ˈu. No ˈu, a pohe ai te feia atoa ta ˈu i matau, te feia herehia iho â râ, ua hinaaro te Atua e faautua ia ˈu.” Ua farii Toru e ua riro oia “ei taata aroha ore e te ino mau” no te mea ua pee oia i te ohipa e te huru o tera pǔpǔ taata taparahi taata. No te riro ei taata tuiroo, te haamanaˈo ra oia: “Ua hinaaro vau e pohe i to ˈu apîraa i muri aˈe i te haapoheraa i te hoê taata tuiroo aˈe ia ˈu.”

Tera râ, ua haapii oia e ta ˈna vahine, o Hannah, i te Bibilia. Ua taui roa o Toru i to ˈna huru oraraa  e feruriraa. Te parau ra o Hannah: “Ua ite maitai au i te mau tauiraa ta ta ˈu tane i rave.” I teie nei, te parau ra o Toru ma te papu: “Te vai ra te hoê Atua o te tâuˈa mau ra ia tatou taitahi. Aita oia e hinaaro ia pohe hoê noa ˈˈe taata. Te hinaaro ra oia ia faaore roa i te hara o te feia tei tatarahapa ma te aau tae. Te faaroo ra oia i ta tatou e faaite ia ˈna, noa ˈtu e mau parau aita tatou i faaite aˈe i te tahi atu aore ra ta vetahi ê e ore e taa. Fatata Iehova i te faaore roa i te mau fifi, te oto e te mauiui rahi. I teie nei â, te tauturu ra oia ia tatou ma te faaohipa i te mau ravea ta tatou i ore i manaˈo aˈenei. Te tâuˈa mau ra oia ia tatou e te tauturu mai oia ia paruparu tatou.”—Salamo 136:23.

Te faaite ra te hiˈoraa o Toru e mea faufaa ia ite e nehenehe te Atua e faaore i te mau fifi atoa e e tamǎrô i te mau roimata atoa. Fatata roa oia i te na reira. Te haapapu ra te reira e a muri aˈe maitai to tatou e te tauturu mai ra te Atua ia fanaˈo tatou i te hoê oraraa maitai aˈe i teie nei. Oia mau, noa ˈtu ua î roa te fenua i te mauiui, te tâuˈa ra te Atua ia oe ma te here e e faufaahia oe i te reira.