A FERURI NA te ori haere ra outou na te hoê eˈa pouri. Ua topa te mahana. Noa ˈtu râ, aita outou e riaria ra inaha te vai ra ta outou te hoê mori pata mea puai te maramarama. Ia pata outou i te mori i raro, e ite maitai outou eaha to mua mai. E ia pata outou i te mori i mua, e ite atea outou i te eˈa no te puai o te maramarama.

E nehenehe e faaau i teie mori pata i te Bibilia. Mai ta tatou i ite i to na mua ˈtu mau tumu parau, e nehenehe te Parau a te Atua e tauturu mai i mua i te mau fifi o te mau mahana atoa, ta tatou e faaruru nei i roto i teie ao papu ore. Hau atu, te horoa mai ra te Bibilia i te maramarama no nia i te a muri aˈe. E nehenehe ïa tatou e ite e e haere na nia i te hoê eˈa o te aratai ra i te oaoa mure ore e i te mauruuru no te mau mea e vai ra. (Salamo 119:105) E nafea ïa?

E hiˈopoa anaˈe e piti tumu no te aha te Bibilia e horoa ˈi i te hoê tiaturiraa papu no a muri aˈe: 1 Te tauturu mai ra te Bibilia ia ite i te oaoa mau i roto i te oraraa, e 2 te haapii mai ra te reira e nafea ia haamau i te hoê auhoaraa mure ore e to tatou Atua poiete.

Te horoa mai ra te Bibilia i te aˈoraa papu no te faaruru i te mau fifi. E ere noa râ te Bibilia i te hoê buka o te tauturu i te taata. Eita te Bibilia e faaitoito ra ia tiatonu noa tatou i nia i to tatou mau fifi, mai te mea ra e te hiˈo noa ra tatou i te hoê tuhaa o te tahi hohoˈa. Te haapii mai ra râ ia hiˈo i te hohoˈa taatoa, oia hoi ia ite e te vai ra te mau ohipa faufaa aˈe i to tatou mau fifi. I reira e itehia ˈi te auraa mau o te oraraa.

Ei hiˈoraa, teie te tahi aratairaa Bibilia: “E rahi aˈe te oaoa ia horoa ˈtu i te horoahia mai.” (Ohipa 20:35) A feruri na i te taime i tauturu ai outou i te tahi atu i te pae moni. Aore ra i te taime i faaroo maite ai outou i te hoê hoa tei haamahora i to ˈna mau huru aau. Aita anei outou i oaoa a tauturu ai i te tahi atu?

E oaoa rahi roa ˈˈe ta tatou e fanaˈo a horoa ˈi ma te ore e hinaaro ia faahoˈihia mai. Ua tapao te hoê papai buka: “Mai te peu e horoa tatou ma te ore  e hinaaro ia faahoˈihia mai, papu maitai e fanaˈo tatou hau atu â i tei horoahia.” Ia horoa tatou i te feia iho â râ o te ore e nehenehe e faahoˈi mai, papu maitai e fanaˈo tatou i te haamaitairaa. E hiˈo ïa tatou i te hohoˈa taatoa. Oia mau, te ohipa ra tatou e te Atua poiete. Te faariro nei te Atua i te ohipa maitai tataitahi ravehia i nia ia vetahi ê ei tarahu na ˈna. (Maseli 19:17) Te haafaufaa rahi nei oia i ta tatou e rave ra no te feia riirii. Te fafau ra oia e faahoˈi oia i te reira maoti te ora mure ore i nia i te fenua faarirohia ei paradaiso. E a muri aˈe faahiahia mau, e ere anei?—Salamo 37:29; Luka 14:12-14. a

Hau atu, te haapii mai ra te Bibilia eaha mau ra te fa o te oraraa a haamori ai tatou i te Atua mau ra o Iehova. Te faaitoito ra te Bibilia ia arue, ia faahanahana e ia faaroo ia ˈna mai tei titauhia. (Koheleta 12:13; Apokalupo 4:11) A na reira ˈi, te rave ra tatou i te hoê ohipa faahiahia mau: te faaoaoa ra tatou i to tatou Atua poiete. Te faaitoito hoi oia ia tatou: “Ia paari hoi oe, ia oaoa tau aau.” (Maseli 27:11) A feruri na: ia rave tatou i te faaotiraa î i te paari niuhia i nia i te mau aratairaa Bibilia, te faaoaoa nei tatou i te aau o to tatou Metua here i te raˈi. No te aha? No te mea te haapao ra oia ia tatou e te hinaaro nei oia ia oaoa tatou ma te pee i ta ˈna aratairaa. (Isaia 48:17, 18) Aita ˈtu â fa oaoa roa ˈˈe ta tatou e haamau maori râ te haamoriraa i te Arii hau ê e te oraraa no te faaoaoa i to ˈna aau.

Te haapii atoa mai ra te Bibilia ia haamau i te hoê auhoaraa e to tatou Atua poiete. Te na ô ra te Bibilia: “A faafatata ˈtu i te Atua, e e faafatata mai oia ia outou.” (Iakobo 4:8) I te tahi mau taime, e ui paha tatou e nehenehe iho â anei tatou e riro ei hoa no te Atua poiete Mana hope. Te haapapu nei râ te Bibilia e “ia imi” tatou i te Atua, e ite iho â tatou ia ˈna, “aita hoi oia i atea ia tatou tataitahi.” (Ohipa 17:27) Mea faufaa no to tatou a muri aˈe ia pee i te aˈoraa Bibilia ia riro ei hoa no te Atua. E nafea ïa tatou?

A feruri na: noa ˈtu ta tatou e rave, aita hoê aˈe o tatou e nehenehe e ape i te enemi hopea, oia hoi te pohe. (Korinetia 1, 15:26) Tera râ, mea mure ore te Atua. Eita roa ˈtu oia e pohe e te hinaaro ra oia ia ora to ˈna mau hoa e a muri noa ˈtu. Na roto i teie mau parau nehenehe mau itehia i roto i te Salamo 22:26, te faataa ra te Bibilia eaha ta Iehova e hinaaro ra no te feia o te imi ra ia ˈna: ia oaoa ratou e a muri noa ˈtu.

E nafea ia haamau i te hoê auhoaraa mure ore e te Atua? A tamau i te haapii no nia ia ˈna maoti ta ˈna Parau, te Bibilia. (Ioane 17:3; Timoteo 2, 3:16) A ani i ta ˈna tauturu no te taa i te Bibilia. Te haapapu ra te Bibilia e ‘ia tamau tatou i te ani atu i te Atua’ i te paari, e horoa mai oia i te reira. b (Iakobo 1:5) I te pae hopea, a tutava i te faaohipa i ta outou i haapii mai. Ia riro te Parau a te Atua ei “lamepa . . . i to [outou] nei avae” e ei “tiarama no to [outou] nei mau eˈa.”—Salamo 119:105.