Te titau ra Iehova ia tatou ia faaite ia ˈna i te manaˈo teimaha e haapeapea e e faahoruhoru ra i to tatou aau. (Salamo 55:22) Noa ˈtu eaha to tatou fifi, e nehenehe tatou e pure ia ˈna. Ia haapeapea tatou no te reira, hoê â atoa ïa no Iehova. Mea faufaa roa te pure no te fanaˈo i te hau o te feruriraa.​—Philipi 4:6, 7.

Ia roohia tatou i te maˈi manava, e moˈemoˈe roa paha tatou. Pinepine atoa vetahi ê i te ore e taa ia tatou. (Maseli 14:10) Ia haamahora râ tatou i to tatou aau i te Atua, e faaroo maite o ˈna ia tatou e e taa atoa ia ˈna to tatou mau huru aau, mauiui e te fifi ta tatou e faaruru ra. Te hinaaro nei oia ia faaite pauroa ˈtu tatou i te mea e haapeapea ra ia tatou.—Paraleipomeno 2, 6:29, 30.

Ma te pure ia Iehova, e puai atu â to tatou tiaturi e te tâuˈa mau ra o ˈna ia tatou. Hoê â ïa huru aau to tatou e to te papai Salamo tei pure: “Ua ite hoi oe i to ˈu ati. Ua ite oe i to ˈu ahoaho rahi.” (Salamo 31:7) Ma te ite e te haapeapea ra Iehova no tatou, e tauturu te reira ia tatou ia mau papu i te mau taime fifi. Eita râ o ˈna e haapeapea noa. E taa ia ˈna ta tatou e faaruru ra e e horoa mai oia i te tamahanahanaraa e te faaitoitoraa maoti te Bibilia.